სალომე ჭაჭუას და გიორგი ვარდოსანიძეს ახალგაზრდულ ქორწილში რვა მეჯვარე ჰყავდათ

პოპულარულმა წყვილმა, მსახიობმა გიორგი ვარდოსანიძემ და მოცეკვავე სალომე ჭაჭუამ, 15 თებერვალს სვეტიცხოველში ჯვარი დაიწერა. ხელის მოწერას კი ახლო მომავალში გეგმავენ. ნეფე–პატარძალმა ეს მნიშვნელოვანი დღე ვიწრო წრეში აღნიშნეს, რომელიც ძირითადად მათი სამეგობროთი და მეჯვარეებით შემოიფარგლებოდა. როგორც "სარკისთვის" გახდა ცნობილი, ახალდაქორწინებულებს 8 მეჯვარე ჰყავდათ, გიორგის – 5 და სალომეს – 3, თუმცა მათგან არც ერთია "ცეკვებიდან" ცნობილი რომელიმე სახე. სოციალურ ქსელებში გავრცელდა ნეფე–პატარძლის მიერ შესრულებული ვალსის კადრები, რომელიც მათ რესტორანში შეასრულეს. სუფრის თამადა სალომე ჭაჭუას ძმა ყოფილა.
სალომემ საპატარძლო კაბის მოდელად თავად შეარჩია ამერიკელი პოპვარსკვლავის ბიონსეს კაბა (დიზაინერი მიშელ კოსტელო) გრემის წლევანდელი ცერემონიალიდან და ერთ–ერთ თბილისურ სალონში შეიკერა.
წყვილმა დროის უქონლობის გამო თაფლობისთვე ზაფხულისთვის დაგეგმა. შეგახსენებთ, რომ მათი სიყვარულის ისტორია პროექტ "ცეკვავენ ვარსკვლავების" მეორე სეზონიდან დაიწყო, სადაც სალომე და გიორგი პარტნიორები იყვნენ. ეს რომანი პირველებმა ჟურნალისტებმა შენიშნეს. მანამდე გიორგის ჰყავდა შეყვარებული, მსახიობი თამთა შალამბერიძე, სალომეს რჩეული კი ასევე მოცეკვავე გიგი გაჩეჩილაძე იყო.
წინასაახალწლოდ გიორგი ვარდოსანიძემ ბანკში აღებული კრედიტით თბილისში, ნუცუბიძის პლატოზე ბინა შეიძინა, გაარემონტა და ახალ წელს ახალ სახლში ახალი ბედნიერებით შეხვდა. მან და სალომემ თანაცხოვრება ჯვრისწერამდე რამდენიმე თვით ადრე დაიწყეს და ბინა ერთობლივად მოაწყვეს.
როგორც "სარკისთვის" მიცემულ ინტერვიუში გიორგი ვარდოსანიძე ამბობს, 2014 წლის დასაწყისი მისთვის ძალიან იღბლიანი აღმოჩნდა, რადგან რამდენიმე ადგილზე დაიწყო მუშაობა, მანქანა გამოცვალა, სახლი იყიდა და, რაც ყველაზე მთავარია, საყვარელ ქალთან ერთად დაიწყო ცხოვრება. "ერთმანეთისთვის დიდი სტიმული ვართ, ერთიმეორეს გვერდში ვუდგავართ, ამიტომ ჩვენს ცხოვრებაში ყველაფერი მაგრად მიდის", – ამბობს გიორგი. მისივე თქმით, სახლში ფუნქციები გადანაწილებული აქვთ და მათ ბუდეში სრული იდილია სუფევს. "ცალკე ცხოვრება, მით უმეტეს, საყვარელ ადამიანთან ერთად ძალიან მაგარი ყოფილა", – გვითხრა მაშინ მსახიობმა.
ჯვრისწერის შესახებ დეტალების გასაგებად "სარკე" გიორგი ვარდოსანიძის მამას, ბატონ დავით ვარდოსანიძეს დაუკავშირდა.
დავით ვარდოსანიძე: ეს ლამაზი დღე ვაკეში, რესტორანში აღვნიშნეთ. ძალიან ლამაზი, ფანტასტიკური სიტუაცია იყო. თან იქ გიორგი პიარმენეჯერია. აბსოლუტურად ყველაფერი ლამაზი იყო – დარბაზი, მომსახურება, დიზაინი, სამზარეულო... რა თქმა უნდა, ყველაფრის თავი და თავი გიოსთან ერთად სალომეც იყო, რომელიც იმ დღეს ბრწყინავდა. ძალიან ლამაზი ქალიშვილი გვყავს.
– უკვე შვილად თვლით სალომეს?
– რა თქმა უნდა. მეორე შვილი კი არა, პირველი შვილია და გიორგიმ მეორე ადგილზე გადაინაცვლა, პირველი ადგილი სალოსია. ჩემი ოცნება იყო, ქალიშვილი მყოლოდა და სალო მყავს ახლა. ულამაზესი ქალიშვილი მაჩუქეს ღმერთმა და გიომ.
– სტუმრებს შორის ვინ იყვნენ?

– ვიწრო წრეში აღვნიშნეთ. გიოს და სალოს უახლოესი სამეგობრო გვყავდა, ეს უფრო ახალგაზრდული საღამო იყო, წინ ხელის მოწერის ცერემონიალია.
– ანუ ხელის მოწერას და ქორწილს ცალკე გეგმავთ?
– მე არაფერს ვგეგმავ, თვითონ არჩიეს ასე, რომ ჯვრისწერის ცერემონიალი ცალკე ყოფილიყო და ხელის მოწერის – ცალკე.
– სალომე როდის გაიცანით?
– პროექტის დასრულების შემდეგ გავიცანი. დაახლოებით ერთი თუ ორი თვის მერე ვნახე პირველად.
– იფიქრებდით, რომ ასეთი ცნობილი რძალი გეყოლებოდათ?
– ძალიან მინდოდა, ასეთი ლამაზი რძალი მყოლოდა. სალომე ლამაზი არამხოლოდ ფიზიკურადაა, მინიმუმი, ათი იმდენი შინაგანი სილამაზე აქვს!
– ძალიან ემოციური იქნებოდა თქვენთვის ერთადერთი ვაჟის დაქორწინება.
– ემოციებს ვერ გადმოგცემთ! როცა შვილს გაზრდით და ცოლს მოიყვანს, თანაც ასეთ ფანტასტიკურ გოგოს, ჩემს ემოციას მერე მიხვდებით. როცა დავდივარ, ჩემსა და მიწას შორის ჰაერია, ფაქტობრივად ჰაერში ვარ. უბედნიერესი კაცი გავხდი! რა თქმა უნდა, როგორც ყველა მშობელმა ასეთ დროს, მეც ბევრი ვინერვიულე, ეს ყველაფერი როგორ ჩაივლიდა. მთავარი იყო, შვილები ყოფილიყვნენ ბედნიერები. ყველაფერმა კარგად ჩაიარა.
ეკა ლემონჯავა, ჟურნალი სარკე