როგორ უმკლავდება მსმენელების იუმორისტულ შეტევებს ''პალიტრა TV''-ს წამყვანი

მარკეტოლოგი გურამ შეროზია ''პალიტრა TV''-ის ეთერში ბიზნესის შესახებ გადაცემას უძღვება. რადიომსმენელსა და ტელემაყურებელს ყოველ პარასკევს მცირე თუ საშუალო ბიზნესის საინტერესო წარმომადგენლებს აცნობს და მათ ისტორიებს უყვება. ამას წინათ მისი ორი გადაცემის ორი ეპიზოდი ინტერნეტჰიტად იქცა. ორივე გადაცემაში გურამი სრულიად სერიოზულ საკითხებზე ლაპარაკობდა, როცა მსმენელი ეთერში შევიდა და პირველ შემთხვევაში მისი შეკითხვა ''ჭამე, ნოდარის'' ფრაზით დაგვირგვინდა, მეორედ კი ქალბატონმა მეგრული კილოთი იკითხა, ჰოტელი და მოტელი ვიცი რა არის, მაგრამ ჰოსტელი რაღააო. გურამს ეთერში არ გაღიმებია, მაგრამ შემდეგ, გადაცემებს განმეორებით რომ უყურებდა, ღიმილს ვერ იკავებდა. ურჩევნია, ბიზნესთემებით გახდეს პოპულარული, მაგრამ ამასთანავე ფიქრობს, რომ ათასში ერთხელ ასეთი ''პრიკოლები'' გადაცემას ძალიან ახალისებს. გურამს ტელეჟურნალისტობის გარდა ბევრი სხვა გატაცებაც აქვს, მას სხვადასხვა თემაზე ვესაუბრეთ.

- ''პალიტრა მედიაში'' მოვედი ორი პროექტის ხელმძღვანელად, პროფესიით ჟურნალისტი არ გახლავართ, ეკონომიკისა და ბიზნესის სპეციალისტი, მარკეტოლოგი ვარ. შემდეგ ვნახე, რომ გადაცემა ''ბიზნესფაილი'' ძალიან ახლოს იყო თემატურად ჩემთან და მე და მისმა წამყვანმა ემა ტუხიაშვილმა გადავწყვიტეთ, ერთობლივად მოგვემზადებინა ის. ამ დრომდე, ანუ იანვრამდე, როცა ღია ეთერში პირველად დავჯექი, ჟურნალისტიკასთან შეხება მხოლოდ ინტერვიუების დონეზე მქონია. როცა მითხრეს, რომ პირველივე დღეს ლაივში უნდა დავმჯდარიყავი, მოულოდნელი იყო ჩემთვის, თუმცა ერთხელ ხომ უნდა გადადგა პირველი ნაბიჯი. დამეხმარა ის, რომ ლექციებს ვკითხულობ, ტრენერი ვარ და დიდ აუდიტორიასთან ურთიერთობა, კომუნიკაცია არ მიჭირს. არც საუბრის პრობლემა მაქვს. ვღელავდი მხოლოდ იმიტომ, რომ ღია ეთერი იყო.
- როგორ მოგეწონა?
- პირველივე გადაცემაზე მივხვდი, რომ ეს ჩემი მოწოდებაა და უნდა განვავითარო. უბრალოდ, გადაცემას ეთერში გასვლის შემდეგ სულ ვუყურებდი და იმ დეტალებს ვამჩნევდი, რომელთა გამოსწორებაც მინდოდა. მეორე-მესამე გადაცემაში უკვე გამოვასწორე. ახლა იმდენად დიდ აზარტში შევდივარ ხოლმე, რომ ზოგჯერ საერთოდ მავიწყდება, რომ კამერების წინ ვარ.
- ''ბიზნესფაილი'' რომელ დღეებში გადის ეთერში?
