ნინო იოსელიანი: "გადავწყვიტე, რომ არ მინდა ქმართან ერთად ცხოვრება"

ფეშენ–მარკეტინგის სპეციალისტი, შოუბიზნესის პოპულარული სახე, ნინო იოსელიანი, კარგახანი ოჯახით ესპანეთში ცხოვრობდა, ახლა კი ორ შვილთან ერთად საქართველოშია, ქმრის გარეშე. მისი მეუღლე, ბიზნესმენი გიორგი ქისტაური, ესპანეთში დარჩა. ნინოს "სარკესთან" არ დაუმალავს, რომ ამჟამად ცოლ–ქმრის ურთიერთობაში გარკვეული კრიზისია და ამიტომ ცალ–ცალკე ყოფნა გადაწყვიტეს.
ნინო საქართველოში საქმიანი მიზნებით არის ჩამოსული, ბოლო პერიოდში აქტიურად დაინტერესდა ქართული მოდის კომერციულად გააქტიურების საკითხით. ამ თემაზე ის ლექციებს კითხულობს მოდის სფეროში მომუშავე ადამიანებისთვის და ქართული ბრენდების კავკასიის მასშტაბით გავრცელებას გეგმავს.
– ნინო, კონკრეტულად რას საქმიანობთ ახლა თბილისში?
– ამ ეტაპზე ფეშენ–მარკეტინგის შესახებ ლექციებს ვკითხულობ. ეს ყველაფრი იმიტომ კეთდება, რომ ახლო მომავალში გუნდი ჩამოყალიბდეს, რომელიც მასობრივი წარმოების ქართულ ბრენდს შექმნის. გაერთიანდებიან დიზაინერთა, მარკეტოლოგთა თუ სტილისტთა გუნდები. იმის გამო, რომ ფეშენ–მარკეტინგი საქართველოში არ ისწავლება, გადავწყვიტე, ორთვიანი ტრენინგ–კურსის ჩატარება. ლექციების დიდ ნაწილს მე ვკითხულობ. ჩემამდე მარკეტინგის შესახებ ლექცია ოთარ ქირიამ წაიკითხა. გვინდა, რომ კავკასიის რეგიონში ქართველი დიზაინერების პროდუქცია გაიყიდოს. საქართველოს საინტერესო ადგილ–მდებარეობა აქვს, მის გარშემო თუ ახლომდებარე ქვეყნებში არსებობს ფული და მოთხოვნა ქართულ პროდუქციაზე. შესაბამისად, სწორად დაგეგმილი კოლექცია და კარგად გათვლილი ბიზნესი წარმატებას მოიტანს.
– ადვილი საქმე ნამდვილად არ არის, რომ ქართული მოდა ბიზნესად აქციოთ. კომერციულად მომგებიანი მდგომარეობის შენარჩუნება მსოფლიო ბრენდებსაც კი უჭირთ.
– ფეშენ–მარკეტინგის გარეშე მოდას ბიზნესად ვერ გადააქცევ. ჩვენი მთავარი ამოცანაა, შექმნილი კოლექციები გაიყიდოს. მარტო დიზაინერი ამას ვერ გააკეთებს, რადგან მისი საქმე კოლექციების შექმნაა. სად უნდა გაიყიდოს, ვინ იქნება მომხმარებელი, რა მოთხოვნაა ბაზარზე და ა.შ, ეს ფეშენ–მარკეტოლოგის სამუშაოა. შექმნილი პროდუქცია რომ გაიყიდოს, იოლი არაა. კარგად უნდა იცოდე, ვინ არის შენი მომხმარებელი. სხვადასხვა ასაკობრივი ჯგუფი თუ სქესის მოთხოვნები უნდა იცოდე. შეიძლება დიზაინერმა ლამაზი კოლექცია შექმნას, მაგრამ ვერ გაყიდოს, რადგან აღმოჩნდეს, რომ ამ სტილზე მოთხოვნა არ არის ან ძალიან ძვირი ფასია იმ სეგმენტისთვის, ვისაც კონკრეტულად ეს სტილი მოსწონს და ა.შ.
ორი კაბის გაყიდვა ბიზნესი არ არის. ბიზნესია, როცა კოლექცია მთლიანად იყიდება. ქართველ დიზაინერებს ამ მხრივ ვეხმარები, მაგრამ ჯერ მხოლოდ რამდენიმე დიზაინერია ჩართული – თამუნა ინგოროყვა, ავთანდილი, თეონა გარდაფხაძე. საქართველოში კიდევ ვერ აცნობიერებენ, როგორი საჭიროა მოდის მარკეტინგი. თითო კაბის გაყიდვით კმაყოფილდებიან. დიდ ბიზნესზე და მოდის ინდუსტრიაზე საუბრისას მარკეტინგი აუცილებელია. საფრანგეთსა და ესპანეთში ვისწავლე ფეშენ–მარკეტინგი და მინდა, ჩემი ცოდნა აქ გამოვიყენო.

– როგორ შეაფასებთ თბილისურ სტილს, რას იცვამენ აქ, რას ანიჭებენ უპირატესობას, რა ტენდენციები შეიმჩნევა?
