ვანო ჯავახიშვილი: "მე სხვა მაფია მაქვს, ნანუკა ჟორჟოლიანს – სხვა"

ორი ტელესახე, შოუს წამყვანები ნანუკა ჟორჟოლიანი და ვანო ჯავახიშვილი, ექსკლუზივებს ისევ ვერ იყოფენ. იყო პერიოდი, როცა სხვადასხვა ტელეკომპანიაში მუშაობდნენ და სტუმრების გადასაბირებლად აკრძალულ მეთოდებსაც იყენებდნენ, მაგრამ ახლა ერთ მოედანზე არიან და ამიტომ ერთმანეთს ინდობენ, თუმცა მათ შორის პირადი კონკურენცია მაინც არსებობს. ვანოსთვის ნანუკა და მისი იმიჯი შიგადაშიგ სახუმარო თემად იქცევა ხოლმე, ნანუკას ყვითელი გადაცემისთვის კი ვანო უკვე ამოწურული თემაა, რადგან ის დახურული ადამიანია და პირად თემებზე საუბარი არ უყვარს.
თუ როგორია ორი "ტელემაფიოზის" კონკურენცია–კოლეგიალობა, ამის შესახებ თავად გვიამბობენ.
– ნანუკა, მახსოვს, ერთხელ ვანო ჯავახიშვილი განსაკუთრებულ სტუმრად გყავდათ მიპატიჟებული. ინტერვიუზე დიდხანს არ გთანხმდებოდათ?
ნანუკა: განა ნანუკას არ თანხმდებოდა, მაშინ "იმედსა" და "რუსთავი 2"–ს შორის მძაფრი კონკურენცია იყო. რთული იყო იქიდან აქ მოსვლა და აქედან იქ მისვლა. ეს იყო მხოლოდ ტელეკომპანიების პოლიტიკიდან გამომდინარე.
ვანო: ტელეკომპანიებს შორის უაზრო ახირებები იყო. ნანუკასთან დიდი ხანია ვმეგობრობ და არასდროს მქონია დაბრკოლება. უბრალოდ არხებს ჰქონდათ დაბრკოლება და ეს აბსოლუტური სისულელე იყო.
ნანუკა: მაშინ ჩემი გადაცემა "ღამის შოუს" სტუდიის ქუდის ქვეშ გადიოდა და ამიტომ მაშინ ამაზე მძაფრი რეაქცია გოგიჩას (დათო გოგიჩაიშვილი. ავტ.) ჰქონდა (ცნობილი დაპირისპირება ვანო ჯავახიშვილისა და დათო გოგიჩაიშვილის გუნდებს შორის. ავტ.). პრინციპში, ამ გადაცემის შემდეგ "ღამის შოუს" ქუდი მოვხსენი კიდეც. ჩემთვის რა მნიშვნელობა აქვს, პოლიტიკური კონიუნქტურა დამიბლოკავს სტუმარს თუ კონკრეტულად ჩემი ხელმძღვანელი.
– როგორ გახსენდებათ ისტორია ვანოს "ძეგლის" დადგმასთან დაკავშირებით?
ნანუკა: საქართველოში მარტივია რამის აგორება. ვანოს, როგორც "დემოკრატიის შუქურას", ძეგლი გავუხსენით თემქაზე, რა თქმა უნდა, ვიხუმრეთ. მის შოუში როცა მივდივარ, სისხლს მიშრობს, ჩემს ჩაცმულობაზეც ბევრს ხუმრობს. ძალიან სახალისო იყო, რომ ძეგლის გახსნას პოლიტიკური ფიგურებიც კი სერიოზულად განიხილავდნენ, ამბობდნენ, ვანოს ნაციონალებმა ძეგლი გაუხსნესო. როცა აღმოჩნდა, რომ ძეგლი ნაციონალებმა კი არა, მე გავუხსენი, ისე შერცხვათ, თავიანთი პოსტებიც კი წაშალეს.
ვანო: თემქის ცენტრი საპატრულოს შენობის გვერდით არის. სასწაული დაკავშირება მოახდინეს, საპატრულოს შენობასთან ვანო ჯავახიშვილის ძეგლი იდგა, ესე იგი ვანო მერაბიშვილმა გაუხსნა, აბა, სხვა ვინ გაუხსნიდაო. სხვათა შორის, გახსნაზე ბევრი ხალხი იყო. ვიღაცეები თვლიდნენ, რომ ეს ძეგლი იქ უნდა მდგარიყო. კიდევ ერთი გასართობი მიეცა ხალხს, სურათებსაც იღებდნენ.
ნანუკა: ვანო ყოველდღე მირეკავდა, ნანუკა, ხუმრობა დამთავრდა, ძეგლი აიღეო. იცით, ამ ძეგლის დადგმის ნებართვას რამდენ ხანს ვითხოვდით? მახსოვს, ძალიან ბევრი განცხადება შევავსეთ. მოკლედ, ვანო ყოველდღე მთხოვდა ძეგლის აღებას, მე კი ჩემი პირობები მქონდა, ამას თუ გააკეთებ, ავიღებ–მეთქი.
ვანო: ერთ–ერთი პირობა ნანუკასთან სტუმრობა იყო. ვეუბნებოდი, ყველაფერს გავაკეთებ, ოღონდ ეს ძეგლი აქედან მომაშორე–მეთქი. როგორც იქნა, აიღო, მომიტანა და ოთახში დამიდგა. დღემდე იქ დგას.
– ნანუკა, როგორი რესპონდენტი გამოდგა ვანო?

