"პოლიტიკოსებით დაბოლებას მარიხუანით დაბოლება არ სჯობს?"

შავ პრინცად წოდებულმა რეპერმა აკაკი ბაბუნაშვილმა ცოტა ხნის წინ სახელი შეიცვალა და ''პრინცი -პი'' გახდა. პრინციპები კი რეპერს მართლაც საინტერესო აღმოაჩნდა. აკაკიმ ძველი ჯგუფი ''ძებნილები'' ახალი შემადგენლობით აღადგინა და დღეს სწორედ ამ ჯგუფის მიზნებსა და გეგმებზე საუბრობს ჩვენთან. რეპერს მის ყოფილ სიყვარულზე, ბაბეზე, და მათ საერთო შვილზეც ვესაუბრეთ. ერთი სიტყვით, წინ საკმაოდ საინტერესო და გულახდილი ინტერვიუ გელით.

- აკაკი, მას მერე, რაც ''ნიჭიერში'' გნახეთ, ფართო აუდიტორიის წინაშე აღარ გამოჩენილხარ. რას საქმიანობდი?
- ვაგროვებდი ინფორმაციას დამწყები რეპერებისგან, ახალგაზრდებისგან. საკმაოდ დიდი ინფორმაცია მივიღე და მოვედი იმის აზრზე, რა უნდა გავაკეთო ახალი.
- შენ, რეპის მამა, რატომ აგროვებდი დამწყები რეპერებისგან ინფორმაციას?
- მე, რეპის მამა, ვალდებული ვარ გავიგო, რა აწუხებს ახალ ''პაკალენიას''.
- რაო, რა გაიგე?
- სხვათა შორის, ნაკითხი, ზრდილობიანი ბიჭები არიან. უკმაყოფილებას გამოთქვამენ ნარკოტიკთან, დღევანდელ პოლიტიკასთან დაკავშირებით. ვინაიდან დაიშალა ძველი ჯგუფი ''ძებნილები'', გადავწყვიტეთ ჩამოგვეყალიბებინა ახალი ჯგუფი იმავე სახელწოდებით. ჯგუფში 12 ადამიანია. თითოეულ მათგანს თავისი სათქმელი აქვს და აუცილებლად იტყვის. მე სათავეში ვუდგავარ ჯგუფს, რომ ვაკონტროლო მათი აზროვნება, მათი საქციელი და სწორად მოგაწოდოთ თქვენ, ჟურნალისტებსა და საზოგადოებას. ჩემი ჯგუფის წევრების ასაკი 25-27 წლამდე მერყეობს.
- სახელებსა და გვარებს არ გვეტყვი?
- ჯერჯერობით მათი სახელებისა და გვარების დასახელება არ მინდა, ვინაიდან ისინი დასაწყისში ნიღბებით წარდგებიან მაყურებლის წინაშე. ასევე გამოჩნდებიან კლიპებში, შოუებში, სცენაზე. ''ძებნილების'' იმიჯი უნდა იყოს ისეთი, როგორიც მათ სახელს შეეფერება. ჩვენ ვმალავთ სახეებს, მაგრამ არა თვალებს. ჩვენი ჯგუფის ბიჭები ქუთაისელები არიან, მაგრამ დიდი იმედი გვაქვს, რომ ბევრი თბილისელიც შემოგვიერთდება. დიდი რეპოჯახის შექმნას ვაპირებთ, რომელიც გათვლილი იქნება სიმართლესა და იმედზე.
- თითოეულს თავისი სათქმელი აქვსო, მითხარი. რა არის ის ძირითადი, რაც მათ აერთიანებთ?
- ეს არის პროტესტი ქიმიურ ნარკოტიკულ საშუალებებზე, რომლებსაც 13- 14 წლის ბავშვები იღებენ და რომელიც ანგრევს ორგანიზმს. ეს არის პროტესტი ნარკომომხმარებლების დაკავებაზე. გვინდა, რომ ნაკლებად მავნებელი ნარკოტიკი, როგორიც არის, მაგალითად, მარიხუანა, იყოს ლეგალიზებული, რათა არ მოხდეს თვითმკვლელობები.
