რა შანსები აქვთ ქართველ წყალბურთელებს ევროპის ჩემპიონატზე

ქართველმა წყალბურთელებმა წელს დიდ წარმატებას მიაღწიეს. ევროპის ჩემპიონატის შესარჩევი ტური გაიარეს და 12 უძლიერეს გუნდთან ერთად ევროპის ჩემპიონობისთვის იბრძოლებენ. წყალბურთელების ასეთი წარმატება სასიხარულოცაა და ცოტა გასაკვირიც, რადგან ამ სპორტს საქართველოში დიდი ყურადღება არ ექცევა. რამდენიმე წლის წინ ნაკრების დაშლაზეც კი იყო ლაპარაკი. ''რეიტინგი'' საქართველოს ნაკრების წევრ გიორგი ხვედელიანს ესაუბრა.

- ეროვნული ნაკრები პირველად მოხვდა ევროპის ჩემპიონატზე. ევროპის თორმეტ საუკეთესო გუნდს შორის ვართ.
- ელოდით ასეთ წარმატებას?
- სურვილი, რა თქმა უნდა, გვქონდა, მაგრამ ევროპის ჩემპიონატის შესარჩევი თამაშების დაწყების წინ ნამდვილად არ გვიფიქრია, რომ რთულ გზას გავივლიდით და ძლიერ მეტოქეებს დავამარცხებდით. თხუთმეტი თამაში გავმართეთ, ცამეტი გამარჯვება, ერთი ფრე და ერთი წაგება გვქონდა. ძალიან მაგარი შედეგია, თურქეთი არ მიიჩნეოდა ადვილ მეტოქედ და ვფიქრობდით, რომ მათთან გამარჯვების შანსი არ გვექნებოდა. ეს ყველაფერი ანგარიშზეც აისახა. თურქეთი ორი თამაშის შედეგით ჩვიდმეტით თექვსმეტი დავამარცხეთ.
- ევროპის ჩემპიონატზე ყველაზე ძლიერ მეტოქედ ვინ მიიჩნევა?
- თორმეტივე ნაკრები ძლიერია და მათ შორის რვა უძლიერესია. ნებისმიერი მათგანი შეიძლება გახდეს ევროპის ჩემპიონი. ამ რვა ნაკრებში ჩვენ, რა თქმა უნდა, არ ვართ. აუტსაიდერებად მოვიაზრებით, რადგან ევროპის ჩემპიონატზე პირველად მოვხვდით. წინასწარ არ ვიცი, რა შედეგს ვაჩვენებთ, მაგრამ რეალურად რომ ვიმსჯელოთ, რვა გუნდი ხელშეუხებელია და მათთან მოგება შეუძლებელი ან რთული იქნება. ჯგუფიდან უნდა გავიდეს სამი ნაკრები. ჩვენი ჯგუფიდან გასვლის რეალური კანდიდატები არიან მონტენეგრო, საბერძნეთი და იტალია. ჩვენი მიზანია, რვა გუნდში შევიდეთ, ამ შემთხვევაში საქართველო მსოფლიო ჩემპიონატის საგზურს მოიპოვებს და ეროვნული ნაკრები კიდევ უფრო დიდ ნაბიჯს გადადგამს წინ.
- ვინ იქნება თქვენი პირველი მეტოქე?
- ევროპის ჩემპიონატს ჩვენ ვხსნით. ცამეტ ივლისს საქართველო-რუმინეთის მატჩი იქნება, ვიმედოვნებთ და ვგეგმავთ, მეტოქე დავამარცხოთ. რუმინეთის ნაკრებს ერთხელ, 2013 წელს შევხვდით და დაძაბულ ბრძოლაში დავამარცხეთ. მართალია, ეს ამხანაგური ტურნირი იყო, მაგრამ ეს შედეგი მაინც რაღაცას ნიშნავს.
- შენ შესახებ გვიამბე.