ნანუკა: თუ არ ვცდები, ვანოსთან პირველად უკრაინიდან ჩამოსვლის შემდეგ ვიყავი, მაშინ მას ასე კარგად არ ვიცნობდი. აღმოვაჩინე, რომ ის სრულიად არამანერული ტიპია და გადაცემის წაყვანისას ძალიან ბუნებრივია, მაგრამ, როგორც რესპონდენტი, ჩაკეტილია, რაღაც თემებზე საუბარი არ უყვარს. რამდენადაც თავისი გადაცემის წაყვანის დროს ძალიან ღიაა, იმდენად დახურული ტიპია, როგორც რესპონდენტი. მიუხედავად იმისა, რომ რთულად გასახსნელი რესპონდენტია, მაინც გყვება, რადგან თავადაც შოუს წამყვანია და ზუსტად იცის, რომ შოუ უნდა შექმნას.
ვანო: ნანუკა როგორიც გადაცემაშია, ისეთივეა ცხოვრებაშიც. როცა ერთმანეთთან სტუმრად მივდივართ, სულ მომზადებულები ვართ.
ნანუკა: იმიტომ, რომ ერთმანეთს რაღაცეებს "ვუჩალიჩებთ".

ვანო: ჰო, იმაზე ვართ გადართული, ვინ უფრო მოგებული დარჩება. პატარა, მეგობრული დაპირისპირება გვაქვს ხოლმე. ჩემთან გადაცემაში რამდენჯერაც ნანუკა მოსულა, ყოველთვის კარგი გამოგვსვლია, რადგან ერთმანეთს კარგად ვეწყობით. ბევრი სტუმარია, რომელიც ჩვეულებრივად მოდის, ჯდება და იქაურობას ტრიბუნად იყენებს, მხოლოდ თავის საქმეს აკეთებს და ჩემს საქმეს – არა. ნანუკა როცა ჩემთან მოდის, იცის, რომ თავისი საქმეც უნდა გააკეთოს და ჩემიც.
ნანუკა: ისეთი სტუმარი, რომელიც მოვა, რაიმე ეპატაჟურს გააკეთებს და გაგაკვირვებს, ძალიან ცოტაა, მაქსიმუმი, ათი კაცი იყოს ასეთი. შემდეგ კი ამბობენ, აღარ გვინდა ეს ერთი და იგივე ხალხიო.
ვანო: როცა "ნანუკას შოუ" იწყება, მთელი ოჯახი ვსხდებით და ვუყურებთ. პირველ რიგში, ნანუკას ჩაცმულობას ვაკვირდები, რომ მერე ვიხუმრო.
ნანუკა: მალე კარგ თემას მივცემ, კლასიკურიდან ჩემს ძველ ჩაცმულობაზე გადავდივარ.
– ნანუკა, ვანოს პოლიტიკურ იუმორს ბევრი მიიჩნევს ტენდენციურად. თქვენი აზრით, ვანო მიშისტია?

