ირინა ონაშვილი გიორგი მახარაშვილზე დედასავით ზრუნავს

მომღერალი გიორგი მახარაშვილი და "მის საქართველო 2003" ირინა ონაშვილი პროექტმა "ორი ვარსკვლავი" კარგ მეგობრებად აქცია. ბევრი დრო არ დასჭირდათ, რომ ერთმანეთის ხასიათი გაეგოთ და საერთო ინტერესებიც აღმოეჩინათ.გიორგი ირინას ქმარ ლადო ვარძელაშვილსაც დაუმეგობრდა, რომელიც იმდენად ჩაერთო პროექტში, რომ კომპიუტერში სიმღერებსაც კი არჩევდა, მათ დუეტს რა მოუხდებოდა. ირინას და გიორგის ერთმანეთზე სათქმელი უკვე ბევრი რამ დაუგროვდათ და "სარკესთანაც" სიამოვნებით ისაუბრეს.
– ირინა, როცა პროექტ "ორ ვარსკვლავში" შემოგთავაზეს მონაწილეობა, რა იყო ის მნიშვნელოვანი ფაქტორი, რის გამოც თანხმობა განაცხადეთ?
ირინა: სიმღერა ძალიან მიყვარს. ჩემს შესაძლებლობებშიც მეტნაკლებად დარწმუნებული ვიყავი და ამიტომ გავრისკე.
– თქვენ "მის მსოფლიოს" ერთ–ერთ ტურში იმღერეთ, 2005 წელს კი მუსიკალურ პროექტ "ჯეოსტარში" მონაწილეობდით. ახლა იყენებთ მაშინ მიღებულ გამოცდილებას?
ირინა: როგორც აღნიშნეთ, ეს ყველაფერი დიდი ხნის წინ იყო. მას შემდეგ ბევრი რამ შეიცვალა, მათ შორის, სიმღერისადმი ჩემი დამოკიდებულებაც. ასე რომ, იქ მიღებულ გამოცდილებას ვერ გამოვიყენებ, თანაც "ჯეოსტარი" ძალიან მალე დავტოვე.
– თქვენი წყვილი როგორ შეარჩიეს?
ირინა: ბევრი შემოთავაზება იყო, აქტიურად მირჩევდნენ, ვისთან შეიძლებოდა მემღერა, მაგრამ მე მაინც გიორგიზე გავაკეთე არჩევანი. ის პროექტ "ახალ ხმაში" გამოდიოდა, მოვუსმინე და ძალიან მომეწონა. სიმაღლითაც შევეფერებით ერთმანეთს.
გიორგი: რეპეტიციაზე ირინას ნამღერი რომ მოვისმინე, გავოცდი, ვერც კი წარმოვიდგენდი, ასე კარგად თუ მღეროდა.
– იმაზე რას ფიქრობთ, რომ გამარჯვება ესემესებზეა დამოკიდებული?
ირინა: ცუდი მომენტია, მაგრამ რომელი პროექტისთვისაც მიყურებია, ხალხი არჩევანში არასოდეს შემცდარა და მგონია, რომ ამჯერადაც არ შეცდება. ქართველი ხალხი ნიჭიერი ერი ვართ, ყველას გვაქვს სმენა და ამიტომ მათი ობიექტურობის იმედი მაქვს.
გიორგი: მეზიზღება, როცა ესემესების რაოდენობა წყვეტს, ვინ დარჩეს და ვინ წავიდეს პროექტიდან. უკვე მეხუთე პროექტში დამჭირდა ხალხის ესემესები მომდევნო ტურში გადასასვლელად.
– ირინა, მგონი, ხალხი არც ელოდა თქვენგან ამდენს.
ირინა: სხვათა შორის, საკუთარი თავისგან მეც არ ველოდი ამდენს. არ მიფიქრია იმაზე, ჩემი ხმის ტემბრს რომელი სიმღერა მოუხდებოდა. ძალიან კმაყოფილი ვარ ჩემი ნამღერით. ლადო თავიდანვე ძალიან ნერვიულობდა და ამ ყველაფერში ჩაერთო.
– ირინა, ამ პროექტმა ესტრადისკენ წასვლის სურვილი ხომ არ გაგიჩინათ?
