როგორ აზროვნებენ მდიდრები

ფსიქოლოგმა სტივ სიბოლდმა სხვადასხვა შემოსავლის მქონე ადამიანის მსოფლმხედველობა შეისწავლა და წიგნში აღწერა. საზოგადოებაზე რამდენიმეწლიანმა დაკვირვებამ, მას საშუალება მისცა გაერკვია, თუ რით განსხვავდება მაღალშემოსავლიანი ადამიანის აზროვნება მათი აზროვნებიდან, ვინც "ხელფასიდან ხელფასამდე" ცხოვრობს.

"საშუალო სტატისტიკური ადამიანი ფიქრობს, რომ მდიდარი ადამიანი ან იღბლიანია ან ბოროტმოქმედი (სწორედ ამიტომაა, რომ მოსახლეობის ყველაზე დაბალ ფენაში გამდიდრება სირცხვილად ითვლება). უზრუნველყოფილებმა კი იციან, რომ სიმდიდრე, შესაძლოა, ბედნიერების გარანტი არ არის, მაგრამ ცხოვრებას გაცილებით იოლსა და სასიამოვნოს ხდის", - წერს სიბოლდი ახალ წიგნში, რომელსაც "როგორ ფიქრობენ მდიდრები" ჰქვია.

"ღატაკები ფიქრობენ, რომ თავდაჯერებულობა ნაკლია. მდიდრებს სჯერათ, რომ თავდაჯერებულობა უპირატესობაა".

"მდიდრები გამოირჩევიან იმით, რომ არ იტანჯებიან თავმდაბლობით და არ იკატუნებენ თავს, თითქოს სამყაროს გადარჩენა სურდეთ....არადა მართლაც - თუ საკუთარ თავს არ უშველე, როგორ შეძლებ სხვების დახმარებას? - წერს წიგნის ავტორი.

"ღარიბები ჩაციკლულები არიან წარსულზე, მდიდრები ორიენტირებულნი არიან მომავალზე"

"მილიონერები, რომლებმაც ნულიდან დაიწყეს, იმიტომ გახდნენ წარმატებულნი, რომ წინ იყურებოდნენ. ფიქრობდნენ იმაზე, თუ როგორ აეხდინათ ოცნებები. ის კი, ვინც ფიქრობს, რომ საუკეთესო ცხოვრება წარსულში დარჩა, ძალიან იშვიათად აღწევს რამეს, ვინაიდან ხშირად იტანჯება დეპრესიით" .

"ღარიბები საარსებო ფულს, მათთვის მოსაწყენი სამსახურით შოულობენ. მდიდრები ბევრ ფულს შოულობენ, ვინაიდან იმ საქმით არიან დაკავებულნი, რომელიც უყვართ"

"ადამიანს ჰგონია, რომ წარმატებული ადამიანები იძულებულნი არიან ჯოჯოხეთური შრომა გასწიონ, რათა შეინარჩუნონ შემოსავლის წყარო. სინამდვილეში, მდიდრები საყვარელ საქმეს აკეთებენ და ეძებენ გზებს, რომ ამ საქმით ფული იშოვონ. საშუალო კლასი კი ეძებს სამსახურს, რათა შემდეგ ის სძულდეს. მას ბავშვობაში ასწავლიან, რომ ფულის შოვნა დიდ ემოციურ და ფიზიკურ დატვირთვას მოითხოვს".

"ქრონიკული ღარიბები, იმედგაცრუების შიშით საკუთარ თავს დაბალ მოთხოვნებს უყენებენ. მდიდრები კი გამუდმებით იღწვიან უფრო მეტისკენ"

"ფსიქოლოგები გამუდმებით ურჩევენ თავის კლიენტებს, რომ არ ჰქონდეთ დიდი იმედები, რათა შემდეგ იმედი არ გაუცრუვდეთ. მაგრამ ვერასოდეს შეძლებ რაიმეს მიღწევას, მათ შორის გამდიდრებასაც, თუ არ გიოცნებია მასზე".

"ღარიბების აზრით, იმისათვის, რომ გამდიდრდე, საჭიროა რაიმე განსაკუთრებული აკეთო. მდიდრების აზრით, იმისთვის, რომ გამდიდრდე, საჭიროა თავად იყო განსაკუთრებული".

"მაშინ, როდესაც ღარიბი ორიენტირებულია ერთსა და იმავე სამსახურზე, მდიდრები საკუთარ გამოცდილებას აანალიზებენ და საკუთარ შეცდომებშიც სარგებელს პოულობენ. მაგალითად, დონალდ ტრამპის ისტორია - მან დაკარგა თავისი მილიონები, ვალების მორევში ჩაიძირა, მაგრამ იქიდან კიდევ უფრო მდიდარი ამოვიდა, ვიდრე მანამდე იყო", - ამბობს წიგნის ავტორი.

"ღარიბები შვილებს - გადარჩენას, მდიდრები კი შვილებს გამდიდრებას ასწავლიან"

"შეძლებულ ოჯახებში ბავშვებს თავიდანვე უხსნიან, რომ არსებობს ადამიანთა ორი ტიპი - მდიდრები და ღარიბები" - მიიჩნევს სტივ სიბოლდი. ამის გამო ის არაერთხელ გაუკრიტიკებიათ და "ელიტარიზმშიც" დაუდანაშაულებიათ. მაგრამ წიგნის ავტორი აზრს არ იცვლის: "ასეთი ბავშვები სამყაროს ობიექტურ აღქმას ეჩვევიან. თუ ბავშვი მალევე ხვდება, რა არის სიმდიდრე, ის აუცილებლად ეცდება გამდიდრებას".

"ღარიბები მიდრეკილნი არიან ფულის შეგროვებისკენ. მდიდრები მიდრეკილი არიან ფულის შოვნისკენ"

ღარიბი ადამიანები გამუდმებით აგროვებენ ფულს, იკლებენ სიამოვნებას, რათა საოჯახო ბიუჯეტში ჩაეტიონ, ამიტომ მათ არასოდეს აქვთ არც ფული და არც ფიზიკური შესაძლებლობა მეტის მისაღწევად. წარმატებული ადამიანი კი იმით გამოირჩევა, რომ ის ყოველთვის ცდილობს ახალი ფულის შოვნას.

სულ სტივ სიბოლდმა წიგნში მდიდრებისა და ღარიბების მსოფლმხედველობას შორის 21 განსხვავება მოიყვანა. თუ ავტორის თეზისების პერიფრაზს მოვახდენთ: ”მდიდრები არ არიან ჩაციკლულები განათლების მიღებასა და დიპლომზე. ისინი ფოკუსირებას ახდენენ სპეციალურ, მათთვის საჭირო ცოდნისა და უნარების გაღრმავებაზე. თავისუფალ დროს სწორედ ამით არიან დაკავებულნი და არ ხარჯავენ მას უბრალო გართობაზე. ფული მდიდრებში ემოციებს არ აღძრავს, ისინი ფულს აღიქვამენ, როგორც მიზნის მისაღწევ საჭირო ინსტრუმენტს”.

მომზადებულია Business Insider-ის მიხედვით.