"ერისიონის" პიარსამსახური: "სანამ ჩვენს გვამებს ჯერ კიდევ ორთქლი ასდიოდა, უკრაინის ანსამბლები რუსეთში კონცერტებს მართავდნენ"

ანსამბლი "ერისიონი" მოსკოვში მაინც გაემგზავრება და 29 ოქტომბერს კონცერტს არა კრემლში, არამედ "კროკუს სითი ჰოლში" გამართავს. ანსამბლის საზოგადოებასთან ურთიერთობის სამსახურის ხელმძღვანელი ლელა წიკლაური "გურია ნიუსთან" ამბობს, რომ ოქტომბრის კონცერტი, აპრილში ჩაშლილი კონცერტის სანაცვლოდ ჩატარდება, თუმცა ანსამბლის გამგზავრებაზე საბოლოო გადაწყვეტილება ჯერ არ მიუღიათ.

"ველაპარაკე როგორც ჯემალ ჭკუასელს, ასევე საპროდიუსერო სახლის ხელმძღვანელს ალეკო ლორთქიფანიძეს. ეს არის ის გადადებული კონცერტი, რადგან გახსოვთ ალბათ, რომ ჩვენ უარი ვთქვით კრემლზე უკრაინისადმი სოლიდარობის გამო. ძალიან სერიოზული და კოლოსალური ჯარიმა იყო, აქ მილიონებზეა საუბარი და ამავე დროს რეპუტაციაზეც. როდესაც მსოფლიოში სიდიდით და რეიტინგით მესამე საკონცერტო დარბაზზე ამბობ უარს, აქ რეპუტაციის შელახვაზეც არის საუბრი. შესაბამისად გამწარებული საპროდიუსერო კომპანია და მეორე მხარე საუბრობდა მაქსიმალურ ჯარიმაზე. სწორედ ამიტომ მოიძებნა ასეთი გამოსავალი. რადგანაც ბილეთები უკვე გაყიდული იყო და ვერავინ წარმოიდგენდა 1 წლის წინ ყირიმში რა მოხდებოდა. არ ვიცით ჯერ ზუსტად რას ვიზამთ, პროცესი ჯერ-ჯერობით მოლაპარაკების სტადიაშია, თუ გადავწყვიტეთ და მშვიდობაც იქნა, აუცილებლად წავა ანსამბლი. ანუ მოხდება გადმოდება ამ კონცერტის, თუმცა ზუსტად არ ვიცით რა ბედი ეწევა სანქციებს. ჩვენი უარი მაქსიმალურად შეურაცხმყოფელი იყო მათთვის და ამიტომ სანქციებსაც მაქსიმალურს ითხოვდნენ", _ ამბობს ლელა წიკლაური. მისივე განმარტებით ყოვლად გაუგებარია ის აჟიოტაჟი, რაც ანსამბლის მოსკოვში შესაძლო გამგზავრებას მოჰყვა. წიკლაური ამბობს, რომ საპროტესტო ტალღის და პეტიციის უკან კონკრეტული დაინტერესებული ჯგუფი იდგა.

"თქვენ თუ წახვალთ რუსეთის საელჩოში და ერთი კვირა ჩაატარებთ მონიტორინგს მიხვდებით ვინ და რამხელა რიგებში დგანან რუსეთის ვიზების მისაღებად, და რა გახდა ეს "ერისიონი", როდესაც საქართველოში ჩამოდიან რუსი მომღერლები, მსახიობები , დასები, ძალიან ბევრი ღონისძიება ტარდება და მაშინ ნუ შემოვუშვებთ მათ. ამიტომ პოლიტიკა და კულტურა უნდა გაიმიჯნოს ერთმანეთისგან. იქ "ერისიონს " ელიან არა მარტო რუსები, არამედ ქართული დიასპორის წარმომადგენლებიც. მე თვითონ ვარ მომსწრე გასულ წელს და ვხედავდი როგორ ხაოდა რუსი ხალხი, ეხუტებდონენ მოცეკვავეებს დ მადლობას უხდიდნენ იმისთვის, რომ ისინი არსებობდნენ. ეს არის სხვა ურთიერთობა და მაშინ 2008 წელს არავის არ უნდა დაავიწყდეს , რომ როდესაც ჩვენს გვამებს ჯერ კიდევ ორთქლი ასდიოდა, უკარიანის სახელმწიფო ანსამბლები, ისეთები როგორიც "ერისიონი" და "სუხიშვილები" მართავდნენ კონცერტებს რუსეთის სხვადასხვა ქალაქებში.

ასევე, ავიღოთ ნინო ქათამაძე და რაჭველი. კულტურული ურთიერთობები ძალიან კარგია, მაგრამ რატომ დადგა დარტყმის ქვეშ მაინცდამაინც "ერისიონი"? როგორც ჩანს სხვა ინტერესების გამო. ძალიან კარგად ვიცით ვინ დგას ამ პეტიციის უკან, თუმცა ამ პეტიციამდეც გვქონდა ანსამბლში მოლაპარაკება, რომ არავითარ შემთხვევაში კრემლში არ წავიდოდით", _ ამბობს წიკლაური.


”გურია ნიუსი”