ზურა ნიჟარაძე: "ბელორუსში სომეხი კაცის როლი უნდა ვითამაშო"

"აზერფილმი" და "ბელორუსფილმი" ერთობლივ კინოს იღებს. გადაღებები როგორც ბელორუსში, ასევე აზერბაიჯანში იქნება. შემოქმედებითმა ჯგუფმა ქასტინგი საქართველოშიც ჩაატარა, რომელშიც არაერთი ქართველი მსახიობი მონაწილეობდა, მაგრამ მეტად ერთს - ზურა ნიჟარაძეს გაუმართლა. ის მთავარ როლზე დაამტკიცეს.

- ფილმში, რომელსაც ''შეწყვეტილი მოგონებები'' ჰქვია, არის ასეთი გმირი - რანტიკა, რომელიც უნდა განვასახიერო. ძალიან საინტერესო სცენარია. მოქმედება ორ ფრონზე მიმდინარეობს, - ყარაბაღსა და მეორე მსოფლიო ომში (1941 წელს). გადამღები ჯგუფი აქ იყო ჩამოსული, ქასტინგი გავიარე და მთავარ როლზე დამამტკიცეს. ფილმში 1000 კაცი ითამაშებს.


- ასეთი მასშტაბური პროექტია?
- კი, 5 მთავარი როლია, 14 - არამთავარი და 17 ეპიზოდური, დანარჩენი - ჯგუფური და ბატალური სცენები.

- რა ენაზე მოგიწევს თამაში.
- რუსულად, უფრო სწორად, დამტვრეული და აქცენტიანი რუსულით, როგორც საერთოდ კავკასიელებს ახასიათებთ...

- სომხი კაცის თამაში არ გაგიჭირდება?
- ადვილი არ არის, მაგრამ არტისტი ვარ და სირთულეები უნდა დავძლიო.

- ვინ არის რეჟისორი?
- ელხან ჯაფაროვი, აზარბაიჯანელია, ვარაბიოვია სცენარის ავტორი, ბელორუს კაცია. კულიევი გახლავთ პროდიუსერი. ახლა მინსკში მივფრინავ, სადაც გადაღებები ორი თვე გასტანს. სანამ გადასაღებ მოედანზე გავალთ, რეპეტიციები გვექნება, ანუ მოსამზადებელი ეტაპი.

ლალი ფაცია