ნინო ძოწენიძის გარეგნობამ მისი შვილი შეაშინა

''ჯიდიესის'' პროექტ ''ერთი ერთში'' რამდენიმე ლაივის გამარჯვებული ნინო ძოწენიძე გახდა. ყველაზე კეთილი და საყვარელი - ასე შეაფასეს მისი გარდასახვა ლეგენდარულ ჯაზ-დივად, ელა ფიცჯერალდად ჟიურის წევრებმა.
ნინო ყველაფერს აკეთებს იმისთვის, რომ საკუთარი შესაძლებლობები მაქსიმალურად გამოავლინოს, მაგრამ როგორც ჩვენთან საუბარში აღნიშნა, ლიდერობას არ ელოდა.

- ლაივის ლიდერობა ძალიან მაგარი შეგრძნებაა. ბოლო ლაივზე ელა ფიცჯერალდის შესრულებისას თითქმის რვა საათი მომიხდა გრიმით ყოფნა. ძალიან ბევრი იმუშავეს და გამხდარი გოგო ელა ფიცჯერალდს დამამსგავსეს. ჟიურის შეფასებებით კმაყოფილი ვარ. საოცარი შეფასებები დავიმსახურე. ძალიან გამიკვირდა, რომ ქორეოგრაფმა ზაკ რისმა 12 ქულა დამიწერა, მაშინ როდესაც საერთოდ არ მიცეკვია და ვოკალის პედაგოგმა სისი სამიმ - 10. მაგრამ, რა თქმა უნდა, მაინც ძალიან გამიხარდა. სისის ჩემთვის აქამდე ათი არასოდეს დაუწერია.
- ფიქრობდი, რომ ამ ლაივის ლიდერი გახდებოდი?
- წინასწარ ვერაფერს დაგეგმავ და ვერ გაიგებ. კონკურსი ძალიან რთული ყოფილა. ზოგადად არ მიყვარს, ხელოვნებაში კონკურსს არ მივესალმები, მაგრამ ვფიქრობ, ''ერთი ერთში'' მონაწილეობა ჩემთვის კარგია. აღმოვაჩინე, რომ ბევრი რამ შემძლებია. ამისთვის დიდი მადლობა მინდა ვუთხრა ტელევიზიას და მგონია, რომ ამის შემდეგ კიდევ ბევრი ახალი რამის გაკეთებას შევძლებ.
- პროექტში მონაწილეობს ვერიკო ტურაშვილი. თქვენ განუყრელი მეგობრები ხართ. რა გრძნობა იყო, როდესაც მეგობრები კონკურენტები გახდით?
- ვერ ვიტყოდი, რომ სასიამოვნო განცდა მქონდა. პროექტში ყველა ფიქრობს გამარჯვებაზე და ყველა მონაწილე თავისებურად ნიჭიერია. ვერიკოც ძალიან ნიჭიერია. ვგიჟდები მისი ხმის ტემბრზე და ამჯერად ის ჩემი კონკურენტია. რას ვიზამთ. ორივე მომღერლები ვართ და ვცდილობთ, ჩვენი შესაძლებლობის მაქსიმუმი გავაკეთოთ.
- თავიდან, როდესაც მონაწილეობას თანხმდებოდით, არ გიფიქრიათ, რომ მეგობრებს ერთმანეთის კონკურენტობა გაგიჭირდებოდათ?
- თავიდან არ ვიცოდი, რომ ვერიკოც მიიღებდა მონაწილეობას. დამირეკა და მითხრა, მეც მიმიწვიეს ''ერთი ერთშიო'', ცოტა დავიბენი. არ ვიცოდი, რა რეაქცია უნდა მქონოდა, უნდა გამხარებოდა თუ მწყენოდა, მაგრამ მერე ვთქვით, რატომაც არა. ჩვენ სხვანაირი მეგობრობა გვა-ქვს და ამას კონკურსი კი არა, არაფერი არ შეცვლის. ჯანსაღი და ჯანმრთელი კონკუ-რენტობით მივდივართ წინ. ამ პროექტში მონაწილეობის შემდეგაც ჩვენ ძალიან კარგი მეგობრები ვიქნებით.
