თიკა ჯამბურიას რატი გაჩეჩილაძემ ხუთი კილო დააკლებინა

მომღერალმა თიკა ჯამბურიამ მიზნად დაისახა, მინიმუმი, 15 კილო დაიკლოს და კარგი მოცეკვავე გახდეს. მისთვის პროექტი "ცეკვავენ ვარსკლავები" დიდი გამოწვევაა. პირველ რიგში, ჯერ საკუთარ თავს უნდა დაუმტკიცოს, რომ ცეკვა მხოლოდ ტანწერწეტა გოგონების საქმე არ არის. ამაში კი გამოცდილი მოცეკვავე, გაჩეჩილაძეების დინასტიის უმცროსი წარმომადგენელი, რატი გაჩეჩილაძე ეხმარება. სხვათა შორის, თიკა ყოველთვის ოცნებობდა მასთან ცეკვაზე და ფორტუნამაც გაუღიმა.

ინტერვიუ თიკას მიერ პროექტის დატოვებამდეა ჩაწერილი.
– როცა პროექტში მონაწილეობა შემოგთავაზეს, ეს წინადადება როგორ მიიღეთ, ბევრი ფიქრი დაგჭირდათ?
თიკა: შემოთავაზება პროექტის პროდიუსერ ნოე სულაბერიძისგან მივიღე. მოსაფიქრებლად მხოლოდ რამდენიმე საათი მომცა. 50–50–ზე ვიყავი. მინდოდა იმიტომ, რომ ცეკვას ვისწავლიდი, მაგრამ არ მინდოდა იმიტომ, რომ არასდროს მიცეკვია, გამოუცდელი ვარ და მეშინოდა, ხალხი რას იტყოდა. იდეალურ ფორმაში არ ვარ, წონის სერიოზული პრობლემა მაქვს. თუმცა მაინც გავრისკე. სულ რაღაც ორი კვირა გვქონდა მოსამზადებლად. შოუ ჩქარ ტემპებში დაიგეგმა და გავიდა ეთერში.
რატი: წინა სეზონშიც მინდოდა ამ პროექტში მონაწილეობის მიღება, მაგრამ ამერიკიდან ახალი დაბრუნებული ვიყავი და ვერ მოხერხდა. ამ სეზონზე გამოსასვლელად განსაკუთრებულად ვემზადებოდი. შოუ სწრაფ ტემპებში მომზადდა და ჯერჯერობით ამ რიტმს ვეგუები.
– პროექტის დაწყებამდე ერთმანეთს თუ იცნობდით?
თიკა: არა. არც ის ვიცოდი, რატი თუ მონაწილეობდა ამ პროექტში. ჩემთვის მეწყვილეს გადამწყვეტი მნიშვნელობა ჰქონდა. რატიზე ყოველთვის კარგი შეფასებები მესმოდა, ვიცოდი, რომ პროფესიონალი იყო. როცა გავიგე, რომ ჩემი პარტნიორი უნდა ყოფილიყო, ძალიან გამიხარდა.
– რატის ხომ არ უჭირს ხელში თქვენი აყვანა?
თიკა: ხომ ხედავთ, რამხელა კუნთები აქვს, როგორ შეიძლებოდა ჩემი ხელში აყვანა გასჭირვებოდა?! რატის ორმაგი ქულები ეკუთვნის, ამხელა წონის ქალს რომ მეჭიდავება.
რატი: სიმართლე რომ გითხრათ, ეს სულაც არ იყო ძნელი. ამ ორ კვირაში თიკა უკვე მინუს 5 კილოგრამია და პირობას გაძლევთ, თუ კიდევ ბევრი ტური დავრჩებით, თიკა 15 კილოგრამს დაიკლებს.
– თიკა, რეპეტიციებზე ძალიან იღლებით?
თიკა: თქვენ რომ დაესწროთ ჩვენს რეპეტიციებს, შეგეცოდებით. რატი იმდენს მავარჯიშებს, რომ ბოლოს ფეხზე ვეღარ ვდგები. თავიდანვე გავაფრთხილე, ბევრს ვიწუწუნებ, მაგრამ თავი არ დამანებო–მეთქი. მუცლის პრესებს და აზიდვებს მაკეთებინებს.
რატი: აზიდვებს ჯერ ვერ აკეთებ, ნუ იტყუები!
