რას ახვედრებს შვილიშვილებს "მანანა ბებო" - მედეა ლორთქიფანიძის საიდუმლო რეცეპტი

თქვენ მას იცნობთ როგორც შფოთიან დედას, ცოლს, დედამთილსა და ბებიას. მანანა ბებო, სერიალიდან "ჩემი ცოლის დაქალები" ხშირად ტრიალებს რძლის სამზარეულოში, უწუნებს ნახელავს და შვილიშვილებს თავისი გაკეთებული სადილების ჭამას აძალებს.

მსახიობ მედეა ლორთქიფანიძეს საკუთარი პერსონაჟის მსგავსად, ორი შვილიშვილი ჰყავს. თავად მარტო ცხოვრობს. ზოგჯერ ბავშვებს თავისთან იტოვებს და საკუთარი ნახელავით უმასპინძლდება. რეალურ ცხოვრებაში რძალი არ ჰყავს, მაგრამ ჰყავს სიძე, რომელსაც სიდედრის მომზადებულზე მეტად, მეუღლის გაკეთებული კერძები მოსწონს.

როდის იყო მედეა ლორთქიფანიძე 115 კილო, რატომ ეძახის შვილიშვილს რიო დე ჟანეიროს, როგორ ამზადებს საფირმო კერძს ჩვენი ინტერვიუდან შეიტყობთ, სადაც აქცენტი სამზარეულოზე გავაკეთეთ.

მედეა ლორთქიფანიძე:
- სამზარეულოსთან ძალიან კარგი ურთიერთობა მაქვს. მეგობრული, დედაშვილური, ამხანაგური. ეს სამსახურშიც იციან. ძალიან კარგი კულინარი ვარ. არსად მიჭამია ისეთი კომბოსტოს რულეტი ნიგვზით, როგორსაც მე ვაკეთებ.

- ჩვენც გაგვიმხილეთ როგორ ამზადებთ კომბოსტოს რულეტს.
- კომბოსტოს ფოთლებს მოვთუთქავ და ტილოზე ვაფენ. ფურცლებს ისე ვწურავ როგორც ზეწარს, ცოტა იცრიცება, მაგრამ არაუშავს. მერე ვკმაზავ ნიგვზით, ნივრით, მწვანილით, სუნელებით, მარილით და ბროწეულით. თითო-თითო ფურცელს დავაფენ, გადავუსვამ საკმაზს, ოთხ ფურცელს ერთად გადავახვევ ტოლმასავით, ზევიდან ნიგვზის ზეთს გადავუსვამ, შევდგამ მაცივარში და მეორე დღეს მივირთმევ. უგემრიელესია.ზოგჯერ ჩემი ნახელავი გადასაღებ მოედანზე მიმაქვს. როცა კარგ სალას ვაკეთებ, მიმაქვს და გიჟდებიან ისე მოწონთ. მურაბებს ვაკეთებ ყველანაირს. სტაფილოთი დაწყებული - მანდარინით დამთავრებული. მიყვარს, როცა ჩემს მურაბას იწონებენ.

- დღის განმავლობაში, დროის რა მონაკვეთს ატარებთ სამზარეულოში?
- ჩემი გაკეთებული სადილი ყოველთვის მაქვს. ხარჩოს, ლობიოს, ჩიხირთმას ვაკეთებ. მიყვარს მაკარონი ყველით. არ მიყვარს კარტოფილი, წიწიბურა და ბრინჯი. სადილს საათნახევარში, ორ საათში ვაკეთებ.

- მოსწონთ თქვენი ნახელავი ოჯახში? თქვენი შვილიშვილები ისევე რეაგირებენ თუ არა თქვენს გაკეთებულ კერძებზე, როგორც თქვენი გმირის შემთხვევაში?
- ორი შვილიშვილი მყავს. 4 წლის რატი და წლინახევრის ნიცა ყიფიანები. ნიცას ვერ ვიმახსოვრებ და რიოდეჟანეიროს ვეძახი. ნიცას საჭმლის დაძალება არ უნდა. რატის ძალიან უყვარს ხილი, ლობიო, ბორში. ჩემს შვილიშვილებს ყველაფერი უყვართ. გემრიელ სადილებს ვაკეთებ და რა ვქნა? მხოლოდ, ბავშვები წიწაკას რომ არ ჭამენ, სადილს პილპილს მერე ვაყრი ხოლმე.

- რადგან შვილიშვილები პატარები არიან, თუ უმზადებთ მათ რაიმე განსაკუთრებულს?
- შვილიშვილებს პირველ რიგში "ნიკორას" საბავშვო სოსისს ვახვედრებ. ძალიან უყვართ. პატარებს მიტოვებენ ხოლმე, ოღონდ რატი მეუბნება "ბებო, მიყვარხარ, მაგრამ არ დავრჩებიო".

