"იმედია, ჩემი გმირის თვისებები ხასიათში არ გადამივა"

სერიალ ''ჩემი ცოლის დაქალებში'' ახალი გმირი, პარლამენტარ ცოტნე ცოტაშვილის ცოლი თიკა გამოჩნდა, რომლის როლსაც მსახიობი ვერიკო კალანდია ასრულებს.
მართალია, ვერიკოს სამსახიობო ფაკულტეტი აქვს დამთავრებული, მაგრამ დიდი ხანი არაა, რაც ამ სფეროშია ჩართული. ალბათ, გაგიკვირდებათ, როცა გეტყვით, რომ ვერიკო სერიალის პარალელურად მძლეოსანთა ფედერაციაში მუშაობს. თუ რა საქმიანობითაა დაკავებული, ამას თავად ჩვენი რესპონდენტი გიამბობთ.

- მსახიობობა ბავშვობიდან მინდოდა, სანამ თეატრალურ უნივერსიტეტში ჩავაბარებდი, ხელოვნების კოლეჯში ვსწავლობდი, სადაც სამსახიობო ოსტატობას დარეჯან ჯოჯუასთან გავდიოდი, მაგრამ აბიტურიენტობისას გადავწყვიტე, სულ სხვა მიმართულებით წავსულიყავი და იურიდიულზე ჩამებარებინა, ერთი წელი ამ ფაკულტეტზე ვისწავლე და შემდეგ წელს თეატრალურ უნივერსიტეტში ჩასაბარებლად გამოცდები თავიდან გავიარე, ასე მოვხვდი დათო კობახიძის ჯგუფში.
სწავლის დამთავრების შემდეგ ერთ-ერთი სარეკლამო სტუდიის მთავარი პროდიუსერის ასისტენტად დავიწყე მუშაობა, ახლა კი მძლეოსნობის ფედერაციაში ახალგაზრდული ოლიმპიური ფესტივალის ''თბილისი 2015''-ის საორგანიზაციო კომიტეტის ღონისძიებათა დეპარტამენტში ვმუშაობ. ეს გრანდიოზული, ახალგაზრდული სპორტული ფესტივალი 2015 წლის ივლისში ტარდება. საქართველოს ევროპის 49 ქვეყნიდან სპორტსმენები, ჟურნალისტები და სპეციალური სტუმრები ეწვევიან, ღონისძიება კი მსოფლიო ტელესივრცის მეშვეობით გაშუქდება.
- როგორ მოხვდი სერიალში ''ჩემი ცოლის დაქალები''?
- ''ჩემი ცოლის დაქალების'' მეოთხე სეზონში ეპიზოდური როლი ვითამაშე, მას შემდეგ, თუკი კასტინგი ტარდება, კასტინგმენეჯერი ეკა მჟავანაძე ყოველთვის მატყობინებს, ამჯერადაც ასე მოხდა. სამსახური ახალი დაწყებული მქონდა, როცა ''რუსთავი 2''-დან დამირეკეს და მისვლა მთხოვეს, ვიფიქრე, კასტინგზე მიბარებდნენ, თუმცა იქ მისულს მითხრეს, რომ როლზე დამტკიცებული ვიყავი, ძალიან გამიხარდა, მაგრამ შემეშინდა, არ ვიცოდი, როგორ შევუთავსებდი ორ სამსახურს ერთმანეთს. არ მინდოდა, არჩევანის წინაშე დავმდგარიყავი. მადლობა ფედერა-ციას, რომ ნებას მრთავენ, გავაკეთო ის საქმე, რაც ასე ძალიან მიყვარს, თუმცა ეს პროექტი ჩემთვის არანაკლებ მნიშვნელოვანია და ძალიან ბედნიერი ვარ, რომ ასეთი მნიშვნელოვანი ღონისძიების ორგანიზებაში ჩავერთე.
- კიდევ რას გვეტყვი შენი სამახიობო გამოცდილების შესახებ?
- თეატრალური უნივერსიტეტის დასრულების შემდეგ რამდენიმე თვე მოზარდ მაყურებელთა თეატრში ვიყავი, მაგრამ მერე GMG-ში გადავინაცვლე... უკვე ორი თვეა, სოხუმის თეატრის დასში ვარ, ახლა მერაბ ყოლბაია დგამს სპექტაკლს, რომელშიც დაკავებული გახლავართ. გარდა ამისა, სხვადასხვა რეკლამაში, საფესტივალო ფილმებში, ქართულ სერიალებში ეპიზოდური როლებიც მითამაშია, მაგრამ ასე ჩამოყალიბებული და გამოკვეთილი პერსონაჟი არასდროს განმისახიერებია.
- რაც შეეხება შენს გმირს, მოგვიყევი მის შესახებ.
- თიკა ''სწერვა'', ეჭვიანი ცოლია ''ისტერიჩკული'' გამოხტომებით, პროფესიით არის ფსიქოლოგი და ცდილობს, ოჯახში, მეუღლის თვალში ჭკვიანი ქალის შთაბეჭდილება დატოვოს. ეს ალბათ ერთგვარი კომპლექსია, რომელზეც მის ქმარს ხშირად ეცინება. თან, იცი, როგორი ფსიქოლოგია? უნივერსიტეტის დამთავრების შემდეგ რომ ამ სფეროს არ გაჰკარებია, მაგრამ ახლა კაბინეტი გახსნა და მისი დაპიარება უნდა, ბოლოს და ბოლოს, წარმატებული ადამიანის ცოლია.
