მზია ორველაშვილი: "სახის კანზე საცხი ჯერ არ წამისვამს"

24 წლის მოცეკვავე მზია ორველაშვილს კანის მოვლისთვის – არა, მაგრამ წონის შენარჩუნებისთვის დიდი ძალისხმევა სჭირდება. საკუთარი გარეგნობის მიმართ პრეტენზიები არ აქვს, მით უმეტეს, საყვარელი მამაკაცი – ქმარი, ქორეოგრაფი ალექსანდრე ოხრიმენკო, მისთვის კომპლიმენტებს არ იშურებს, რაც, რა თქმა უნდა, სტიმულს აძლევს. ყველაზე მეტად კი "ჯადოსნური" სიტყვები შველის, რომლებსაც საკუთარ თავს ხშირად უმეორებს.
– მზია, როგორც მოცეკვავე და როგორ უბრალოდ ქალი, თავს როგორ უვლით, ყველაზე მეტად რაზე ზრუნავთ?
– იშვიათად თუ ვახერხებ საკუთარ თავზე ზრუნვას. დილით ბავშვი მიმყავს სკოლაში, მერე მივდივარ სამსახურში, ნაშუადღევს შვილი სკოლიდან გამომყავს და ისევ სამსახურს, ანუ საცეკვაო სტუდიას ვუბრუნდები. 24 წლის ვარ და სახის კანზე საცხი ჯერ არ წამისვამს, მიუხედავად იმისა, რომ ჩემს ასაკში კანს უკვე აქტიურად უვლიან. მე ყოველდღიურ ცხოვრებაში მაკიაჟსაც კი არ ვიკეთებ. სცენისთვის თუ მჭირდება, ვარცხნილობასაც თავად ვიკეთებ და მაკიაჟსაც.
– არც წონის კონტროლი გჭირდებათ?
– ყოფილა პერიოდი, როცა 2 კილო მომიმატებია და დიეტის დაცვა დამიწყია. ადვილად ვიმატებ, ამიტომ სულ ვცდილობ, კვება ვარეგულირო. საღამოს 6 საათის მერე აღარ ვჭამ. ცომეულს და ტკბილეულს ვერიდები და სხვებსაც იმავეს ვურჩევ. სანამ ცეკვას დავიწყებდი, დედა სულ მაფრთხილებდა, ცოტა ჭამე, თორემ გასუქდებიო. ახლა 52 კილო ვარ, სიმაღლეში – მეტრი და 68 სანტიმეტრი. მაქსიმუმი, 60 კილომდე მოვიმატო, მაგრამ ეს მოცეკვავისთვის დიდი წონაა. ჩემი ქორეოგრაფი სულ მეუბნება, დამატებით სპორტდარბაზშიც იარეო. ეს ცალკე ვარჯიშია, სადაც მუცლის პრესს და ფეხის კუნთებს იყალიბებ. მოცეკვავეებს ფეხებზე გვაქვს გართულება. მუცლის პრესის გამკვრივება თუ სხეულის ტონუსში მოყვანა სახლში ვარჯიშითაც გამოვა, მთავარია მონდომება.
– სცენაზე გამოსვლისას მოცეკვავეს სხეული იდეალურ ფოორმაში უნდა ჰქონდეს. ამისთვის, პირველ რიგში, რას აკეთებთ?
– ვირუჯები. ლათინოამერიკულ ცეკვებში გარუჯული კანია საჭირო. სტანდარტულ ცეკვებში კი თეთრი კანიც მიღებულია. მუდმივად მაღალ ქუსლებზე ვცეკვავთ, ამიტომ ბევრს ვენების პრობლემა ექმნება – კანზე ლურჯი ძარღვები უჩნდებათ. ამ დროს, ბუნებრივია, ესთეტიკურ მედიცინას მიმართავენ და მათ ლაზერით იშორებენ. საბედნიეროდ, მე მსგავსი პრობლემა არასდროს შემქმნია. ეს ალბათ გენეტიკაზეა დამოკიდებული.
– ორსულობას თქვენი ფორმები არ შეუცვლია?
– ბავშვის გაჩენიდან რამდენიმე დღეში 16 კილო დავიკელი, მაგრამ ეს საკმარისი არ იყო, რადგან ძალიან ბევრი მქონდა მომატებული. მკაცრი დიეტის და ვარჯიშის შედეგად ფორმა დავიბრუნე. მალე ვიმატებ და, საბედნიეროდ, ადვილად ვიკლებ.
– თქვენს ოჯახში უფროსი თაობის ქალები როგორ უვლიან თავს და როგორ გამოიყურებიან?
– დედის მხრიდან ბებია, თამარა კოლებოვა, დღეს 76 წლისაა და თამამად შემიძლია ვთქვა, რომ 50 წელზე მეტს არ მისცემთ. ის მუდმივად უვლის თავს. ყოველ დილით ადრე დგება და, სეზონის მიუხედავად, სუფთა ჰაერზე გადის და სეირნობს. სახეზე მუდმივად მასაჟებს იკეთებს და სხვადასხვა საცხებს ისვამს. საათობრივად და სწორად იკვებება. ტკბილეულს საერთოდ არ ჭამს. უპირატესობას მოხარშულ საკვებს ანიჭებს. ორ საათში ერთხელ მცირე რაოდენობით იკვებება საღამოს 6 საათამდე. დღემდე მაკიაჟს იკეთებს და კარგად იცვამს. რაც შეხება დედას, ის მოცეკვავე და მსაჯია. ისიც ძალიან უვლის თავს და კარგად გამოიყურება. ამჟამად ქორეოგრაფია და სცენაზე აღარ ცეკვავს.
