როგორ ემზადება მარიკო ებრალიძე „ევროვიზიისთვის“

ყოველთვის ინტერესისა და პოლემიკის საგანი ხდება, ვინ წარადგენს „ევროვიზიაზე“ საქართველოს და რამდენად კარგი სიმღერა შეირჩა. არც წლევან-დელი წელია გამონაკლისი. ბევრი სკეპტიკურად შეხვდა მარიკო ებრალიძისა და ჯგუფ „შინის“ ტანდემს. თუმცა ბევრი იმასაც ფიქრობს, რომ საქართველო კვლავ ღირსეულად წარდგება მილიონიანი მსმენელის წინაშე. მარიკო ებრალიძემ და ჯგუფმა „შინმა“ გერმანიაში უკვე ჩაწერეს სიმღერა, რომელსაც „ევროვიზიაზე“ შეასრულებენ. „სამი წუთი დედამიწამდე“, ასე ჰქვია სიმღერას, რომლითაც ქართველი მუსიკოსები შეეცდებიან, ევროპას კიდევ ერთხელ გააცნონ საქართველო.
კონკურსისთვის მზადების დეტალების გასაგებად მარიკო ებრალიძესა და „ევროვიზიის“ პროდიუსერ ნათია უზნაძეს ვესაუბრეთ.

- მარიკო, როგორც ვიცი, თავიდან ძალიან ემოციურად შეხვდი, რომ „ევროვიზიაზე“ უნდა წარგედგინა საქართველო. ახლა როგორ გრძნობ თავს, პირველი ეიფორიის გასვლის შემდეგ?
- ვიტყოდი, რომ ჩემი რეაქცია თავიდან არაადეკვატური იყო. ახლა კონკურ-სისთვის რომ ვემზადებით, ყველა მოვლენას თავისი ემოცია ახლავს. ყველა ნაბიჯზე ახალი ეიფორია მოდის. ეს ყველაფერი დიდ სტიმულს მაძლევს იმისთვის, რომ საქმეს, რომელსაც შევეჭიდე, დიდი პასუხისმგებლობით მოვეკიდო.
- ნათია, რატომ გადაწყდა, რომ წელს საქართველოს „შინი“ და მარიკო ებრალიძე წარადგენდნენ „ევროვიზიაზე“?
- ამ გადაწყვეტილებაზე ბევრი ვიფიქრეთ. გვინდოდა, ყოფილიყო ორიგი-ნალური სიმღერა ქართული მოტივებით. პირველი შემთხვევაა, როდესაც საქართველოს ასეთი ტანდემი წარადგენს. მარიკოს და „შინს“ ერთად არასდროს უმუშავიათ. მინდა აღვნიშნო, რომ მარიკოს გარდა, ბევრი სხვა კანდიდატურა განიხილებოდა, მაგრამ აქვე იმასაც ვიტყვი, რომ მის კანდიდატურას მთელმა საპროდიუსერო ჯგუფმა დაუჭირა მხარი. ჩემი აზრით, ძალიან კარგი გადაწყვეტილება მივიღეთ. ეს იქნება მათი პირველი ერთობლივი ნამუშევარი. ისინი უკვე ძალიან კარგად ასრულებენ დაკისრებულ მოვალეობას. ძალიან მონდომებულები არიან და მგონია, რომ კარგ შედეგს მივიღებთ.
- რაზე იმღერებთ?
მარიკო:
- ძალიან მასშტაბული სიმღერაა. სიმღერაში არის ნებისმიერი თაობის ფიქრები, ნებისმიერი თაობის გემოვნებაა გათვალისწინებული. შეიძლება, ეს სიმღერა მოასმენინო თოთო ბავშვსაც და მოხუცებულსაც. მგონია, რომ ყველა იპოვის ამ სიმღერაში თავის პატარა ნავსაყუდელს. ყველა გაიგებს იმ ქართულ ამოძახილს, რომელიც შექმნა არაჩვეულებრივმა ჯგუფმა „შინმა“. ზაზა მიმინოშვილმა დაწერა სიმღერა და არანჟირება მთლიანმა „შინმა“ გააკეთა.
