როგორ გავატაროთ საცობში დრო სასარგებლოდ

მოდი, დავითვალოთ: ყოველ სამუშაო დღეს რომ მოგიწიოთ დღეში 15 წუთით მაინც საცობში ყოფნა, წელიწადში 5 დღე-ღამეზე მეტი გამოგივათ უქმად ყოფნა.

და ეს მხოლოდ დაკარგული დრო არ იქნება - ბევრი მძღოლისა და მგზავრისთვის ეს გაფუჭებული ნერვებია!

ჩვენ გასწავლით, როგორ გაატაროთ ეს დრო უფრო სასარგებლოდ და აუღელვებლად.

თუ თქვენ მგზავრი ხართ, რა თქმა უნდა, უფრო გაგიადვილდებათ საქმის გამონახვა: წაიკითხავთ წიგნს, "ჩაუჯდებით" ინტერნეტს, დაკავდებით ხელსაქმით, ისაუბრებთ ტელეფონზე და ასე შემდეგ.

მძღოლს ამ შემთხვევაში ნაკლებად უმართლებს - ის უნდა იჯდეს საჭესთან და აკონტროლოს გზა და რაიმეთი გართობა მხოლოდ მაშინ შეუძლია, როცა საცობი საერთოდ "უმოძრაოა". ამიტომაც ჩვენი რჩევები, პირველ რიგში, მათთვის არის, ვინც საჭესთან ზის.

თუ "მოძრავი" საცობია

მაშ ასე, თუ მანქანები ნელა, მაგრამ მაინც მოძრაობენ, თქვენი ფეხები, ხელები და თვალები ამ დროს სულ დაკავებულია. ამ შემთხვევაში თქვენ შეგიძლიათ:

1. დაურეკოთ ახლობლებს, მეგობრებს, პარტნიორებს ან ხელმძღვანელობას, პირველ რიგში, იმისათვის, რომ შეატყობინოთ, რომ გაგვიანდებათ. მეორეც - განიხილოთ რაიმე აუცილებელი საკითხი, რომ მერე ამისთვის აღარ დაკარგოთ ისედაც დაკარგული დრო. მაგრამ დაიმახსოვრეთ, გამოიყენეთ სპიკერფონი ან ბლუთუსი.

2. მოუსმინეთ აუდიოწიგნს

შეარჩიეთ თქვენი გემოვნებით საინტერესო ნაწარმოები. ამასთან, აუცილებელი არ არის, რომ მხატვრული იყოს. აუდიოწიგნები სხვადასხვა ჟანრის არსებობს. თუ მასზე ხელი არ მიგიწვდებათ, შეგიძლიათ გადმოტვირთოთ ინტერნეტით.

3. შეისწავლეთ უცხო ენა

იმეორეთ უცხო სიტყვები და ფრაზები დიქტორის კვალდაკვალ. ეს არა მარტო გაგიმდიდრებთ ლექსიკას, არამედ დადებითად აისახება თქვენს კარიერულ წინსვლაზეც.

4. აჰყევით მუსიკას

ეს დაგეხმარებათ სტრესთან გამკლავებაში, რომელიც ასეთ სიტუაციაში გარდაუვალია.

5. იფიქრეთ და ჩაწერეთ იდეები აუდიოპლეერზე ან მობილურის დიქტოფონზე.
მაგალითად, თუ თქვენ ჟურნალისტი ხართ, მწერალი ან პოეტი, შეგიძლიათ იდეები, მუზები დიქტოფონზე ჩაინიშნოთ. შემდეგ შეძლებთ, ეს ყველაფერი ფურცელზე გადაიტანოთ. ეს ტრიუკი ძალიან ეფექტურია და დროს დაგიზოგავთ.

6. დაეხმარეთ ბავშვს გაკვეთილების მომზადებაში

თუ თან ბავშვი გახლავთ, მასთან ერთად შეგიძლიათ დაიზეპიროთ ლექსი ან გადაიმეოროთ გამრავლების ტაბულა, მოუყვეთ რაიმე სასარგებლო და საინტერესო ისტორია, რაც შემდეგ სკოლაში გამოადგება. ბავშვიც არ მოიწყენს და თქვენი დროც სასარგებლოდ გავა.

7. გაიმკვრივეთ დუნდულებისა და მუცლის კუნთები

დაჭიმეთ დუნდულების კუნთები ერთად ან რიგრიგობით 2-3 წუთის განმავლობაში. შეზნიქეთ, შემდეგ კი გამოზნიქეთ მუცელი. თითოეული მოქმედება 1-3 წუთის განმავლობაში დააყოვნეთ. ვარჯიში გაიმეორეთ მინიმუმ 20-ჯერ. ბევრი ურჩევს საცობში სუნთქვითი ვარჯიშების გაკეთებას. ამის გაკეთება არ ღირს, რადგან ირგვლივ ჰაერი გამონაბოლქვი აირებით არის სავსე.

8. გააკეთეთ სახის ვარჯიშები
გაბერეთ და ჩაჩუტეთ ლოყები, მომუწეთ ტუჩები და დააკვირდით მეზობელი მანქანების მძღოლების რეაქციას.. თან კარგად გაერთობით, თან სახის კუნთებს გაივარჯიშებთ.

თუ თქვენ უმოძრაო საცობში ხართ

თუ თქვენ ძალიან არ გაგიმართლათ და უძრავ საცობში მოხვდით და ხელებიც დროებით თავისუფალი გაქვთ, თქვენ შეგიძლიათ:

9. მოაწესრიგოთ მანქანის პატარა სათავსო

10. ააწყოთ "კუბიკ-რუბიკი"

11. უყუროთ მანქანის ტელევიზორს ან ვიდეოს ინტერნეტში.

12. იმუშაოთ ან ისწავლოთ

მაგალითად, შეგიძლიათ დაწეროთ სტატია, შეადგინოთ თათბირის ოქმი ან წაიკითხოთ გაკვეთილი.

13. ითამაშოთ

მობილურ ტელეფონზე ან სხვა მოწყობილობაზე. თუ თქვენ მგზავრიც გახლავთ, მასთან ერთად შეგიძლიათ ითამაშოთ მინი-ჭადრაკი ან კარტი.

14. დაკავდეთ ხელსაქმით

თუ ქარგავთ ან ქსოვთ და თან გაქვთ წამოღებული ხელსაქმე, შეგიძლიათ ამით გაერთოთ. მაგრამ ფრთხილად იყავით ჩხირებთან და ნემსთან, არ დაიზიანოთ რამე.

15. დაბოლოს, თუ ძალიან ცუდ ხასიათზე ხართ, მოუსმინეთ ან მოყევით ანეკდოტები. როგორც ცნობილია, სტრესი სიცოცხლეს ამოკლებს, სიცილი კი - ახანგრძლივებს!

თავისუფალ გზას და მწვანე შუქს გისურვებთ, მაგრამ თუ ასე მაინც არ არის, მყარ ნერვებს!