ნინო თარხან-მოურავისა და თემიკო ჭიჭინაძის შვილი სერიალ ''ჩემი ცოლის დაქალებში'' გადაიღეს

რუსთაველის თეატრის მსახიობების ნინო თარხან-მოურავისა და თემიკო ჭიჭინაძის შვილი, 22 წლის ელისაბედი, მშობლების პროფესიას არ გაჰყოლია, სამხატვრო აკადემიაში სწავლას წელს ასრულებს - მომავალი დიზაინერია.
დედა-შვილს შინ ვეწვიეთ. მათ სიახლეზეც ვესაუბრეთ, რომელიც ელისაბედის ''ჩემი ცოლის დაქალებში'' გადაღებას უკავშირდებოდა...

ნინო:
- ელისაბედი რომ დაიბადა, 25 წლის ვიყავი. დედაჩემმა მთხოვა, თუ გოგონა შეგეძინება, მინდა, ჩემი დიდი ბებიის სახელი დაარქვაო. თხოვნა შევუსრულე და ელისაბედი დავარქვი. მაშინ უკვე თეატრში ვმუშაობდით. ბავშვი 1992 წელს გაჩნდა. ამ პერიოდს დაემთხვა არეულობა ჩვენს ქვეყანაში. არ გვქონდა შუქი, წყალი, არ დადიოდა ტრანსპორტი და თეატრშიც შესაბამისი სიტუაცია იყო. ძირითად დროს შინ ვატარებდი, მაგრამ როცა სპექტაკლი გვქონდა, ელისაბედს ძიძასთან ვტოვებდით, რომელიც არაჩვეულებრივი ქალი იყო.
ელისაბედი:
- სამხატვრო აკადემიის IV კურსის სტუდენტი ვარ, მოდის დიზაინის ფაკულტეტზე ვსწავლობ, წელს ვამთავრებ. ახლახან დავიწყე ტანსაცმლის კერვა და ძალიან დიდი იმედი მაქვს, მომავალში უფრო დავიხვეწები. სადიპლომოს ვაკეთებ და ამაზე ვარ გადართული. გასაკეთებული მაქვს ხუთი კომპლექტი. მომავალში ალბათ უფრო დედას ჩავაცმევ (იღიმის). დიპლომს რომ დავიცავ, სურვილი მაქვს, მაგისტრატურაში მილანში ან ლონდონში ვისწავლო. შემდეგ მინდა გავხსნა ჩემი პატარა ატელიე, სადაც ერთად იქნება სამკერვალოც და მაღაზიაც.
- ამ ეტაპზე როგორი სტილის სამოსი მოგწონს?
- ეს ხასიათზეა დამოკიდებული. უფრო მეტად მომწონს ''აჯაჯული'' ჩაცმა, რადგან თავისუფალ სტილში ჩაცმული თავს კომფორტულად ვგრძნობ.
- ამ თვალსაზრისით, შენსას დედას გემოვნებაც ემთხვევა?
- მგონი, მე და დედას ერთნაირი გემოვნება გვაქვს, ერთნაირად ვიცვამთ. მე ყოველთვის მომწონს დედას ტანსაცმელი და სულ მინდა, მეც ჩავიცვა მისი სამოსი.
- მსახიობი მშობლების შვილი ხშირად ამავე პროფესიას ირჩევს, შენ რატომ არ მოისურვე?
- ბავშვობაში ძერწვის წრეზეც დავდიოდი და ხატვაზეც, მაგრამ მაშინ არ მიფიქრია სამხატვრო აკადემიაში ჩაბარებაზე. მსახიობობა მინდოდა, მაგრამ ბოლო წელს გადავიფიქრე და ხატვის საფუძვლიანი შესწავლა დავიწყე.
- ამ გადაწყვეტილების შეცვლაში მშობლები რამენაირად ხომ არ ჩარეულან?
ნინო:
- არა, ერთადერთი, რაც გავაკეთე, წავიყვანე თეატრში და რეპეტიციებზე დავსვი. ანუ ელისაბედი დაესწრო ე. წ. ''ჭუჭყიან სამუშაო'' პროცესს, რაც მგონი, დიდად არ მოეწონა. ალბათ ამანაც ითამაშა როლი მისი გადაწყვეტილების შეცვლაში.
- ელისაბედ, თუ გახსოვს, პირველად მშობლებმა როდის წაგიყვანეს თეატრში და რომელია შენთვის მათი გამორჩეული როლები?
- მახსოვს, პირველად ჯერ ''საშობაო სიზმარი'' ვნახე, შემდეგ ''მერე რა, რომ სველია, სველი იასამანი''. ძალიან მომწონს სპექტაკლი ''თორმეტი განრისხებული მამაკაცი'' და მასში მამას როლი. რაც შეეხება დედას, ''შობის მეთორმეტე ღამეს'' დავასახელებ, რადგან ის ბიჭის როლს ასრულებს და თავს ძალიან კარგად ართმევს.
- რა თემაზე შეიძლება იკამათო დედასთან ან მამასთან?
- მე და დედას სერიოზულად არ გვიკამათია. ერთადერთი უთანხმოება იმაზე მოგვდის, რომ ერთმანეთის ტანსაცმელი ჩავიცვით. შეიძლება, დილას დედას ზედა ჩავიცვა, აკადემიაში გავქანდე, მერე მან ეძებოს, ვერ იპოვოს და დამირეკოს. საერთოდ, ჩემს ოჯახში არც დედაა მკაცრი და არც მამა. სახლიდან რომ გავდივარ, იციან სად, ვისთან ერთად ვიქნები, დაახლოებით ვამბობ, როდის დავბრუნდები და ჩემს სიტყვას ვასრულებ კიდეც.