- ვიწვევთ მცირე, საშუალო და შემდგარი ბიზნესის წარმომადგენლებს და ვაყოლებთ მათ, როგორ დაიწყეს საკუთარი საქმე. მსმენელისთვის საინტერესოა მათ მიერ განვლილი გზა, მეორე ნაწილში კი პრაქტიკული მხარე გვაქვს ჩართული და მომხმარებელი კონკრეტული პროდუქციის შესახებ იღებს დეტალურ ინფორმაციას. გადის სამშაბათსა და პარასკევს, 15 საათსა და 10 წუთზე, რადიო ''პალიტრისა'' და ''პალიტრა TV''-ის ეთერში, სამშაბათს მიჰყავს ემა ტუხიაშვილს, პარასკევს გადაცემას მე ვუძღვები.
- რომელი საინტერესო ისტორია მოგისმენია შენი რესპონდენტისგან?
- ასეთი ბევრი ყოფილა. მაგალითად, ერთ-ერთი ტურისტული კომპანიის მფლობელმა გვიამბო, როგორ დაგეგმა მეგობრებთან ერთად მოგზაურობა და ყველას ჩაურტყეს ვიზა მის გარდა. ამის შემდეგ გადაწყვიტა ამ სფეროში საკუთარი ბიზნესის წამოწყება (იღიმის). დღეს საკმაოდ დიდი ტურისტული ორგანიზაცია აქვს. ზოგადად, ბიზნესი წარმატებით ეწყობა იმ შემთხვევაში, როცა თავად გაქვს გამოცდილება იმ საქმეში, რომელსაც იწყებ, ასევე უნდა იცნობდე ბაზარს და გქონდეს ჩატარებული შესაბამისი კვლევა. ამას საკუთარი გამოცდილებიდანაც ვამბობ, რადგან ჩემმა პირველმა ბიზნესმა არ გაამართლა და დაარსებიდან ერთ წელიწადში დავხურე, მეორე კი დღესაც საკმაოდ კარგად დგას ფეხზე. პირველ შემთხვევაში ტურისტული კომპანია დავაარსე ისე, რომ არანაირი კვლევა არ ჩამიტარებია. თანაც, ხუთი მეგობარი ვიყავით ერთად, ხუთივე მენეჯერი და არ გვყავდა არც ერთი დაქვემდებარებული თანამშრომელი. კონსალტინგური კომპანია კი მარტომ დავაარსე და მხოლოდ ერთი ადამიანი მყავს დამხმარედ.
- ვიცი, რომ კითხულობ ლექციებს, მიგყავს გადაცემა. კიდევ რით ხარ გატაცებული?
- ვწერ ლექსებს. მქონია პოეზიის საღამო. განსხვავებულ ჟანრში ვწერდი, არ იყო მიყვარხარ, გიყვარვარ. ახლა ცოტა ჩამოვშორდი ამ საქმიანობას, გარდა ამისა, პროზაში მუშაობისთვის დრო არ მაქვს, თუმცა ბლოგებს ვწერ და ვაქვეყნებ, რომლებსაც ბევრი აგრესიული კომენტარი მოჰყვება ხოლმე. მაგალითად, გამოვაქვეყნე ბლოგი სათაურით ''ფეისბუქის მარგალიტების ტოპ-ხუთეული'', ანუ როგორ იყენებენ სოციალურ ქსელს არამიზნობრივად. ალბათ, გინახავთ, შეყვარებულებს რომ აქვთ ხოლმე საერთო ''ფეისბუქ''-გვერდები ან თავიანთ თითოეულ ნაბიჯს რომ აშეარებენ ხოლმე. კიდევ დამიწერია ''სელებრითი ქართულად'', ანუ როგორ უნდა მოიხვეჭო პოპულარობა საქართველოში.
- შენ გინდა პოპულარობა?
- არ იქნება ცუდი, თუკი ადამიანები დაინახავენ, რა საქმეს ვაკეთებ და ამით გამიცნობენ, მაგრამ მდარე ხერხებით პოპულარობის მოპოვება არ მინდა.
- ამის მიუხედავად, შენი გადაცემები სწორედ ''პრიკოლებით'' გახდა ინტერნეტჰიტები. მაგალითად, ქალბატონმა დაგირეკა და თავისი შეკითხვა დაამთავრა ცნობილი ფრაზით ''ჭამე, ნოდარი''.