თიკა: იმდენს მარბენინებს, ძალა მეცლება. აზარტული პროექტია და ჩემი სახით ფუმფულა გოგოებს სტიმულს ვაძლევ, რომ იცეკვონ. მინდა, მათ ვუთხრა, რომ ეს სულაც არ არის შეუძლებელი. წელს ამერიკაში ასეთივე პროექტში ჩემზე ბევრად მეტი წონის გოგონამ გაიმარჯვა.
რატი: წონასაც არ აქვს მნიშვნელობა და არც იმას აქვს, ფეხები გაქვს თუ არა. არიან წყვილები, რომლებიც პროთეზით ცეკვავენ ან ყავარჯნებით. მთავარია სურვილი.
– ალბათ ნახეთ შოუს ჩანაწერი. საკუთარი თავის მიმართ რა შენიშვნები გქონდათ?
თიკა: რა თქმა უნდა, ჩემი ცეკვით კმაყოფილი არ ვარ, მაგრამ ახლა უკვე ვიცი, ფეხი როგორ უნდა დავდგა, ხელი როგორ უნდა ვამოძრაო. უკეთ შეიძლებოდა მეცეკვა. მომდევნო ტურებში მეტს გავაკეთებ.
რატი: შემდეგ ტურებში ვეცდებით, ნაკლი გამოვასწოროთ, მაგრამ ამ ორ კვირაში თიკამ კარგი რეზულტატი დადო. ყველაფერს კარგად გაართვა თავი, თუმცა ადამიანს ყოველთვის იმაზე მეტი შეუძლია, ვიდრე აკეთებს.
თიკა: ვეცადე, ხასიათში მეცეკვა და ხალისიანი განწყობა მიმეტანა მაყურებლამდე.
– რატი, ჟიურის წევრი გოჩა ჩერტკოევი თქვენი ოჯახის წევრია. როგორ მოგწონთ ჟიურის ამპლუაში?
რატი: გოჩა პროფესიონალია, იცის თავისი საქმე, შესაბამისად, ჟიურის როლში ძალიან მომწონს. ერთ კი ვიცი, ყველაზე მეტს მე მომთხოვს და შეფასების დროს არ დამინდობს. ყველაზე მეტად ეს ფაქტი მახარებს. საზოგადოებას შეიძლება ეგონოს, რადგან გოჩა ჩემი ოჯახის წევრია, ანგარიშს გამიწევს, ამ დროს კი პირიქით, ყველაზე მკაცრი ჩემ მიმართ იქნება. დღემდე ვითვალისწინებ მის რჩევებს, შენიშვნებს. გოჩას დიდი მიღწევები აქვს თავის საქმეში, რაც ადვილი ნამდვილად არ ყოფილა. გოჩამ და ჩემმა დამ მასწავლეს ცეკვა.
– თიკა, საზოგადოებისგან როგორი შეფასებები მიიღეთ?
თიკა: ნორმალური, დადებითი შეფასებები მივიღე, ყველამ მითხრა, რომ ჩემს ასეთ ცეკვას არ ელოდნენ.
– სოციალურ ქსელში თქვენს დეკოლტეს განიხილავენ. ერთ–ერთმა კონკურსანტმა, გიორგი ნაზღაიძემაც გააზიარა ფოტო, კომენტარით – "ჯანმრთელი თიკა". ასეთ კომენტარებზე როგორ რეაგირებთ?
თიკა: არ ვიცი, ამან ასეთი აჟიოტაჟი რატომ გამოიწვია. გიორგი ნაზღაიძემ რა ფოტო და კომენტარიც დადო, ისეთივე კომენტარი გავუკეთე – შე ნაგავო–მეთქი. ამ ყველაფერზე ორივემ ბევრი ვიხალისეთ. ჩვენი ხუმრობაა სიტყვა "ნაგავო", რომელსაც ერთმანეთს ხშირად ვეძახით. სოციალურ ქსელში გავრცელდა ერთი სახალისო ვიდეო, სადაც ვიღაც კაცი ყვირის, შე ნაგავოო, ჩვენც ეს ფრაზა ამოვიჩემეთ და ხუმრობით ვეძახით ერთმანეთს. ინტერენტსაიტის ჟურნალისტმა კი ეს ყველაფერი სხვა ინტერპრეტაციით დაწერა. ძალიან გავბრაზდი! რამდენიმე დღეა ჩემს დეკოლტესა და მკერდზე ლაპარაკობენ, მაგრამ რას ვიზამ? ასეთი კოსტიუმი შემირჩიეს. სამბას როლინგით ნამდვილად ვერ ვიცეკვებდი. ვერ ვხვდები, რატომ გაუკვირდათ. მოცეკვავეები ისე გამოდიან სცენაზე, რომ თითქმის არაფერი აცვიათ.
