რა სურვილი აისრულა ''პალიტრა TV''-ს ახალი გადაცემის წაყვანით გიორგი მეგრელიშვილმა

გიორგი მეგრელიშვილი ''პალიტრა TV''-ს ეთერში ახალი პროექტით გამოჩნდა. ''გვეთამაშე ჩვენ'' შოუების წაყვანაში გამობრძმედილი მსახიობისთვის კიდევ ერთი საინტერესო გამოცდილებაა, თუმცა ამასთანავე, როგორც გაგვანდო, ყველაზე სასურველიც, ვინაიდან შოუ ინტელექტუალურია და მიზნად წიგნისა და განათლების პოპულარიზაციას ისახავს.
ცნობილი ადამიანები ყოველ კვირა დღეს ესტუმრებიან გიორგის და 15 განსხვავებული სირთულის შეკითხვაზე მოუწევთ პასუხის გაცემა, სხვადასხვა სფეროდან. ყოველ ხუთ შეკითხვაზე სწორად გაცემული პასუხების შემდეგ სტუმარი თითო წიგნს მიიღებს. გადაცემის პარტნიორები არიან ''ბიბლუსი'' და ''პალიტრა L'', შესაბამისად, წიგნებსაც გამომცემლობა დააწესებს.
თავიდან შეკითხვებს სპეციალური ჯგუფი მოამზადებს, მოგვიანებით კი, რამდენიმე გადაცემის შემდეგ, მაყურებლებიც ჩაერთვებიან და ცნობილ მოთამაშეებს შეკითხვებს დაუსვამენ. თუკი მონაწილე მათ კითხვას ვერ უპასუხებს, დაწესებულ წიგნს შეკითხვის ავტორი მიიღებს.