- (იღიმის) ამ გადაცემაში მიკროსაფინანსო ორგანიზაციასთან ვსაუბრობდი სესხების თემაზე, ძალიან სერიოზულ საკითხზე. ეს იყო რიგით მესამე გამოჩენა ეკრანზე, არ დამაცადეს და შემოვიდა ქალბატონის ზარი. ის რბილი ლ-ებით ლაპარაკობდა, ვერ წარმოვიდგინე, რომ სერიოზულ გადაცემაში იუმორისტული ზარი მექნებოდა და ბოლომდე დავაცადე აზრის გამოთქმა. როცა ახსენა ჩემი შვილი ნოდარიო და შეეტყო ხმაზე, რომ სიცილი ეპარებოდა, ვერ მივხვდი, რა უნდა გამეკეთებინა, უნდა გამეთიშა ეთერიდან თუ არა. საეთეროშიც არავის ეცალა, რადგან სიცილით კვდებოდნენ. ბოლოს თქვა, ''ჭამე, ნოდარიო'' და მივხვდი, რომ ღადაობა იყო და ეთერიდან გათიშეს.
- ვინმე შენი ახლობელი ხომ არ იყო?
- ბევრჯერ მოვუსმინე გადაცემას და ფაქტია, ხმაზე არ მეცნობა. კომენტარებში დამიწერეს, ეს რა რობოტი და გაუცინარი ხელმწიფეა, ამ ჩართვაზე როგორ არ გაეღიმაო. სამაგიეროდ, მერე, როცა გადაცემას გამეორებით მოვუსმინე, მოვკვდი სიცილით (იცინის). მეორე ზარზე კი, როცა მსმენელმა უნიჭო მეგრულით დაიწყო ლაპარაკი და ჰოტელი, მოტელი გავიგე და ჰოსტელი რა არისო, რომ იკითხა, ეტყობოდა, რომ სპეციალურად რეკავდა. მას ბოლომდე დავაცადე, რადგან ხუმრობა დაწყებული ჰქონდა და ბარემ დავამთავრებინე. არ ვიცი, ვინ არიან ეს ადამიანები, მაგრამ ან თვითონ უნდათ პოპულარობა, ან მე მაპიარებენ, რისთვისაც დიდი მადლობა მათ. მაგრამ მირჩევნია, თემატური, ბიზნესთემებით გავპიარდე. ამის მიუხედავად, ზოგჯერ ხუმრობა ახალისებს ყველაფერს, მათ შორის, სერიოზულ გადაცემასაც. იმედია, არ გახშირდება. ზოგი კომენტარებში წერდა, მე ამაზე უკეთ ვიხუმრებდიო (იცინის).
- ნეგატიური კომენტარები ახსენე და კიდევ რას წერენ შენზე?
- ამბები გე-ზე დადეს ჩემთან ინტერვიუ და კომენტარებში ვიღაცამ დამიწერა, აქ ხუმრობას და ინტერვიუების მიცემას სჯობს, წახვიდე და შენს მიტოვებულ შვილს მიხედოო. არ ვიცი, ეს საიდან მოიტანეს, მაგრამ ადრე ''ფეისბუქზე'' ჩემი დეიდაშვილის ფოტოებს ვაქვეყნებდი, ეტყობა, ვიღაცებს ჩემი შვილი ეგონათ. მერე მთელმა მკითხველმა აიტაცა და 50-ე კომენტარში უკვე წავიკითხე ისტორია, როგორ მგავს ის ბავშვი და როგორ მელოდება ბავშვთა თავშესაფარში ყოველდღე.
- იქვე ეწერა, რომ ეს ბავშვი იუნა შაფათავასგან გყავს.
