რა თემაზე არ საუბრობენ საქართველოში ტელეფონით

საქართველოში გამოკითხული რესპონდენტების უმრავლესობას სურვილი არ აქვს, ტელეფონით გაუზიარონ მეგობრებს როგორც თავიანთი საიდუმლო, ასევე აზრი მიმდინარე პოლიტიკური მოვლენების შესახებ, – ამის შესახებ "საერთაშორისო გამჭვირვალობა – საქართველოს" აღმასრულებელმა დირექტორმა ეკა გიგაურმა განაცხადა.

კამპანიაში "ეს შენ გეხება" ჩართულმა ორგანიზაციებმა დღეს სატელეფონო მოსმენებთან დაკავშირებით მოსახლეობის აზრის გასაგებად ჩატარებული კვლევის შედეგების პრეზენტაცია გამართეს.

კვლევა 2013 წლის 3-26 ოქტომბერს ჩატარდა და ქვეყნის მასშტაბით 1918 სრულწლოვანი პირი გამოიკითხა.
შედეგების მიხედვით, რესპონდენტთა 63%-მა მიუთითა, რომ ტელეფონით საიდუმლოს მეგობარს არ გაუმხელდა, ხოლო 69% აცხადებს, რომ ტელეფონით სახელმწიფოში მიმდინარე პოლიტიკური მოვლენების შესახებ კრიტიკულ აზრს არ გამოხატავდა.

კვლევის მიხედვით, რესპონდენტებს განსხვავებული პოზიციები აქვთ თუ რა კატეგორიის ადამიანებს უსმენს სახელმწიფო. რესპონდენტთა 23% მიიჩნევს, რომ მძიმე დანაშაულის ჩამდენ პირებს უსმენენ, 13% ფიქრობს, რომ ნაკლებად მძიმე დანაშაულში მონაწილე პირებს, 11%-ის აზრით, ძირითადად პოლიტიკოსების საუბრები ისმინება, 5% კი თვლის, რომ ჟურნალისტებს უსმენენ. მხოლოდ 9% მიიჩნევს, რომ უკანონო ფარული მოსმენები არ ხორციელდება. 23 % მიიჩნევს, რომ სახელმწიფო ფარულად უსმენს ყველა მოქალაქის სატელეფონო საუბარს.

"ამ კვლევის შედეგად შეგვიძლია ვთქვათ, რომ

საქართველოს მოქალაქეების დიდი რაოდენობა არ ენდობა შსს-ს იმ ნაწილში, რომ ისინი არ უსმენენ მათ და არ არღვევენ მათ უფლებებს. ეს არის საგანგაშო ციფრები. ხელისუფლება უნდა დაუფიქრდეს, რამდენად სჯერა მათი მოსახლეობას ამ ნაწილში. როგორც ჩანს, მოსახლეობა მათგან სისტემურ ცვლილებებს ითხოვს. რაც, იმედი მაქვს, რომ განხორციელდება", - აღნიშანავს ეკა გიგაური.

"ინტერპრესნიუსი"