- სიმღერა ინგლისურენოვანია?
ნათია:
- ინგლისურენოვანიცაა და ქართულიც, ნაზავია. სიმღერის პრემიერა თხუთმეტ მარტს შედგება. მისი სახელწოდებაა „სამი წუთი დედამიწამდე“. ასეთი სახელწო-დება იმიტომ შევარჩიეთ, რომ „ევროვიზიაზე“ არის სტანდარტი, არ შეიძლება, სიმღერა სამ წუთზე მეტხანს გაგრძელდეს.
მარიკო:
- სამწუთიან სიმღერაში ყველაფერია ჩატეული. ყოველი მოსმენის შემდეგ გაოგ-ნებული ვრჩები და ვერ ვხვდები, როგორ მოახერხა ეს ბატონმა ზაზამ. სამი წუთი ხომ ძალიან ცოტაა იმისთვის, რომ ბევრ რამეს მოჰყვე. მაგრამ „შინის“ წევრები ძალიან მაგრები და მრავალფეროვნები არიან და იმიტომაც გამოსდით ასეთი მუსიკა.
- რას ეტყოდით იმ ადამიანებს, რომლებიც ფიქრობენ, რომ არ შეიძლება მარიკო ებრალიძის და „შინის“ ტანდემი იყოს „ევროვიზიის“ ფორმატი.
ნათია:
- სულ ვსვამ კითხვას, მითხრან, რა არის „ევროვიზიის“ ფორმატი.
მარიკო:
- ასეთი ნათქვამის შემდეგ სულ მიჩნდება სურვილი, „ევროვიზიაზე“ ყველაფერი გავაკეთოთ იმისთვის, რომ სკეპტიკოსებს აზრი რადიკალურად შევაცვლევინოთ და ვათქმევინოთ, უი, მგონი, ვცდებოდითო.
ნათია:
- „ევროვიზიას“ ფორმატი არ აქვს. ესაა კონკურსი, რომელსაც ჰყავს სამასი მილიონი მაყურებელი და ვერასდროს იწინასწარმეტყველებ, რა მოხდება. მხოლოდ ერთადერთხელ იყო ყველაფერი წინასწარ ნათელი, როდესაც შვედეთმა გაიმარჯვა. ლორენი თავიდანვე ფავორიტი იყო. ყველამ ვიცოდით, რომ შვედეთი გაიმარჯვებდა. მისი სიმღერა „ეიფორია“ დღემდე ჩარტებში ლიდერია. ყველას ვთხოვ, ხომ შეიძლება, ერთხელ მაინც დავივიწყოთ კრიტიკა, გავერთიანდეთ. შემოგვიერთდით და ერთად ვუგულშემატკივროთ საქართველოს.
- რამდენიმე წელია, შიდაშესარჩევი ტური საქართველოში აღარ ტარდე-ბა. ამას წინათ ანრი ჯოხაძემ აღნიშნა, მომღერლების შერჩევა ასე ჯობია, მანამდე მაინც ყველამ ყველაფერი იცისო.
- ტარდებოდა კონკურსი და არავინ იცოდა, ვინ გაიმარჯვებდა.
- ანრიმ თქვა, რომ წინასწარ იცოდა.
- ასე თქვა ანრიმ და ამაზე კომენტარს ვერ გავაკეთებ. თავის მართლება არ მინდა. ტარდება კონკურსი, არის ჟიური, შემოდის ესემესები და გამარჯვებული ვლინდება. „ევროვიზიის“ მონაწილე ყველა მომღერალმა იცის, საპროდიუსერო ჯგუფი რას აკეთებს თითოეული მონაწილისთვის და წლების შემდეგ ამ თემაზე საუბარი მიზანშეწონილი არ არის.
- ამბობენ, რა საჭიროა კონკურსში მონაწილეობა, სადაც შედეგს წინასწარ ვერ გათვლი და რომელიც ძალიან პოლიტიკურია. მეზობელი ქვეყნები ყოველთვის ერთმანეთს უმესიჯებენ და წარუმატებლობის შემთხვევაში ძალიან კარგ მომღერალს შეიძლება, გული დასწყდეს. გარდა ამისა, მონაწილეობისთვის დიდი თანხები იხარჯება...