– 20 წლიდან 35 წლამდე კატეგორია მოდის ბიზნესისთვის საინტერესოა, რადგან სამოსში ფულს ამ ასაკის ადამიანები ხარჯავენ. თბილისი მეტნაკლებად მიჰყვება თანამედროვე მოდას. ინტერნეტის საშუალებით ძალიან ადვილია ტენდენციებში გარკვევა. ქართველების გემოვნება საკმაოდ დახვეწილია. აქ მოსწონთ თავისუფალი სტილი – ტანსაცმელი, რომელსაც ყოველდღიურად ჩაიცვამ, აქსესუარების და ქუსლიანი ფეხსაცმლის დამატების შემთხვევაში კი საღამოს სამოსადაც გამოიყენებ. ცხოვრების სტილი ქმნის მოთხოვნას. ჩვენთან, თბილისში, გალა საღამოები არ იმართება, რომ ხშირად გვჭირდებოდეს საღამოს კაბების ჩაცმა. შეიძლება გვინდოდეს, მაგრამ სად ჩავიცვათ? ამიტომ ქართველები თავისუფალ სტილს ანიჭებენ უპირატესობას. საღამოს კაბებზე იმ შემთხვევაშია მოთხოვნა, როცა ბანკეტი ან ქორწილი აქვთ.
– 35 წელს გადაცილებული ადამიანები როგორ იცვამენ, რას ანიჭებენ უპირატესობას?
– ამ დროს უფრო კლასიკურ სტილს ანიჭებენ უპირატესობას. ეს ასაკობრივი კატეგორია ხარისხს დიდ ყურადღებას აქცევს. არ უყვართ ექსპერიმენტები და ექსტრავაგანტურად ჩაცმა.
– რა განხვავებაა ევროპულ და ქართულ მოდას შორის?
– გლობალურად რომ ავიღოთ, ყველგან აქტუალურია კომფორტული და თავისუფალი სტილი. რაც შეეხება აზიას, იქ საღამოს კაბები აინტერესებთ, რადგან მათი ცხოვრების სტილი არ გულისხმობს ქალის თავისუფლებას, დიასახლისები სახლში ცდილობენ, ლამაზად გამოიყურებოდნენ ქმრებისთვის. მსოფლიოს იმ ნაწილში კი, სადაც ქალები დასაქმებულები და აქტიურები არიან, თავისუფალი სტილი, ე.წ. "ურბან შიკია" მოდაში.
– როგორ შეატყვეთ, თბილისურ მოდაში ისევ შავი ფერი ჭარბობს?
– შავი ყველგან აქტუალურია და არა მხოლოდ – თბილისში. ამავდროულად სეგმენტია გასათვალისწინებელი, საქართველოში არ უყვართ რისკიანი ნაბიჯების გადადგმა, ამიტომ შავი უფრო აქტუალურია.
– რატომ არ უყვართ ქართველებს ფერებით "თამაში"?
– ალბათ ცხოვრების სტილიდან გამომდინარე და ერთმანეთსაც ბაძავენ. საქართველოში ქუჩები, გარემო ძალიან დაბინძურებულია და ღია ფერის ტანსაცმელი მალე ჭუჭყიანდება. რამდენჯერაც ღია ფერი ჩავიცვი თბილისში, ორ საათში გასარეცხი გახდა, თუმცა მე პირადად ფერები მიყვარს.
– რა ტენდენციაა მსოფლიო მოდაში, რა გახდა ბოლო დროს აქტუალური?
– ძალიან აქტუალურია ბიოქსოვილები, ხელით შეღებილი ნაჭრები, მზის სოლარულ სისტემაში დამზადებული კაბები. აქტუალურია სამოსი, რომლის მიღმაც ისტორიაა. ეს სეგმენტი კარგად აითვისეს ამერიკულმა ბრენდებმა. ერთ–ერთი ამერიკული ბრენდი ხელით ამუშავებს ნაჭრებს და მზის სისტემის ენერგიაზე აწყობილი აპარატურით კერავს კაბებს. ამ ბრენდის აქტიური მომხმარებელი ვარ.
– ყოველთვის საქმიანი ქალი იყავით, თქვენს ორ ბიჭს, 8 წლის ალექსანდრეს და 7 წლის ლუკას ძირითადად ვინ უვლის?
– მათ მოვლაში დედა რომ არ მეხმარებოდეს, ბევრ რამეს ვერ გავაკეთებდი. ახლა შედარებით დაჭკვიანდნენ, ადრე უფრო ცელქობდნენ. სკოლაში 6 საათამდე არიან, შემდეგ სპორტზე მიდიან.
– ბიჭებთან სიმკაცრის გამოჩენა გიწევთ?
– მათთან მკაცრი არასოდეს ვარ, შვილებთან ვმეგობრობ. ალექსანდრე მიყვებოდა, სკოლაში ბავშვებმა მკითხეს, დედა თუ გიყვირისო, მე ვუპასუხე, არა–მეთქი, ყველას გაუკვირდა, რა კარგი დედიკო გყოლია, ჩვენ გვიყვირიანო. ვცდილობ, შვილებს მეგობრულად გავაგებინო, რაც მინდა.
– ქმარი საქართველოში არ ჩამოგყვათ?
– ამ ეტაპზე ცალ–ცალკე ვართ, მე აქ ვცხოვრობ, ის – იქ. ხშირად ჩამოდის და ბავშვებს ნახულობს. მიმოსვლა გვაქვს.
– ეს თქვენს ურთიერთობაში კრიზისის ნიშანი ხომ არ არის?
– მე გადავწყვიტე, რომ ამ ეტაპზე არ მინდა მასთან ერთად ცხოვრება და მასთან ერთად ყოფნა. ამ თემაზე და მიზეზებზე კონკრეტულად ვერ ვილაპარაკებ. ვნახოთ, რა იქნება. გადავწყვიტეთ, რომ ასე ჯობს, ჩვენს ურთიერთობას ასე სჭირდება. ვნახოთ, როგორ განვითარდება მოვლენები.
– თქვენს ურთერთობაში აღებული პაუზა შვილებზე უარყოფითად არ აისახა?
– არა, ეს ტაიმაუტი შვილებს არ ეხება. ერთმანეთს ეკონტაქტებიან, მამა მათ ხშირად ნახულობს.
მანანა ნოდია, ჟურნალი სარკე