ნანიკო ხაზარაძემ ეკო ფანგანი დირექტორად დაისვა

ტელეწამყვან ნანიკო ხაზარაძეს ახალი "დირექტორი" ჰყავს – მოდელი ეკო ფანგანი. დირექტორი თავად შეარქვა, რადგან მასში ორგანიზატორული ნიჭი და ბევრი ისეთი თვისება დაინახა, რაც ლიდერს ახასიათებს. თავის მხრივ, ეკო ფანგანი, როცა "დღის შოუში" მივიდა, ნანიკოს ცნობილ სიხისტეს არ შეუშინებია, პირიქით, ეცინება, როცა სხვებისგან ესმის, რომ ნანიკო ხაზარაძესთან მუშაობა რთულია. ასეა თუ ისე, გარეგნულად განსხვავებული და შინაგანად ერთნაირად "მამალი" ქალები საერთო ეთერში მშვიდობიანად თავსდებიან, ყოველ შემთხვევაში, ჯერჯერობით.
– ნანიკო, როგორ მიიღეთ "დღის შოუში" ახალი წამყვანი ეკო ფანგანი?
ნანიკო: წლების განმავლობაში ვცდილობ, თუკი სადმე კასტინგია და წამყვანს ეძებენ, ეკო ფანგანის კანდიდატურა გავიტანო და აჰა! ეს ქალი მოწოდებით დირექტორია, ნებისმიერ ადგილას სიტუაციას აგვარებს, ამიტომ ვფიქრობ, რომ ეთერსაც სჭირდება ერთი დირექტორი. თან ეკოს მანიკიური, ბეჭედი, ქუსლიანები უყვარს, ის ზუსტად ეკრანისთვისაა გამოჭრილი.
– ერთმანეთს დიდიხანია იცნობთ?

ნანიკო: ერთ რამეს ვიტყვი: იცნობდე ცხოვრებაში – არ ნიშნავს, რომ ეთერშიც იცნობ. ეთერი სხვა რეჟიმია – ტვინის, ფიზიკის, დროის აღქმის, თემიდან არგადახვევის, ანუ ჩემთვის მთავარია, ადამიანი ეთერში გავიცნო.
– მერე, როგორ არის საქმე, გაიცანით ეკო ეთერში?
ნანუკა: არა, ეკოს ჯერ ეთერში ბოლომდე არ ვფლობ. ამ ეტაპზე მასთან კომფორტულად ვარ, მაგრამ მირჩევნია, კიდევ უფრო კარგად ავითვისო ის. მეორე თანაწამყვანს, სოფო ნარჩემაშვილს, უკვე კარგად ვიცნობ, ვიცი, რა შეიძლება მიპასუხოს, სად შეიძლება გამაწყვეტინოს და ა.შ. ეკოს ასე კარგად არ ვიცნობ.
ეკო: ნანიკო, მე არაპროგნოზირებადი ვარ!
ნანიკო: დროთა განმავლობაში პროგნოზს გავაკეთებ, რადგან ეთერი ამას მოითხოვს.
– ნანიკო, თქვენც აღნიშნეთ, რომ ეკო ძალიან ქალურია, უყვარს მანიკიური, კაბები, პრანჭვა... არ გიკვირთ, დირექტორის თვისებებს რომ ამჟღავნებს?
ეკო: ეკოს თუ დასჭირდა, კაცურიც არის.
ნანიკო: მე ვიტყოდი, რომ ქალურობა მანიკიურის და კაბის სინონიმი არ არის.

ეკო: ეს პრანჭიაობის სინონიმია და არა – ქალურობის. შეიძლება არანაირი აქსესუარი არ გაიკეთო, მაგრამ შინაგანად ისეთი ქალური იყო, სულ ასხივებდე...
ნანიკო: ეკო ამ მანიკიურის და მძივის იქით ხანდახან შეიძლება ისეთი მიმწოლი და კაცზე ძლიერი იყოს, რომ ვინმეს შეშურდეს.
ეკო: ჩემი სიძლიერის კაცებს უნდა შეშურდეთ!

