''სტეფანეს პატივს ვცემ, გაბუნია მუსიკის გარტყმაში არ არის''

წინა კვირას ''X ფაქტორის'' მორიგ ტურში მომღერალი მიშა შაყულაშვილი ვნახეთ - თამთა გოდუაძის საუკეთესო ათეულში მოხვდა, თუმცა მენტორმა ბოლო მომენტში გაწირა და შემდეგ ტურში არ გადაიყვანა. შენ უკვე ჩამოყალიბებული მომღერალი ხარ და შეცვლა გამიჭირდებაო, უთხრა.
ჩვენ მომღერალსა და კომპოზიტორს სტუდიაში ვესტუმრეთ და პროექტთან დაკავშირებით ინტერვიუ ჩავწერეთ.

- მიშა, 1992 წლის შემდეგ, საქართველოში არც ერთ მუსიკალურ პროექტში არ მიგიღია მონაწილეობა. ''X ფაქტორში'' გასვლა რატომ გადაწყვიტე?
- რამდენადაც ვიცი, ასაკი ყველგან განსაზღვრული იყო.
- ყველგან არა.
- ჰო, ალბათ. რა გითხრა, რატომღაც მომინდა, მაყურებლისთვის თავი გამეხსენებინა.
- დაავიწყდი მაყურებელს?
- (იღიმება) მე? რაღა დროსია. როგორც აქტიური მომღერალი, რა თქმა უნდა, დავავიწყდი. 1994 წლის შემდეგ ათასში ერთხელ გამოვდივარ სცენაზე, მაშინ, როცა დღეგამოშვებით ფილარმონიის სცენაზე ვიდექი. ამ შენობაში ვცხოვრობდი, ''ივერიაში'' როცა ვმღეროდი. გამოვდიოდი მარათონებზე, ტელევიზია იღებდა ''პრესტიჟ- შოუს'', რომელშიც ასევე ვმონაწილეობდი. ერთი სიტყვით, აქტიური მუსიკალური ცხოვრებით ვცხოვრობდი, მიუხედავად იმისა, რომ მაშინ საქართველოში მძიმე წლები იყო.
- ''X ფაქტორში'' მონაწილეობის მიზანი მხოლოდ მაყურებლისთვის თავის გახსენება იყო, თუ სხვა გეგმებიც გქონდა?
- სხვა რა უნდა ყოფილიყო?
- მთავარი, პროექტის მოგება, თუ ამხელა ამბიცია არ გქონდა?
- (იღიმება) ამბიცია მე რომ მქონდა, ჩემო კარგო, ისეთი უნდა, მაგრამ თავის დროზე... ამბიცია სა- ზიზღარი რამ არის, რაც ეკლესიისკენ ვქენი პირი, მის მერე გავაცნობიერე. მიუხედავად იმისა, რომ ადამიანში უკვე გამჯდარი ხასიათის, თვისებების შეცვლა ასე ადვილი არ არის, ვებრძვი საკუთარ თავს. მადლობა უფალს, რომ ისეთი აღარ ვარ, როგორიც ვიყავი. მე და არავინ სხვა, აი, ასე ვხედავდი. პრინციპში ასეც იყო იმ დროს. კარგი მომღერლები იყვნენ ყველანი, მაგრამ, რატომღაც...
- გეგონა, შენ საუკეთესო იყავი?
- იმ წლებში ასეც იყო-მეთქი, ვამბობ. ამას ბევრი პროფესიონალი აღიარებდა, მაგრამ ეს თვითონ არ უნდა შეიმჩნიო. უბადრუკი ხარ ამ დროს. ყველაზე სასაცილო მაშინ ხარ, როცა გგონია, რომ ამას შენ აკეთებ. უფლის გარეშე არაფერი ხდება, არავინ არ ხარ საერთოდ.