ირინა: ცხოვრებაში მქონდა ეტაპი, როცა სიმღერების ჩაწერა დავიწყე, მაგრამ ამჯერად უკვე აღარ ვაპირებ.
– რატომ, ჟიურის შეფასებებმა ხომ არ გადაგაფიქრებინათ?
ირინა: ჟიურის წევრები ძალიან მაგრები არიან და მათი არც ერთი შეფასება მწყენია. მთავარია, ჩვენ საკუთარი თავის სწორად შეფასება შევძლოთ. როცა საკუთარ თავზე ზედმეტი წარმოდგენები გაქვს, ამ დროს შეიძლება ჟიური უსამართლო მოგეჩვენოს. სულ არ მწყენია თეონა კონტრიძისგან იმის მოსმენა, რომ რაღაც სიმღერები ჩემი არ არის და თავს კომფორტულად არ ვგრძნობ. ჟიურის ყველა წევრი თავისი საქმის პროფესიონალია, ყველა დეტალს ხვდებიან და, როგორ შემიძლია ვთქვა, რომ არაობიექტურები არიან?
– ნიკო ბერიძემ პროექტის დატოვების შემდეგ თქვა, ჟიური ჩვენ კი არა, არაპროფესიონალ მომღერლებს უნდა აფასებდესო. გიორგი, თქვენ როგორ თვლით?
გიორგი: ასეთ რაღაცეებზე პრობლემა არ მაქვს. შეიძლება ცუდად გამომდის, მაგრამ მე ჟიურისთვის კი არა, ხალხისთვის ვმღერი ყოველთვის. ჟიური თუ რაღაცას ისე ვერ მეტყვის, ამის გამო ნერვები რომ მოვიშალო და მეწყინოს, მაშინ სცენაზე დაბოღმილი უნდა გავიდე. ამიტომ არ მესმის, რატომ უნდა ვიშალო ნერვები და რატომ უნდა ვიყო ცუდ ხასიათზე.
– ერთმანეთის ხასიათს როგორ შეეწყვეთ?
ირინა: ჩვენ შორის ასაკობრივ ზღვარს თუ გავითვალისწინებთ, გიორგის მიმართ დედობრივი გრძნობა მაქვს. ვეკითხები ხოლმე, სახლში როდის მივა, თუ "ფეისბუქზე" გვიან არის შემოსული, ვწერ, რომ დაიძინოს, თორემ დილით ვეღარ ადგება და ა.შ.
გიორგი: მე ყველაფერში ვუჯერებ.
– პროექტს მაყურებლებისგან დიდი კრიტიკა მოჰყვა. თითქმის ყველა კონკურსანტზე თქვეს, ვერ მღერის, ამას აქ რა უნდაო. ამაზე რა რეაქცია გქონდათ?
გიორგი: ხალხის კრიტიკა ჩვენ შეგვეხო?
ირინა: მიხარია, რომ მათი კრიტიკა ჩვენ ყველაზე ნაკლებად შეგვეხო. გასართობი შოუა და ამიტომ არ შეიძლება ვინმეზე თქვან, რატომ მივიდა ამ პროექტშიო. ყველა პროფესიონალი მომღერალი რომ გამოვიდეს, ფორმატი დაირღვევა.
გიორგი: მიუხედავად იმისა, რომ კრიტიკა მე და ირინას არ შეგვხებია, ბევრი ისეთი ადამიანის სტატუსები ვნახე "ფეისბუქის" გვერდებზე, რომ ძალიან გამიკვირდა. არ ვიცი, "ტიპობენ" თუ რას ნიშნავს ეს. ზუსტად ვიცი, რომ ისინი, ვინც ასეთ რაღაცეებს წერენ, დიდი სიამოვნებით იქნებოდნენ ჩვენს ადგილზე. ამიტომ მათი მხრიდან ასეთი რაღაცეების წერა სირცხვილია. არც ერთი ის მონაწილე, ვისაც სიმღერასთან შეხება ჰქონია და ამ პროექტში მღერის, კრიტიკის ღირსი არ არის. და საერთოდაც, რა აბრაზებს ამ ხალხს, ვერ ვხვდები. თუ არ მოსწონთ, სხვა არხზე გადართონ. ფაქტი ერთია, გადაცემას ძალიან დიდი რეიტინგი აქვს, ამიტომ ასეთ სტატუსებს და ვიღაცეების აზრებს ყურადღება არ უნდა მიაქციო.
