მზია ორველაშვილს "ცეკვებმა" უკრაინელი ქმარი, საშა ოხრიმენკო, აპოვნინა

პროექტის "ცეკვავენ ვარსკვლავები" მონაწილე, პროფესიონალი მოცეკვავე მზია ორველაშვილი თითქმის ერთი წელი მალავდა რომანს ამავე პროექტის ქორეოგრაფთან, უკრაინიდან მოწვეულ საშა (ალექსანდრ) ოხრიმენკოსთან. თურმე კულისების მიღმა ორი სეზონის განმავლობაში დიდი სასიყვარულო ვნებები თამაშდებოდა. მათ ურთიერთობას გულშემატკივრობდნენ კონკურსანტებიც და ჟიურის წევრიც – ერთ სეზონში მზიას მეწყვილე, ოთარ ტატიშვილი. ბევრი რომ არ გავაგრძელოთ, მზია და საშა მალე ქართულ–უკრაინულ ქორწილს გადაიხდიან, სადაც ოთარ ტატიშვილს ვერავინ შეეცილება თამადობაში.
როგორ დაიწყო მოცეკვავისა და ქორეოგრაფის სიყვარულის ამბავი და რა სირთულეებთან არის დაკავშირებული სხვადასხვა ქვეყნების შვილების ურთიერთობა, ამის შესახებ წყვილი თავად გვიამბობს.
– როგორ აღმოაჩინეთ ერთმანეთი?
მზია: როცა პროექტის მეორე სეზონზე მიმიწვიეს, ვიცოდი, რომ ქორეოგრაფები ისევ დიმა დიკუსარი და ალიონა შოფტენკო იქნებოდნენ, მაგრამ აღმოჩნდა, რომ მესამე ადამიანიც დადგამდა ცეკვებს. ეს იყო საშა. დავინახე თუ არა, მაშინვე მომეწონა და ცოტა გავეპრანჭე. ძალიან მალე დავიწყეთ შეხვედრები.
– საშა, თქვენც თავიდანვე მოგეწონათ მზია?
საშა: თავიდან, როგორც საქმეს სჭირდებოდა, ისე ვუდგებოდი ყველა მოცეკვავეს, მაგრამ ერთ დღეს მზიას "ჩაჩაჩას" შევხედე და უცებ მივხვდი, რომ სხვანაირად აღვიქვი. ძალიან კარგად ცეკვავდა.
– ურთიერთობის გაღრმავებასთან ერთად რა საერთო თვისებები აღმოაჩინეთ ერთმანეთში?
საშა: ჩვენ ცეკვის სიყვარული გვაერთიანებს, ერთნაირი მუსიკალური გემოვნებაც გვაქვს. მზიას თვისებების 95 პროცენტი ჩემთვის მოსაწონია. ხასიათში მას აქვს როგორც ძალიან კარგი მხარეები, ასევე ცუდიც.
მზია: ზოდიაქოს ნიშნით ორივე მორიელი ვართ და ხშირად ვეჯახებით ერთმანეთს.
საშა: შეიძლება ერთ წამში უმნიშვნელო მიზეზით წავკამათდეთ, მაგრამ მალევე გვავიწყდება.
მზია: ეგრევე ვრიგდებით, უერთმანეთოდ ვერ ვძლებთ. 5 წუთიც რომ გავიდეს, ერთმანეთს ვურეკავთ.
– სამსახურში მალე შეამჩნიეს თქვენი ურთიერთდამოკიდებულება?
საშა: როცა ორ ადამიანს ერთმანეთი მოსწონს, ეს გარშემომყოფებისთვის შეუმჩნეველი არ რჩება. დიმა და ალიონა მეკითხებოდნენ, როგორ მიდიოდა ჩვენი ურთიერთობა და მეც ვუყვებოდი. მათ ეს მოსწონდათ, რჩევებსაც მაძლევდნენ. ყველა მხარში გვედგა.