- 25 წლის ვარ. დამთავრებული მაქვს 55-ე სკოლა. პროფესიით იურისტი გახლავართ. ივანე ჯავახიშვილის სახელობის უნივერსიტეტი დავამთავრე, მაგრამ სპეციალობით არასდროს მიმუშავია. მყავს მეუღლე ნინო ენუქიძე და შვილი ნიკოლოზ ხვედელიანი, რომელიც წლისა და რვა თვისაა.
- წყალბურთით როდის დაინტერესდი?
- რვა წლის ასაკში შემიყვანეს წყალბურთზე იმის გამო, რომ ბავშვობაში ადვილად ვცივდებოდი, წყალბურთი კი სხეულის გასაკაჟებლად საუკეთესო სპორტად ითვლება. წყალბურთმა იცის ადამიანის ''მოწამვლა''. მეც მათ შორის ვარ. ძალიან შემიყვარდა ეს სპორტი.
- ზღვაზე დასვენებისას, ალბათ, ბევრი ადამიანი გყავს გადარჩენილი.
- არასდროს არავინ გადამირჩენია, თუმცა ბავშვობაში მქონდა მაშველობის სურვილი და ვინმეს თუ დავინახავდი, რომ იხრჩობოდა, გადავარჩენდი.
- რთული სპორტია?
- გასულ წელს წყალბურთი ყველაზე დამღლელ სპორტად აღიარეს. წყალში დიდხანს ყოფნა რთულია, როდესაც გეჭიდავებიან, გირტყამენ და გახრჩობენ. ამ დროს უნდა მოახერხო და ბურთი გაიტანო. ამიტომაც ხშირად 3-4 წუთში ერთხელ ცვლიან მოთამაშეებს. წყალბურთი რაგბიზე უფრო დამღლელ სპორტად მიიჩნევა.
- წყალბურთი შემოსავლიანი სპორტია?
- ნამდვილად არაა შემოსავლიანი. ფეხბურთისა და წყალბურთის ბიუჯეტის შედარებაც კი სასაცილოა. საქართველოს საწყალოსნო ეროვნული ფედერაციის ბიუჯეტი შარშან 400 000 ლარი იყო. საწყალოსნო ფედერაციაში კი ოთხი სპორტი შედის.
- სპორტსმენი ბიჭები ყოველთვის პოპულარულები არიან გოგონებში. სანამ ცოლს შეირთავდი, გოგონები ყურადღებით გაწუხებდნენ?
- ახლა წყალბურთი შეიძლება გახდეს პოპულარული, მაგრამ სანამ ცოლს მოვიყვანდი, ქართული წყალბურთი ძალიან ცუდ მდგომარეობაში იყო და არავინ გვიცნობდა. იყო მომენტი, როცა ვფიქრობდით, რომ აღარ ვიყავითY ეროვნულ ნაკრებში და წყალბურთს თავს ვანებებდით. 2009 წელს მე და ჩემი თანაგუნდელები სამსახურებს ვეძებდით. სანდრო ბითაძემ, რომელიც ახლა ჩვენი ფედერაციის ვიცე-პრეზიდენტია, გადაარჩინა წყალბურთი. მოიძია ფინანსები და ვარჯიში თავიდან დავიწყეთ.
- მეუღლე რა პროფესიისაა?
- მარკეტოლოგია, ილიას უნივერსიტეტის ბიზნესის ფაკულტეტის დეკანის მოადგილეა და ამავე უნივერსიტეტში ლექციებსაც კითხულობს. ჩემი ჰობია მეუღლესთან ერთად მოგზაურობა. ვცდილობთ, როგორც კი თავისუფალ დროს გამოვნახავთ, სამოგზაუროდ წავიდეთ.
- წყალბურთი მეგობრული სპორტია, თუ არის წყალბურთელებს შორის დაპირისპირებები?
- წყალბურთელები ცოტანი ვართ, ყველა ერთმანეთთან ვმეგობრობთ.
- მართლა ძალიან ცოტანი ხართ. აქამდე წყალბურთელ ირაკლი კუტალაძეს ვიცნობდით.
