ბევრი ხორცის და ყველის მიღება ისეთივე საზიანოა, როგორც მოწევა

კალიფორნიელი ექსპერტები მივიდნენ დასკვნამდე, რომ საშუალო ასაკის ადამიანები, რომლებიც დიდი რაოდენობით ცხოველურ ცილას იღებენ, საკუთარ თავს ისეთივე საფრთხეს უქმნიან, როგორც მწეველები.

მეცნიერებმა 20 წლიანი კვლევა ჩაატარეს, რომელშიც 6400 ადამიანი მონაწილეობდა. აღმოჩნდა, რომ ადამიანები, რომელთა ყოველდღიურ რაციონშიც ცხოველური ცილებისგენ დატვირთული საკვები შედის, ოთხჯერ მეტად რისკავენ დაავადდნენ კიბოთი, ვიდრე ისინი, ვინც დაბალცილიან საკვებს იღებს. ამავე რისკის ქვეშ არიან ის ადამიანები, რომლებიც დღეში 20 ღერ სიგარეტს ეწევიან.

საქმე ისაა, რომ ცილა ააქტიურებს სიმსივნის უჯრედების ზრდას და აჩქარებს უჯრედების დაბერების პროცესს.

მეცნიერთა თქმით, ასეთი კვება სახიფათოდ შეიძლება მივიჩნიოთ მაშინ, თუკი ადამიანის ორგანიზმში დღიური კალორაჟის მეხუთედი ცილების შემცველი საკვებისგანაა მიღებული.

სასურველია, რომ საშუალო ასაკის ადამიანმა სხეულის მასის 1 კგ-ზე 0.8 გრ ცილა მიიღოს. მაგალითად, ადამიანმა, რომელიც 57 კგ-ს იწონის, დღეღამეში 45-50 გრ ცილა უნდა მიიღოს.

უფრო ცხადად რომ წარმოვიდგინოთ, მაგალითად 300 გრამიანი სტეიკი უკვე 77 გრ. ცილას შეიცავს, ჭიქა რძე ორგანიზმს ცილის დღიური ნორმის 12 %-ს აძლევს, ხოლო 40 გრ ყველი 20%-ს.
ამიტომ, მეცნიერები გვირჩევენ ვაკონტროლოთ რა ოდენობის ცილას მივიღებთ ყოველდღიურად.