ანა ზუბაშვილი: "წითური თმა ჩემი მთავარი პლუსია, მას არასოდეს შევიღებავ"

ერთი თვის წინ "მის საქართველო"–ების რიცხვს 20 წლის ანა ზუბაშვილი შეემატა. მან 2013 წლის ყველაზე ლამაზი გოგონას გვირგვინთან ერთად "ტოიოტა რავ 4"–იც მიიღო. ლამაზმანის სიმაღლე 177 სანტიმეტრია, წონა – 52 კილოგრამი, სხეულის პარამეტრები კი მოდელისთვის იდეალური – 90–60–90.
ანას ოჯახი ცხინვალიდან არის დევნილი. სამაჩაბლოს ომის დროს სახლ–კარი დაკარგეს და მას შემდეგ მშობლიური კუთხე აღარ უნახავთ. ომგამოვლილმა დედ–მამამ გოგონას ასწავლეს, რომ წინააღმდეგობების დაძლევა შრომითა და მიზანდასახულობით არის შესაძლებელი. ანა სამოდელო კარიერის პარალელურად სხვა პროფესიასაც ეუფლება – ილიას უნივერსიტეტში ბიზნესფაკულტეტზე სწავლობს. ბიზნესს, როგორც რთულად ამოსახსნელ ამოცანას, ისე უყურებს, ხოლო ადრე გათხოვებას – როგორც განვითარებისა და წარმატების შანსის დაკარგვას.
– ანა, როგორც ვიცი, ცხინვალის რეგიონიდან ხართ. გაგვაცანით თქვენი თავი, ოჯახის წევრები.
– ცხინვალიდან ვართ დევნილები. ჩვენი სახლ–კარი ომის პერიოდში განადგურდა. მას შემდეგ ჩემი ოჯახი მშობლიურ მხარეში არ დაბრუნებულა. დედა და მამა ბიოლოგები არიან, მაგრამ პროფესიით არ მუშაობენ. მყავს 14 წლის ძმა და 24 წლის და. ჩემი და ცხინვალშია დაბადებული. 10 თვის იყო, მშობლებთან ერთად იქაურობის დატოვება რომ მოუხდა. მე თბილისში დავიბადე, 1993 წელს, მაგრამ გორში გავიზარდე, 11 წლის ასაკში რომ ვიყავი, თბილისში დავბრუნდით. ამჟამად ილიას სახელმწიფო უნივერსიტეტში მეორე კურსზე ვარ და ძალ–ღონეს არ ვიშურებ იმისთვის, რომ იქაც წარმატებული ვიყო.
– რატომ გადაწყვიტეთ სილამაზის კონკურსში მონაწილეობა?
– უკვე დიდი ხანია, სამოდელო სფეროში ვარ, "მის საქართველოს" კონკურსი კი ჩემთვის ერთგვარი გამოწვევა იყო. მაინტერესებდა, რამდენად შევძლებდი დაგროვილი გამოცდილების გამოყენებას. მიმაჩნია, რომ ეს მოვახერხე. ამას გარდა, ეს საუკეთესო კონკურსია პროფესიული განვითარებისა და საკუთარი თავის რეალიზებისთვის. მინდა, ყველა გოგონას ვურჩიო, რომ თამამად და ყოველგვარი ეჭვების გარეშე მიიღონ მონაწილეობა, რადგან ჟიური თითოეულ მონაწილეს ობიექტურად აფასებს.
– როგორი იყო თქვენი ცხოვრების რეჟიმი "მის საქართველოს" კონკურსამდე და რა შეიცვალა მის შემდეგ?
– ჩემი ცხოვრება ამ კონკურსამდეც ძალიან საინტერესო, მრავალფეროვანი და დატვირთული იყო. ვსწავლობდი და ამავე დროს მოდელობით ვიყავი დაკავებული. ამ კონკურსმა კი ჩემი ცხოვრება კიდევ უფრო მრავალფეროვანი გახადა. ფლობდე საქართველოს ყველაზე ლამაზი ქალის ტიტულს, ძალიან დიდი პასუხისმგებლობაა ქვეყნის წინაშე, რადგან საერთაშორისო ასპარეზზე საქართველო მე უნდა წარვადგინო. ასევე ძალიან დიდ პასუხისმგებლობას ვგრძნობ ოჯახისა და სააგენტოს წინაშე. მინდა, მათი იმედები გავამართლო.
