შალვა რამიშვილი: "მარგო ლუჩკო "ქართულ ოცნებას" დააჰიპნოზებს"

ტელეჟურნალისტ შალვა რამიშვილის ცხოვრებაში ლეწვის, ნგრევის, ხალხის ცემის ეტაპი დგება. უნდა, რომ ბოღმა ამოანთხიოს და ამას თავისი გადაცემით, "შალვა რამიშვილის შოუთი" აპირებს. სპილოები, ჟირაფები, კამეჩები, მაიმუნები... ქართულ ფანოღურ სიმღერებზე ამღერებული ეგზოტიკური ქვეყნების აბორიგენები, დაჰიპნოზებული "ქართული ოცნების" წევრები... ამ ყველაფრის თავმოყრას თავის გადაცემაში აპირებს. ასე რომ, პრეზიდენტის კანცელარიიდან წამოსული შალვა ტელევიზიას საინტერესო, მაგრამ სახიფათო შოუთი უბრუნდება. პოლიტიკაზე ბევრს აღარ საუბრობს, რადგან იქ ბევრი გულისტკენა შეხვდა. ახლა მთლიანად იმ საქმეზეა გადართული, რაც ყველაზე მეტად უყვარს.
– შალვა, ქართულ ტელეარხებზე გასართობი შოუების სიმრავლეა. თქვენი გადაცემა რითი აპირებს მაყურებლის დაინტერესებას?
– თვითონ გადაცემის ფორმატი არის ძალიან საინტერესო. ამერიკული კომპანიისგან შევიძინეთ. მთავარი ისაა, რომ ყველა შოუში ერთი დიდი ცხოველის მოყვანა გვინდა.
– ცხოველები რაში გჭირდებათ?
– ძალიან უჩვეულოა და იმიტომ. არც ერთ ქართულ შოუში არ ჰყოლიათ ჟირაფი, სელაპი... ასეთი დეტალებით გვინდა, გადაცემა გავამრავალფეროვნოთ, მაგალითად, მონოლოგის დროს აქლემმა გამოიაროს და თან მაიმუნები დახტუნაობდნენ.
– ცხოველების ქცევას ვერ გააკონტროლებთ და ეს სახიფათო არ არის?
– ჩვენს შოუს სახიფათო იმიჯიც ექნება. მაყურებელი მუდმივად დაძაბული უნდა იყოს, ყოველი კადრი მისთვის მოულოდნელი აღმოჩნდება.
ასევე გვაქვს რუბრიკა "ნივთების დამტვრევა". სტუდიაში ადამიანები მოიტანენ თავიანთ ძვირფას ნივთებს, რაშიც ფულს გადავუხდით და მათთან ერთად ძვირფას ნივთებს უროებით დავამტვრევთ.
– მაყურებლის წინაშე ძვირფასი ნივთები რატომ უნდა ამტვრიოთ, რა აზრი დევს ამაში?
– საინტერესო არ არის იმის ყურება, თუ როგორ ამტვრევს ვიღაც თავის საყვარელ ტელევიზორს? ჩვენ ამაში ფულს გადავიხდით. რამდენიმე ადამიანი უკვე შეპირებული გვყავს და თავიანთი ნივთებით მოვლენ. შეიძლება ოჯახის წევრიც მოიყვანონ, რომელსაც ვცემთ და ამაშიც ფულს გადავუხდით.
– ცხოველები, ნივთების მტვრევა, ხალხის ცემა.. ქართული ტელეეთერისთვის ეს მართლაც ახალია.
– კი და ჩვენი ჩანაფიქრიც ეს იყო. თან კატეგორიულად არ გვინდა პატარა ცხოველების მოყვანა. არ გვსურს, რომ იგივე თანხა დავხარჯოთ და ეფექტი არ ჰქონდეს. ახლა "სარკეს" ექსკლუზიურად გიმხელთ რაღაცეებს.
– ცხოველებს ზოოპარკიდან მოიყვანთ?
– რატომ ზოოპარკიდან?! მაგალითად, ძალიან დიდი კამეჩის მოსაყვანად ზოოპარკი არ დაგვჭირდება. ამ ყველაფრის გარდა ეგზოტიკური ქვეყნებიდან ადამიანებს ჩამოვიყვანთ. პაპუა ახალ გვინეაში ისეთი ადამიანები არიან შემორჩენილი, რომლებიც ქვის ხანაში ცხოვრობენ. სწორედ მათი ჩამოყვანა გვინდა, რომ რომელიმე ფანოღური სიმღერა შეასრულონ. ფანოღურ სიმღერებს ქართველი ვარსკვლავებიც მღერიან, მაგრამ მათი მოწვევა საინტერესო არ იქნება. ეგზოტიკური ქვეყნის აბორიგენი რომ იმღერებს, პატარა ხარ, პატარა ხარ, პატარაო, ხომ საინტერესო გამოვა?
– საკმაოდ დიდბიუჯეტიანი გადაცემა გაგიკეთებიათ.
