ქართველი მამაკაცები, რომლებიც კინოში გაშიშვლდნენ

ბოლო დროს ქართველი მამაკაცები გათამამდნენ და ეკრანზე საკუთარი სხეული სამოსის გარეშე გამოაჩინეს. მათ პარალელურად, ისეთი მსახიობი ქალბატონებიც არსებობენ, რომლებიც ლამის ფეხის ფრჩხილიდან კისრამდე შემოსილები არიან და ეკრანისთვის გახდას არც აპირებენ ან - ჯერ არ აპირებენ...

პირველი ქართველი მამაკაცი, რომელიც გადასაღებ მოედანზე გაშიშვლდა, გივი ბერიკაშვილი გახლავთ: ალბათ ყველას გახსოვთ ფილმი "ლონდრე", რომელშიც მთავარი პერსონაჟი, უსამართლოდ დაჩაგრული ადამიანების დასახმარებლად, შიშველ-ტიტველი იბრძვის. რთულად თუ მოიძებნება ვინმე, ვისაც ამ ფილმში გივი ბერიკაშვილის გაშიშვლება უხამსობად მოეჩვენება. სამაგიეროდ, როგორც კი ქართულ ეკრანზე შიშველი მამაკაცების "ახალი ტალღა" წამოვიდა, მას კრიტიკის ტალღაც მოჰყვა...

სპორტსმენ რამაზ ნოზაძეს საზოგადოების უარყოფითი აზრი არ ადარდებს, - ღიპიანმა შურიანებმა ჩემს ათლეტურ აღნაგობას უყურონ და დაუდგეთ თვალიო, - ამბობს...

რამაზ ნოზაძე:
- მაშინ საკმაოდ ახალგაზრდა სპორტსმენი ვიყავი. დარბაზში გახდილი ვვარჯიშობდი. რეჟისორი შოთიკო კალანდაძე შემოვიდა, დამინახა, ჩემი სხეული მოეწონა და მითხრა, - შეიძლება, ფილმში გადაგიღოთო? ბევრი ცნობილი მსახიობი ჩამომითვალა, რომლებიც ამავე ფილმში მონაწილეობდნენ. ამიტომ დავთანხმდი.

- თავიდანვე იცოდი, რომ ეკრანზე გახდა მოგიწევდა?
- ვიცოდი, რომ რომაელის "კაბა" მეცმებოდა (ჭიდაობისას, საჭიდაო ტრიკოში გამოწყობილს იმაზე მეტი კი არ მიჩანს, ვიდრე - რომაელის "კაბაში"). გადასაღებ მოედანზე ცოტა სხვანაირად მოხდა, მაგრამ ჩემთვის არც ეს იყო პრობლემა... პირველ ფილმში რომაელის "კაბა" მეცვა, მეორეში - ზეწარი მქონდა შემოხვეული.

- მართალია, რინგზეც თითქმის შიშველი ხარ, მაგრამ ფილმში გაშიშვლება ალბათ სულ სხვაა...
- ერთმანეთისგან მაგრად განსხვავდება! გადასაღებ მოედანზე ჩხუბის სცენა ან გახდილი რომ ხარ მიწოლილი, არაფერია; ტექსტის თანხლებით გადაღება კი ძნელია.

- ერთ-ერთ ინტერვიუში აღნიშნე, ეს კადრები აღარც კი მახსოვდაო. როცა კამერის წინ გაიხადე, ახალგაზრდა სპორტსმენი იყავი, ეკრანზე ფილმის გამოსვლისას კი - უკვე წარმატებული. ფილმმა დისკომფორტი ხომ არ შეგიქმნა?
- მართლაც, ძალიან ძველი კადრები იყო... არანაირი დისკომფორტი არ მიგრძნია. არაა გამორიცხული, მტრებმა თქვან, - აუჰ, ნოზაძემ რა ქნაო?! ეკრანზე მიყურონ და დაუდგეთ თვალები! რომ დავბერდები და ამ სცენას ვნახავ, ვიტყვი: ვა, რა მაგარი ტიპი ვყოფილვარ-მეთქი!.. ფილმში მაყურებლისათვის ისეთი არაფერი მიჩვენებია, რაც ჩემს შეჯიბრებაზე მოსულ გულშემატკივრებს არ უნახავთ.