ნანუკა: ძალიან მიკვირს, ვანო ჯავახიშვილზე რომ ამბობენ, ერთი მიმართულებით ხუმრობსო. ვანო რომ მიხეილ სააკაშვილზე ხუმრობდა, არ მგონია, ამდენი ვინმეს ეხუმრა, იმ მწვანე სპორტულებით სისხლი გაუშრო. შოუს წამყვანს თემა უნდა მისცე, მიხეილ სააკაშვილი კი იმ სტილის პოლიტიკოსი იყო, რომელიც ბევრ "საღადაო" თემას აძლევდა. ასეთი წამყვანია, მეტ თემას ვინც მისცემს, იმაზე იხუმრებს...
ვანო: მაგალითად, მიხეილ სააკაშვილზე ხუმრობას დღესაც მთხოვენ, მაგრამ ახალი მთავრობა მოვიდა, რომელიც უამრავ მასალას მაძლევს და ვერ გამოვტოვებ. ამიტომ გამოდის, რომ ხელისუფლებაზე მეტი ხუმრობა მაქვს, ვიდრე ოპოზიციაზე, რომელიც ფაქტობრივად ისეთს არაფერს აკეთებს, რომ იხუმრო. ერთი ამბები იყო ატეხილი, სააკაშვილის ხელისუფლების დაკვეთებს ასრულებსო. ძალიან დიდი ვიდეო გავაკეთე, რომელიც მხოლოდ იმ ხუმრობებზეა აწყობილი, რაც სააკაშვილსა და წინა ხელისუფლებაზე მქონდა. ამ ვიდეოს ცოტა ხანში დავდებ, რომ აღარ თქვან, მხოლოდ ამ ხელისუფლებაზე ხუმრობს და მიკერძოებულიაო. ძალიან მკაცრი ხუმრობები მქონდა, მაგალითად, ბანერზე გახსნილი ქარხნების შესახებ. ამაზე ხალხი "ღადაობდა", ნაციონალებს აღარ უჯერებდნენ, რომ რაღაცას ხსნიდნენ.
ნანუკა: მახსოვს, ვანომ სააკაშვილი გარკვეული პერიოდი კომბინიზონით ამოიჩემა. მე მის ადგილას ბევრ რაღაცას პიროვნულ შეურაცხყოფად მივიღებდი.
ვანო: სხვათა შორის, ნანუკასთანაც ის პრობლემაა, რაც ჩემთან, მაგალითად, სტუმრის. არსებობენ სტუმრები, რომლებიც მთლიანად გაყურებინებენ შოუს, არსებობენ სტუმრები, ვისაც რაღაცეები უნდა გამოწოვო. ნანუკასთან ძირითადად ყვითელი თემებია. არსებობს თემები, რომლებზეც სულ ვხალისობ. მაგალითად, ვიღაცამ თქვა, მე ბოზი ვარო. ასეთ სტუმარს ვერ მოვიყვან, რადგან თემას ვერ გავშლი, ნანუკა კი კარგად შლის.
– ნანუკა, რა კატეგორიის სტუმრები არიან თქვენთვის ყველაზე "მომგებიანი"?
ნანუკა: სხვათა შორის, რუსეთიდან ჩამოსული რესპონდენტები, თუნდაც ქართველები, ძალიან გახსნილები არიან. იცით, ჩემი თავი რაში დამიჭერია? მათი თავისუფლება მაკომპლექსებს. ყველა თემაზე საუბარი შეუძლიათ, მათ შორის იმაზეც, ბოლოს სექსი როდის ჰქონდათ. ჩვენ, ქართველი ჟურნალისტები ხომ ასეთ კითხვებს არ ვსვამთ. მაგალითად, თეონა კონტრიძეს შეუძლია ისეთ თემებზე ისე ღიად გესაუბროს, რომ გაოცებული ვარ.
– როცა რესპონდენტი გადაცემაში სტუმრობაზე უარს გეუბნებათ, რა ხერხები გაქვთ მის დასათანხმებლად?
ნანუკა: არის რესპონდენტი, რომელსაც არ "დავკერავ". მაგალითად, ერთი–ორისგან უარი მიმიღია, თან გაურკვეველი მოტივაციით, ზოგს ტელეკომპანია უქმნის პრობლემას. როცა "იმედზე" ვიყავი, ის ტელეკომპანია უქმნიდათ პრობლემას, ახლა "რუსთავი 2"–ზე ვარ და ახლა ეს ტელეკომპანია უქმნით პრობლემას, გავგიჟდი! ერთადერთი რესპონდენტი, ვისაც მუდმივად, უარის მიუხედავად, ვურეკავდი, შალვა ნათელაშვილი იყო. როგორი უარიც უნდა ეთქვა, მაინც ვურეკავდი. ერთხელაც აღმოვაჩინე, რომ ეს ჩემი ბატონი შალვა, რომელსაც 2 წელი "ვკერავდი", ვანო ჯავახიშვილთან იყო სტუმრად. ოოო, იქ ამბავი მოხდა!..