- ჯგუფში ნარკომომხმარებლები გყავთ?
- ნარკომომხმარებელი არა, მაგრამ მარიხუანის მომხმარებლები გვყავს. პლანს მე გასართობ ბალახს ვეძახი. მარტივად ავხსნი, დღეში შემიძლია, ორი კოლოფი სიგარეტი მოვწიო. ეს ნებადართულია და ასევე ვნებს ჯანმრთელობას. მარიხუანა ამდენი არ დამჭირდება, ერთი ღერიც დამაკმაყოფილებს და ეს აკრძალულია. რომელი უფრო მავნებელია ორგანიზმისთვის, ორი კოლოფი სიგარეტი თუ ერთი ღერი პლანი? პროტესტი გვაქვს იმაზე, რომ ახალგაზრდებში ქაოსია, ვერ გაუგიათ, როგორ მოიქცნენ, რა ისწავლონ, ან საერთოდ ისწავლონ თუ არა. როგორი ცხოვრება იქნება მათთვის უკეთესი. ვერც მუსიკასთან მეგობრობენ. ამასთან დაკავშირებით ''ძებნილები'' პოლიტიკოსებს მივმართავთ, მიმართულება მისცენ ახალგაზრდებს, რა გააკეთონ, ისწავლონ და ამით იყვნენ ბედნიერები თუ არ ისწავლონ და ამით იყვნენ უბედურები. ყველა საქართველოდან წასვლაზე ფიქრობს. ჩემს ახალგაზრდობაში არავინ ამბობდა, საქართველოში ცხოვრება არ მინდაო. ყველას მოგვწონდა აქ ცხოვრება და გვიყვარდა ჩვენი ქვეყანა. მე ახლაც მიყვარს საქართველო, მაგრამ ახალი თაობა ქვეყნიდან გარბის.
- შენც ხომ იყავი წასული მოსკოვში?
- ვიყავი, მაგრამ იმისთვის არა, რომ ჩემი ქვეყანა მძულდა. ახლის შექმნის სურვილი მქონდა, ახლის სწავლის, გამოცდილების შეძენის სურვილი. რაღაც მინდოდა მიმეღო სხვა ქვეყნიდან, კარგი ან ცუდი. მერე ჩამოვსულიყავი და მეთქვა, რომ საქართველო ყველა ქვეყანას სჯობს, მეც ვიყავი წასული, მაგრამ დღეს აქ ვარ-მეთქი.
- რა შექმენი ახალი?
- სიტყვა თავისუფლების შეგრძნება განვმარტე. დღეს ხალხს თავისუფლება ''რაც მინდა იმას გავაკეთებ'' ჰგონია. ეს არ არის თავისუფლება. თავისუფლება არჩევანის უფლებაა. შენ უნდა აირჩიო, გინდა თუ არა.
- რისი თქმა გინდა, თავისუფლების გემო მოსკოვში გაიგე?
- არა, თავისუფალი მანამდეც ვიყავი. მე სულ თავისუფალი ვარ და რაც მთავარია, მქონდა იმის უფლება ამერჩია, რეპერი გავმხდარიყავი თუ ექიმი... შებოჭილია ხალხი, პოლიტიზებული, მათ შორის ყველაზე მეტად ხელოვანები. არ იციან, რა გააკეთონ, რისთვის გააკეთონ, გაუშუქებს თუ არა რომელიმე ტელევიზია. ეთერი ისევ პოლიტიკით არის გატენილი. კვლავ პოლიტიკოსები გვაბოლებენ. პოლიტიკოსებით დაბოლებას მარიხუანით დაბოლება არ სჯობს?
- კითხვაზე არ მიპასუხე. თავისუფლების საძიებლად რუსეთს რატომ მიაშურე?
