კანში სკანდალური ქცევის გამო უკრაინელი ჟურნალისტი გაათავისუფლეს

ტელეარხ «1+1» პრესსამსახურმა ინფორმაცია გაავრცელა, რომლის თანახმადაც ჟურნალისტ ვიტალი სედიუკოვს შრომითი ხელშეკრულება შეუწყდა.


,,კანის კინოფესტივალზე ჟურნალისტის გამოხდომა ვიტალის კერძო ინიციატივაა და მას რედაქციისათვის საკუთარ გეგმებზე ინფორმაცია არ მიუწოდებია’’ - ნათქვამია პრეს-რელიზში.


კომპანია წუხილს გამოთქვამს იმ დისკომფორტზე, რომელიც ჟურნალისტმა თავისი ქცევით ამერიკელ მსახიობ ამერიკა ფერერას შეუქმნა და მისი ქცევა წინააღმდეგობაში მოდის კომპანიის ღირებულებებსა და ჟურნალისტურ ეთიკასთან.

შეგახსენებთ, რომ კანის კინოფესტივალზე უკრაინელი ჟურნალისტი დააკავეს, რომელიც ჰოლივუდის მსახიობ ამერიკა ფერერასთვის კაბის აწევას ცდილობდა. ინციდენტი მაშინ მოხდა, როდესაც ანიმაციური ფილმის " როგორ მოვარჯულოთ დრაკონი 2"-ის შემქმნელები ფესტივალის სასახლის კიბეებზე ადიოდნენ.