– ოჯახის წევრებისგანაც ხომ არ მიიღეთ შენიშვნა ღრმა დეკოლტეს გამო?
თიკა: არა, ჩემი ოჯახის წევრები ასეთ რამეებს ადეკვატურად აფასებენ. სამბა უნდა იცეკვო დეკოლტირებული კაბით. ჩემს შვილს, ნინას, დედის გამოსვლა ძალიან მოეწონა. დამირეკა და მითხრა, რომ ლამაზი ვიყავი. ნინას რატი ძალიან შეუყვარდა.
რატი: პირველ ტურში მეც თითქმის შიშველი ვიყავი და ჩემზე არ ატეხილა ამხელა ამბავი. რაც შეეხება ოჯახის წევრების აზრს, ჩემი ძმა, გიგი, ყოველთვის მიმითითებს შეცდომებზე, არასდროს მაქებს, იგივე პოზიცია უჭირავს მამასაც, დედა კი შეფასების დროს ძალიან ლოიალური და რბილია.
– თიკა, ვიცი, რომ თქვენმა ყოფილმა ქმარმა, ბექა ხოფერიამ, მეგობრების გარემოცვაში უყურა თქვენს ცეკვას და ძალიან გქომაგობდათ, ნერვიულობდა...
თიკა: რა შუაშია ყოფილი ქმარი?! ამ ინტერვიუში რა შუაშია მისი ხსენება?! ჰო, ალბათ მიყურა. ცეკვის დროს ყოფილ ქმარზე მეტად სხვა რაღაცეებზე მეფიქრებოდა.
რატი: მაგალითად, იმაზე, შემდეგ ტურში რას ვიცეკვებდით.
– თიკა, თვალი რატომ გაქვთ დაშავებული?
თიკა: ცეკვის დროს თვალის ქუთუთო დავიზიანე. გაგიკვირდებათ და, რეპეტიციის დროს საკუთარ ფეხს დავარტყი თვალი.
– როგორია პროექტის მიღმა თქვენი ურთიერთობა, ცეკვამ დაგამეგობრათ?
რატი: თავიდანვე ადვილად გავუგეთ ერთმანეთს, ბევრი საერთო თვისება აღმოვაჩინეთ. ჯერჯერობით მიჯერებს და მერე ვნახოთ. თიკას კარგი ხასიათი აქვს, მსიამოვნებს მასთან ერთად ვარჯიში, ძალიან მხიარულია, თუმცა ცოტა ზარმაცია.
თიკა: არ ვარ ზარმაცი, იტყუება! პირიქით, ძალიან მონდომებული ვარ. თუ არ ვიმეგობრეთ, არაფერი გამოგვივა. დიეტაზე ვარ და რატი ჩემ თვალწინ მიირთმევს ნაყინს.
რატი: ნაყინების, ბიგმაკების დრო დამთავრდა მის ცხოვრებაში! ახლა ვარჯიში, ცეკვა და მიზნისკენ სწრაფვაა საჭირო.
თიკა: ჰო, ძალიან მინდა, რომ მოვიგოთ. ერთი კვირა გვაქვს ახალი ცეკვის მოსამზადებლად და თავდაუზოგავი შრომაა საჭირო. საკუთარ თავს არ დავინდობ, მზად ვარ, კიდევ ბევრი ტური ვიყო ამ პროექტში.
– დაბოლოს, რატი, ამერიკაში დიდხანს ცხოვრობდით, თიკას შემოქმედებაზე რა წარმოდგენა გაქვთ?
რატი: ამერიკაში 4 წელი გავატარე. თიკას შემოქმედებას ბავშვობიდან ვიცნობ, მისი სიმღერები ყოველთვის მომწონდა.
– ეს 4 წელი იქ სულ ცეკვით იყავით დაკავებული?
– ჩემი სიძის, გოჩა ჩერტკოევის და დის, შორენას სტუდიაში ვასწავლიდი ცეკვას და ამავე დროს კოლეჯში ბიზნესმენეჯმენტს ვეუფლებოდი. როგორც კი სწავლა დავამთავრე, საქართველოში დავბრუნდი და ჯერჯერობით ამერიკაში წასვლას არ ვგეგმავ.
ლანა კიკნაძე, ჟურნალი სარკე