სალომე ღვინიაშვილი: "ქართველ ქალებში კრივი მოდური მე გავხადე"

მოდელი სალომე ღვინიაშვილი ქმარ–შვილს დაუბრუნდა. პროექტ "ორ ვარსკვლავში" ყოფნის დროს მათთვის დრო აღარ რჩებოდა, კონკურსის დატოვების შემდეგ კი მთლიანად ოჯახს ეკუთვნის. მალე თურქეთში ქმართან, ფეხბურთელ ზურა ხიზანიშვილთან გაემგზავრება, მას ბარგის ჩალაგებაში დაეხმარება და თბილისში ერთად დაბრუნდებიან. ქართველ ფეხბურთელს თურქეთის გუნდ "ქაისერში" კონტრაქტი უმთავრდება, ახალ კონტრაქტს კი თბილისში დაელოდება. ახალგაზრდა წყვილმა ზაფხულიც დაგეგმა – სამ შვილთან ერთად დასვენების ლამაზ დღეებს მოიწყობენ.
– სალომე, პროექტში მეშვიდე ტურამდე მიხვედით, ამ დროს აზარტი და გამარჯვების სურვილი მატულობს ხოლმე. არ გინდოდათ ფინალამდე მისვლა?
– არა, ჩემი სურვილიც იყო, პროექტი დამეტოვებინა, თუნდაც ჩემი რეჟიმიდან გამომდინარე: ჩემი ქმარი თურქეთშია და პროექტის გამო ისეთი სიხშირით ვეღარ ჩავდიოდი მასთან, როგორც ადრე. ჩემს საქმეებსაც ვეღარ ვაქცევდი ყურადღებას. ეს ყველაფერი ძალიან რთული აღმოჩნდა. ვფიქრობ, რომ იქიდან ზუსტ დროს წამოვედი. ამას მოჰყვა დიდი მითქმამოთქმა, სალომეს ჯერ არ უნდა დაეტოვებინა პროექტიო, მაგრამ მე ასე არ ვფიქრობ.
– რა შეგძინათ კონკურსმა?
– ძალიან დიდი გამოცდილება. მიუხედავად იმისა, რომ ჩემი პროფესიიდან გამომდინარე, სცენას მიჩვეული ვიყავი, ეს სულ სხვა რამ იყო. ძალიან დავაფასე ის მომღერლები, რომლებიც ცოცხლად მღერიან – ეს ძალიან რთულია. მსოფლიო მასშტაბით ცოცხლად ბევრი ვერ მღერის. უფრო თამამი გავხდი სცენაზე. მიუხედავად იმისა, რომ ბევრი კრიტიკა მოჰყვა ამ ყველაფერს, ვფიქრობ, მაინც სასიამოვნო პერიოდი იყო. პროექტში გასართობად მივიღე მონაწილეობა, ფანტასტიკური ადამიანები გავიცანი, მეგობრები შევიძინე.
– სოციალურ ქსელში ბევრი გაკრიტიკებდათ, ამაზე რა რეაქცია გქონდათ?
– ამისთვის მზად ვიყავი. კარგად სიმღერა რომ შემეძლოს, ისე მიყვარს აპლოდისმენტები, დამიჯერეთ, აქამდე სცენაზე მე თვითონ დავდგებოდი. კრიტიკას ჩვეულებრივად შევხვდი, მხოლოდ პირველი ტურის შემდეგ მქონდა ცუდი შეგრძნება, ისიც საკუთარი თავის მიმართ, რადგან ვფიქრობდი, რომ უკეთ შემეძლო შესრულება. შემდეგ ნერვიულობა შედარებით გადავლახე. კრიტიკას ჩემთვის არაფერი დაუკლია. ჩემზე რაც უნდა ილაპარაკონ, მე მაინც სალომე ღვინიაშვილი ვიქნები. ყველაზე კარგად რომ მემღერა, ვიღაც მაინც იტყოდა უარყოფითს. სხვათა შორის, ჩემ მიმართ ხალხი ყოველთვის დადებითად არის განწყობილი. ქუჩაში რომ გამოვდივარ და ვიღაც კარგ რამეს მეტყვის, რაც ხშირად ხდება, მთელი დღე ფანტასტიკურ ხასიათზე ვარ.
– ჟიურის წევრებიდან თქვენთვის განსაკუთრებით მნიშვნელოვანი ვისი შეფასება იყო?