- მიშა, შენი პირველი გამოჩენა ''X ფაქტორში'' მაყურებელს არ უნახავს. პირდაპირ ათეულში გნახეთ. თუ დაინტერესდი, რა მოხდა, რატომ არ ჩაგსვეს გადაცემის იმ ნაწილში?
- ეს კითხვა გადაცემის პროდიუსერებს უნდა დაუსვათ. მე კი არა, ლევან გვაზავა, რომელიც საუკეთესო ოთხეულში მოხვდა, მაყურებელს პირველ ტურში არ უნახავს.
- შენ მიმართ ჟიური მკაცრი აღმოჩნდა, როგორ გგონია, ამის საფუძველი ჰქონდათ?
- რა გითხრა, ეს ალბათ ჟიურის უნდა ჰკითხოთ.
- გიორგი გაბუნიამ ასე შეგაფასა, - ''არ მომეწონა არაფერი, ჩემთვის ეს გამოსვლა იყო ნული''...
- მინდა ვიყო კორექტული, ობიექტური და მშვიდად მივიღო ყველაფერი ის, რაც დაკავშირებულია ამ სუბიექტთან, გაბუნიასთან. ვინ არის საერთოდ გაბუნია?
- ჟურნალისტი, ტელეწამყვანი.
- მართლა? მერე რა...
- შენ გიორგის უთხარი, რომ მისგან მსგავს შეფასებას ელოდი, რატომ?
- არ გამკვირვებია იმიტომ, ამ ადამიანს რომ არაფერი არ მოსწონს. ასეთი რამ გინახავთ?! ორასი მომღერალი გამოვიდა და მისი მოსაწონი არც ერთი არ იყო. სტივი უანდერს რომ ემღერა, ალბათ მასაც შენიშვნას ეტყოდა ეს მუსიკის ცოდნაში პაწაწუნა გაბუნია. თუ ''X ფაქტორის'' წესდებაში წერია ის, რომ ჟიურის ერთი წევრი აუცილებლად ტელეწამყვანი უნდა იყოს, ისეთი ტელეწამყვანი უნდა დასვან, რომელიც მუსიკაშიც ერკვევა. ეს ვიღაც გაბუნია, ჩემი აზრით, მუსიკის გარტყმაში არ არის. ვენაცვალე ჟიურის იმ წევრებს,
რომლებიც აღიარებდნენ ჩემს ნიჭიერებას, რომ ჩემი შეფასება გაუჭირდებოდათ, რომ თითო ბგერა ახსოვთ ჩემი ნამღერი. ლაპარაკი მაქვს სტეფანეზე, დიდ პატივს ვცემ, ძალიან მაგარი მუსიკოსია, მცოდნეა. ამ ადამიანისგან, მიუხედავად იმისა, რომ ჩემზე პატარაა და ჩემ მერე მოდის შოუბიზნესში, მისაღებია თუნდაც კრიტიკა. გაბუნიასგან რა უნდა მივიღო?
- რეპერტუარი სტეფანემაც დაგიწუნა...
- მერე რა, მას ხომ არ აურჩევია ჩემთვის რეპერტუარი, შეეძლო დაეწუნებინა.
- ''მეც არაფერი არ მომეწონაო'', - ასეთი ფრაზაც თქვა...
- იმ სიმღერაში ეტყობა არ მოეწონა. გემოვნებაზე ხომ არ დავობენ. მეც რომ მკითხოს ვიღაცამ, სტეფანეს რომელიმე სიმღერაზე, მომწონს თუ არა, შეიძლება, უარყოფითი პასუხი მქონდეს. აბსოლუტურად მეგობრულად ვამბობ ახლა ამას. ჩემთვის მისი სიმღერა, პუტინზე რომ იმღერა, სასაცილოა. სხვადასხვა სტილში ვმღერით. ეს ბუნებრივია. იქ ხომ არ დავდგებოდი და დავიწყებდი ლაპარაკს. დამერწმუნე, ვერც ერთი ვერ გამიძლებდა, ოთხივეს ერთად რომ ელაპარაკა. თამთას, ჩემს მენტორს, არაფერს ვერჩი. გოგომ თქვა, ჩამოყალიბებული ხარ, დიდი ხნის ვარსკვლავი და ვერ შეგცვლიო. რატომ უნდა გადამასხვანაიროს ვიღაცამ?
