ანი ქორქია: "მშობიარობის შემდეგ ჩემი წონა ყოველგვარი ძალისხმევის გარეშე დავიბრუნე"

ტელეწამყვანი ანი ქორქია სამი თვის წინ ბიჭის დედა გახდა, ამ ხნის განმავლობაში 20 კილოს დაკლება მოასწრო და ეკრანსაც დაუბრუნდა პროექტით "ორი ვარსკვლავი", თუმცა ეს ხელს არ უშლის პატარა გიორგი ბუნებრივ კვებაზე ჰყავდეს და მასთან დიდი დრო გაატაროს. ბავშვის მოვლაში მისი ქმარი კახა ჩიქოვანიც ძალიან აქტიურობს. მათი პატარა უკვე თამაშს სწავლობს და ახალბედა მშობლები მასთან ერთად ერთობიან.
– ანი, ძალიან აქტიური ორსული იყავით, დიდი მუცლით ეკრანზე ჩანდით. ეს ცხრა თვე უპრობლემოდ გაატარეთ?
– პირველი ექვსი თვის განმავლობაში ტოქსიკოზი მქონდა, წყალსაც შეზღუდული რაოდენობით ვსვამდი, რადგან მონელების პრობლემა მქონდა. წონაში საგრძნობლად დავიკელი, ექვსი თვის შემდეგ კი სწრაფი მატება დავიწყე და ორსულობის ბოლო სამ თვეში 20 კილოგრამი მოვიმატე. ჩემმა წონამ დეპრესიაში ჩამაგდო. ბუნებრივია, ყველა ქალს სურს, რომ ყოველთვის კარგ ფორმაში იყოს, თუნდაც ორსულობისას. შვილის გაჩენის შემდეგ სამ თვეში დავიკელი.
– ტოქსიკოზმა თქვენს ხასიათზეც იმოქმედა?
– არა, თანაც მთელი 9 თვე კახა განსაკუთრებულად ზრუნავდა ჩემზე, მის მიმართ არანაირი პრეტენზია არ მქონია. ის საჭმელი მოჰქონდა, რომელიც მიყვარდა. ვცდილობდი, ჩემი ტოქსიკოზის გამო მისთვის ხასიათი არ გამეფუჭებინა. ერთად მოვუწყვეთ პატარას თავისი კუთხე, ყოველ შოპინგზე, პირველ რიგში, ჩვენი შვილისთვის ვყიდულობდით საჭირო ნივთებს. კახა ჩემი დახმარების გარეშეც მშვენიერ ტანსაცმელს ყიდულობდა პატარასთვის.

– ფიზიოლოგიურად იმშობიარეთ?
– პატარას ჭიპლარი შემოეხვია და ამიტომ საკეისრო კვეთა დამჭირდა. კატეგორიული წინააღმდეგი ვარ საკეისრო კვეთის, მაგრამ ჩემს შემთხვევაში ეს გარდაუვალი იყო. ფიზიოლოგიური მშობიარობისთვის ვიყავი მომზადებული და, როგორც ექიმი მეუბნებოდა, ჩვენი ბიჭი, სავარაუდოდ, 7 იანვარს უნდა დაბადებულიყო, მაგრამ ორი კვირით ადრე, 25 დეკემბერს გავხდი დედა. ძალიან ლამაზი ბიჭი შეგვეძინა – 3 კილო და 600 გრამი, 53 სანტიმეტრი.
საკეისრო კვეთის დროს ქმარს არ უშვებენ საოპერაციოში, მაგრამ არა მგონია, თუნდაც ფიზიოლოგიური მშობიარობის დროს კახა ჩემ გვერდით ყოფილიყო. ძალიან მგრძნობიარეა და ამ ყველაფერს ვერ გადაიტანდა. ორსულობისას ერთხელ შევთავაზე მშობიარობაზე დასწრება, მაგრამ მისი სახის გამომეტყველებით მივიღე პასუხი და აღარ დამიძალებია, მის ნერვულ სისტემას გავუფრთხილდი.
– დედობას როგორ აუღეთ ალღო, თავიდან ხომ არ გაგიჭირდათ ჩვილის მოვლა?
– შვილის გაჩენისთანავე იღვიძებს დედური ინსტინქტები. დედობა იმხელა პასუხისმგებლობაა, რომ გამორიცხულია, სათანადოდ არ მოიქცე. რაც შემიძლია და რაც არ შემიძლია, შვილისთვის ყველაფერს ვაკეთებ. ვთვლი, რომ კარგ დედობას ვუწევ ჩემს ბიჭს.
– ქმარზეც იმავეს თქმა შეგიძლიათ, მზრუნველი მამაა?
– სამშობიაროდან რომ გამოგვწერეს, კახა ძალიან მეხმარებოდა. გიორგი პირველი თვე უმიზეზოდ ტიროდა, გაზები აწუხებდა და ახალგამომცხვარი მშობლები ჭკუიდან გადაგვიყვანა. მშობიარობამდე ბევრი ლიტერატურა წავიკითხე, თუ როგორ უნდა გამეზარდა შვილი, ყურადღებით ვუსმენდი ჩემს მშობლებს, კახას მშობლებს, მაგრამ საქმე საქმეზე რომ მიდგა, მაინც დავიბენი. კახა გვერდში მედგა, ერთი წუთით არ დავუტოვებივარ. ახლა ჩვენი ბიჭი წამოიზარდა, თამაში დაიწყო და გიორგისთან ერთად ჩვენც კარგად ვერთობით.
