"მაზლის ცოლი ყველას ისე აჩვენებს თავს, თითქოს ვჩაგრავ და ჩემი მსხვერპლია"

ორმა რძალმა ერთად შევაბიჯეთ ახალ ოჯახში. მას თავიდანვე არ მოვეწონე და შემიძულა. მაშინ მეც სტუდენტი ვიყავი და ისიც. ის ყოველდღე ხან დაქალებში დადიოდა, ხან – წვეულებებზე. არასდროს მეცადინეობდა, მე კი სულ ვსწავლობდი და უნივერსიტეტში კარგი ქულებიც მქონდა. ჩემმა რძალმა გრანტი ვერ აიღო და უნივერსიტეტში ფულის გადახდა დასჭირდა. დედამთილს არ ჰქონდა საშუალება, რომ მისი სწავლის საფასური დაეფარა. მე კი 100%–იანი გრანტი ავიღე და ფულის გადახდა არ დამჭირდა. დედამთილი მხოლოდ ტრანსპორტის და ბუფეტის ფულს მაძლევდა. ამაზე ჩემი რძალი ცეცხლდებოდა. ქმარს აქეზებდა, დედაშენს არ ვუყვარვართ, გვატყუებს და შენს საყვარელ რძალს სწავლის ფულს უხდისო.
მაზლი ჩემს ქმართან, ანუ თავის ძმასთან, მოვიდა და უთხრა, შენს ცოლს სწავლის ფულს დედაჩემი უხდისო. ძმამ უპასუხა, რა სწავლის თანხა, მხოლოდ ტრანსპორტის ფულს აძლევსო. ამის გამო მაზლი თავის ცოლს მაგრად ეჩხუბა. ის კიდევ ბოღმით უფრო აივსო.
როდესაც დავორსულდი, თავის დაქალთან ჭორაობდა, ექიმმა უთხრა, ბავშვი ინვალიდი იქნება, მაგრამ მალავენ, არავის ეუბნებიანო. ეს ყველაფერი ჩემს ყურამდე მოდის. ჭორებს მივრცელებს, თითქოს მე ვემუქრები, რომ, თუ დაორსულდება, მუცელს მოვაშლევინებ. ყველას თავს აჩვენებს, რომ ვჩაგრავ და ჩემი მსხვერპლია. არც კი ვიცი, ასეთი ფანტაზია საიდან აქვს.
უკვე აღარ შემიძლია მისი გაძლება. როგორ მოვიქცე, მასთან ნორმალური ურთიერთობა როგორ უნდა მქონდეს?
სარკის ერთგული მკითხველი