სალომე ტეტიაშვილი შეყვარებულს დაშორდა: ''დაკეცილი დანა მესროლეს თავში''...

მას შემდეგ რაც სალომე ტეტიაშვილი ინტერნეტლიდერი გახდა და უკვე ტელეგადაცემებსა და შოუებში მიიწვიეს, საზოგადოება მისი პირადი ცხოვრებით დაინტერესდა. ხელმოკლე ოჯახში, უმამოდ გაზრდილ გოგონას, უამრავი თაყვანისმცემელი გამოუჩნდა. სალომემ ცოტა ხნის წინ ''რეიტინგისთვის'' მიცემულ ინტერვიუში ამ თემაზე დასმულ კითხვას ასე უპასუხა, - ''შეყვარებული ვარ, ყველაფერი მეგობრობით დაიწყო. ათი თვეა რაც ერთად ვართ. ჩემი რჩეული ბიზნესადმინისტრირებაზე სწავლობს. არ მღერის''.

ამ ინტერვიუს შემდეგ რამდენიმე დღეში გავრცელდა ინფორმაცია, რომ სალომე შეყვარებულს დაშორდა. მომღერალს სოციალურ ქსელში დავუკავშირდით და ამ თემაზე კომენტარი ვთხოვეთ.

- სალომე, ''რეიტინგთან'' ინტერვიუში შენს შეყვარებულზე საუბრობდი. ცოტა ხნის წინ გავრცელდა ინფორმაცია, რომ დაშორდით. მართალია?
- მართალია.
- შეიძლება მიზეზი გკითხო?
- კი, როგორ არა. ზოგჯერ ხდება, რომ ადამიანები ერთმანეთს ვეღარ უგებენ. ჩვენს შემთხვევაშიც ასე მოხდა. ვერ შევეწყეთ ერთმანეთს, ჩვენი ინტერესები აღარ ემთხვეოდა. ამიტომაც გადავწყვიტეთ ასე. ცივილურად, ადამიანურად ვისაუბრეთ ყველაფერზე და ერთმანეთის გავიგეთ.
- ვიცი, რომ საერთო სამეგობრო წრე გაქვთ. არ გიჭირთ მასთან მეგობრის ამპლუაში ყოფნა?
- ცოტათი მიჭირს, რა თქმა უნდა, ცუდი შეგრძნებაა, მაგრამ ყველაფერი ხდება და როგორი მეგობრობითაც დაიწყო ჩვენი ურთიერთობა, ისევე გაგრძელდება. ამაში ორივე ერთმანეთს ვუწყობთ ხელს.
- მაშინ არ გაგვიმხილე შენი რჩეულის ვინაობა, ახლა ხომ არ გაგვიმხელ?
- არა, თავად არ სურს და არ მინდა ვაწყენინო.
- სალომე, ის ინციდენტი, სააგენტოები რომ წერდნენ, დანით დაჭრესო, როგორ დამთავრდა, ვინ იყო ის ადამიანი ხომ არ გაარკვიე?
- არავის დავუჭრივარ. თავი გამიტეხეს, დაკეცილი დანა მესროლეს თავში. ეს ინფორმაცია სააგენტოებმა ათასნაირი ინტერპრეტაციით გამოაქვეყნეს. ნამდვილად არ ვიცი ვინ იყო. საბედნიეროდ საგანგაშო არაფერი ყოფილა. მსუბუქი დაზიანება მქონდა.
- მას მერე კიდევ ხომ არავის შეუშინებიხარ? ხომ არ გეშინია ღამით გარეთ გასვლა?
- შეშინებით არავის, მაგრამ ვცდილობ მარტომ არ ვიარო, მითუმეტეს ღამით.

ნინო მჭედლიშვილი
რეიტინგი