- არა. თავისუფლების საძიებლად არ მივაშურე. უბრალოდ, მაინტერესებდა როგორ ცხოვრობდნენ. ამსტერდამშიც ვიყავი, არც იქ მომეწონა. ძალიან ბევრი ჰომოსექსუალი შემხვდა ქუჩაში და არ მესიამოვნა. ვიღაცას ალბათ სიამოვნებს. მათ არ გავკიცხავ, მე არ მსიამოვნებს. რუსეთში ვისაც სწავლა უნდა, სწავლობს და წარმატებულია, ვისაც ხელოვნების კეთება უნდა, აკეთებს და წარმატებულია. ხალხი არ არის ''დაგრუზული'' პოლიტიკით. ჩვენთან ყველა პოლიტიკაზე ლაპარაკობს, განურჩევლად ასაკისა და პროფესიისა.
- თქვენს ჯგუფს რა მისია აქვს ამ ყველაფერში, რისი შეცვლა შეგიძლიათ?
- ჩვენი მოძრაობით, ჩვენი ხმით, ჩვენი სიტყვით, ჩვენი პრინციპით არ მივცემთ ხალხს საშუალებას, დაიბოღმონ. პირველ რიგში, ახალ თაობას ვეტყვით, რომ არის გამოსავალი, თუ გინდათ, ჩვენთან გაერთიანდით, გინდათ, თქვენით თქვით სათქმელი, რომელიც იმედს მისცემს ადამიანებს. ჩვენ იმედის დასათესად მოვდივართ. არ ვთესავთ ტყუილს, რომელიც ისედაც თავზე საყრელად არის ჩვენს ქვეყანაში.
- უკვე პოპულარულ რეპერებთან თუ გაქვთ მოლაპარაკება, რომ შემოუერთდნენ თქვენს ჯგუფს?
- ჯერ გვინდა საქმე დავანახვოთ ყველას. შემდეგ, თუ ჩვენი მოძრაობა, ჩვენი იდეა მოეწონებათ და შემოუერთდებიან ჯგუფს, კარი ღიაა, მხოლოდ გაგვიხარდება.
- ჩვენ გვახსოვს ჯგუფი ''ძებნილები და ჯერონიმო''. სად არის ჯერონიმო?
- ჯერონიმო ''ჯი-დი-ეს''-ში მუშაობს. თავისი საქმით არის დაკავებული.
- ნიღბების მოხსნის დრო როდის დადგება?
- ნიღაბს დღეს ყველა ატარებს, უბრალოდ, სხვები ამას მალავენ. ჩვენ ვამბობთ, რომ ნიღბებით ვართ. დრო დადგება და მოვიხსნით ნიღბებს. როცა ამას ხალხი მოითხოვს, როცა დაინტერესდება საზოგადოება, ვინ ვართ ჩვენ.
- თქვენს ტექსტებში ბილწსიტყვაობა თუ იქნება?
- არა, ჩვენ, ქუთაისელ რეპერებს, ბილწსიტყვაობა არ გვახასიათებს, ზრდილობა გვასწავლეს, კარგად აღგვზარდეს.
- აკაკი, ცოტაოდენი პირადზეც უნდა გკითხო. ცოტა ხნის წინ ''რეიტინგში'' შენი ყოფილი მეუღლის, ბაბეს ინტერვიუ დაიბეჭდა, სადაც ის თქვენი ოჯახის დანგრევაზე საუბრობდა, რომ ფეხმძიმე მიატოვე და მოსკოვში კარიერის გასაგრძელებლად წახვედი...
- ქართული მართლმადიდებლური ადათ-წესით მეუღლე ნიშნავს ადამიანს, რომელთანაც ჯვარი გაქვს დაწერილი და ხელი გაქვს მოწერილი. როცა ჩვენ ერთად ვიყავით, ამას ცოლქმრობა არ ერქვა. ერთმანეთი გვიყვარდა, ჩვენი შვილიც სიყვარულის ნაყოფია. რაც შეეხება ჩემს წასვლას მოსკოვში, ეს არ ყოფილა მისი მიტოვებისთვის გამიზნული. ვინმეს მიტოვება რომ მნდომებოდა, ამისთვის ქალაქიდან წასვლა არ დამჭირდებოდა, მერწმუნეთ. მე იქ სამუშაოდ წავედი. დღეს ვისაც როგორ აწყობს, ისე ლაპარაკობს. ეს მისი უფლებაა. 2 წელი ვიყავი მოსკოვში. ჩამოვედი და დავუბრუნდი ოჯახს. ერთი წელი ვცდილობდით ურთიერთობების დალაგებას, ამას თავადაც აღნიშნავს, მაგრამ არ გამოგვივიდა.