– როცა ერთ დღეს, როგორც თავად აღნიშნეთ, ქვეყნის ყველაზე ლამაზი ქალის ტიტული მქონე გახდით, რა ემოცია დაგეუფლათ?
– ჩემს ემოციებზე საუბარი დღესაც ძალიან მიჭირს. ბედნიერებისა და სიხარულის გადმოცემა სიტყვებით რთულია. ეს ყველაფერი სიზმარს ჰგავს, რომელიც დღემდე გრძელდება.
– ემზადებოდით გამარჯვებისთვის?
– დიახ, გამარჯვებისთვის ვემზადებოდი, მაგრამ ეს კონკურსი ჩემთვის, პირველ რიგში, გამოცდილებისთვის და ადამიანებთან ურთიერთობისთვის იყო მნიშვნელოვანი.
– იცნობთ წინა წლების გამარჯვებულებს, მათგან რაიმე რჩევა მიგიღიათ?
– თამთა შედანიას და ჯანეტ ქერდიყოშვილს ვიცნობ. მათთან ძალიან ვმეგობრობ და ისინიც მთელი გულით მგულშემატკივრობდნენ, თავიანთ გამოცდილებას მიზიარებდნენ.
– თქვენი გარშემომყოფების, მეგობრების, ოჯახის წევრების პირველი ემოცია როგორი იყო გვირგვინის დადგმის შემდეგ?
– მეგობრები ყოველთვის მირჩევდნენ, ამ კონკურსში მიმეღო მონაწილეობა, თუმცა ზოგიერთი მათგანი სკეპტიკურად უყურებდა ამ ყველაფერს, რადგან ფიქრობდნენ, რომ კონკურსში ჩაწყობით იმარჯვებდნენ. მე ზუსტად ვიცოდი, რომ ჟიურის წევრები ყველა მონაწილეს ობიექტურად აფასებდნენ, ამიტომ ეჭვების გარეშე მივიღე მონაწილეობა. გამარჯვებით კი მეგობრებს სტერეოტიპი დავუმსხვრიე, რომ ამ კონკურსში ჩაწყობით იმარჯვებენ. ჩემი წარმატებით ყველა ძალიან ბედნიერი იყო. საოცარი განცდაა, როცა ხედავ, ვისაც უყვარხარ და გიყვარს, შენით რომ ამაყობენ. ჩემი მშობლების და და–ძმის თანადგომას ყოველ ფეხის ნაბიჯზე ვგრძნობ. თამამად ვიტყვი, რომ ჩემი ყოველი წარმატება მათი დამსახურებაა. სამოდელო ბიზნესი ისეთი სფეროა, სადაც იმედები ხშირად გიცრუვდება, რადგან ძალიან დიდი კონკურენციაა. ამ დროს მშობლის თანადგომა ძალიან ბევრს ნიშნავს. ისინი ყოველთვის მეუბნებიან, რომ არ უნდა დავნებდე და უნდა ვიბრძოლო, ვიშრომო, ჩემი შესაძლებლობები მაქსიმალურად გამოვიყენო და ყველაფერს მივაღწევ. ვინც თვითონ მოიპოვებს სახელს, იგი ბევრად წინ არის იმაზე, ვისაც ეს სახელი მამა–პაპისგან რგებიაო – ვცდილობ, მშობლების რჩევები გავითვალისწინო.
– იშვიათი თმის ფერი გაქვთ – წითური. მის გამო გამორჩეული ყურადღება გიგრძვნიათ გარშემომყოფებისგან?