- სხვადასხვა შოუს წაყვანის გამოცდილება მაქვს, მაგრამ დიდი ხანია მინდოდა, ასეთ სერიოზულ გადაცემას გავძღოლოდი. რატომღაც საქართველოში ასეთი ტენდენცია ჩამოყალიბდა, ტელევიზიით რაც უფრო დიდ სისულელეს იტყვი, მით უფრო ეცინებათ. იუმორის საწინააღმდეგო არაფერი მაქვს და არც აცრილი ვარ ამაზე, მაგრამ ზოგადად ვაფასებ სიტუაციას. დღეს ხალხი უფრო მეტად სისულელეს აქცე-ვს ყურადღებას, თუმცა მაინც მჯერა, რომ მაყურებელი არ არის სულელი და განათლებაც აქვს. უბრალოდ, ყველა ცდილობს თავის გაპიარებას მხოლოდ სისულელით. მე კი მომეცა შანსი, წავიყვანო კარგი გადაცემა, სადაც საუბარია წიგნებსა და ინტელექტზე. მომწონს ეს ტენდენცია, რომ ბოლო პერიოდში ამ ტიპის გადაცემებს უფრო დიდი ყურადღება ექცევა. ჩემი შვილი 11 წლისაა და ვცდილობთ, მას წიგნის სიყვარული ვასწავლოთ. ვინც ჩვენს გადაცემაში მოვა სათამაშოდ, დაამტკიცებს, რომ წიგნის სიყვარული მნიშვნელოვანია.
- ვინ იქნებიან თქვენი თამაშის მონაწილეები?
- ცნობილი ადამიანები სხვადასხვა სფეროდან. საჩუქრად ყოველ ხუთ კითხვაზე 15-დან თითო წიგნს მიიღებენ. მინდა აღვნიშნო, რომ ადვილი შეკითხვებია, ისტორიიდან, კულტურიდან, პოლიტიკიდან. იქნება დაახლოებით ასეთი ტიპის კითხვები: როგორ იწყება ''ვეფხისტყაოსანი'' ან ვინ გაფრინდა პირველი კოსმოსში. რასაკვირველია, არ შეიძლება, ადამიანმა ყველაფერი იცოდეს, მათ შორის, ჩვენც. თუკი რაიმე გაგვეპარება, მაყურებელს აუცილებლად დაველოდებით, გვექნება საკონტაქტო საშუალებები, რითაც მაყურებელს ჩვენთან დაკავშირება შეეძლება. ველოდებით მათ გამოხმაურებას. სპეციალური ჯგუფი მუშაობს შეკითხვების შედგენაზე, მეც ვმონაწილეობ ამ პროცესში. ვფიქრობ, ამ გადაცემით მაყურებელიც გაიხსენებს ბევრ რამეს, რაც დროის ფაქტორის გათვალისწინებით დაავიწყდა.
თითოეული შეკითხვისთვის ქვიშის საათი მუშაობს და ერთი წუთია გამოყოფილი. სხვათა შორის, პირველი გადაცემის ჩაწერისას დავაკვირდი, რომ ეს ერთწუთიანი სიჩუმე ქალებთან განსაკუთრებით ყოვლისმომცველია, თუკი ქალი მსახიობია, საერთოდ. ამას წინათ, ფილოსოფიისკენ წავედი და ბიბლიოთეკას ვესტუმრე. 15 წუთი გავატარე, უბრალოდ, მაინტერესებდა, როგორი გარემო დამხვდებოდა იქ. გამაყრუებელი სიჩუმე იყო, იქ ხომ არავინ ლაპარაკობს... გადაცემაში, რასაკვირველია, ასეთი სიჩუმე არ გვექნება (იღიმის).
- პირველ ჩაწერებზე თავი როგორ იგრძენით?
- პირველი ხუთი შეკითხვა ადვილად მიდის, მერე რთულდება და იწყება ფიქრი, რაც ძალიან საინტერესოა. შეიძლება, ზუსტი პასუხი არ იცოდეს, მაგრამ მოთამაშე აკვირდება ჩემს ინტონაციასაც კი, სიტყვებს, რომ ლოგიკურად მივიდეს პასუხამდე. სხვათა შორის, აქ სტუმრად მოსვლა დიდი გამბედაობაა, ეს ხომ არ არის გადაცემა, სადაც კურიოზის გახსენებას გთხოვენ...
- უარი ხომ არ უთქვამთ გადაცემაში მოსვლაზე?
- შესაძლოა, უთქვამთ, მაგრამ ჩემამდე პროდიუსერს არ მოუტანია, რადგან აუცილებლად დავასახელებდი მათ ვინაობას (იცინის). ვფიქრობ, გადაცემას თავი არავინ არ უნდა აარიდოს. ასეთი რამ მაბრაზებს. მეც მქონია ასეთი შემთხვევა, რომ ყველაფერი ვერ გამიხსენებია და შეკითხვებიდან, რომელიც ჟურნალისტს ინტელექტ-რუბრიკაში დაუსვამს, მხოლოდ 60%-ზე გამიცია პასუხი. თუმცა თავი ნამდვილად არ ამირიდებია. უფრო სასიამოვნოა რაღაც ახლის გაგება და ამაში მონაწილეობა. არცოდნა არცოდვაა.
მინდა, გადაცემაში რისკიანი ადამიანები მოვიდნენ, ინტელექტუალები, იუმორი რომ არ აკლიათ. მინახავს ბევრი ადამიანი, კროსვორდს რომ რამდენიმე წუთში ავსებს.
ვფიქრობ, ეს გადაცემა მეც წამადგება ჩემს პროფესიაში, ადამიანებთან ურთიერთობაში. სხვათა შორის, მაქს ვებერზე ისაუბრა დავით ზურაბიშვილ
მა, რომელმაც გადაცემაში მონაწილეობა მიიღო. მაშინ მივხვდი, რომ პოლიტიკოსებსაც შეიძლება, მორალი ჰქონდეთ (იცინის).
- თავად რა წიგნი წაიკითხეთ ბოლოს?
- ამ ბოლო დროს იუნგის გარშემო ვტრიალებ. ბოლოს კი წავიკითხე მაქსიმ კანტორის ''ხატვის სახელმძღვანელო''.
- გარდა გადაცემის წაყვანისა, კიდევ რას საქმიანობთ?
- სიამოვნებით გავუძღვებოდი გადაცემას ჯანსაღი ცხოვრების წესის შესახებ. შესაძლოა, ქართველისთვის ბოდიბილდინგსა და წიგნს შორის რაიმე საერთოს დანახვა რთული იყოს, მაგრამ ორივე ნებისყოფის გამოცდას უკავშირდება, ერთი - გონების, სულის, მეორე კი სხეულის გავარჯიშებას ემსახურება. მე თავადაც ვვარჯიშობ, მაგრამ ამაზე ახლა ბევრს არ ვილაპარაკებ.
რაც შეეხება საქმიანობის სხვა მიმართულებებს, ახლახან დავამთავრე მუშაობა ჩემს მეორე ფილმზე, სახელად ''ტრაქტორი'', გიზო ნიშნიანიძის ნაწარმოების მიხედვით. ამ ფილმში ვითამაშე კიდეც, ამ სიამოვნებას ვერ ვიკლებ. მაქვს დაგეგმილი შექსპირის ''ჰამლეტის'' თანამედროვე ვერსიის გადაღება. პრობლემა შესაძლოა, ფინანსურმა სირთულემ შექმნას, ზოგადად კი, მგონია, რომ უნდა გამომივიდეს. ყველა ადამიანს, ვინც ჩემნაირად არის მოწამლული საკუთარი პროფესიით, იმედი ყოველთვის აქვს.
- ოჯახზეც გკითხავთ...
- მყავს მეუღლე და ვაჟი. შესაძლოა, სიტყვა მიჩვევა არცთუ კარგად ჟღერს და იმედი მაქვს, წყვილებს არ ეწყინებათ, მაგრამ ცოლ-ქმარი ერთმანეთს ეჩვევა და ეს ძალიან დიდი ბედნიერებაა. ყოველდღე ერთმანეთს ხომ არ ვეუბნებით, მიყვარხარო, მაგრამ იგულისხმება. მე და ჩემი მეუღლე 12 წელია, ერთმანეთს მივეჩვიეთ და კარგი იქნება, თუკი ასე გაგრძელდება. ვერ წარმომედგინა, რომ შევძლებდი ცხოვრების ერთ ადამიანთან გატარებას. საკუთარი თავი სხვანაირი მეგონა. ზოგადად, არსებობს მოსაზრება, რომ ხელოვან ადამიანებს უჭირთ პირადი ცხოვრების მოწყობა, თითქოს საქმე მაშინ უფრო გამოსდით, თუკი პირადი ბედნიერება დანგრეული აქვთ. არ მომწონს, რომ პროფესიისთვის საკუთარი პირადის გაწირვა გიწევს. მეც მქონია ასეთი მომენტები, მაგრამ ეს კარგი არ არის... ყველა მსახიობს ჩვენ-ჩვენი ''ხუშტურები'' გვაქვს, თუმცა ამ ყველაფერს აქვს თავისი მოტივები.
- ალბათ, მეუღლეც დამთმობია.
- კი, იცის, რომ გადარეული ვარ. თავისი სიმშვიდით ბევრ რამეს მასწავლის. ნინო რუხაძეა, მაგრამ მინდა, მეგრელიშვილი იყოს (იცინის).
- თქვენს ვაჟს უნდა მსახიობობა?
- ბედნიერი ვიქნები, თუკი მსახიობი გახდება, ოღონდ მაღალი შემოსავალი ექნება (იღიმის).

ნინო მურღულია
ჟურნალი ''რეიტინგი''