რა პირობა დადო ქმართან, გიგი ოქროპირიძესთან, თამუნა ლეკვეიშვილმა

"კომედი გრუპის" მსახიობ თამუნა ლეკვეიშვილისა და მუსიკოს გიგი ოქროპირიძის ოჯახურ ცხოვრებაში იუმორი ძალზე პოპულარულია. ცოლ–ქმარი ერთმანეთთან კარგად არიან შეხუმრებული და მხიარულად, დაუძაბავად ზრდიან უკვე სამ შვილს – 3 წლის ნინის, 2 წლის ნიკოლოზს და ახალშეძენილ, 3 თვის ელენეს. თამუნას და გიგის სახლის გარეთაც საერთო საქმე აერთიანებთ – პროფესიით ორივე მუსიკოსია, ერთად სიმღერებს წერენ და წინ კიდევ ბევრი გეგმა აქვთ, საიდანაც ზოგ–ზოგი რამ "სარკესაც" გაუზიარეს.
– თამუნა, სამსახურს და სამ შვილს ერთდროულად ვერ აუხვალთ. ვინ გეხმარებათ?
თამუნა: ბავშვების გაზრდაში დედა და ძიძა მეხმარებიან, მარტო ალბათ ძალიან გამიჭირდებოდა. მანამ, სანამ ელენე ცოტა წამოიზრდება, დედაჩემთანაა. ელენე ჯერ ძალიან პატარაა, მამა მასთან ნაკლებად ურთიერთობს. გიგის როცა დრო აქვს, ნინი და ნიკოლოზი სასეირნოდ აუცილებლად დაჰყავს.
გიგი: ელენე ავად გვყავდა, ვირუსი შეხვდა და პირბადის გარეშე მის ოთახში დღემდე არ შევდივართ.
თამუნა: ელენე იზოლირებულ ოთახშია, იქ შესვლას ყველა ვერიდებით, პატარასთან დედაჩემია მიმაგრებული, რომელიც პირბადით დადის. დღეს კი თქვენი ჟურნალისთვის "გამოვამზეურეთ".
გიგი: როცა დრო მაქვს, ყოველთვის ვცდილობ, ნინისთან და ნიკოლოზთან ერთად ვიყო, ხან ბაღში მიმყავს, ხან ვასეირნებ, ხან კისერზე ვისვამ და ხანაც ხელში მიჭირავს. ელენე კი ხელში იშვიათად ამყავს, რადგან ძალიან პატარაა.
– როგორი ბავშვები გყავთ, რა მიდრეკილებებს ამჟღავნებენ?
თამუნა: ნინი მალე 4 წლის გახდება, ძალიან ჭკვიანია. ხატვა უყვარს. შეუძლია მთელი დღის განმავლობაში იჯდეს და მშვიდად ხატოს, თავის ასაკთან შედარებით კარგად გამოსდის. გიგის მამიდა მხატვარია და ალბათ გენში აქვს. საბავშვო ბაღში სულ ათიანებს უწერენ ხატვაში. ეკრანზე რომ დამინახავს, შემომხედავს და იტყვის: "ერთი დედა, მეორე დედა".
გიგი რომ ბრუნდება, ნინის უკვე სძინავს და მამა კანფეტს საწოლთან უდებს. რომ შეეკითხოთ, რომელი უფრო ვუყვარვართ, დედას გოგო ვარო, გიპასუხებთ, მაგრამ მამა უფრო მეტად უყვარს. ჩვენი პატარა მალე 3 თვის გახდება. ძალიან ჭკვიანი გოგოა, ტირილი არ უყვარს, კარგად ჭამს, არ გვაბრაზებს.
გიგი: ნიკოლოზი ძალიან ცელქია, ყველაფრის დამტვრევა უყვარს. ამაში ვის ჰგავს, არ ვიცი.
თამუნა: ვის ჰგავს, არ იცი? ახლა ნუ იტყუები! შენ გგავს!
გიგი: ბავშვობაში მეც ასეთი ვყოფილვარ. მეც ვამტვრევდი სათამაშოებს, მაინტერესებდა, შიგნით რა ხდებოდა. ალბათ ამ ასაკში ყველა ბიჭი ასე იქცევა.
– თავისუფალ დროს ცოლ–ქმარი შვილებთან ერთად სეირნობთ, ქალაქგარეთ გადიხართ?
გიგი: კი, როგორ არა! ჩემი თვითმფრინავით პარიზში მივფრინავთ ხოლმე.
თამუნა: კარგი რა, ამაზე ნუ ხუმრობ! იმდენი ფული როდის გექნება, რომ ბავშვებთან ერთად პარიზის "დისნეი ლენდში" წავიდეთ, ოღონდ ბანკის სესხებით – არა.