ირინა: ვინც პროექტის გაკრიტიკებაში აქტიურადაა ჩართული, მათ მინდა ვუთხრა, რომ ყველაფერს მარტივად შეხედონ. ორგანიზატორებს ძალიან რთული ამოცანა ჰქონდათ, ისეთი ხალხი უნდა ამოერჩიათ, ვინც ცნობილიც იყო და ამავდროულად მღეროდა კიდეც. ამ პროექტში მართლა დიდი შრომაა ჩადებული, ალბათ ჩემსავით მათაც დაივიწყეს ოჯახი, შვილები, სამსახური და ეს დეტალები გაითვალისწინონ.
– ირინა, როგორი იყო თქვენი ქმრის, ლადო ვარძელაშვილის რეაქცია, როცა უთხარით, რომ ასეთი ფორმატის პროექტიდან მიიღეთ შეთავაზება?
ირინა: ჩემი ქმარი ძალიან უპრობლემოა. 4 წელია ერთად ვართ და მისგან არასოდეს მქონია შეზღუდვები. უბრალოდ რჩევებს მაძლევს ხოლმე. როცა ვუთხარი, მონაწილეობის მიღება მინდა–მეთქი, დამთანხმდა.
გიორგი: სიმღერების შერჩევა რომ დაიწყო, ეგეც თქვი.
ირინა: ლადო ჩემი დიდი გულშემატკივარია, მთელი ჩემი ოჯახი გვერდით მიდგას.
– ირინა, კონკურსანტებს ოჯახის წევრები დარბაზიდან ამხნევებენ. მაყურებელი ალბათ პირველივე ტურში ელოდა თქვენი ქმრის ნახვას დარბაზში. რატომ არ მოვიდა ბატონი ლადო?
ირინა: ლადო ასეთი ტიპია. ხომ არიან ქმრები, რომლებიც ცოლებს თითქმის ყველგან დაჰყვებიან, ლადო – არა. ადრე არ ეცალა, ახლა კი აქვს ბევრი თავისუფალი დრო, მაგრამ მიჩვეული ვარ, რომ მარტომ უნდა ვიარო.
– გიორგი, თქვენ გაიცანით ლადო?
გიორგი: კი, აბა რა! მე და ლადო დავძმაკაცდით.
– თქვენ ვინ გქომაგობთ ყველაზე მეტად?
გიორგი: ოჯახის წევრები და სამეგობრო.
ირინა: შენი თაყვანისმცემელი გოგოები? გიორგის ბევრი თაყვანისმცემელი ჰყავს. გარდა იმისა, რომ კარგად მღერის და ვიზუალურადაც კარგი ბიჭია, ბევრი დადებითი თვისება აქვს.
გიორგი: ირინას ვეუბნები, კარგი გოგო გამაცანი–მეთქი და არავის მაცნობს.
ირინა: სიმღერასთან ერთად მაჭანკლობაც დავიწყო?
– ეტყობა, უკვე კარგად დაახლოვდით.
ირინა: კი, ასეა. დუეტში სიმღერა ძალიან რთულია. სცენაზე უცხოებივით რომ არ დავმდგარიყავით, გარკვეული დროის ერთად გატარება იყო საჭირო.
გიორგი: ირინა შესანიშნავი ადამიანია და მაგრად "მიტყდება", აქამდე რომ არ ვიცნობდი. ერთად მაგრად ვერთობით, ხან რუსთავში ავტორბოლას ვმართავთ, სადაც ირინა მჯობნის, ხან გუდაურში ვსრიალებთ და იქ უკვე მე ვჯობნი. ვუთხარი, პარაშუტით გადმოვხტეთ–მეთქი, მაგრამ უარს მეუბნება.
ირინა: გიორგი ექსტრემალია. მე კი სიმაღლის მეშინია და უარს ვეუბნები.
ქეთი დინოშვილი, ჟურნალი სარკე