- თქვენი აზრით, „ევროვიზია“ პოპულარული რომ არ იყოს, ორმოცდამე-ცხრამეტედ გაიმართებოდა? ყველა ევროპული ქვეყანა მიისწრაფვის იმისკენ, რომ მონაწილეობა მიიღოს ამ კონკურსში. ესაა კონკურსი, სადაც ქვეყნის პოპულარიზაცია და რეკლამა ხდება სამ წუთში. ოლიმპიადის შემდეგ ეს ერთადერთი კონკურსია, რომელსაც ამდენი მაყურებელი ჰყავს. საბოლოოდ მაინც ყველა უყურებს მთელ მსოფლიოში. რამდენიმე წელია, ამერიკას სურს მიიღოს მონაწილეობა, მაგრამ ასე თუ მოხდა, მაშინ კონკურსს სახელწოდება უნდა შეეცვალოს. ქართველ მონაწილეებს ძალიან კომპეტენტური ჟიურისგან ყოველთვის მაღალი შეფასებები აქვთ. უბრალოდ, მერე ყველაფერი ესემესებზეა დამოკიდებული. ამიტომ ყველა უცხოეთში მცხოვრებს ვთხოვ, დაუმესიჯონ სა-ქართველოს. თითოეული ესემესი ჩვენთვის ძალიან მნიშვნელოვანია. სიტყვებით ვერ გადმოგცემთ, რამდენად მნიშვნელოვანია, როდესაც ელოდები ქულების გამოცხადებას. არასდროს დამავიწყდება შარშანდელი ხმის მიცემის პროცედურა. როდესაც კონკურსამდე ნახევარი საათით ადრე პრესამ დაგვაჯილდოვა, როგორც საუკეთესო დუეტი და ხმის მიცემა რომ დაიწყო, ხმები არ გვქონდა. მერე რამდენიმე თვის განმავლობაში ყურში ჩამესმოდა სოფო გელოვანის ხმა, რომელიც მეკითხებოდა, ნათია, რა ხდებაო.
მარიკო:
- ამიტომ ვთხოვ ევროპაში მცხოვრებლებს, ერთი ზარით მაინც დაგვეხმარონ.
- ნათია, შიდაშესარჩევი ტური აღარ გაიმართება?
- წინასწარ არ ვიცით. მთავარია, წლევანდელი გამოცდა კარგად ჩავაბაროთ.
- როგორი იყო ჯგუფ „შინის“ რეაქცია თქვენს შეთავაზებაზე?
- მათთვისაც მოულოდნელი იყო. ტელეფონით ვესაუბრე და მითხრეს, ყველა-ფრის გასაანალიზებლად დრო მოგვეცითო. ნახევარ საათში დამირეკეს და მითხრეს, რომ თანახმა იყვნენ. მინდა, ძალიან დიდი მადლობა ვუთხრა ჯგუფ „შინს“, რომელიც დაგვთანხმდა მონაწილეობაზე და მარიკო ებრალიძეს, რომელიც მართლა თავდაუზოგავად შრომობს. თებერვალში გამოვაცხადეთ, რომ წავიდოდა კონკურსზე და იმ პერიოდიდან მარიკოსგან სიტყვა არა ან არ შემიძლია, არ გამიგია.
- მარიკო, „შინთან“ ერთად მუშაობისას რაიმე სირთულე შეგხვდა?
- ღმერთის წყალობით, ბენდთან მუშაობის გამოცდილება მაქვს. მერიის მუნი-ციპალიტეტის ბენდის სოლისტი ვარ და ეს გამოცდილება „შინთან“ მუშაობაში ძალიან მეხმარება.
- კონკურსზე რამეს გათვლა ძალიან ძნელია, როგორი წინათგრძნობა გაქვს?