– მათი ჩამოყვანა არც ისე ძვირი ჯდება. შეგვიძლია მძივები მივცეთ და სრულიად საკმარისი იქნება. თან გაუხარდებათ, უცხო ქვეყანაში გადაცემაში რომ მიიწვევენ. გამოდის, რომ მხოლოდ მათი მგზავრობის ფული დაგვჭირდება.
– ქართველი მაყურებელი როგორ მიიღებს ამ ყველაფერს, რა მოლოდინები გაქვთ?
– აი, ეგ არ ვიცი. ჩვენი პრომოებიც ძალიან ბევრს მოეწონა, საკმაოდ განსხვავებული გამოვიდა.
– მოკლედ, თქვენს ფანტაზიას უსაზღვრო გასაქანი მიეცით.
– ცალსახად, მაგრამ ეგზოტიკური ქვეყნების აბორიგენების ჩამოყვანა ზვიომ (ზვიად ბლიაძე) მოიფიქრა. უნდოდა, ნარდი ეთამაშათ, მაგრამ ეს არ არის საინტერესო. მე კი მოვიფიქრე, რომ ჯობდა, ემღერათ. შეიძლება ბედუინიც ჩამოვიყვანოთ. ძირითადად მესამე სამყაროს ქვეყნებიდან იქნებიან, რადგან ამერიკიდან და საფრანგეთიდან ვინმეს მოწვევა ძალიან ძვირი დაგვიჯდება, თან ნაკლებად ეგზოტიკურია, რადგან თბილისში ამერიკელსაც ნახავ და ფრანგსაც, ბედუინს კი – ვერასოდეს.
– ეს იდეები ბევრი ფიქრის შედეგად მოგდით თავში თუ სპონტანურად?
– ბავშვობაში ძალიან მძიმე ფსიქოლოგიური ტრავმა გადავიტანე. პატარა ვიყავი, როცა უზარმაზარმა ძაღლმა შემაშინა. ეს აქამდე არავისთვის მითქვამს. მას შემდეგ კრიტიკულ სიტუაციებში გონება მეხსნება და საიდანღაც ექსტრაორდინარული იდეები მოდის. ეს ჩემდა უნებურად ხდება და წინასწარ არც მე ვიცი, რას შევთავაზებ მაყურებელს.
– ალბათ ისიც გათვალისწინებული გაქვთ, რომ თქვენს იდეებს ბევრი კრიტიკოსი გამოუჩნდება.
– ბუნებრივია, კრიტიკისთვის მზად ვარ. ოთხკაციანი მობილური რაზმები შევქმენით და, ვინც გამაკრიტიკებს, ყოველგვარი ცემის გარეშე, კანონის სრული დაცვით მივალთ მასთან, თვალებში ჩავხედავთ და ვკითხავთ, რატომ გამაკრიტიკა. მინდა, ცილისმწამებლურ კრიტიკას ერთხელ და სამუდამოდ მოვუღო ბოლო! არც ფიზიკურად შევეხებით ვინმეს და არც შეურაცხყოფას მივაყენებთ.
– ცნობადი სახეების უმრავლესობა ამბობს, არ მაინტერესებს, ჩემზე რას ლაპარაკობენო. თქვენთვის ეს ასე მნიშვნელოვანია, რომ არ დაიზარებთ და კარდაკარ დაიწყებთ სიარულს?
– ასეთი მიდგომა არ შეიძლება. მე ვაპირებ, დავიბოღმო.
– როგორც გავიგეთ, თქვენს შოუში წარსულში პოპულარული ტელესახე მარგო ლუჩკოც გამოჩნდება. რამ ან ვინ გაგახსენათ მარგო?
– მარგოს ბავშვობიდან ვიცნობ. საბავშვო ბაღშიც ერთად დავდიოდით, მაგრამ მერე ერთმანეთი დავკარგეთ და ახლა ისევ ვიპოვეთ. რა უცნაურია, არა? მაშინაც ძალიან მაგარი გოგო იყო.
ალბათ არ დაიჯერებთ, მაგრამ სადღაც ვრეკავდი და შემთხვევით მარგოსთან მოვხვდი. თურმე ასეთი რაღაცეებიც ხდება. რომ ველაპარაკე, ჩვენი მეგობრობა გამახსენდა და გადავწყვიტე, ჩემს შოუში მომეყვანა.
– მარგო რას გააკეთებს შოუში?
– მას თავისი რუბრიკა ექნება, ცნობილ ადამიანებს დააჰიპნოზებს. არ ვიცი, იცით თუ არა, მაგრამ მარგოს ჰიპნოზის გაკეთება შეუძლია, ამისი კურსები აქვს გავლილი. ეს ზოგზე ჭრის, ზოგზე – არა. ხუთ პოლიტიკოსთან მივა და ამ ხუთიდან რომელიმეს დააჰიპნოზებს.
– ე.ი. პოლიტიკოსები ამოიღეთ მიზანში?
– პოლიტიკოსების დაჰიპნოზება უფრო საინტერესო არ იქნება?