- ვერიკოს პროექტში მამაკაცად გარდასახვამ მოუწია. გინდა, ამ შემთხვევაში შენც მისი ბედი გაიზიარო?
- იმედია, მამაკაცი მომღერლის შესრულება მეც მომიწევს. მინდა და მაინტერესებს, მამაკაცად გარდასახვა როგორ გამომივა. მგონია, რომ ლოტოტრონი ამჯერადაც გამიმართლებს და ძალიან მაგარ კაც მომღერალს შემახვედრებს.
- რომელ მომღერლად გარდაისახებოდი?
- სიმართლე რომ გითხრათ, არ ვიცი. ამიტომაცაა ეს კონკურსი საინტერესო, რომ წინასწარ არ იცი, ვისი შესრულება მოგიწევს. შეიძლება, ისეთი მომღერალი შეგხვდეს, საერთოდ არ იყოს შენთან ახლოს არც ჟანრით და არც ტემბრით, მაგრამ შენ უნდა შეძლო და გარდაისახო. მე ყოველთვის მაგარი მომღერლები მხვდებიან და ვფიქრობ, ამ ყველაფერს თავს ნორმალურად ვართმევ.
- პროექტის მიღმა რას საქმიანობ?
- მთლიანად ''ერთი ერთში'' ვარ ჩართული. სხვა არაფრისთვის დრო არ მრჩება. ბევრი დრო სჭირდება, რომ ის მომღერალი, რომელიც უნდა განასახიერო, შეისწავლო და ყველაფერი ისე გააკეთო. საკუთარი ბავშვისთვისაც აღარ მრჩება დრო. შვილს ვენატრები და ლაივებზე მნახულობს ხოლმე. იქაც ვერ მცნობს. ბოლო ლაივზე ვეკითხებოდი, გინდა, ელა ფიცჯერალდის მსგავსი დედა რომ გყავდეს-მეთქი და არაო, ცოტა შეშინებულმა მიპასუხა.
- ოჯახისთვის დრო რომ აღარ გრჩება, მეუღლე, გიგა კუხიანიძე, არ აპროტესტებს?
- გიგა ხელს მიწყობს, რომ ამის გარდა სხვა არაფერზე ვიფიქრო. ოჯახი მეხმარება, რომ შევძლო და ამ კონკურსში წარმატებულად მივიღო მონაწილეობა.
- პროექტის დამთავრების შემდეგ რა გეგმები გაქვს?
- ძნელია, შემოქმედებაში რამე დაგეგმო. საქართველოში მომღერლები კონცერტებით არ ვართ განებივრებული. შოუბიზნესში არაფერი ხდება, ამიტომ მიხარია, რომ ამ პროექტში ვარ. გასულ ზაფხულს გადავიღე კლიპი, რომელიც უკვე დამონტაჟდა. ჩემს კარიერას არ ვეშვები.
- ამდენი ხანი კლიპის პრემიერა რატომ ვერ მოხერხდა?
- ბევრი ხელის შემშლელი პირობა იყო. კლიპის პრემიერა მალე მექნება.
- რაზეა სიმღერა?
- ჩემი სიმღერაა, ინგლისურენოვანი.
- ''შინამანაკენას'' ჰგავს?
- საერთოდ არ ჰგავს ''შინამანაკენას''. მაყურებლის წინაშე საინტერესო ვიზუალით წარვდგები. ცოტა სხვანაირი ნინო ვიქნები.
- ძალიან მაგარი სიახლეა. ბოლო დროს ქართველი მომღერლები კლიპებს, ფაქტობრივად, აღარ იღებენ.
- საჭიროა გქონდეს სტიმული, რომ კლიპი გააკეთო.
