რის გამო ინგრევა ოჯახი ყველაზე ხშირად?

როგორც აღმოჩნდა, ყველაზე მტკიცე ოჯახებისთვისაც კი მთავარი "მტერი" ეჭვიანობაა. თანაც ეჭვიანობა განსაკუთრებით დამღუპველად სწორედ ოფიციალურად დაქორწინებულ წყვილებზე მოქმედებს. რომ არა ეჭვიანობა, განქორწინებათა რაოდენობა სამჯერ შემცირდებოდა.

საინტერესოა, რომ სამოქალაქო ქორწინებაში მყოფ ან უფრო თავისუფალი ურთიერთობების მქონე წყვილებს ნაკლებად "აწუხებთ" ეჭვიანობა და მათი კავშირი გაცილებით ხანგრძლივია.

სპეციალისტთა მტკიცებით, ეჭვიანობა უარყოფითად მოქმედებს არა მარტო წყვილის ემოციურ, არამედ სექსუალურ ურთიერთობებზეც. პარტნიორის ღალატზე ეჭვი საგრძნობლად აქვეითებს სქესობრივ ლტოლვას.

და კიდევ, შესაბამისი გამოკვლევების შედეგად დადგინდა, რომ ქალები გაცილებით მტკივნეულად განიცდიან ემოციურ ღალატს, მამაკაცები კი - სექსუალურს. 

ოჯახის სიმტკიცესა და ერთგულებაზე ქალსა და მამაკაცს განსხვავებული შეხედულებები აქვთ.

სპეციალისტებმა ცდის პირებს სხეულზე სპეციალური გადამცემები მიამაგრეს და სთხოვეს, თავიანთი მეორე ნახევრები სხვაზე შეყვარებული ან საწოლში სხვა პარტნიორთან ერთად წარმოედგინათ. 

აღმოჩნდა, რომ მამაკაცი უფრო მტკივნეულად და სერიოზულად განიცდის ფიზიკურ ღალატს, ქალები კი ვერაფრით ეგუებიან, თუნდაც წარმოსახვითაც კი, რომ მათ მამაკაცებს სხვა შეუყვარდეთ.

სხვათა შორის, სპეციალისტებმა დაადგინეს, რომ ქალბატონთა 10% ამას მხოლოდ "ხელოვნებისადმი სიყვარულით" აკეთებს, თითქმის 50% - პარტნიორის მიერ მიყენებული წყენისა და ტკივილის გამო. ამ შემთხვევაში ქალი ღალატობს არა თავად ფაქტის გამო, არამედ იმისთვის, რომ თავი კვლავ მიმზიდველად და სასურველად იგრძნოს. 

დანარჩენი 40% კი ამას თავიანთი მეორე ნახევრების ღალატის საპასუხოდ, შურისძიების მიზნით აკეთებს. საინტერესოა ისიც, რომ გამოკითხვების შედეგად ასევე დადგინდა, რომ ამგვარ განწყობაზე ქალბატონები ყველაზე ხშირად 25, 32 და 40 წლის ასაკის შემდეგ დგებიან. 

როცა ოჯახურ ურთიერთობებში ბზარი ჩნდება, ქალბატონები განქორწინების გადაწყვეტილებას უყოყმანოდ იღებენ, თუ გაიგეს, რომ ქმარს სხვა შეუყვარდა; მამაკაცები კი მაშინვე ანგრევენ ოჯახს, როცა საქმე ქალის ფიზიკურ ღალატს ეხება. 

ჟურნალი "რეიტინგი"