- მიუხედავად იმისა, რომ შენი გმირი ძალიან ეჭვიანია, ქმარი მის მოტყუებას მაინც ახერხებს.
- კი, მართალი ხარ, ჯერჯერობით ვერ ხვდება, ან იქნებ, თავს იტყუებს, რომ ის პრივილეგიები და ოჯახური მდგომარეობა არ დაკარგოს, რაც ამ ტიპის ქალებს იზიდავთ. თიკა ჩემგან რადიკალურად განსხვავებულია, იმედია, ჩემი გმირის თვისებები ხასიათში არ გადამივა (იცინის).
- როგორი შეფასება მოჰყვა ოჯახის წევრებისგან შენს პერსონაჟს?
- არაფრით არ შემიძლია სერიალის ყურება ოჯახის წევრებთან ერთად, ისინი ერთად, მე კი ცალკე, მარტო ვადევნებ თვალყურს (იღიმის). შემოქმედების თვალსაზრისით ძალიან დიდ მნიშვნელობას ვანიჭებ მამას შეფასებას, რომელიც გახლა ვთ მწერალი ზაურ კალანდია, იგი წლების განმავლობაში ჟურნალ ''ცისკრის'' მთავარი რედაქტორი გახლდათ. მართალია, ზუსტად ჩემი სფეროს წარმომადგენელი არ არის, მაგრამ იცის და ესმის ეს საკითხი, ამიტომ როდესაც სპექტაკლში მაკავებენ ან სცენარს მიგზავნიან, პირველ რიგში, მამას ვაკითხებ და საქმის კურსში ვაყენებ. ვიცი, რომ ყოველთვის სწორ შენიშვნებს მომცემს და სწორად შემაფასებს.
- როგორც ყველა მსახიობს, ალბათ შენც გექნება საოცნებო როლი..
- მართალია, დიდი გამოცდილება მჭირდება, რომ ჩემი საოცნებო როლი შევასრულო, მაგრამ მაინც გეტყვით, ეს არის კარმენი...
- როგორც კი ეკრანზე გამოჩნდი, მაყურებელმა შეამჩნია, რომ ძალიან ჰგავხარ ლელა კილაძეს. შემთხვევით პირადადაც ხომ არ იცნობ ლელას?
- სხვათა შორის, ეს ჩემთვის არავის უთქვამს და ლელასაც არ ვიცნობ.
- გარდა იმისა, რომ მსახიობი ხარ და მძლეოსნობის ფედერაციაში მუშაობ, კიდევ რა ინტერესები გაქვს?
- პროფესიიდან გამომდინარე, მიყვარს თეატრი და ხშირად დავდივარ კიდეც. ასევე დიდ სიამოვნებას მანიჭებს თბილისისა და ბათუმის ჯაზფესტივალები და თუ თავისუფალი დრო მაქვს, ვცდილობ, არ გამოვტოვო. ამ ბოლო დროს ძალიან დავინტერესდი ჩოგბურთით და სიარული დავიწყე. გარდა ამისა, მიყვარს კულინარია. ზაფხულობით გოგონები წყნეთში, ჩემი მეგობრის ნინი დადუნაშვილის აგარაკზე ვისვენებთ, სადაც საოჯახო საქმეები გადანაწილებული გვაქვს. მე სამზარეულოში არავის ვუშვებ, დაპყრობილი მაქვს ის ტერიტორია და მეგობრებს საოცრად გემრიელ რაღაცებს ვთავაზობ.
- პირად ცხოვრებაში, რა ხდება?
- საინტერესო არაფერი..
- თუმცა, ალბათ ოდესმე შეყვარებული ყოფილხარ.
- გატაცება მქონია, მაგრამ სერიოზული არაფერი.
- როგორი მამაკაცები იპყრობენ შენს ყურადღებას?
- რამდენიმე წლის წინ რომ გეკითხათ, გეტყოდით, რომ ბიჭი, რომელიც მომეწონებოდა, აუცილებლად უნდა ყოფილიყო მაღალი, შავგვრემანი და არავითარ შემთხვევაში არ უნდა ჰქონოდა ''კურნოსა'' ცხვირი, თუმცა ერთ დღესაც საპირისპირო გარეგნობის ბიჭი მომეწონა. ასე რომ, ამ კითხვაზე პასუხი არ მაქვს (იცინის).
- თავადაც ''კურნოსა'' ცხვირი გაქვს, ოპერაციის შედეგია თუ ბუნებრივად ხარ ასეთი?
- ხშირად მეკითხებიან, გაკეთებული მაქვს თუ არა ცხვირის ოპერაცია, არადა, არ მაქვს. ძალიან ვგავარ მამას, შეიძლება ითქვას, მისი ასლი ვარ. მეც და ჩემს და-ძმასაც ასეთი ცხვირები გვაქვს.
- როგორც ზემოთ აღნიშნე, მამის აზრს დიდ მნიშვნელობას ანიჭებ, როგორ რეაგირებს მამა შენი თაყვანისმცემლების ''შემოტევაზე'', რომლებიც ალბათ მრავლად არიან?…
- მამასთან მეგობრული ურთიერთობა მაქვს. ხშირად გვისაუბრია ამ თემაზე, საერთოდ არ არის მკაცრი, ამიტომ ერთმანეთს კარგად ვუგებთ.

ციცი ომანიძე
ჟურნალი ''რეიტინგი''