– ეს ბავშვობაში გარკვეულ კომპლექსებს მიქმნიდა, რადგან გამორჩეულად ვგრძნობდი თავს და უფრო მეტ ყურადღებას ვიქცევდი, ვიდრე სხვები. წლების მატებასთან ერთად მივხვდი, რომ თმის ფერი ჩემი "კოზირია". თმა დღეს ჩემი მთავარი პლუსია. მის გამო გადაღებებსა და ჩვენებებში ხშირად მიწვევენ. ყოფილა შემთხვევა, უთხოვიათ, თმა შეიჭერი ან შეიღებეო, მაგრამ ეს არის ის, რასაც არასოდეს დავთანხმდები.
– "მის საქართველოს" ტიტული გარკვეული ტრამპლინია. როგორ უყურებთ თქვენს მომავალს?
– ჩემთვის ეს ტიტული წარმატების კიბესთან ასოცირდება და ახლა ერთ–ერთ საფეხურზე ვდგავარ, სადაც გაჩერებას არ ვაპირებ. ამ ტიტულმა თავდაჯერება შემმატა.
– თუმცა ის წარმატებასთან ერთად გარკვეულ შეზღუდვებსაც გულისხმობს. რისი უფლება არ გაქვთ, თუნდაც გარკვეული ხნით?
– მე თვითონ შემეცვალა საკუთარი თავისადმი დამოკიდებულება მას შემდეგ, რაც "მის საქართველო" გავხდი. თუ ადრე სარკეში ჩაუხედავად შემეძლო გარეთ გასვლა, ახლა უფრო მეტი პასუხისმგებლობით ვეკიდები გარეგნობაზე ზრუნვას, სამოსს თუ ქცევას. კონტრაქტის მიხედვით, მხოლოდ გათხოვება მეკრძალება ერთი წლის განმავლობაში, თუმცა ამაზე ჯერ ისედაც არ ვფიქრობდი.
– ბიზნესფაკულტეტზე სწავლობთ. ამ სფეროში ხედავთ თქვენს მომავალს?
– ბიზნესი საკმაოდ რთული სფეროა. ძალიან დიდ ნებისყოფას და შრომას მოითხოვს. ეს ყველაფერი ჩემთვის ძალიან საინტერესოა. ბავშვობიდან მიყვარდა რთული ამოცანების ამოხსნა. ბიზნესი სწორედ ამოცანასავითაა ჩემთვის, რომლის ამოხსნასაც შევეცდები.
– რა გატაცებები, ინტერესები გაქვთ?
– კითხვა ძალიან მიყვარს. ყოველი ახალი წიგნის წაკითხვის შემდეგ თავს სულ სხვანაირად ვგრძნობ. კლასიკური მუსიკის დიდი თაყვანისმცემელი ვარ. ფილმების საყურებლად დიდი დრო არ მრჩება, ისე კი კომედიურ ჟანრს ვანიჭებ უპირატესობას.
– რა არის თქვენი ყველაზე დიდი ოცნება?
– ვოცნებობ, მსოფლიოში ყველა ცნობილი დიზაინერის ჩვენებაში მივიღო მონაწილეობა.
– სიყვარული უკვე გეწვიათ თუ ჯერ არ შეგხვედრიათ "ის ერთადერთი"?
– ასეთი ადამიანი ჯერ არ არსებობს.
– როგორი მამაკაცი წარმოგიდგენიათ თქვენ გვერდით?
– ვაჟკაცური, თავმდაბალი და პროფესიულად შემდგარი. თუ სიმპათიურიც იქნება, გამიხარდება. ვფიქრობ, ადრეულ ასაკში დაოჯახება ადამიანს განვითარების საშუალებას და შესაბამისად წარმატებულად დასაქმების შანსს ართმევს.
– მალე "მის მსოფლიოზე" უნდა წარდგეთ. როგორ ემზადებით?
– როგორც ფიზიკურად, ასევე ფსიქოლოგიურად ვემზადები. ძალ–ღონეს არ ვიშურებ იმისთვის, რომ ღირსეულად წარვდგე საერთაშორისო ჟიურის და მაყურებლის წინაშე.
მანანა ნოდია, ჟურნალი სარკე