- ირაკლის კარგად ვიცნობ. მოსკოვში ვთამაშობდი ერთი პერიოდი და მაშინ გავიცანი.
- ირაკლისთან ერთ გუნდში თამაშობდი?
- მე მოსკოვის ''ცეესკაში'' 2006-07 წლებში ვთამაშობდი. მერე გერმანიაში გადავედი სათამაშოდ. ირაკლი - მოსკოვის ''დინამოს'' წევრი იყო. მე და ირაკლის საქართველოს ნაკრებში რამდენჯერმე ერთად გვითამაშია. ბაბუამისი, გივი ჩიქვანაია, ევროპის ერთ-ერთი საუკეთესო წყალბურთელია.
- წინაპრებში სპორტსმენი არ გყოლია?
- არავინ ყოფილა ჩემს ოჯახში სპორტსმენი.
- მოსკოვიდან გერმანიაში სათამაშოდ რატომ გადახვედი? იმის გამო, რომ ქართველი ხარ, პრობლემები ხომ არ შეგექმნა?
- კლუბთან არ შემქმნია პრობლემები. იმ პერიოდში, როდესაც მოსკოვში ვთამაშობდი, 2007 წელს ქართველებზე ვიზების გაცემა შეწყდა და მოსკოვიდან ამის გამო წამოვედი. გერმანია კი იმიტომ დავტოვე, რომ კლუბის მფლობელებთან რაღაცებზე ვერ შევთანხმდი.
- მეუღლეს შეუყვარდა წყალბურთი?
- ნინო თამაშებზე სულ მოდის, გულშემატკივრობს საქართველოს ნაკრებს და ზედმეტად ნერვიულობს. შანსი არ არის, ადამიანი ერთხელ მივიდეს აუზზე წყალბურთის საგულშემატკივროდ და არ შეუყვარდეს ეს სპორტი. მით უფრო მაშინ, როდესაც შენი ძალიან ახლობელი ადამიანი თამაშობს.
- გინდა, რომ შენი შვილიც წყალბურთელი გახდეს?
- ჯერ მხოლოდ წლის და რვა თვისაა, მაგრამ აუზს რომ ხედავს, ყოველთვის ცდილობს, ჩავიდეს. არასდროს არაფერს დავაძალებ. რადგან მე მენდომება, არასდროს ვეტყვი, წყალბურთს გაჰყევი-მეთქი. რა თქმა უნდა, შევიყვან ცურვაზე, იმიტომ რომ ძალიან კარგია ჯანმრთე-ლობისთვის და გარდა ამისა, წინასწარ ვიცი, რომ ძალიან კარგი სამეგობრო წრე ეყოლება და ბევრ რამეს ისწავლის. პირველ რიგში, დამოუკიდებელ ცხოვრებას.
- რომელ ქვეყანაშია ყველაზე პოპულარული წყალბურთი?
- უნგრეთში, სადაც ტარდება ევროპის ჩემპიონატი. ბოლოს ისინი გახდნენ მსოფლიო ჩემპიონები. ოლიმპიადა ხორვატიამ მოიგო. სერბეთს, რუმინეთს, ესპანეთს, მონტენეგროს ძალიან კარგი ნაკრებები ჰყავს. ვინ ვის მოუგებს, წინასწარ ვერ იტყვი.
- ქართველი ქალი წყალბურთელები რატომ არ გვყავს?
- ქალი წყალბურთელების თბილისის ''დინამო'' სსრკ-ს ჩემპიონი იყო. ადრე ქალი წყალბურთელები უფრო წარმატებულები იყვნენ. თბილისის ''დინამოს'' მამაკაცების გუნდი საბჭოთა კავშირის ჩემპიონი არასდროს გამხდარა. უკვე დაიწყო ამ თემაზე მუშაობა და უახლოეს მომავალში ქალთა ნაკრებიც გვეყოლება.

მერი კობიაშვილი
ჟურნალი ''რეიტინგი''