- რა იყო თქვენი დაშორების რეალური მიზეზი?
- მერყევი ხასიათი.
- რომელი არ იყავით დარწმუნებული საკუთარ გრძნობებში?
- მე როგორც კი ჩამოვფრინდი, გამთენიის 5-6 საათი იქნებოდა, პირდაპირ მასთან მივედი. მივაკითხე ჩემს შვილს, უკვე წლისა და 7 თვის დამხვდა. ჩემს გრძნობებში დარწმუნებული რომ არ ვყოფილიყავი, არ მივიდოდი. იმ დღესვე ვიგრძენი, რომ ბაბე ჩემი აღარ იყო. იმ დღიდან ვცდილობდი, მიზეზი მეპოვა... არაფერი გამოვიდა.

Rating

- მეჩვენება, რომ გულდაწყვეტილი ხარ.
- ასაკის ბრალია. 20-30 წლის რომ ვიყო, უფრო ადვილად შევხედავდი ყველაფერს. ამ ყველაფერმა ჩემს ცხოვრებას დაღი დაასვა. მეუღლეობა თავისთავად პატივისცემასა და სიყვარულს არ გულისხმობს. მე ვიცნობ წყვილებს, რომლებიც უსიყვარულოდ ცხოვრობენ. ჩვენ სიყვარულით დავიწყეთ ცხოვრება. თუ სიყვარული ვერ იმარჯვებს, იქ ხელმოწერა რა საჭიროა.
- ტრადიციული ქართველი ვარო, მითხარი. ხომ არ იყო გარკვეული აკრძალვები თქვენი ურთიერთობის დანგრევის მიზეზი?
- თუ გახსოვთ, ბაბე პირველად სწორედ ჩემი კლიპით გამოჩნდა სიმღერაზე ''გაიჩალიჩე'' და იმ დროისთვის საკმაოდ თამამადაც. ასეთ რაღაცებზე გართულება არ მაქვს. თვითონ ხელოვანი ვარ და კარგად მესმის ეს დეტალები. მაგრამ როგორც ხდება ხოლმე, ''ვისაც ჩავაცვი, იმან გამხადა''. დღეს თვითონ ჩნდება დამოუკიდებლად სხვადასხვა პროექტში და იმ სახელით, რომელიც მე დავარქვი.
- მოგეწონა მისი გამოსვლა ''ნიჭიერში''?
- არ მინახავს. ტელევიზორს არ ვუყურებ. ძირითადად სტუდიაში ვარ, არ მცალია. მისი ინტერვიუც თქვენს ჟურნალში შემთხვევით ნათესავთან ვნახე.
- ბავშვთან ურთიერთობა გაქვს?
- ბარბარე ახლა 4 წლის არის. ჩემი საქმიდან გამომდინარე ყოველდღიური ურთიერთობა არ გვაქვს, მაგრამ ვნახულობ, რაც შემიძლია ვეხმარები, უმამობას ნამდვილად არ ვაგრძნობინებ. ძალიან ვუყვარვარ.
- შენს პირადში ახალი ხდება რამე?
- არაფერი. ახლა ფლირტაობისთვის ნამდვილად არ მცალია, მთლიანად საქმეზე ვარ გადართული.
- როდის გამოჩნდებით, როდის აიღებს შტურმით ''ძებნილები'' ქართულ შოუბიზნესს?
- მალე, ძალიან მალე. არ მინდა დავაკონკრეტო. მინდა, მოულოდნელი იყოს ჩვენი გამოჩენა. ერთად ყოფნას მოაქვს წარმატება და ამის იმედი მაქვს მეც.

ნინო მჭედლიშვილი
ჟურნალი ''რეიტინგი''