- საზაფხულო ქართული ჰიტი უკვე წლებია, არ გვქონია. შეიძლება, შენი სიმღერა ზაფხულის ჰიტი გახდეს?…
- არ მგონია, გაჰიტდეს. მასებზე გათვლილი სიმღერა არაა. ჩემი აზრით, ძალიან ცოტა მსმენელს მოეწონება.
- კონკურსები არ მიყვარსო თქვი, მაგრამ ''ერთი ერთში'' მონაწილეობამ ხომ არ გაგიჩინა იმის სურვილი, რომ კონკურსში საქართველოს ფარგლებს გარეთ მიიღო მონაწილეობა?
- ''ერთი ერთში'' რომ შემომთავაზეს მონაწილეობა, პირველ რიგში ის მომეწონა, რომ პროექტიდან არავინ ვარდებოდა. ზუსტად ვიცი, რომ ჩემზე ძალიან იმოქმედებს, პროექტს ვინმე რომ ტოვებდეს. მერე სულ დაძაბული ვიქნები და სტრესულ მდგომარეობაში ვეღარაფერს გავაკეთებ. თამამად შემიძლია ვთქვა, რომ ახლა ძალიან მაგარ კონკურსში ვარ.
- საქართველოში დიდი პოპულარობით სარგებლობს ''ახალი ტალღა'' და ''ევროვიზია'', სადაც მონაწილეობაზე ბევრი მომღერალი ოცნებობს.
- ''ახალ ტალღაში'' არ მივიღებდი მონაწილეობას, ''ევროვიზიაში'' მონაწილეობაზე კი დავთანხმდებოდი. ჩემი მეუღლე აკეთებს საბავშვო ''ევროვიზიას'' და ყოველთვის წარმატებით ვბრუნდებით. იმიტომ არ ვამბობ, რომ ჩემი მეუღლეა, მაგრამ მან ზუსტად იცის, რა სჭირდება ამ კონკურსზე ევროპას. ამიტომ სიამოვნებით წავიდოდი ''ევროვიზიაზე''.
- ზოგი ფიქრობს, რომ ერთპიროვნულად აღარ უნდა წყდებოდეს, ვინ წავიდეს ამ კონკურსზე. იზიარებ ამ აზრს, როგორც მივხვდი?
- გიგას დიდ შესაძლებლობებს არ აძლევენ და გული ძალიან სწყდება. ალბათ, ჭეშმარიტება როდისმე გაიმარჯვებს.
- თუ გიგა კუხიანიძეს დაევალება ''ევროვიზიაზე'' წამსვლელთა ვინაობის არჩევა და შენ წახვალ, ბევრი იტყვის, რომ არასწორი გადაწყვეტილებაა, რადგან არჩევანი საკუთარ მეუღლეზე შეაჩერა.
- შეიძლება, მე არ წავიდე და გიგამ სხვა პროდუქტი გააკეთოს. არ ვიცი, გიგას ამ საკითხს რატომ არ ანდობენ. ფაქტია, რომ საბავშვო ''ევროვიზიაზე'' ყოველთვის წარმატებას ვაღწევთ. მე არ ვამბობ, რომ მარიკო ებრალიძე და ''შინი'' ცუდები იყვნენ, მაგრამ ''ევროვიზიაზე'' წასაღები პროდუქტი ცოტა სხვაგვარად უნდა გაკეთდეს. ვფიქრობ, გიგას რომ დაავალონ ეს საკითხი, კონკურსზე იმაზე კარგ შედეგს აუცილებლად მივაღწევთ, რაც აქამდე გვქონდა.
- იყო ლაპარაკი იმაზე, რომ გიგას ჩაებარებინა ''ევროვიზიის'' შიდა შესარჩევი კონკურსი?
- ასეთი რამ არ ყოფილა და სამწუხარო სწორედ ესაა.

მერი კობიაშვილი
ჟურნალი ''რეიტინგი''