რის გამო სცადა თვითმკვლელობა მერიემ უზერლიმ

თურქულმა ისტორიულმა სერიალმა "დიდებული საუკუნე" მთელი მსოფლიოი დაიპყრო და, შესაბამისად, მსახიობი მერიემ უზერლი, რომელიც ჰიურემის, სულთან სულეიმანის ლეგენდარულ ცოლს განასახიერებს, ერთ დღეში გახდა პოპულარული.
ის თურქი მამისა და გერმანელი დედის შვილია. 1982 წლის 12 აგვისტოს გერმანიის ქალაქ კასელში დაიბადა, ამის გამო თავს გერმანელად მიიჩნევს. ჰყავს ორი ძმა და და. სწავლობდა ჰამბურგის სამსახიობო აკადემიაში. კარიერაც გერმანიაში დაიწყო, თამაშობდა თეატრში, ასევე იღებდნენ გერმანულ მოკლემეტრაჟიან ფილმებში, პოპულარობა კი "დიდებულმა საუკუნემ" მოუტანა. სერიალისთვის ის მრავალ მსახიობ ქალს შორის შეარჩიეს და ამ როლით მთელ მსოფლიოში გაითქვა სახელი.
თურქული სერიალის გერმანელი ვარსკვლავი, მერიემ უზერლი, 2013 წლის მაისში გადასაღები მოედნიდან გაუჩინარდა და მას მერე პროექტს აღარ დაბრუნებია. მიზეზად თავდაპირველად დაღლილობა დაასახელა. პროექტის დატოვების ნამდვილი მიზეზი კი მოგვიანებით გაამხილა. აღმოჩნდა, რომ მერიემს მეგობარმა მამაკაცმა, ჯან ატეშიმ, რომლისგანაც შვილს ელოდა, აბორტის გაკეთება მოსთხოვა. თურქმა ბიზნესმენმა ისიც კი უთხრა, რომ ბავშვი არ სურდა და მის შვილად აღიარებას არ აპირებდა. ასეთ დარტყმას მერიემმა ვერ გაუძლო და თავის მოკვლა სცადა. ამ ტრაგედიის მიუხედავად, მსახიობმა გადაწყვიტა, ბავშვი შეენარჩუნებინა და გერმანიაში მშობლებთან წავიდა.
2014 წლის 10 თებერვალს მერიემ უზერლის გოგონა შეეძინა, რომელსაც სახელად ლარა დაარქვა და მას მშობლების დახმარებით ზრდის.
თავისი ცხოვრების ბოლოდროინდელ მოვლენებზე მსახიობი თურქულ ჟურნალ "ტემპოსთვის" მიცემულ ინტერვიუში საუბრობს, რომელსაც ქვემოთ გთავაზობთ.
– როგორ მოხვდით სერიალში, რომელმაც მსოფლიო პოპულარობა, შეიძლება ითქვას, ერთ დღეში მოგიტანათ?
– სერიალში შემთხვევით მოვხვდი. მანამდე არაერთხელ ვცადე თურქეთში მუშაობა, მაგრამ უარს ვიღებდი. ერთხელ მეგობარმა, რომელთან ერთადაც ჰამბურგის თეატრში ვმუშაობდი, სერიალის ავტორებს უამბო ჩემზე და სინჯებზე მიმიწვიეს. მრავალ მსახობ ქალს შორის ამარჩიეს და... ჩემი ცხოვრება ერთ დღეში შეიცვალა. ენობრივი ბარიერი შემექმნა, გადაღებამდე თურქულად საერთოდ ვერ ვლაპარაკობდი. თავდაპირველად სერიალის ეპიზოდს მითარგმნიდნენ, ძალიან მალე კითხვა ვისწავლე. რაც არ მესმოდა, დახმარებას ვითხოვდი.
– ცნობილი გახდა, რომ მას შემდეგ, რაც მეგობარმა მამაკაცმა მიგატოვათ და ორსულს თურქეთიდან წასვლა მოგიწიათ, ფსიქიკური პრობლემები შეგექმნათ და მკურნალობა დაიწყეთ.
– მკურნალობას დღემდე ვაგრძელებ, მაგრამ ცუდმა პერიოდმა გაიარა. მშობიარობის შემდეგ გაცილებით უკეთ ვარ – თმა შევიჭერი, მუქად შევიღებე, ისევ ისეთი მერიემი გავხდი, როგორიც სერიალის გადაღებამდე ვიყავი. წლის ბოლომდე თერაპიის კურსს დავამთავრებ.
– თურქი მაყურებელი თქვენს დაბრუნებას ელოდება, იმედებს ხომ არ გაუცრუებთ?
– ახლა ბავშვის აღზრდით ვარ დაკავებული. მომავალ წელს სავსებით შესაძლებელია, დავბრუნდე, მაგრამ არა – ჰიურემის როლზე, რა თქმა უნდა. მინდა, სერიალის მილიონობით თაყვანისმცემელს ბოდიში მოვუხადო. ნუ იღელვებენ, მაინც დიდხანს არ მომიწევდა თამაში მეოთხე სეზონში. სიუჟეტის მიხედვით, სულთანი ჰიურემი უკვე ასაკოვანი ქალია და პროდიუსერი ამბობდა, რომ ჩემზე გაცილებით ასაკოვანი მსახიობის შეყვანას აპირებდნენ.