გიგი: როცა მექნება, აუცილებლად წავალთ!
– გიგი, რას იტყვით, სამი შვილის გაჩენა–გაზრდაში სიძნელე უფრო მეტია თუ სიხარული?
გიგი: ჩინელებს კარგი გამონათქვამი აქვთ, მდინარე რომ დიდდება, კალაპოტს თავისით პოულობსო. მეორეს და მესამეს ვერ გავაჩენ, ამდენს რა მოუვლისო, რომ ამბობენ, ასე არ არის. თამუნა ძალიან მზრუნველია, მრავალშვილიან დედობას თავი კარგად გაართვა. ყველას ვურჩევდი, რომ შვილების გაჩენისგან თავი არ შეიკავონ. ეს ჩემი მეგობრული რჩევაა იმ ადამიანების მიმართ, ვისაც ერთი ან ორი შვილი ჰყავთ. ბევრი შვილის ყოლა დიდი სიამოვნებაა. ზოგს თვეში 12 ლარი აქვს შემოსავალი და 12 შვილი ჰყავს.
თამუნა: მე და გიგიმ გადავწყვიტეთ, რომ სამ შვილზე გავჩერდებით.
გიგი: კი, ამაზე ნამდვილად შევთანხმდით.
– თამუნა როგორ შეცვალა სამი შვილის დედობამ?
გიგი: თამუნას ვერანაირ ცვლილებას ვერ ვამჩნევ, უბრალოდ სამი შვილის დედაა და ცოტა დამძიმდა.
თამუნა: ეს "დამძიმება" დროებითია. გიგის პირობას ვაძლევ, რომ ცოტა ხანში ისევ "დავმსუბუქდები". ამ ეტაპზე ზედმეტ წონას მსუბუქად ვებრძვი, ჰემოგლობინი მაქვს დაბალი და ისეთ მომაკვდინებელ დიეტას, როგორსაც ვიცავდი ხოლმე, ვერიდები. უბრალოდ ვცდილობ, ღამით არ ვჭამო. რამდენიმე დღის წინ კარტოფილისა და ყველის ხინკალი შემომეჭამა, ოღონდ – ორი ცალი. გიგი ჭამდა და მეც მომინდა.
გიგი: ეს ჩემი ბრალია, რადგან სახლში გვიან მიწევს დაბრუნება და ვახშამიც მიგვიანდება. ასე რომ, იმ ორ ხინკალს ჩემს თავზე ვიღებ.
– გიგი, კლასიკურ მუსიკას ჩამოშორდით?

გიგი: არა, მაგრამ მაინც გამოდის, რომ ბიზნესს მივყავი ხელი. კლასიკური მუსიკა საქართველოში არცთუ ისე დაფასებულია და, როცა მუშაობა დავიწყე, პროფესიის გადასხვაფერება მომიწია, სხვა ჟანრში წავედი. პატარა ბარი "აურა" გავაკეთე, სადაც ნიჭიერ მუსიკოსებს საშუალება აქვთ, მოვიდნენ, დაუკრან და ისიამოვნონ იმით, რომ მღერიან და არა იმით, რომ აიღონ 20 ლარით მეტი, ვიდრე სხვა ბარში იღებენ. ჩემს განვლილ გზაზე ბევრ შეცდომას გადავაწყდი, ამიტომ სხვა მუსიკოსებს ყველანაირად ვუწყობ ხელს, რომ იგივე მათაც არ დაემართოთ.
– რა მიგაჩნიათ თქვენს შეცდომად?
გიგი: როგორ შეიძლება ადამიანი სახელმწიფო სიმფონიურ ორკესტრში უკრავდეს და ხელფასი 500 ლარი ჰქონდეს?! ეს სახელმწიფოს პრობლემაა. როგორ შეიძლება მომღერალი კონცერტზე გამოიყვანო და ჰონორარი არ გადაუხადო?! შეცდომად მიმაჩნია ისიც, რომ მომღერალი, რომელიც "საქართველოს ვარსკვლავი" გახდება, პროექტის მერე დაიკარგოს. ლიანა ისაკაძის კამერულ ორკესტრში ვუკრავდი და ხელფასი 120 ლარი მქონდა. სახელმწიფო ორკესტრზე მაქვს საუბარი!
კლასიკის ჟანრში ფინანსურად კატასტროფა კი არა, უარესი საშინელება ხდება. ამ სფეროში უამრავი ნიჭიერი მუსიკოსი და დირიჟორი გვყავს, დაფინანსება კი არ არსებობს. დაფინანსება მოთხოვნიდან გამომდინარეობს, კლასიკური მუსიკის მოთხოვნის კულტურა კი ძალიან დაბალია. თავისი ბიუჯეტით ლა სკალაც კი ვერ ინახავს საკუთარ თავს, სახელმწიფო ეხმარება. ქვეყანამ კეთილი უნდა ინებოს და სიმფონიური ორკესტრი შეინახოს.