მზია: სამსახური სამსახურია და იქ გრძნობების აფიშირება უადგილოა, მაგრამ მე და საშა თუ 5 წუთს გამოვნახავდით თავისუფალს, ერთმანეთს სულ ვეკონტაქტებოდით. ხშირად ერთმანეთის პირისპირ ვიდექით, მაგრამ ინტერნეტს და მობილურს ვიყენებდით კომუნიკაციისთვის, რადგან არ გვინდოდა, ჩვენი გრძნობებით სხვების ყურადღება მიგვექცია.
– თქვენი სიყვარულის განსაკუთრებული ქომაგი ვინ იყო?
მზია: ოთარ ტატიშვილი განსაკუთრებით გვგულშემატკივრობდა. სულ მეუბნებოდა, ძალიან კარგი ბიჭია, მასთან ბედნიერი იქნებიო. კონკურსანტებიც – ეკო ფანგანი, ეკა ნიჟარაძე, ია სუხიტაშვილი, ძალიან გვქომაგობდნენ. ურთიერთობების გაღრმავებაში დაგვეხმარნენ. ჩვენს ქორწილში თამადა ოთარ ტატიშვილი იქნება. ის ჩვენთვის უკვე ოჯახის წევრივით არის.
საშა: ოთარი კეთილი სულის ადამიანი, ძალიან მაგარი პიროვნებაა.
– როგორი იქნება ქართულ–უკრაინული ქორწილი?
საშა: უკრაინაში და საქართველოში ბევრი მეგობარი მყავს – მშობლები, ნათესავები, უახლოესი მეგობრები... ხალხი აქეთ–იქით რომ არ ვატაროთ, ალბათ ორ ქვეყანაში მოგვიწევს ქორწილის გადახდა. ვფიქრობ, აქაც და იქაც პატარა ქორწილს გადავიხდით. კონკრეტულ თარიღს ჯერ არ ვიტყვით, მაგრამ ეს უახლოეს მომავალში იქნება.
– ერთმანეთის მშობლები ალბათ უკვე გაიცანით.
საშა: თავიდან ცოტა მეშინოდა მზიას მშობლების გაცნობა. მსმენოდა, რომ ქართველი მამები ძალიან მკაცრები არიან. თან ერთხელ მზიას მამის ხმა მოვისმინე – ძლიერი, მამაკაცური და საკმაოდ სახიფათო. მაგრამ მზიამ სახლში რომ მიმიპატიჟა, მის ოჯახის წევრებთან ძალიან სასიამოვნოდ გავატარე დრო.
მზია: საშას მშობლები უკრაინაში ყოფნისას გავიცანი, როცა პროექტის მეორე სეზონი დასრულდა. მათ საოცრად თბილად მიმიღეს. ისეთი შეგრძნება მქონდა, თითქოს სულ ვიცნობდით ერთმანეთს. მომწონს მათი ქორწილის ტრადიცია, სადაც პატარძალი თავის მამასთან ერთად ცეკვავს. მინდა, ქორწილში მამასთან ერთად ვიცეკვო. საშასთვის ქართული ტრადიციებიდან უცხო აღმოჩნდა ღვინის სმა ფიალებით.
– მზია, თქვენი შვილი, ლევანი, როგორ გააცანით საშას, როგორი ურთიერთობა დამყარდა მათ შორის?
მზია: საინტერესო ის არის, რომ საშამ თავიდან არც იცოდა, შვილი რომ მყავდა. მე მეგონა, ამ ამბავს დიმასგან და ალიონასგან შეიტყობდა. ხშირად ვსაუბრობდი შვილზე, მაგრამ რატომღაც ყურადღება არ მიუქცევია. მე კი ვფიქრობდი, რომ იცოდა. ერთ დღესაც ჩემი შვილი საცეკვაო დარბაზში შემოვიდა და საშას რომ გავაცანი, ძალიან გაუკვირდა.