– თქვენ ერთ–ერთი ყველაზე საყვარელი უცხოელი მსახიობი ხართ თურქი ხალხისათვის. ელოდით, რომ მაყურებელი სერიალიდან თქვენს წასვლას ასე გააპროტესტებდა?
– თურქი ხალხის სიყვარულს იქ ყოფნის დროსაც ვგრძნობდი. სუპერმარკეტშიც ვერ გავიდოდი, ხალხი რომ არ შემომხვეოდა. ვიცოდი, რომ ეს სიყვარულის გამოვლინება იყო, მაგრამ მეშინოდა.

– ბერლინში დაბრუნების შემდეგ თავს გაცილებით უსაფრთხოდ გრძნობთ?
– თავდაპირველად არ მქონდა უსაფრთხოების განცდა. კლინიკაში მკურნალობის დროს კარზე კაკუნისაც კი მეშინოდა. ვფიქრობდი, რომ თურქეთში ჩემ წასაყვანად მოვიდოდა ვინმე. დაბნეული ვიყავი. იყო უამრავი შეკითხვა, მაგრამ იმის ძალაც არ მქონდა, პასუხი გამეცა.
– თქვენთვის ძნელი არ იყო სერიალის დატოვება?
– რა თქმა უნდა, ძნელი იყო. სულ რამდენიმე სერიაღა იყო გადასაღები, მაგრამ სათამაშოდ უკვე ძალა აღარ შემწევდა.
– ჰიურემი ის პერსონაჟია, რომელმაც თქვენზე ყველაზე დიდი გავლენა იქონია?
– დიახ, აბსოლუტურად.
– რა განსხვავებაა ბერლინსა და თურქეთში ცხოვრებას შორის?
– ბერლინში ჩემი სახლია, ჩემი მშობლები, ჩემი მეგობრები. აქაური ქუჩები ხელისგულივით ვიცი, აქ ვარსკვლავი არ ვარ და თავს გაცილებით კომფორტულად ვგრძნობ.
– გერმანელი ხალხისათვის ცნობილია, რომ თურქეთში ძალიან პოპულარული ხართ?
– არა, მაგრამ არიან ადამიანები, რომლებმაც იციან, რომ ცნობილ თურქულ სერიალში ვმონაწილეობდი.
– მარტოხელა დედობა ძნელი არ არის?
– სანამ ვიმშობიარებდი, ამაზე ძალიან ბევრს ვფიქრობდი და მეშინოდა, მაგრამ როდესაც რეალობის წინაშე დავდექი, აღარ მეშინია. ვფიქრობ, ჩემს ცხოვრებაშიც გამოჩნდება წესიერი ადამიანი, რომელიც ჩემს შვილს ნამდვილ მამობას გაუწევს.
– სიმართლეა, რომ თავის მოკვლა სცადეთ?
– დიახ, სიმართლეა. 2013 წელს ანტალიაში საუკეთესო დრამატულ მსახიობად მაღიარეს. დაჯილდოების მერე დღეს სასტუმროს ნომერში მივედი და... ჯილდო დავამსხვრიე. მინდოდა, აივნიდან გადავმხტარიყავი.
– რამ მიგიყვანათ თვითმკვლელობამდე?
– დეპრესია მქონდა. ეს მხოლოდ დაღლილობის ბრალი არ იყო, საყვარელ ადამიანთან სერიოზულად დამეძაბა ურთიერთობა. როდესაც ჯანმა ჩემი ორსულობის შესახებ შეიტყო, მიმატოვა, უფრო მეტიც, ბავშვის მოცილებას მთხოვდა, მაგრამ მე შვილი ავირჩიე. ამით ჩემს კარიერასაც წერტილი დავუსვი.
– ისევ გიყვართ თქვენი შვილის მამა?
– არა. მე მიყვარდა მამაკაცი, რომელიც არ არსებობდა. ერთწლიანი ურთიერთობის განმავლობაში ყველაფერი მივეცი, რაც შემეძლო, რათა ბედნიერი ყოფილიყო.
– ბავშვის გაჩენას გეგმავდით?
– არ ვგეგმავდი, რადგან ოფიციალურად არ ვიყავით დაქორწინებული, თანაც სერიალის მეოთხე სეზონში უნდა მეთამაშა. ჯანს ორი შვილი ჰყავს, მესამე არ სჭირდებოდა. მიმტკიცებდა, რომ, როგორც კი ჩემი ორსულობის შესახებ შეიტყობდნენ, პროდიუსერები კონტრაქტის დარღვევის გამო გამაძევებდნენ, ამიტომ თვითონ მივიღე გადაწყვეტილება და სერიალი დავტოვე.
– ჯანს დაქორწინება არ შემოუთავაზებია?
– არა, რადგან თავისუფლება უნდოდა. ჩვენ ერთად ძალიან კარგ დროს ვატარებდით. მე მის ცხოვრებაში სტუმარი ვიყავი, როგორც საფულეს, ისე დამატარებდა თან, მაგრამ საქმე საქმეზე რომ მიდგა, პასუხისმგებლობას გაექცა.