- ფილმისთვის გახდა ისევ რომ შემოგთავაზონ, ოღონდ - ეროტიკული სცენისთვის, დათანხმდები?
- ვერ დავთანხმდები.

- ვიდრე დაოჯახდებოდი, მანამდეც ასე ფიქრობდი?
- მანამდე გახდაზე დავთანხმდებოდი, მაგრამ ეროტიკულ სცენაში მონაწილეობაზე - არა.

- უკვე გახდაზეც უარს ამბობ?
- გახდას გააჩნია: წელს ზემოთ გავიხდი, ქვემოთ - არა: ჩემი ცოლი იეჭვიანებს (იცინის).

- არანაირი ჰონორარის ფასად?
- ნოზაძე არ იყიდება! შეიძლება, ვინმეს მეგობრულად უფრო ამოვუდგე მხარში, ვიდრე - გარკვეული თანხის სანაცვლოდ გავიხადო.

როლანდ ოქროპირიძე:
- წინათ შოთიკო კალანდაძეს არ ვიცნობდი. თავის ფილმში მონაწილეობა რამდენჯერმე შემომთავაზა. თავდაპირველად უარი ვუთხარი: ცოტა უცნაურია, როცა რეჟისორი (რომელთანაც მეგობრობა არ გაკავშირებს) ფილმში გიღებს და ფულს არ გიხდის. უარის მიუხედავად, რამდენჯერმე კიდევ დამირეკა, - მოდი, ჩემი ფილმები ნახე და ისე გადაწყვიტე, ასე უცებ უარს ნუ ამბობო... სხვათა შორის, მისი ფილმები მომეწონა. დავინტერესდი და მომინდა, ამ ადამიანს მხარში ამოვდგომოდი.

- როგორ ფიქრობ, შენით რატომ დაინტერესდა? ვიცი, რომ რამაზ ნოზაძე ვარჯიშისას თითქმის შიშველი ნახა და მისი ათლეტური აღნაგობა მოეწონა. სადმე შიშველი შენც ხომ არ გნახა?
- არა, შიშველი გადასაღებ მოედანზეც არ ვუნახავვარ. უნდოდა, უფრო მეტი "რაღაცები" გადაეღო, მაგრამ ჩემგან უარი მიიღო. როგორც თვითონ მითხრა, გადაცემა "პროფილში" მნახა და მოუნდა, რომ თავის ფილმში გადავეღე. სიმართლეა თუ არა, არ ვიცი.

- ეროტიკულ სცენაში მონაწილეობისას უხერხულობის განცდა თუ გაგიჩნდა და როგორ დაძლიე?
- შოთიკომ ჯერ სურათები გადამიღო ლიკა ქავჟარაძესთან ერთად (მანამდე ამ ქალბატონს პირადად არც ვიცნობდი). რეჟისორს გადაღებული მასალა მოეწონა. მერე მე და ლიკა ერთმანეთს იქვე შეგვაჩვია.

- როგორ შეგაჩვიათ?
- მითხრა, აკოცეო. დიდად მორიდებული არ ვყოფილვარ - მსახიობობა ჩემი პროფესიაა. რა თქმა უნდა, უხერხული სიტუაცია შეიქმნა, მაგრამ ზედმეტად - არა.

- ხალხის რეაქციაზე არ დაფიქრებულხარ? შიშველი მამაკაცი ეროტიკულ სცენაში...
- როგორც კი ფილმის რაღაც ნაწილს გადაიღებდნენ, დამონტაჟებამდე ვნახულობდი. ამაზე თავიდანვე შევთანხმდით: რაიმეს თუ ზედმეტად მივიჩნევდი, უნდა "ამოგვეჭრა". ფილმის კადრები რომ ვნახე, იქ ქართველი მაყურებლისათვის მიუღებელი ვერაფერი აღმოვაჩინე - ქალს ვკოცნი, რა მოხდა?!

