თამუნა მუსერიძე - ტელეწამყვანმა სხეულის მოხატვა დაიწყო

სხეულის მოხატვა, ანუ ტატუ, იგივე სვირინგი უძველესი დროიდან იღებს სათავეს. ყოველ ხაზს, ფიგურას თავისი დატვირთვა აქვს... თუმცა ზოგი ტატუს უბრალოდ, ისე, მოდისთვის იკეთებს. მაგალითად, ტელეწამყვან თამუნა მუსერიძეს ბოლო დროს გატაცებასავით ექცა სხეულის ამა თუ იმ ნაწილის ამოსვირინგება. ერთი თვის წინ, მარჯვენა ფერდქვეშ საჰაერო ბუშტი დაიხატა...

- ტატუს შენთვის უბრალოდ მოდის ნაწილია თუ რაიმე დატვირთვა აქვს?
- ძალიან მომწონს. თავიდან მეუბნებოდნენ, არ გაიკეთო, თორემ მაგ საქმემ ჩათრევა იცისო. რა თქმა უნდა, არ ვუჯერებდი, მაგრამ როგორც ხედავთ, ჩამითრია კი არა, ვეღარ ვჩერდები... ჩემს ყოველ სვირინგს თავისი მნიშვნელობა აქვს, ისე, უბრალოდ არც ერთი გამიკეთებია.

- დავუშვათ, მოგბეზრდა ესა თუ ის ტატუ, მერე?
- არა მგონია, რომ მომბეზრდეს, თან, ყველა ისეთ ადგილას მაქვს გაკეთებული, რომ არ ჩანს, სამოსი ფარავს, ანუ მობეზრების მომენტი გამორიცხულია.

- პირველი ტატუ როდის და სხეულის რა ნაწილზე ამოისვირინგე?
- პირველი 3 წლის წინ თითზე გავიკეთე. ჩემი შვილის სახელი, სანდრო დავიწერე. მეორე 2 წლის წინ დავიხატე და არის ლოტუსი.

ლოტუსს სამნაირი მნიშვნელობა აქვს, მაგრამ მხოლოდ ერთს გეტყით, როგორც იცით, ეს ყვავილი ჭაობში იზრდება და არცთუ ლამაზი კვირტები აქვს, მაგრამ მისგან ულამაზესი ყვავილი ჩნდება... ამ ყველაფერს ცოტა რთული დატვირთვა აქვს, მაგრამ ამის შესახებ მოკლედ ასე ვიტყოდი.

- გაქვს ასევე "თეთრი" ტატუც...
- რაც შეეხება "თეთრ" ტატუს, ის საერთოდ არ ჩანს, მაგრამ როგორც კი გავირუჯები, ის მაშინ სხეულზე თეთრად იკვეთება, ანუ თავს მხოლოდ ნამზეურის შემთხვევაში იჩენს...
ერთი თვის წინ სვირინგი კიდევ გავიკეთე - საჰაერო ბუშტი, რომელსაც ქვემოთ აწერია "თავისუფლება".

- ალბათ იმიტომ, რომ თავისუფალი ადამიანი ხარ...
- ეს შორიდან და გვერდიდან ჩანს ასე.

- რა, კომპლექსები გაწუხებს?
- ჰო, რაღაცები მაწუხებს (სიცილით ამბობს)... მე სულიერ თავისუფლებას ვგულისხმობ
და არა თავისუფალ ქცევას, ჩაცმას, საუბარს და ა.შ.

- კიდევ აპირებ, სხეულის მოხატვას?
- დიახ, ზურგზე წარწერის გაკეთება მინდა.

- რა უნდა დაიწერო?
- მოდი, ამაზე ჯერ არ ვილაპარაკებ...

- სანდროს ასე მოხატული დედიკო მოსწონს?
- კი, განსაკუთრებით საჰაერო ბუშტზე გიჟდება... თავის სახელს, რომელიც თითზე მაწერია, მეგობრებს აჩვენებს ხოლმე.

- ტატუს გაკეთებამ რაიმე ხომ არ შეცვალა შენს ცხოვრებაში? ვითომ, ახლა უფრო მაგარი ტიპი ხარ?
- შეიცვალა ის, რომ მივხვდი, - ტკივილის მოთმენა და დაძლევა შემიძლია, მაგრამ ეს იმას არ ნიშნავს, რომ უფრო მაგარი ტიპი ვარ. თუმცა ამტანი ვყოფილვარ. ფეხზე სვირინგს სამსაათ-ნახევარი მიკეთებდნენ. წინასწარ გამაფრთხილეს, ყველაზე მტკივნეული ადგილია და იქნებ, სხვა ნაწილი შეარჩიოო, არ დავნებდი. 3 საათის განმავლობაში, ტიპი სახეზე წყალს მასხამდა, გული რომ არ წამსვლოდა.

- რა საჭიროა ასეთი მსხვერპლი?
- მინდოდა...

ლალი ფაცია
ამბები.გე