– განსაკუთრებით თეონა კონტრიძის შეფასება მაინტერესებდა. ის ყოველთვის ობიექტურია. როცა თეონას გაიცნობ, მისგან აღარაფერი გეწყინება, ყოველ შემთხვევაში, მე არაფერი მწყენია არც მისგან და არც ჟიურის სხვა წევრებისგან. ალბათ იმიტომ, რომ ამ ქულებს ჩემთვის არსებითი მნიშვნელობა არც ჰქონდა და ცუდ ხასიათზეც არ ვდგებოდი, თუ შედარებით დაბალ ქულას მიწერდნენ. ადამიანები როცა პირად შეურაცხყოფაზე გადმოდიან, მაშინ არის რთული, მოითმინო, მაგრამ ჩემ შემთხვევაში მსგავსი არაფერი ყოფილა.
– ერთ–ერთ კონკურსანტს, კოტე თოლორდავას კი თეონა კონტრიძის სიტყვები – ნინი ბადურაშვილი ისე მაგრად მღერის, მის გვერდით შენი სიმღერა ფეხებზე მკიდიაო, ძალიან ეწყინა და ეს გამოხატა კიდეც.
– თეონა ამ პროექტის განმავლობაში ყველამ კარგად გავიცანით. ვიცით, რა ტიპია. მისი ნათქვამი ალბათ არც ასეთი გასაბრაზებელი იყო. ნინიმ ისე მაგრად იმღერა, რომ იქ უკვე მართლა ყველას ყველაფერი ფეხებზე ეკიდა. ადამიანები თავისებურად იგებენ ყველაფერს.
– ქმრის ძმაკაცები გქომაგობდნენ. კალათბურთელი ზაზა ფაჩულია გაგეხუმრათ, რომ, თუ კარგად არ იმღერებდით, ფეხსაცმელს გესროდათ. როგორ გაფასებდნენ ზურას მეგობრები?
– ჩემი და ზურას მეგობრები პირველივე ტურიდან ესწრებოდნენ კონცერტებს და მგულშემატკივრობდნენ. ზაზა ფაჩულია როგორც კი თბილისში ჩამოვიდა, კონცერტზე მოვიდა. ზაზას ამ ხუმრობას საფუძველი აქვს, ადრე თავის თამაშზე ფეხსაცმელი ისროლა. ეს ისტორია ზუსტად არ მახსოვს. მოკლედ, ვეცადე, კარგად მემღერა, რომ ზაზას ბოტასი არ მომხვედროდა.
– ზურას მოსწონდა თქვენი ნამღერი?
– ზურა ყველა კონცერტს უყურებდა, თუ თბილისში იყო – ესწრებოდა. მეუბნებოდა, ჩემი გამოსვლა როდის იყო უკეთესი ან როდის ვერ ვმღეროდი. სულ უკვირდა, ამაზე უკეთ რატომ უნდა იმღერო, უკეთესად სიმღერა რომ შეგეძლოს, მომღერალი იქნებოდიო. გულს მიხარებდა. ზურა ჩემ მიმართ კრიტიკული არასდროს არის. პირველი ტურის მერე ცუდ ხასიათზე ვიყავი და გამამხნევა. პროექტის განმავლობაში თვითონაც ძალიან ნერვიულობდა.
– რა იყო თქვენი მეუღლის პირველი შეფასება მას შემდეგ, რაც პროექტი დატოვეთ?
– გადაცემის დასრულების შემდეგ მობილურს რომ დავხედე, ზურას მესიჯი დამხვდა: "ეგრე, რა!". თვითონაც ფიქრობდა, რომ დრო იყო, კონკურსი დამეტოვებინა.
– შვილებს ალბათ გული ძალიან ეტკინათ, ისინი ხომ განსაკუთრებულად გქომაგობდნენ.
– სხვათა შორის – არა, რადგან იცოდნენ, რომ უკვე ძალიან მინდოდა წამოსვლა. ყველას ვაფრთხილებდი, რომ ესემესი არ გამოეგზავნათ. სანამ პროექტს დავტოვებდი, იმის წინა ტურშიც მეგონა, რომ კონკურსიდან წავიდოდი. მეორე დღისთვის უკვე სხვა გეგმები მქონდა, მაგრამ, ჩემდა გასაკვირად, დავრჩი. ბავშვებმა იცოდნენ, რომ პროექტის დატოვებას ვაპირებდი და უხაროდათ. უკვე აპროტესტებდნენ, დედა დაგვიბრუნეთო. თუმცა, როცა კონკურსიდან გამოვვარდი, 7 წლის ტასომ ცოტა იტირა, კიდევ მინდოდა, დედიკო სცენაზე მენახა, ძალიან ლამაზი იყოო. მეუბნება, გთხოვ, ყოველდღე ისეთ ფორმაში იყავიო.
– შეიძლება, რომ მომავალში რომელიმე კონკურსში ისევ გიხილოთ?