- გარდა იმისა, რომ ხატავ და დიზაინერი გახდები, კიდევ რა ინტერესები გაქვს?
ნინო:
- სერიალში თამაშობს (იღიმის). ელისაბედი 14 წლის იყო, როცა მერაბ კოკოჩაშვილმა გადაიღო თავის ფილმში ''უსუი'', რომელშიც ლევან წულაძესთან ერთად ითამაშა. 16 წლის გახლდათ, როცა ''პირველ არხზე'' სერიალში მონაწილეთა შესარჩევად კასტინგი გამოცხადდა, მე უბრალოდ გზა ვასწავლე და თავად წავიდა. ეს იყო სერიალი ''მესამე თაობა'', რომელშიც ელისაბედმა ითამაშა. ახლა კი გადაიღეს სერიალში ''ჩემი ცოლის დაქალები''.
ელისაბედი:
- ერთ სერიაში გადამიღეს. არ ვიცი, კიდევ გამოვჩნდები თუ არა. კურტანას დის როლი შევასრულე. ჯგუფს, რომელიც ახლა სერიალზე მუშაობს, დიდი ხანია ვიცნობ და მათთან მითანამშრომლია. იმ პერიოდიდან ვახსოვარ და როცა დამირეკეს და მკითხეს, თუ მქონდა დრო და სურვილი, რომ გადაღებებზე მივსულიყავი, რა თქმა უნდა, ამ შემოთავაზებას სიამოვნებით დავთანხმდი.
- სოციალურ ქსელში ამ სერიალს თავისი გვერდი აქვს, სადაც იდება სე-რიალიდან მსახიობის ფოტოებიც. ადევნებ თვალს მათ ქვეშ კომენტარებს, რომლებიც ზოგჯერ ძალიან არაკორექტულიცაა?
- არა, არ ვადევნებ, თუმცა სერიალს ყოველთვის ვუყურებ და ძალიან მომწონს. მგონი, საქართველოში ყველა უყურებს, ძალიან რეიტინგული და ხარისხიანია. მსგავსი შემოთავაზება რომ იყოს, კიდევ დიდი სიამოვნებით დავთანხმდებოდი.
- როგორ შეაფასეს მშობლებმა შენი ნამუშევარი?
ნინო:
- მე კმაყოფილი ვარ (იღიმის). ამოცანას, რომელიც გადამღებმა ჯგუფმა მიზნად დაუსახა, მგონი, მშვენივრად გაართვა თავი.
ელისაბედი:
- ჩემთვის ყველას აზრი მნიშვნელოვანია, მაგრამ პირველ რიგში, მშობლების.
- ელისაბედი გარეგნულად ორივეს გგავთ და ხასიათით?..
ნინო:
- გარეგნულად მეც მგავს და თემიკოსაც, ხასიათითაც, მაგრამ ალბათ აქვს თავისი თვისებებიც, რომელიც ორივეს ხასიათს აპატიოსნებს და ხვეწს (იღიმის).
- მგონი, დედა-შვილს გიყვართ თმასთან დაკავშირებული ექსპერიმენტები...
- კი, გვიყვარს.
ელისაბედი:
- დიახ, ასეა. თავიდან ძალიან მინდოდა, ქერა თმა მქონოდა და შევიღებე. მერე უცებ გადავწყვიტე შეჭრა. ვიფიქრე, თმის ფერს აღარ შევიცვლი და გაჯანსაღდება-მეთქი, მაგრამ ზუსტად ერთ კვირაში თმა წითლად შევიღებე. საერთოდ, ვარცხნილობას ხშირად ვიცვლი.
- რამდენად გახსნილი ხარ მშობლებთან?
- ბევრ რამეს ვუყვები.
- პირადსაც? აქვე ისიც გვითხარი, რა ხდება შენს პირადში?
- პირადში ყველაფერი კარგადაა. არაფერი განსაკუთრებული (იღიმის).
- დასასრულ, ქალბატონო ნინო, ბოლო დროს არაერთი ადამიანისგან მსმენია, რომ რუსთაველის თეატრში არაფერი ხდება ახალი. არც მაყურებლის ისეთი აქტიურობაა, როგორიც თუნდაც ზაალ ჩიქობავას მმართველობის დროს...
- ახლახან დავით საყვარელიძემ ნიკუშა გომელაურის პოეზიის მიხედვით მინისპექტაკლი დადგა. მას ცოტა არასტანდარტული ფორმა აქვს, თან ექსპერიმენტულ სცენაზე თამაშდება და ვფიქრობ, საინტერესო გამოვიდა. დანარჩენ სიახლეებს რაც შეეხება, ჩაშვებულია რამდენიმე სპექტაკლი, რომლებსაც ალბათ მომავალ სეზონზე წარმოვადგენთ. საერთოდ, რა ხდება თეატრში, ცოტა რთული სათქმელია. ყველაფერს თავისი დრო აქვს, ასეა ყველა სფეროში - დიაგრამა ხან ზევით ადის და ხან ქვევით, ახლა სწორ ხაზზე ვართ და იმედია, მალე დავიწყებთ აღმასვლას (იღიმის).

ანა კალანდაძე
ჟურნალი ''რეიტინგი''