ვანო: ჩემთან იმიტომ მოვიდა, რომ მე 3 წელი "ვკერავდი".
ნანუკა: შალვა ხომ უმაგრესია, პიარს უმაგრესად გრძნობს და ზუსტად იცის, მერე შენ როგორ უნდა "დაგკეროს". ზუსტად ერთი კვირა რეკავდა და ამბობდა, რომ მთელ შემოქმედებით ჯგუფს შესარიგებლად ხინკლებზე გვეპატიჟებოდა.
– კიდევ რომელი პოლიტიკოსების "დაკერვა" იყო შედეგიანი ან უშედეგო?

ვანო: შალვა ნათელაშვილს მართლა 3 წელი "ვკერავდი", რაღაც ხუმრობებიც სწყინდა, მაგრამ მას შემდეგ, რაც ჩვენთან პირველად მოვიდა, მოდის და მოდის. ხელისუფლების წარმომადგენლებიდან ძალიან ბევრთან ვრეკავ, რომლებიც ყოველგვარი მიზეზის გარეშე სტუმრობაზე უარს მეუბნებიან. მაგალითად, ბოლოს ალექსი პეტრიაშვილს ვესაუბრე, რომელმაც მითხრა, გახსნილი ტიპი არ ვარ და ნუ მომიწვევო.

ნანუკა: შალვა ნათელაშვილმა მე ის არ მაპატია, ტიტველი გოგოები რომ მოვიყვანე და შალვას ითხოვდნენ. თუ პატივისცემა გინდოდა, სახლთან მაინც მოგეყვანაო, მითხრა. გადაცემაში სტუმრობაზე კახი კალაძისგან თანხმობა მივიღე, რასაც პოლიტიკური ბატალიები მოჰყვა. ირაკლი ღარიბაშვილმა კი მითხრა, თუ მსგავს გადაცემაში წავალ, აუცილებლად შენთან მოვალო. კატეგორიული უარი გიორგი მარგველაშვილმა მითხრა. მას ვერც მივუახლოვდი, რომ ამეხსნა, ჩემთან ნეგატიური არაფერი კეთდება და ეს გამოეყენებინა. ჩემგან პოლიტიკოსი ყოველთვის მოგებული მიდის.
ვანო: ჯერ ახლები არიან და არ იციან. არც ჩემი გადაცემიდან წასულა სტუმარი უკმაყოფილო. ბოლოს კახა კუკავა მყავდა, არადა ამბობდა, იუმორის გრძნობა არ მაქვსო. იმ საღამოს მომწერა, შენ რა პოპულარული ყოფილხარო. ეტყობა, გადაცემის შემდეგ ძალიან ბევრი ზარი შეუვიდა.
ნანუკა: სხვათა შორის, კახა კუკავა და ზვიად ძიძიგური ძალიან კარგი რესპონდენტები არიან. ისინი არასდროს არც ერთ პოლიტიკურ კონიუნქტურას არ ექვემდებარებოდნენ. როცა ყველა აპროტესტებდა აქ მოსვლას, ისინი სტუმრობაზე ყოველთვის თანახმა იყვნენ.
– მიუხედავად იმისა, რომ ერთ არხზე ხართ, ერთმანეთს ალბათ მაინც კონკურენტებად აღიქვამთ.