- როდესაც თქვენთან რჩებიან, თუ აძლევთ თამაშის, გასეირნების, კომპიუტერთან თამაშის უფლებას?
- კომპიუტერი არ მაქვს. ბავშვებს მულტფილმებს ვურთავ. სახლის არევას როგორ დავუშლი?! როცა ისინი მიდიან, ჩემს სახლში რომ მოხვიდეთ, სათამაშოებში ვერ მიპოვით.

- უდროობიდან გამომდინარე, თუ გიწევთ მზა სადილის ან ნახევარფაბრიკატების ყიდვა?
- დიახ, კატლეტს და ტოლმას ვყიდულობ ბახტრიონისა და ცინცაძის კუთხეში მდებარე "ნიკორაში", მიყვარს ეს სუპერმარკეტი. ძალიან გემრიელი ნახევარფაბრიკატები აქვთ. სამსახურიდან რომ ვბრუნდები, მშიერი ვერ დავწვები. ღამის ოთხი საათიც რომ იყოს, უნდა ვივახშმო.

- ტკბილეულთან და დესერტებთან როგორი

დამოკიდებულება გაქვთ? თავად თუ ამზადებთ?
- ცომი არ ვიცი. ჩემი შვილი აცხობს, მე არ გამომდის. ერთხელ გადავწყვიტე ხაჭაპურის ან ლობიანის გამოცხობა. მაღაზიაში ჩავედი, ცომი მოვითხოვე. მომიტანეს გახვეული, გაყინული ცომი. ვიკითხე გაყინული ცომი რად მინდა მეთქი?! თურმე გაყინული უნდა წავიღო, რა ვიცოდი, ცომი რა იყო. გაშტერებული მიყურებდა გამყიდველი. ცხობა არ ვიცი.

- ჯანსაღად კვებას თუ ცდილობთ?
- ჯანსაღად არ ვიკვებები. ახლა თუ რამის შეზღუდვა დავიწყე... ერთი პური ოთხი დღე მყოფნის. დღეში ორჯერ მიწევს ჭამა.

- წონასთან დაკავშირებული პრობლემები თუ გქონიათ?
- როგორ არა, დაახლოებით 25 წლის წინ 115 კილო ვიყავი. ჩემმა ქმარმა მითხრა, ბურთივით ხარო. წამიყვანეს, დამაწვინეს საავადმყოფოში, 82 კოლოზე ჩამოვედი. თან ვვარჯიშობდი, ისე კარგად ვიყავი, შპაკატზეც კი ვჯდებოდი. მერე, მოვედი სახლში. ჩემი ქმარი კარგი მჭამელი იყო. რასაც გავუკეთებდი, მეც ვჭამდი და 95 კილომდე ავედი.

- სადილს როდის ამზადებთ?
- კვირას. ხან ბორშს ვამზადებ, ჩიხირთმას. ცოტას გაკეთება არ ვიცი. ახლაც შეყინული მაქვს ლობიოც, ჩიხირთმაც. მეზობლებსაც დავურიგე, მაგრამ ვერ მოვერიე. ისეთი კარგი მეზობლები მყავს, ვინც კი რამეს ვაკეთებთ, ერთმანეთს აუცილებლად ვუგზავნით. თუკი ვინმე ნამცხვარს აცხობს, მაშინვე შემომიტანენ - ხოლმე.

- თუ შეიძლება გაგვიმხილეთ კიდევ ერთი რეცეპტი, რომლითაც ყველა გიცნობთ და კერძის დაგემოვნების შემდეგ აღფრთოვანებულები რჩებიან.
- ძალიან მოწონთ ჩემი გაკეთებული აჯაფსანდალი. ბადრიჯანს სათითაოდ არ ვწვავ. უნდა გავფცქვნათ ბადრიჯანი. ვჭრით ბრტყლად და ვაფენთ ტაფაზე, ვასხამთ ზეთს, შემდეგ კიდევ რამდენიმე ფენა ბადრიჯანს დავადებთ ზევიდან. დავახურავთ თავსახურს და შევდგამთ ცეცხლზე. როდესაც სუნს გაუშვებს, გადმოვაბრუნებთ. მოვხრაკავ ცალკე ხახვს, შევკმაზავ ბულგარულით, ცოცხალი პამიდვრით, დანაყული მწვანილით, სუნელებით, ნივრით, წიწაკით. სუნელები რომ გამომელიოს შეიძლება გავგიჟდე. ყველაფერს ერთმანეთში ავურევ და მაშინვე გადმოვდგამ. არ ვადუღებ. გავაჩერებთ ცოტა ხანი და გაციებულს შევჭამთ