ნანიკო: ნუ გიხარია, რომ ძლიერი ხარ!
ეკო: საერთოდ არ მიხარია, რომ ისინი არ ვარგიან არაფრად. როგორ უნდა მიხაროდეს ეს?!

ნანიკო: ვარგიან, როგორ არა!
ეკო: ვინ?
ნანიკო: მამაკაცები.
– ნანიკო, თქვენ პრანჭია არ ხართ?
ნანიკო: არა.

ეკო: ნანიკოს თავისი დამახასიათებელი სტილი აქვს. ქერა თმა ძალიან უხდება. შავ თმაშიც მახსოვს და ცოტა გრძელ თმაშიც. როცა გაგიცანი, შავი თმა გქონდა. ეს ძალიან ადრე, ბათუმში "სუბტროპიკის" ფესტივალის დროს იყო.

ნანიკო: მაშინ პუტკუნაც ვიყავი. ქერა თმა იმიტომ მიყვარს, რომ ჩემთვის პრაქტიკულია. ასე ქალი უფრო მოვლილის შთაბეჭდილებას ტოვებს.
– ნანიკო, მაღალქუსლიანი ფეხსაცმელები, კაბები თქვენგან შორსაა?

ნანიკო: ყველაფერს თავისი ადგილი აქვს, მაღალქუსლიანი ფეხსაცმელებიც მაქვს, კაბებიც, მაგრამ ბევრად მირჩევნია, მოხერხებულად ვიყო ჩაცმული, ვიდრე კონკრეტული ღონისძიების გამო დისკომფორტს ვგრძნობდე. ამიტომ მეტნაკლებად ისე მაცვია, როგორც ახლა მხედავთ.
– ნანიკო, ინტერვიუს დაწყებამდე თქვენს საუბარს მოვკარი ყური, საკუთარ თავზე ამბობდით, ყველაზე უკულტურო ვარო. მგონი, თავის მოვლაზე საუბრობდით.
ნანიკო: თვითონ პროცედურაზე არ ვსაუბრობდი. სახლში სტაბილურად არ გამაჩნია სახის საცხი, არასდროს მაქვს თვალის – ცალკე და სახის ცალკე საცხი, მუდამ რაღაც გაურკვევლობას ვისვამ. ამის მიუხედავად, მაინც ვთვლი, რომ ცუდად არ გამოვიყურები. ძალიან დიდი მადლობა ჩემს გენეტიკას, დედაჩემს, ბებიაჩემს. მერწმუნეთ, გენეტიკა წამყვანია. არანაირი ლანცეტი, პინცეტი, მეზო, ინვაზიური, არაინვაზიური მეთოდი არ უშველის ქალს, თუ მას კარგი გენეტიკა არ აქვს. ასე რომ, სანამ "გავქაჩავ" გენეტიკით, ასე ვიქნები და ალბათ მერე მეზოსაც გავიკეთებ და პლასტიკურ ოპერაციასაც. ჯერ ამის სურვილი არ მქონია.

ეკო: მეც არ მქონია, მაგრამ უცებ ჩავერიე. ხალხს ჰგონია, ძალიან ვუვლი თავს. სინამდვილეში არასდროს ვვარჯიშობ, არც დიეტაზე ვარ. მადლობა ღმერთს, ეს გენეტიკურად არ მჭირდება, თუმცა რაღაც ეტაპზე ცოტ–ცოტა ყველას ყველაფერი სჭირდება. სტანდარტულად სახეს ვიწმენდ, ფრჩხილებს ვიკეთებ. ეს ელემენტარული ჰიგიენაა. კიდევ, წარბებშუა, ცხვირთან, ბოტოქსს ვიკეთებ, რადგან 18 წლიდან მიმიკური ნაოჭი მაქვს.

ნანიკო: ბოლოს ფრჩხილები სალონში 22 სექტემბერს გავიკეთე, რადგან 23–ში ეთერში გავდიოდით. ფრჩხილებს თვითონ ვუვლი, თმას თვითონ ვიღებავ. მაკიაჟს არ ვიკეთებ, ვერ ვიტან, როცა მიკეთებენ. ეს ალბათ უფრო მენტალური პრობლემაა, ფსიქოსომატური აშლილობა მაქვს. რა ვქნა, რაღაცეების კეთება არ მიყვარს.
– ნანიკო, ეკოს მოუწონეთ, ცხვირის ოპერაცია რომ გაიკეთა?

