ეკა კვალიაშვილი პატარა ლუკას ბებია გახდა

11 თებერვალს მომღერალი ეკა კვალიაშვილი ბებია გახდა. მის ქალიშვილს, მომღერალ ნუკა კვალიაშვილს, ბიჭი ეყოლა. ახალშობილს ლუკა დაარქვეს. როგორც ოჯახისგან შევიტყვეთ, ის 3 კილოგრამსა და 600 გრამს იწონის. ახალბედა ბებიამ გვითხრა, დედა–შვილი თავს კარგად გრძნობენ, უკვე სახლში არიან და შვილის მოვლაში ნუკა ძალიან აქტიურობს.
– პატარა ლუკა 11 თებერვალს, საღამოს დაიბადა. ყველაფერმა კარგად ჩაიარა, მადლობა ღმერთს, ფიზიოლოგიურად იმშობიარა. ნუკას მშობიარობა რომ დაეწყო, მეც და მისი ქმარი ნიკუშაც, პირველივე წამიდან მის გვერდით ვიყავით, მშობიარობასაც დავესწარით. ლუკა როგორც კი დაიბადა, მაშინვე ნუკას დაუწვინეს გულზე, ძალიან ბედნიერი იყო, – გვიამბობს ბედნიერი ბებია ეკა.
– ახალგაზრდა ასაკში ბებიად გახდომა რა ემოციაა?
– ბებია რომ უნდა გავმხდარიყავი, ამ აზრს რამდენიმე თვეა შევეგუე. ბებიობა ჩემთვის, იცით, რას ნიშნავს? პატარა ლუკა ჩემი სისხლი და ხორცია, ამ შემთხვევაში ჩემთვის უკვე სულ ერთია ბებია მერქმევა თუ დედა, ლუკა მუცლადყოფნიდან სიგიჟემდე მიყვარს! რომ დავინახე, უფრო შემიყვარდა და როცა შევეხე, ხომ საერთოდ! ძალიან კარგი ბიჭია, დედასაც ჰგავს და მამასაც.
– ახალბედა მშობლები და ბავშვი სად არიან, თქვენთან თუ ნიკას სახლში?
– ნუკა ხან ჩემთან არის და ხან თავის სახლში. ლუკას თავისი კუთხე ჩემს სახლშიც მოვუწყვე. ძირითადად ნუკა უვლის, მე საჭიროებისამებრ ვეხმარები. უმჯობესია, დედას უფრო ხშირი კონტაქტი ჰქონდეს მასთან, რადგან თოთოა და დედის აურას, სუნსაა მიჩვეული. ხელში აყვანით არ ვანებივრებ, მაგრამ ნუკას და ნიკას სულ უნდათ, რომ ხელში ეჭიროთ.
...
"სარკე" ულოცავს ახალბედა მშობლებს შვილის შეძენას და ბედნიერ მომავალს უსურვებს.

სოფიო ბოჭორიძე, ჟურნალი სარკე