– როგორ შეცვალა გიორგის დაბადებამ თქვენი ურთიერთობა?
– ახლა ნამდვილი ოჯახი ვართ. გიორგის დაბადებამ უფრო გააძლიერა ჩვენი გრძნობა, უფრო გაამყარა ჩვენი ურთიერთობა. მე და კახამ 2 წლის წინ ვიქორწინეთ, ერთი წლის თავზე მივხვდით, რომ შვილი გვინდოდა და ამისთვის მომზადება დავიწყეთ. ახლა სრულყოფილი ოჯახი გვაქვს, ჩვენთვის პრიორიტეტი გიორგია, გვინდა, არაფერი მოვაკლოთ და ამისთვის არც დროს დავზოგავთ და არც ენერგიას.
– მშობიარობიდან რამდენიმე თვეში ეკრანზე გამოჩნდით. მომატებული კილოგრამები როგორ მოიშორეთ?
– საკეისრო კვეთის შემდეგ ვარჯიში არ შეიძლება. ბავშვი ბუნებრივ კვებაზე მყავს და ამიტომ ვერც დიეტას ვიცავ, მხოლოდ ტკბილეული და ცომეული ამოვიღე რაციონიდან. ჭარბი წონისკენ მიდრეკილება არასოდეს მქონია, გენეტიკამაც თავისი ქნა და ჩემი წონა ყოველგვარი ძალისხმევის გარეშე დავიბრუნე.
– რამდენიმე წელი "რუსთავი 2"–ში მუშაობდით. რატომ დატოვეთ ეს არხი?
– "რუსთავი 2"–ში პირველი ნაბიჯები გადავდგი, მეტიც, იქ გავიზარდე, ბევრი რამ ვისწავლე, პროფესიონალებთან ერთად ვმუშაობდი, არაჩვეულებრივი გარემო იყო. ჩემი გადაცემა "ეთამაშე ვარსკვლავს" 6 სეზონი გადიოდა, შემდეგ დაიხურა. იმ დროს არხზე ბევრი ცვლილება მოხდა და ლოტოს გათამაშების წამყვანად გადავედი. დღემდე ძალიან კარგად მახსენდება იქ გატარებული დრო. ყველა, ვის გვერდითაც ვმუშაობდი, ძალიან მიყვარს და არც არავინ დამიკარგავს. იქიდან ყოველგვარი კონფლიქტის გარეშე წამოვედი.
– ტელეკომპანია "იმედში" მიგიწვიეს თუ თავად შესთავაზეთ საკუთარი კანდიდატურა?
– შემოთავაზება მივიღე და სამთვიანი კონტრაქტი გავაფორმე. მიხარია, რომ ხისტი გადასვლა არ გამომივიდა არხიდან არხზე. როდესაც ბევრ წელს ატარებ ერთ სამსახურში, მერე შენს ოჯახს ტოვებ და სხვა ოჯახში მიდიხარ, რთულია. მადლობა იმ ადამიანებს, რომლებიც ამ არხზე დამხვდნენ და კარგად მიმიღეს. აქ ძალიან კარგი გარემოა.
– მუშაობა შვილთან ურთიერთობაში ხელს არ გიშლით? მით უმეტეს, რომ ბუნებრივ კვებაზე გყავთ.
– კიდევ ერთხელ დიდი მადლობა მინდა, გადავუხადო შემოქმედებით გუნდს, რადგან ჩემი მდგომარეობა გაითვალისწინეს და კვირაში მხოლოდ ორჯერ მიწევს სამსახურში მისვლა სამ–სამი საათით. ასე რომ, სამსახური ბავშვთან ურთიერთობაში ხელს არ მიშლის. ჩემს სახლთან ახლოს არის ის ატელიეც, სადაც ამ პროექტის დიზაინერები კაბებს მიკერავენ. ასე რომ, თავისუფალი გრაფიკი მაქვს და შვილისთვის სათანადო დრო მრჩება.
– ალბათ მაინც დაგჭირდებათ დამხმარე, ვინც თუნდაც იმ სამ საათს ბავშვთან დარჩება.
– მყავს არაჩვეულებრივი ძიძა, ძალიან კარგი ქალი, ვისთანაც შვილს უპრობლემოდ ვტოვებ. დედა და ჩემი დედამთილიც აქტიურად არიან ჩართული გიორგის გაზრდაში.
– ქმარმა არ გითხრათ, რომ სამსახურში გასვლა ნაადრევი იყო?
– როცა ეს შემოთავაზება მივიღე, მე და კახა ერთად დავსხედით და ყველაფერი განვიხილეთ. კახამ მკითხა, შოუს წამყვანობას ბავშვის მოვლის პარალელურად შევძლებდი თუ არა. არ უნდოდა, ზედმეტად დავტვირთულიყავი. როცა გავიგე, რომ ტელევიზიაში მთელი დღის გატარება არ მომიწევდა, სიამოვნებით დავთანხმდი და არც მას გამოუთქვამს პროტესტი. კახას ჩემი ეკრანზე გამოჩენა ძალიან მოსწონს. როცა კარგად გამოვიყურები, კომპლიმენტებს არ იშურებს.
ლანა კიკნაძე, ჟურნალი სარკე