- კარგია, რომ იუნა ახსენეს, რადგან თუკი ასეთ ჭორს გაავრცელებენ, სიმპათიურ ქალზე მაინც თქვან (იღიმის). არ ვიცი, რატომ ახსენეს ჩემთან. ალბათ, სადაც სექსის მინიშნებაა, სტერეოტიპია ასეთი, რომ ყველგან იუნა ახსენდებათ. მეგობრებში მყავს ''ფეისბუქში'' და შორიდან ვიცნობ.
- შენი ოჯახური მდგომარეობა როგორია?
- არ ვარ დაქორწინებული, არც ვყოფილვარ და ზუსტად შემიძლია ვთქვა, რომ შვილი არ მყავს.
- როგორი გოგონები გხიბლავს?
- რამდენჯერაც ვთქვი, რომ შავგვრემანი და საშუალო სიმაღლის გოგონები მომწონდა, რეალურად სულ სხვა ტიპის გოგონა მომწონებია. სულ სტაბილური ურთიერთობები მქონდა, რომელიც ერთ წელიწადზე მეტს გრძელდებოდა. ბოლო ურთიერთობა ორი თვის წინ დასრულდა, ახლა ახალი არაფერია.
- სტუდენტი გოგონები სერიოზულად თუ აღგიქვამენ?
- დისტანციას ვიცავ, თუმცა ეს იმას არ ნიშნავს, რომ ლექციების შემდეგ ერთად სადმე წასვლა არ შეგვიძლია. სერიოზულად რომ აღმიქვამენ, ამის დადასტურებაა, რომ ჩემი ლექციების კურსზე ახლა 200-ზე მეტი სტუდენტი ჩაეწერა. ალბათ ამას ხელს ასაკიც უწყობს და ის, რომ მენტალურადაც ახლოს ვართ.
- ვიცი, რომ ბევრს მოგზაურობ.
- ევროპის თითქმის ყველა ქვეყანაში ვარ ნამყოფი, დიდი ბრიტანეთის გარდა და ეს გემრიელ ლუკმად მაქვს მოტოვებული. სხვათა შორის, მოგზაურობა ყირგიზეთიდან დავიწყე და ნელ-ნელა სხვა ქვეყნებიც მოვინახულე. მოგზაურობის ჩემი მეთოდი მაქვს, სოციალურ ქსელში გაცნობილ ადამიანებთან ჩავდივარ ოჯახებში და შემდეგ მათაც ვმასპინძლობ. ტურისტები ჩემს ქვეყანას სხვა თვალით მანახვებენ ხოლმე, როდესაც აღფრთოვანებით იყურებიან ნარიყალიდან. ორი კვირის წინ მალტაში ვიყავი, იქ დამპატიჟეს, ჩემით არასდროს მომივიდოდა თავში აზრად იქ წასვლა, უამრავი კუნძულია, ნავებით გადაადგილდებიან და ძალიან სასიამოვნო შთაბეჭდილება დატოვა. მომწონს ბრიუსელი და ამსტერდამი, პარიზი უფრო ცივია. ბუდაპეშტი მომეწონა, პრაღა - ნაკლებად. როგორც კი შესაძლებლობა მომეცემა, ისევ წავალ ახალი ქვეყნის მოსანახულებლად.
- კარგი განტვირთვა შენთვის სწორედ ეს არის?
- გააჩნია, როგორი განწყობა მაქვს. თავისუფალ დროს ჩემს პატარ-პატარა ჰობის მივმართავ, მაგალითად, ვმღერი, ალბათ, ლექსების წერაც ჰობია ამ ეტაპზე, რადგან ჯერ ვერ განვავითარე, შაბათ-კვირას მეგობრებთან ერთად სიამოვნებით გავდივარ ქალაქგარეთ. სირცხვილია, მაგრამ ყაზბეგსა და სვანეთში ბოლო ორ წელიწადში ვიყავი. გარდა ამისა, თავისუფალ დროს ფრანგულ ენას ვსწავლობ და ვარჯიშს დავუბრუნდი, ბედნიერი და მოტივირებული ვარ, რომ გაზაფხულისთვის ფორმას დავიბრუნებ (იღიმის).

ნინო მურღულია
ჟურნალი ''რეიტინგი''