- მინდა, რომ მოვიგოთ. დანიაში მოსაგებად მივდივარ. მონაწილეობას რომ მივიღებთ, ეს უკვე წარმატებაა. ჩვენ ისედაც კარგები ვართ, მაგრამ „ევროვიზიაზეც“ მივიღოთ მონაწილეობა, რა პრობლემაა? რატომაა ისეთი დამოკიდებულება, მაინც ვერ ვიმარჯვებთ და რატომ მივდივართო, ვერ ვხვდები. მთავარია, შენს ქვეყანას როგორ წარადგენ. მეშვიდე წელია, საქართველო ამ კონკურსში მონაწილეობს და ვერც ერთ შემთხვევაში ვერ ვიტყვით, რომ ხმა არ ჰქონდა ვინმეს, ან ცუდი ნომერი ჰქონდა. ყველა ღირსეული მონაწილე იყო.
ნათია:
- მარიკოს და ჯგუფ „შინს“ ორი დაუვიწყარი კვირა ელოდება. ვამბობ ხოლმე, რომ ყველა მომღერალმა უნდა განიცადოს ის, რაც „ევროვიზიის“ კულისებში ხდება. კონკურსიდან დაბრუნებული ყველა მომღერალი მოწამლულია ამ კონკურსით. თავს მილიონი ადამიანი გევლება და შენს განწყობაზე ზრუნავენ.
მარიკო:
- სოფომ და ნოდიკომ მოლოცვის შემდეგ პირველად მითხრეს, პასუხისმგე-ბლობაზე არ ინერვიულო, დატკბი იმ ყველაფრით, რაც ამ კონკურსზე დაგხვდება და დადებითი ემოციით დაიმუხტეო.
ნათია:
- მინდა აღვნიშნო, რომ უკვე გადაწყდა და ხუთ და ექვს მარტს გადავიღებთ ვიდეოკლიპს. მარიკოს და „შინის“ კლიპს ბასა და თამრიკო ფოცხიშვილები გადაიღებენ. დარწმუნებული ვარ, ისევე, როგორც ბასას ყველა კლიპი, ესეც ძალიან კარგი გამოვა. თხუთმეტ მარტს ვიდეორგოლის პრეზენტაცია გაიმართება. დანიიდან ჩამოვა გადამღები ჯგუფი, რომელიც ქვეყნის საიმიჯო ვიდეორგოლს გადაიღებს. წლევანდელი ვიდეორგოლის თემაა ქვეყნის დროშა. სხვა დეტალებს ვერ გავამხელთ, მხოლოდ იმას ვიტყვი, რომ საიმიჯო ვიდეორგოლს ყვარელში გადავიღებთ.
- სასცენო კოსტიუმებზე ვინ იზრუნებს?
- დათუნა სულიკაშვილი და ავთანდილი.
- როგორც მივხვდი, წელს „ევროვიზიაზე“ წარსადგენ სიმღერაზე მთლიანად ქართველები იმუშავებენ.
- მხოლოდ ტექსტის ავტორი გვყავს უცხოელი. სიმღერის ტექსტი დაგვიწერა წარმოშობით რუმინელმა, რომელიც გერმანიაში მოღვაწეობს და „შინის“ მეგობარია.
- მარიკოს იმიჯში რამე შეიცვლება?
- სულ ვხუმრობ ხოლმე, რომ მარიკოს თმას ვპარსავთ. ყველაფერს საბოლოოდ ალბათ დიზაინერები გადაწყვეტენ, ყოველ შემთხვევაში, თმა ექნება.
- მარიკო, როგორც ვიცი, დიეტაზე ხარ და გინდა, კონკურსამდე კიდევ რამდენიმე კილოგრამი დაიკლო.
- მთელი ცხოვრება დიეტაზე ვარ, ამიტომ ვერ გეტყვით, სპეციალურად „ევრო-ვიზიისთვის“ დავჯექი-მეთქი დიეტაზე.
ნათია:
- ახლა მარიკოს „ევროვიზიის“ დიეტა დაეწყო, რომელიც მერწმუნეთ, ყველაზე ეფექტურია.

მერი კობიაშვილი
ჟურნალი „რეიტინგი“