ჩემი ბარი მაქვს, მალე მეორესაც გავხსნი და მესამეზეც მიდის უკვე საუბარი. ამას მხოლოდ შემოსავლის გამო არ ვაკეთებ. რასაც ხელს ვერ უწყობენ მავანნი, მე მინდა, საკუთარ თავზე ვიტვირთო და მუსიკოსებს, რითიც შემიძლია, დავეხმარო. ჩემი ახალი ბარი, რომელიც გაიხსნება, კაბარეს სტილის იქნება, წინასწარ ბევრს ვერაფერს გეტყვით.
– თამუნასაც კონსერვატორია აქვს დამთავრებული. ცოლ–ქმარი მუსიკალურად თანამშრომლობთ?

გიგი: მე და თამუნას ერთობლივად არაერთი სიმღერა გვაქვს დაწერილი, ერთი ჩავწერეთ, რომელიც რადიოებში დიდი პოპულარობით სარგებლობს. სიმღერებს ხშირად ვწერ.
თამუნა: ფილმ "მისტერ ძიძას" საუნდტრეკი, რომელსაც ლევან მასპინძელაშვილი ასრულებს, ჩემი და გიგის დაწერილია. დღეს ეს სიმღერა უკვე ჰიტია. ეს ფილმი ისეთი წარმატებული აღმოჩნდა, ყველანი სასიამოვნოდ გაკვირვებულები დავრჩით, ჯერ კიდევ გადის კინოთეატრებში, ფაქტობრივად რეკორდი მოხსნა.
სხვათა შორის, გიგიმ ბოლო პერიოდში ძალიან საინტერესო მიმდინარეობა აირჩია, რომელიც საქართველოში პოპულარული არ გახლავთ. მისი სიმღერების არანჟირება ლითონის ჩასაბერებითაა გაკეთებული, ცოტათი გორან ბრეგოვიჩის კომპოზიციასაც წააგავს.
გიგი: ერთი ჟანრი არ მაქვს ამოჩემებული, რასაც მუზა მოიტანს, იმას მივყვები. პროფესიონალი კომპოზიტორი არ ვარ, რომ დავჯდე და ჰარმონიები ვითვალო. ჩემს მუზას ვენდობი. თამუნასგანაც ბევრ რჩევას ვიღებ.
– გიგი, "კომედი შოუში" თუ მოგწონთ თამუნას პერსონაჟები?
გიგი: შენიშვნებსაც ვაძლევ ხოლმე, მაგრამ ეს მხოლოდ ჩვენი თემაა. მისი ყველა როლი მომწონს.
თამუნა: გიგი თუ როლთან დაკავშირებით შენიშვნას მომცემს, ყველაფერს გავითვალისწინებ, თუ ჩავთვლი, რომ სწორად მეუბნება.
– გიგი, თამუნას კოლეგებთან როგორი ურთიერთობა გაქვთ?
გიგი: "კომედი გრუპის" ყველა წევრთან ძალიან ახლო ურთიერთობა მაქვს, ყველასთან ვმეგობრობ, ვასო ფხაკაძე ნინის ნათლიაა.
– თამუნა ოჯახში როგორია, იუმორს სახლშიც აქტიურად იყენებს?
გიგი: ერთხელ აინშტაინს ჰკითხეს, რომ გძინავთ, წვერი საბნის ზემოთ გაქვთ თუ ქვემოთო. აინშტაინმა უპასუხა, მთელი ღამე არ მეძინა იმაზე ფიქრით, წვერი სად მქონდაო. ასე რომ, ამ შეკითხვის პასუხი არ ვიცი, არ დავკვირვებივარ.. ადამიანი სამი რამით ფასდება – როგორია ოჯახში, სამსახურში და მეგობრებთან. თამუნა ოჯახში ძალიან კარგია. რადგან თქვენ აქ ხართ, ეს ნიშნავს, რომ სამსახურშიც გადასარევია და ალბათ მეგობრებშიც ასეთია.
თამუნა: მეგობრებში ყველაზე კარგი ვარ, მაგრამ სამივე შემთხვევაში კარგად ვგრძნობ თავს. რაც მთავარია, გიგისაც საოცარი იუმორის გრძნობა აქვს. შემთხვევით რაღაც თემას ავაგდებთ და ამაზე დაუსრულებლად შეგვიძლია ვიხუმროთ.
სოფიო ბოჭორიძე, ჟურნალი სარკე