"მიცვალებული" ოჯახს 23 წლის შემდეგ დაუბრუნდა

ბანგლადეშის ერთ–ერთ მივარდნილ სოფელში მცხოვრები მამაკაცი, რომლიც 23 წლის წინ გაუჩინარდა, ოჯახს დაუბრუნდა. ამჟამად უკვე 52 წლის მოსლემუდინ სარკერი 1989 წლის თებერვალში სამსახურში წავიდა და მას შემდეგ აღარ დაბრუნებულა. ის პორტში მუშაობდა და ყველას ეგონა, რომ ზღვაში დაიხრჩო. რამდენიმეკვირიანი უშედეგო ძებნის შემდეგ მაშველებმა მისი გვამის ძებნა შეწყვიტეს.

ოჯახს მისი პოვნის იმედი გადაწურული ჰქონდა მანამ, სანამ ცოტა ხნის წინ მათ სახლში ანონიმური ზარი არ გაისმა, რომელმაც აცნობა, რომ მათი ოჯახის დაკარგული წევრი ცოცხალი იყო. როგორც გაირკვა, ამ ხნის განმავლობაში მოსლემუდინი პაკისტანის ციხეში იხდიდა სასჯელს, შემდეგ კი საბუთების უქონლობის გამო სამშობლოში დაბრუნებას ვერ ახერხებდა.

სარკერს აეროპორტში ძმა დახვდა. მოსლემუდინის განცხადებით, 1989 წელს მან ინდოეთის საზღვარი უკანონოდ გადაკვეთა. მოგვიანებით დაქორწინდა, 1997 წელს კი ინდოეთიდან პაკისტანის საზღვრის უკანონო გადაკვეთისათვის დააპატიმრეს. მან ციხეში 15 წელი გაატარა. "მიცვალებული" თანასოფლელის დაბრუნებას მთელი სოფელი ზეიმით შეხვდა.