ნანიკო: როცა ეკო დავინახე, პირველი ეს ვუთხარი: "რად გინდოდა?". ახლაც, რაღაც ეტაპზე ჩემს აზრზე ვრჩები. მოტივაციას ვერ მივხვდი.
ეკო: თვლის, რომ არ მჭირდებოდა. პატარა რაღაც არ მომწონდა და ის შევისწორე.
– როგორ გახსენდებათ პროექტის "ცეკვავენ ვარსკვლავები" პერიოდი? მაშინ ერთმანეთის კონკურენტები იყავით.
ნანიკო: სწორედ იქ მივხვდი, რომ ეკო დირექტორია. დისციპლინა, დალაგება უყვარს. არა მარტო თავის მეწყვილეს "ალაგებდა", ზოგადად სიტუაციას ალაგებდა.
ეკო: შოუებში ადამიანის ბევრი დაფარული თვისება მჟღავნდება, იქ ვერ ითამაშებ. გამწარებული, გაოფლილი რომ ვარჯიშობ, გშია და გწყურია, ამ დროს ბევრ იმ თვისებას ავლენ, რასაც პირდაპირ ეთერში ვერ გამოამჟღავნებ. სხვათა შორის, პროექტის მეორე სეზონი განსაკუთრებულად გამორჩეული იყო. ნანიკოს გავარდნა ჩემთვის ძალიან დიდი სტრესი იყო, რადგან ვგულშემატკივრობდი. დიდი პოტენციალი ჰქონდა და მეწყვილეც გადასარევი ჰყავდა. რაც მე ნანიკოს მესიჯები გავუგზავნე...
– ეკო, ნანიკომ შოუს დროს თქვენში დირექტორი დაინახა, თქვენ რა აღმოაჩინეთ მასში?
ნანიკო: ის, რომ კარგი ქვეშევრდომი ვარ.

ეკო: ნანიკო ობიექტურია. როცა რაღაცას გეუბნებიან, სხვამ შეიძლება შოუ დაგიდგას, ნანიკო კი ყველაფერს ობიექტურად გეუბნება.
– ანუ თქვენ ობიექტურობას უწოდებთ იმას, რასაც სხვები უხეშობად მიიჩნევენ?
ნანიკო: ზოგადად ხმის ტემბრი, ინტონაცია უხეში მაქვს, მაგრამ ეს იმას არ ნიშნავს, რომ შიგნიდან ვარ ასეთი. ეს ჩემი მანერაა. ჩემი შვილი, ლილუ, მეუბნება, დედიკო, შენ არ გეგონოს, რომ ხალხს ყველაზე ბრაზიანი ჰგონიხარო. ეტყობა, ამაზე ძალიან ბევრი იფიქრა. მითხრა, ვიცი, შიგნიდან რა სიკეთით აღსავსე ხარ, მაგრამ შენ ასე საუბრობო. ჩემი საუბრის მანერა თვითონ მაოცებს. მინდა, ადამიანს რაღაც თბილად და კარგად ვუთხრა, მაგრამ ისე მოჭრილად და მოკლედ ვლაპარაკობ, რაღაცეები უხეშად გამომდის. ეს ამ ბოლო დროს დავიჭირე, მას შემდეგ, რაც ლილუმ მითხრა. ჩემს თავზე ვმუშაობ, იმედია, ოდესმე დავრბილდები.