- თან, შიშველი ხარ...
- წელს ზევით შიშველი ვარ და თეძო მიჩანს.

- თითქოს ტრუსიც არ გაცვია. სინამდვილეში, გეცვა?
- ნამდვილად მეცვა, ოღონდ - სანახევროდ.

- ჯერ ტრუსი რა არის და ისიც - სანახევროდ ჩაცმული?
- (იცინის) მართალია. თავდაპირველად, თეძოს გაშიშვლება არ მინდოდა, მაგრამ რეჟისორმა ძალიან მთხოვა - ტრუსი ჩანს და ამის გამო, ხელოვნური კადრი გამოდისო. არ მიმაჩნია, რომ იმ კადრებში რაღაც საოცარია, თუმცა შოთიკოს აქვს ფილმები, სადაც გაცილებით მეტი შიშველი ქალი და კაცია და მათ სრულიად "გარკვევით" უჩანთ ყველაფერი...

- ფილმის ნახვის შემდეგ შენს საცოლეს როგორი რეაქცია ჰქონდა?
- ძალიან სასიამოვნო და კარგიაო, არ უთქვამს. ესთეტიკურად ვერ აღიქვამს.

- შენ აღიქვამ?
- არც მე მომწონს.

- ასეთ ფილმში მონაწილეობა შენმა მეუღლემაც რომ გადაწყვიტოს, რას იზამ?
- არა მგონია, რომ გადაწყვიტოს.

- მაინც რომ გადაწყვიტოს? შენც არ აპირებდი შოთიკო კალანდაძის ფილმში მონაწილეობას, მაგრამ მაინც გაშიშვლდი.
- არ მესიამოვნება, წინააღმდეგი ვიქნები.

- მსგავს სცენაში გადაღებას კიდევ დათანხმდები?
- ჰონორარს და რეჟისორს გააჩნია. ახლა უფრო მეტი გამოცდილება მაქვს.

- რა თანხის სანაცვლოდ გაიხდი?
- გააჩნია, რეჟისორი ვინაა.

- შოთიკომ რომ შემოგთავაზოს?
- შოთიკომ შემომთავაზა, მაგრამ კოსტიუმებზე ვერ შევთანხმდით.

- კოსტიუმებზე? ე.ი. ჩაცმული იქნებოდი?
- კი.

- ფილმში შენს ეროტიკულ სცენასთან დაკავშირებით უარყოფითი აზრი თუ მოგისმენია?
- კი, მაგალითად - ღირებული ფილმი მაინც იყოსო, - და ა.შ.

სამაგიეროდ, უარყოფითი აზრი ვანო თარხნიშვილს არ მოუსმენია (ყოველ შემთხვევაში, თავად ასე მითხრა): არც ისე დიდი ხნის წინ, კინოთეატრებში ახალი ქართული ფილმი - "ჭამა და სექსი" გამოვიდა და ქართულ ეკრანებზე გაშიშვლებულ მამაკაცებს კიდევ ერთი მსახიობი - ვანო თარხნიშვილი შეემატა. ვფიქრობ, მსახიობი "თამამ" სცენაში მონაწილეობას ისე დათანხმდა, რომ ფსიქოლოგიურად მზად არ იყო, საკუთარი უკანალი მაყურებლისათვის ეჩვენებინა: მართალია, მითხრა, ამ სცენაში მონაწილეობაში ვერანაირ პრობლემას ვერ ვხედავო, მაგრამ ჩვენს თემას სხვა "შიშველი მამაკაცები" თუ იუმორით შეხვდნენ, ვანო ძალიან გაღიზიანდა და ინტერვიუ "გამაუქმებინა". უფრო მეტიც - მანამდე ვერ დამშვიდდა, სანამ არ დარწმუნდა, რომ დიქტოფონით ჩაწერილი მისი საუბარი წავშალე...