– და ამაზე დაგთანხმდებიან?

– ეს მათზე არ არის დამოკიდებული, მარგო მიეპარება მათ.
– ვინ გახდება მისი "მსხვერპლი", ნაციონალები თუ "ოცნების" წევრები?
– ნაციონალებს არ გავუკეთებთ ჰიპნოზს.

– რატომ?
– არ მინდა მათთვის ჰიპნოზის გაკეთება. მარგოსაც ვურჩევ, ისინი არ დააჰიპნოზოს. თუ რატომ, ეს ისეთი საკითხია, რაზეც ინტერვიუში ვერ ვილაპარაკებ. ძირითადად "ქართული ოცნების" წარმომადგენლებს დააჰიპნოზებს.
– აშკარაა, რომ ტელევიზია ძალიან გიყვართ. სადაც უნდა წახვიდეთ, ბოლოს ყოველთვის ტელევიზიაში ბრუნდებით.
– ყველაზე მეტად მიყვარს საქართველო და შემდეგ უკვე ტელევიზია. თითქმის ერთნაირად მიყვარს. როგორც საქართველოა ჩემი სამშობლო, ისე ტელევიზიაა ჩემთვის სამშობლო.
– აბა, რაღატომ მიდიხართ ხოლმე?
– ეს ისეთი რაღაც არის, როცა ზოგჯერ ძალიან საყვარელი ადამიანისგან გვინდება დასვენება, მაგრამ ცოტა ხანში ისევ უკან გვიხმობს. ხომ გქონიათ შემთხვევა, როცა გითქვამთ, საქართველოდან წავალ, ცოტას დავისვენებო, მაგრამ ძალიან მალე მოგნატრებიათ თქვენი ქვეყანა. სწორედ ასეთი რამ მემართება, როცა ტელევიზიიდან მივდივარ.
– ყოველგვარი გულის დაწყვეტის და ფიქრის გარეშე მიატოვეთ პოლიტიკა?
– იყო ძალიან ბევრი გულისტკენა, ტრავმა, ტკივილი, გადაჩეხვა, ამიტომ ისევ საყვარელ საქმეს დავუბრუნდი. ვერ წარმოიდგენთ, როგორი რთულია, აკეთო ის საქმე, სადაც შენს თავს ვერ ხედავ.
– როცა პრეზიდენტის ადმინისტრაცია დატოვეთ, განაცხადეთ, პრეზიდენტ გიორგი მარგველაშვილის მეგობრად ვრჩებიო. ახლა როგორი ურთიერთობა გაქვთ მასთან?
– ჩვენ ერთმანეთთან არანაირი კონფლიქტი არ გვქონია, ამიტომ მასთან მეგობრობას დღემდე ვაგრძელებ.
– მახსოვს თქვენი ხმამაღალი განცხადებები, როცა ჯერ კიდევ ტელეწამყვანი იყავით. მაშინ ამბობდით, "ქართული ოცნების" მიმართ მიკერძოებული ვარო. მერე რა მოხდა, მოლოდინი არ გამართლდა, იმედები გაგიცრუვდათ?
– იმედები არ გამცრუებია, მაგრამ ასეთ შეკითხვებზე პასუხების გაცემა არ მინდა. უფრო სახალისო თემებზე ვისაუბროთ.
– თქვენი ცხოვრების დღევანდელი ეტაპით კმაყოფილი ხართ?
– ჩემი ცხოვრება ფერების მიხედვით მაქვს დალაგებული. ახლა მწვანე ეტაპი მიდგას. იყო ნარინჯისფერი, რუხი, შავი...
– ეს ფერები რას გამოხატავს?
– ეს მკითხველს მივანდოთ, ყველაფერს ნუ დავუღეჭავთ. მთავარი ისაა, რომ ახლა ჩემი ცხოვრების მწვანე ეტაპი დგება.
– ანუ ხალასი და მხიარული?
– აი, უკვე გამოიცანით!
– თქვენს მკვეთრ ნაბიჯებს და გადაწყვეტილებებს ოჯახი როგორ ხვდება?
– მათგან ასპროცენტიანი სტიმული მაქვს. ამჟამად მთლიანად სამსახურზე ვარ გადართული.

– ამას თქვენი ახალშერთული ცოლი ხატია ეკიზაშვილი იოლად ეგუება?
– უნდა შეეგუოს, რა ვქნათ.
– არჩევანი არ აქვს?
– არა. როგორც კი არჩევანს ღია სივრცეში ჩამოკიდებულს ტოვებ, მაშინვე ფუჭდება საქმე.
– როცა თქვენ არ გიტოვებენ არჩევანს, ამაზე რა რეაქცია გაქვთ?
– ეს ძალიან მტკივნეულია. ჩემი ცხოვრების შავ ეტაპზე არ დამიტოვეს არჩევანი და ეს ჩემთვის იმდენად მტკივნეული იყო, რომ გახსენებაც არ მინდა.
ქეთი დინოშვილი, ჟურნალი სარკე