- მაგრამ შენ დაჰპირდი თამთას, რომ წაჰყვებოდი, შეიცვლებოდი.
- ეგ პროექტში დასარჩენად ვუთხარი და წავყვებოდი კიდეც, მაგრამ გააჩნია რაზე. ყველაფერზე გოდუაძეს კი არა, ბიონსეს არ გავყვები.
- თუმცა იყო იქ რეპლიკები, გაბუნიამ თამთას გადაულაპარაკა, - შენ ვინ არ გამოგყვებაო...
- დიდი კაცია გაბუნია (იცინის), რა გავაკეთო. არ ჰყოფნის საქართველო გენეტიკურად, მეტი მასშტაბის კაცია.
- შენ რომ ყოფილიყავი თამთას ადგილზე, იმავე ოთხეულს დაიტოვებდი გუნდში?
- პირველ ტურზე ძალიან ბევრ ადამიანს უთხრეს, გადასული ხარო და ბევრს მერე აღარ დაუძახეს. პირველი ტურიდან ბევრ ასეთს დავტოვებდი. მაგალითად, ტატო გოდერძიშვილს. პროფესიონალი მომღერალია. გული დამწყდა სტეფანეს გუნდიდან ცენტერაძეზე, ძალიან მაგარი გოგოა. ამ ათეულს რაც შეეხება... სიმართლე რომ გითხრა, თამთას პირდაპირ ვუთხარი, ყველა და ყველაფერი მახსოვს საქართველოს ესტრადაზე და შენ რატომ არ მახსოვხარ- მეთქი. მე საქართველოში არ მიმღერიაო, მითხრა. მე არ ვიცნობ თამთას შემოქმედებას.
- ძალიან ადვილია, რომ დაინტერესებულიყავი, ''იუთუბზე'' ნახავდი.
- მოვისმენ აუცილებლად. ამ ოთხეულს რაც შეეხება, მომწონს. ოთხივე ფანტასტიკური მომღერალია თავთავიანთ ჟანრში.
- ბუნებრივია, გყავდა გულშემატკივრები, ყველაზე მეტად ვინ ნერვიულობდა შენი გამოსვლის დროს?
- ჩემი ძმისშვილები, ნათესავები, მეგობრები. შვილი 5 წლის არის, იმან ჯერ რა უნდა ინერვიულოს.
- შენი ყოფილი ცოლი, სოფო ბედია თუ გგულმშემატკივრობდა?
- არ ვიცი და არც მაინტერესებს.
- შენს პირად ცხოვრებაში სიახლეა?
- არა, ღმერთის დიდებით, ახალ სიყვარულს ველოდები. ქალების მეტი რა არის, მაგრამ რაც შეეხება სიყვარულსა და ოჯახის შექმნას, ჯერ სიახლე არ მაქვს.
- მსგავსი პროექტი კიდევ რომ ჩატარდეს, მიიღებ მონაწილეობას?
- იცი რა, რაღა დროს ჩემი კონკურსია, დიდი ხანია, ჟიურიში უნდა ვიჯდე. ''ვოისში'' ვცდიდი ბედს, მაგრამ ეს პროექტი, სამწუხაროდ, დახურეს.
- დღეს რას საქმიანობ?
- ვწერ სიმღერებს, დავდივარ ეკლესიაში და დროს ვატარებ საკუთარ შვილთან.
- შვილმა როგორ გააცნობიერა ის, რომ მისი მშობლები ცალ- ცალკე ცხოვრობენ?
- ტყუილად აგრძელებ, ამ თემაზე საუბარს არ ვაპირებ.

ნინო მჭედლიშვილი
ჟურნალი ''რეიტინგი''