ეკო: ნანიკოს უხეშობას მე ვერ ვხედავ. ნანიკო, გინდა, საიდუმლო გითხრა? ჩემთვის უკითხავთ, ნანიკოსთან ურთიერთობა რთულიაო. ამაზე ძალიან მეცინება ხოლმე.
ნანიკო: ყველას ჰგონია, რომ რქებით ვაწვები.
ეკო: ასეთი მართლა არ არის. აქ მისი სახლია. მე ახლა მოვედი, სოფიკო – შარშან, ნანიკო კი ძალიან ბევრი წელია, აქ მუშაობს.
ნანიკო: შეიძლება, მეტი გამოცდილება რომ მაქვს, საკუთარ თავზე ბევრ ინიციატივას ვიღებ.
ეკო: გადაცემის დაწყებამდე ნანიკოს ვეუბნები, ნახე, ეს და ეს მოვამზადე–მეთქი. ნანიკო საშუალებას მაძლევს, რადგან კვირაში ერთ დღეს, პარასკევს ვარ ეთერში და ჩემი რუბრიკაა, რაც მომზადებული მაქვს, ხალხს ვაჩვენო.
– ნანიკო, როცა თქვენზე ასეთ შეფასებებს ისმენთ, გწყინთ თუ შეეჩვიეთ?
ნანიკო: არც მწყინს და ამას არც შეჩვევა უნდა. ამას დაფიქრება სჭირდება, რატომ ხდება ასე. როცა პირველად "დღის შოუში" დავჯექი, დიდი გამოცდილება მქონდა, დოდოშკა ხურცილავას და ია ფარულავას კი – არა. ბევრი რამ საკუთარ თავზე მე კი არ ავიღე, ამაღებინეს, ამიტომ შეიძლება მეტწილად ბევრ რამეს მე უფრო ვაკეთებდი, ვიდრე სხვები, მაგრამ რა ვქნა, თუ ასე ჰგონიათ.
ეკო: ხალხს ისიც ჰგონია, რომ ტუჩები დავიბერე, მაგრამ ასე არაა.
– ეკრანის მიღმა აგრძელებთ ურთიერთობას?
ნანიკო: მე ისეთი მეგობრებისთვისაც კი არ მრჩება დრო, ვისთან ერთადაც გავიზარდე და ძალიან ჩემები არიან. მიყვარს, ჩემი დრო და სივრცე რომ მაქვს და მაქსიმალურად ვიყენებ. სახლში ყოფნა მიყვარს.
ეკო: მე ხელოვნების ხელშეწყობის ფონდ "ავტოგრაფშიც" ვმუშაობ. გია ყანჩელის ექსპერიმენტული კონცერტი ჩვენ გავაკეთეთ, ძალიან მალე ირაკლი ჩარკვიანის წიგნის პრეზენტაცია გვექნება, რომელსაც ასე ერქმევა – "ამბავი მეფეზე". ჩემს უახლოეს მეგობრებს ყოველდღე ვნახულობ, ასე თუ ისე მეგობრებს – კვირაში ერთხელ. ოთხი ძმისშვილიდან ერთს მე ვუვლი. რაც უფრო მეტ საქმეს ვაკეთებ, მით უფრო მობილიზებული ვარ. ცოტა ხანში შეყვარებული რომ მეყოლება, იმასაც მოვუვლი, იმას ვენაცვალე მე! ჩემს ძველ შეყვარებულზე არაფერი მკითხოთ, იმის გარდა კიდევ მყავდა შეყვარებულები, ამაზე რატომ არ მეკითხებით?!
– იმიტომ, რომ თქვენი და მომღერალ ბექა ჩხაიძის სიყვარულის ამბავი ძალიან გახმაურდა. ბევრს აინტერესებს, ახლა რა ხდება თქვენს ურთიერთობაში?
ეკო: ეს პრესისთვის დამთავრებული თემაა.
– წეღან რომ თქვით, ცოტა ხანში შეყვარებული მეყოლებაო, ესე იგი გამოჩნდა ვინმე?
ეკო: როცა მეყოლება, ხომ მეყოლება? ყოფილა ეტაპი, როცა შეყვარებული არ მყოლია, მაგრამ ეს დიდხანს არ გაგრძელებულა.
– მეჩვენება, რომ შეყვარებული ხართ და არ ამბობთ.
ეკო: პირველი სიტყვა რა თქვით? დიახ, ყველაფერი გეჩვენებათ, არავინ მყავს!
ნანიკო: ამას კარგი შეყვარებული რომ ჰყავდეს, დამალავდა კი არა, "დღის შოუში" დაგვიჯდებოდა!
ეკა ლემონჯავა, ჟურნალი სარკე