ნანუკა: კი, როგორ არ ვართ კონკურენტები! საერთოდ, გუნდური მოთამაშე ვარ. სხვათა შორის, ეს ჩემი და მაია ასათიანის ურთიერთობასაც დაეტყო. მე ნებისმიერი გადაცემის კონკურენტი ვარ, რომელიც რეიტინგს წერს. ახლა ვანომ რომ გითხრათ, მინდა, ნანუკამ მომიგოსო, მოგატყუებთ. ბუნებრივია, ყველას გვინდა, რომ რეიტინგი გვქონდეს, მაგრამ, თუ ვხედავ, რომ ჩემი არხის გადაცემას ვინმე სხვა უგებს, უბედურება მემართება!
ვანო: ჩვენი გადაცემების რეიტინგზე მეტად მთავარია, რომ არხი იყოს პირველი, ამის შემდეგ მოდის ჩვენი კონკრეტული რეიტინგები.
– ვანო, მახსოვს, როცა ნანუკა ამ ტელეკომპანიაში გადმოვიდა, იხუმრეთ, ამ არხებზე ექსკლუზივების მაფია მე მეკუთვნისო. წაგართვათ ეს მაფია?
ვანო: ჯერ ჩვენი გზები არ გადაკვეთილა, მე სხვა ექსკლუზივების მაფია მაქვს, ნანუკას – სხვა.
ნანუკა: ერთ კონკრეტულ მაგალითს გეტყვით: მოლაპარაკება გვქონდა რეპერ ქულიოსთან. როცა გავიგეთ, რომ ის ვანოსთან მიდიოდა, მოლაპარაკება აღარ გავაგრძელეთ, რადგან ამ არხზე მოდიოდა. რომ ეთქვათ, სხვა არხზე მიდისო, იქ უბედურებას ჩავიდენდი.
– ნანუკა, ვანო თქვენს ჩაცმულობაზე რომ ხუმრობს, თქვენ თუ მოგწონთ მისი კლასიკური სამოსი?
ნანუკა: ვანოს ჩვეულებრივი კლასიკური ჩაცმულობა აქვს და რა უნდა ვთქვა? ასეთი შოუს წამყვანს ასეც უნდა ეცვას, სპორტულებით რომ გამოვიდეს, ხომ გადავირიე!
ვანო: ნანუკას ჩაცმულობაში ყველაფერი მომწონს, უბრალოდ უნდა იღადაო!
– ერთმანეთს პიროვნულად კარგად იცნობთ?
ვანო: მე თვითონ არ ვიცი ჩემი ხასიათი და ნანუკამ რა უნდა გითხრათ?
ნანუკა: ვანო ყველაზე უბოროტო ტიპია, რომელსაც სტუმრის დანდობა შეუძლია. ძალიან შეყვარებული ქმარია. როცა ერთად სადმე ვყოფილვართ, ეს შემიმჩნევია. პირად ურთიერთობებს ძალიან უფრთხილდება, რაც ჩემთვის ძალიან მნიშვნელოვანია. რაღაცეების მიმართ კომპლექსიანია, ძალიან გახსნილი არ არის, მაგრამ ისეთია, მისი დანახვა სულ რომ გიხარია.
ვანო: ნანუკა კომპლექსიანი არ არის, ძალიან გახსნილია და ყველაფრის პირში თქმა იცის, მოსწონს თუ არ მოსწონს. ეს ძალიან კარგი თვისებაა.
– პოპულარობას ოდესმე შეუწუხებიხართ?

ვანო: არ მიყვარს, როცა არჩევნების პერიოდში ვხდები პოპულარული. ამ დროს მაყურებელი განსაკუთრებულად ემოციურია, განსაკუთრებულად გულშემატკივრობს თავის პოლიტიკურ ფავორიტს და შესაბამისად მასზე ნათქვამი ყველა ხუმრობა უარყოფითად ესმის. ჩვენ კიდევ ხომ სულ არჩევნების რეჟიმში ვართ. წელიწადში ერთხელ დგება პერიოდი, როცა ძალიან დიდი ლანძღვის რეჟიმში მიწევს მუშაობა. ამ დროს მინდა, რომ ძალიან უცნობი ტიპი ვიყო, რომელიც ქუჩაში ჩვეულებრივად დადის.
ნანუკა: მე ამ ყველაფრით ვცხოვრობ, პოპულარობით კი არა, ადამიანებთან ურთიერთობით. ყველაზე მძიმედ აღვიქვამ, როცა ჩემი მეორე ნახევრის ან მისი ოჯახის წევრების მიმართ აგრესია ჩემზე გადმოაქვთ. მაგალითად, ჩემი ქმრის დედაზე დაიწყებენ საუბარს და კომენტარებში მე მომდგებიან, ამას ვერ ვიგებ! არც ჩემი პირადი ცხოვრების თემა დამთავრდა, რომელსაც 9 წელია ღეჭავენ. ეს თემა რომ არ სრულდება, მგონია, ძალით, ხელოვნურად უჩიჩხინებენ.
ეკა ლემონჯავა, ჟურნალი სარკე