– არა, რადგან კონკურსების წინააღმდეგი ვარ. ამ პროექტში მონაწილეობა მხოლოდ იმიტომ მივიღე, რომ მისი ფორმატი ვინმესთან შეჯიბრს არ გულისხმობდა. მინდა, ჩემი სამომავლო გეგმები კინოს დაუკავშირდეს, თუმცა, არ ვიცი, რამდენად გამომივა. სიამოვნებით მოვსინჯავდი თავს კინოში. ჯერ შემოთავაზება არ მქონია.
– საკუთარი ბიზნესიც წამოიწყეთ და კაფე გახსენით. რატომ დაინტერესდით ამ საქმით?
– ეს ყველაფერი სპონტანურად გადავწყვიტე ჩემს მწვრთნელთან ერთად, რომელიც კრივში მავარჯიშებს. დიდი ხანია სპორტულად ვცხოვრობ, მაგრამ მხოლოდ ვარჯიში საკმარისი არ არის, თუ ორგანიზმს ჯანსაღი კვებით არ ვუწყობთ ხელს. საქართველოში დიეტა ყოველთვის აქტუალური თემაა. მე დიეტების მომხრე არ ვარ. სწორი კვება სულ სხვა რამეა. ამიტომაც მთავარი აქცენტი გავაკეთეთ ჯანსაღ მენიუზე, სადაც ხაჭაპურებს და კალორიულ ნამცხვრებს ვერ ნახავთ. რთული ყოფილა ბიზნესის მართვა, დიდი პასუხისმგებლობა სჭირდება. ყველაფერი სწორად უნდა გააკეთო და თან ხარისხი შეინარჩუნო. თუმცა ძალიან საინტერესოა და ვფიქრობ, რომ ნელ–ნელა გავფართოვდებით.
– ალბათ შვილებსაც აჩვევთ სწორ კვებას. სადილებს თქვენ აკეთებთ ოჯახში?
– ძალიან ხშირად მე ვამზადებ კერძებს. პროდუქტების შესაძენად ბაზარშიც დავდივარ. ვიცი, როგორი ყველი თუ პომიდორი მინდა. მე უნდა ავარჩიო და ვიყიდო, რადგან სხვისი ნაყიდი არ მომწონს.
– კრივზე უნდა გკითხოთ. მაინცდამაინც სპორტის ამ სახეობით რატომ დაინტერესდით?
– როცა კრივში ვარჯიშობ, დიდ ენერგიას ხარჯავ, ამ დროს ყველა კუნთი მუშაობს და ძალიან ეფექტურია. მგონი, სპორტის ეს სახეობა ბოლო პერიოდში მოდურიც გავხადე, რადგან ბევრმა დაიწყო ვარჯიში.
– ზედმეტად მამაკაცური სპორტია და გოგონების აღნაგობაზე ცუდად არ მოქმედებს?
– გოგონებისთვის სახიფათო არაა, მაგრამ თუ ზედმეტად ბევრ დროს დაუთმობენ და არასწორად ივარჯიშებენ, მაშინ შეიძლება უარყოფითი შედეგი მიიღონ.
– ხშირად ხართ გარუჯული. ეს საზიანო არ არის კანისთვის?
– ყოველ დეკემბერს დუბაიში მივდივართ, იქ ვირუჯები და ზამთარში ის ფერი მომყვება ხოლმე. სცენაზე გარუჯვა აუცილებელია, ამიტომ მაქვს ახლა ნამზეური. ბოლო პერიოდში თავს ვიკავებ რუჯისგან. მიმაჩნია, რომ ზედმეტი დოზით საჭირო აღარაა. მათ, ვისაც გარუჯული კანი უყვართ, ვეტყვი, რომ სოლარიუმის ყველა აპარატი უსაფრთხო არ არის. უნდა იცოდნენ, აქვს თუ არა მას დამცავი ფუნქცია და რუჯი შემდეგ მიიღონ.
– თქვენი ქმრის გეგმები როგორია?
– მალე მასთან წავალ, მივეხმარები ბარგის ჩალაგებაში, რადგან თურქეთში, "ქაისერში" თამაშის კონტრაქტი უმთავრდება. შემდეგ რამდენიმე კვირით თბილისში დავბრუნდებით და მერე რა გველის კონტრაქტთან დაკავშირებით, ჯერ არ ვიცით.

– რაც შეეხება საზაფხულო გეგმებს, უკვე დააწყვეთ?
– ყველაფერი დაგეგმილი გვაქვს. საქართველოში ცოტა ხანი გავჩერდებით. ჯერ აუცილებლად მარტო დავისვენებთ, შემდეგ – ბავშვებთან ერთად. ყოველ ზაფხულს ასე ვაკეთებთ. ბავშვებს დიდ დროს ვუთმობთ, შარშან ორი კვირით პარიზში ვიყავით შვილებთან ერთად. შემდეგ მე და ზურა წავედით ამერიკაში ერთი კვირით.
მანანა ნოდია, ჟურნალი სარკე