საშა: იმიტომ გამიკვირდა, რომ მანამდე არ ვიცოდი. შემდეგ კი ვთქვი, შვილი ჰყავს და ეს კარგია–მეთქი. ძალიან საყვარელი, პატარა, სიმპათიური ადამიანია.
– საშა, ლევანის გული მალე მოიგეთ?
საშა: მალე დავუახლოვდით ერთმანეთს. ცოტა ხანში კი მთაწმინდის პარკშიც დავიწყეთ სიარული ხელჩაკიდებულებმა.
მზია: საშა ძალიან თბილი ადამიანია, ლევანს გაცნობისთანავე დაუმეგობრდა. მას ახლა ისეთივე ურთიერთობა აქვს ჩემს შვილთან, როგორიც ჩემს ყოფილ ქმარს. საშა ძალიან ყურადღებიანია, ყველაფერს აკეთებს მისთვის და ამით ბედნიერი ვარ.
– მზია, წინა ოჯახური ცხოვრების გამოცდილება ახალში გამოგადგებათ?
მზია: საერთოდ, ყველა ურთიერთობა ინდივიდუალურია... ახლა შედარებით დამყოლი ვარ, ვიდრე ადრე ვიყავი. დღეს ბედნიერი ვარ და ვფიქრობ, რომ ჩემი მეორე ნახევარი ვიპოვე.
– მოცეკვავეს მუდმივად სხვადასხვა პარტნიორთან უწევს ცეკვა. ეს თქვენთვის ეჭვიანობის მიზეზი არ გახდება?
მზია: მე, მაგალითად, ძალიან ეჭვიანი ვარ. მესამე სეზონის დროს რამდენჯერმე ძალიან ვიეჭვიანე. იყო ისეთი მომენტები, რომლებზეც საუბარი არ მსურს. საშასგან რაღაც გარკვეული, ჩემთვის მიუღებელი მზერა დავიჭირე სხვა ქალის მიმართ, ამიტომ პატარა კონფლიქტი გვქონდა. ბოლოს გამაგებინა, რომ ეჭვიანობა არ მჭირდება, რადგან მე ვუყვარვარ და თუ ლამაზ ქალს გააყოლებს თვალს, ეს არაფერს ნიშნავს. როცა ძალიან ლამაზი კაცის გვერდით დგახარ, მუდმივად არსებობს ეჭვის საფუძველი, მაგრამ საბოლოოდ მივხვდი – 100 პროცენტით უნდა ვიყო დარწმუნებული, რომ საშას მე ვუყვარვარ და ჩემია! ასე რომ, არ მჭირდება ეჭვიანობა, თუმცა ცოტ–ცოტა შეიძლება.
საშა: მე ვიცი, მზია სად არის, რას აკეთებს, მის პარტნიორებსაც ვიცნობ. ვიცი, რომ ვუყვარვარ, მიყვარს და ეს საკმარისია. თუ ადამიანს არ უნდა შენთან ერთად ყოფნა, ამისთვის პროფესია საბაბი არ გახდება და, თუ უნდა, შენ გვერდით იყოს, პროფესია არ გახდება ხელისშემშლელი.
– საშა, მზიას მიმართ, როგორც ქორეოგრაფი, ობიექტურობას ინარჩუნებთ თუ შეცდომებზე სიყვარულით თვალს ხუჭავთ?
საშა: არანაირად ვხუჭავ თვალს! თუ რამე არ მომწონს, ისევე თავისუფლად ვეუბნები მზიას, როგორც სხვა მოცეკვავეებს. ვფიქრობთ, კონკურსებზეც ერთად გამოვიდეთ.
– სად აპირებთ ცხოვრებას, საქართველოში თუ უკრაინაში?
საშა: კონკრეტული პასუხი ჩვენც არ გვაქვს. დრო გვიჩვენებს ყველაფერს. შეიძლება აქ დავრჩეთ, შეიძლება წავიდეთ.
მზია: ან ორივე ქვეყანაში ვიცხოვროთ – ხან აქ, ხან უკრაინაში.
მანანა ნოდია, ჟურნალი სარკე