– რაიმე მავნე ჩვევა თუ გაქვთ?
– ჩემი მავნე ჩვევაა მზესუმზირის სიყვარული. ცნობილია, რომ ის კბილებს აფუჭებს. ქმარი მუდმივად მაძლევს შენიშვნას ამასთან დაკავშირებით. არ ვეწევი, თუმცა არიან მოცეკვავეები, რომლებიც ამ მავნე ჩვევაზე უარს ვერ ამბობენ. ყავასაც არ ვსვამ, რადგან სახის კანს ისევე აფუჭებს, როგორც სიგარეტი. გამოფხიზლება და ტონუსში მოსვლა ყავის გარეშეც შემიძლია.
– კიდევ რა რჩევას თუ შენიშვნას გაძლევთ ქმარი?
– შეიძლება სამოსთან ან ვარცხნილობასთან დაკავშირებით თავისი აზრი გამოთქვას. მე ყველას აზრს ვითვალისწინებ, მით უმეტეს, ქმრისას. მას ყოველთვის მოვწონვარ და ყოველდღე კომპლიმენტს მეუბნება.
– ალექსანდრი უკრაინელია და ალბათ იქ ჩასვლა ხშირად გიწევთ. იქაური ქალები როგორ გამოიყურებიან?
– უკრაინაში ისეთი გამოპრანჭულები დადიან, ჩვენ ქორწილში ან წვეულებაზე რომ მივდივართ ხოლმე. ყოველდღე მაღალ ქუსლებზე დგანან. ჩვენთან უფრო თავისუფალი, სპორტული სტილი აქვთ. თან აქ ისეთი ტროტუარებია, მაღალ ქუსლებზე სიარული არც ღირს.
– მოცეკვავე ქალებს გარეგნობაში ძირითადად რისი კორექტირება შეიძლება დასჭირდეთ პლასტიკური ქირურგიის საშუალებით?
– ასე ვერ ვიტყოდი. პირადად ჩემი აზრით, ღმერთმა რა გარეგნობაც მოგცა, ის უნდა გქონდეს, მაგრამ თუ ადამიანს ძალიან სჭირდება რაღაცის კორექცია, აუცილებლად უნდა მიმართოს პლასტიკურ ქირურგს. ბელორუსიაში რომ ვცეკვავდი, იყო ასეთი შემთხვევა, როცა გოგონამ მკერდი დაიპატარავა, რადგან დიდი მკერდი ცეკვაში ხელს უშლიდა.
– თქვენ რა მსხვერპლზე წასულხართ პროფესიის გამო?
– წლების წინ ძალიან გრძელი თმა მქონდა, წელამდე. მიყვარდა და შეჭრას არ ვაპირებდი. ერთ დღესაც ჩემმა ცეკვის ხელმძღვანელმა, ანდრეი საბანოვსკიმ, მაიძულა თმის შეჭრა, იმიჯის შეცვლა გჭირდებაო. პარიკს ვერ ვატარებდი, რადგან ცეკვის დროს შეიძლება მოგძვრეს, ამიტომ უნდა შემეჭრა. ბევრი ვიტირე, ბოლოს კი წავედი და შევიჭერი. ერთი კვირა საკუთარ თავს ვერ ვეგუებოდი, სხვანაირი გამხადა ამ ვარცხნილობამ. მერე შევეჩვიე და ახლა თმის გაზრდა აღარც მინდა. ერთი პერიოდი თმა ქერადაც მქონდა შეღებილი, ბოლოს კი ისევ მუქი ფერი ვარჩიე.
– რომელი ფერი გიყვართ განსაკუთრებით?
– ჩემი თვალების ფერიდან გამომდინარე, განსაკუთრებით მწვანე მიყვარს.
– როგორ სამკაულებს იკეთებთ?
– სცენაზე აუცილებლად მცირე ზომის და სპეციალურად დამზადებული სამკაულები გვიკეთია. ყოველდღიურ ცხოვრებაში კი სამკაული დიდად არ მიყვარს.
– სარკეში ხშირი ჩახედვა გახასიათებთ?
– რეპეტიციებზე ფეხების მოძრაობას თუ დგომას ვაკვირდები. ყოველდღიურ ცხოვრებაში კი დილით ჩავიხედავ, მოვწესრიგდები და მერე აღარც მახსენდება.
– რა დროს ხართ საკუთარი თავის მიმართ კრიტიკულად განწყობილი?
– სულ ვცდილობ, ფორმაში ვიყო, მაგრამ მაინც დიდი მნიშვნელობა ენიჭება განწყობას. ხანდახან უმიზეზოდ არ მომწონს საკუთარი თავი, მაგრამ უფრო ხშირად კმაყოფილი ვარ. როცა გარეგნობაში რაღაც არ მომწონს, სარკის წინ ვდგავარ და საკუთარ თავს ვეუბნები: "შენ ძალიან ლამაზი და კარგი ხარ!". ეს მეთოდი ფსიქოლოგ–მასაჟისტმა მასწავლა და მინდა გითხრათ, რომ ამართლებს.
მანანა ნოდია, ჟურნალი სარკე