ოკან იალაბიკი: "ჩემი და სელმა ერგეჩის ცოლქმრობა მაყურებლის ფანტაზიის ნაყოფია"

ქართველი მაყურებლისათვის ნამდვილად საინტერესო იქნება სერიალ "დიდებული საუკუნის" გმირის, ფარგელის, იგივე იბრაჰიმ ფაშას როლის შემსრულებელ ოკან იალაბიკის რეალური სახე – მისწრაფებები, შეხედულებები და ცხოვრებისეული დეტალები. მაშ, ასე:
ოკან იალაბიკი 1978 წლის 13 დეკემბერს თურქეთის ქალაქ სტამბულში დაიბადა. სამსახიობო კარიერაში პირველი ნაბიჯები ჯერ კიდევ ბავშვობაში გადადგა – სკოლის თეატრში თამაშობდა. შემდეგ სტამბულის უნივერსიტეტში ეუფლებოდა სამსახიობო ხელოვნებას. უნივერსიტეტის დამთავრების შემდეგ ოკანმა ძალები ტელესერიალებში მოსინჯა. პირველი როლი 2003 წელს სერიალ "შერსერში" შეასრულა, სადაც მაღალი წრის წარმომადგენელ გოგონაზე შეყვარებული უმუშევარი ახალგაზრდა განასახიერა. შემდეგ იყო მსახიობის გარდასახვა ფილმში "გამიგე, საყვარელო", რომელსაც მოჰყვა "შემოდგომის ტკივილი", "ნადირობის სეზონი" და სხვა.
ყველაზე დიდი პოპულარობა ოკანს 2011 წელს "დიდებულმა საუკუნემ" მოუტანა. მსახიობმა არაჩვეულებრივად შეასრულა ფარგელის როლი, რისთვისაც ის თურქული კინოს უმაღლესი პრემიით "ანტალიათი" დააჯილდოვეს.
კინოკრიტიკოსები აღნიშნავენ, რომ ოკანის სამსახიობო შესაძლებლობები უსაზღვროა. მას განსაკუთრებული, ხავერდოვანი ხმა აქვს, რის გამოც ფილმების, მულტფილმების, რეკლამებისა და სხვადასხვა გადაცემის გახმოვანება უწევს. დღეს უკვე ოკანს 40–მდე წარმატებული როლი აქვს განსახიერებული.
მსახიობის პირადი ცხოვრებიდან ცნობილია, რომ დიდი ხნის განმავლობაში ხვდებოდა ულამაზეს თურქ მსახიობ ჰანდე სორალს. 2 წლის წინ უნდა დაქორწინებულიყვნენ კიდეც, მაგრამ მოვლენები სხვანაირად განვითარდა და რამდენიმე თვის წინ ერთმანეთს დაშორდნენ. ამჟამად ოკანი სხვა თურქ ლამაზმანს, ასევე მსახიობ ჰანდე დოღანდემირს ხვდება.
ოკან იალაბიკი ჟურნალისტებთან ურთიერთობას ან თავს არიდებს, ან ძალიან მოკრძალებულად საუბრობს. მაისის დასაწყისში მან გამონაკლისი ჟურნალ "ტემპოსთვის" დაუშვა და ინტერვიუ მისცა, რომელსაც ქვემოთ გთავაზობთ.

– რას გვეტყვით "დიდებულ საუკუნეში" შესრულებულ როლზე? ის აბსოლუტურად განსხვავებულია ყველა თქვენი სერიალისგან, რადგან ისტორიულ ფაქტებზეა დაფუძნებული.
– სცენარი ნელ–ნელა იწერება. იბრაჰიმ ფაშას როლის შესრულება ძალიან მინდოდა და გამიმართლა. სცენარი მე–16 საუკუნის თურქეთის ისტორიას ეფუძნება. მიუხედავად იმისა, რომ ისტორიული წყაროები ზედმიწევნით შევისწავლე, მაინც ვშიშობდი, რამე დეტალი არ გამომპარვოდა. ვფიქრობ, ყველაფერმა კარგად ჩაიარა.
– პიროვნული თვისებებით ჰგავხართ იბრაჰიმ ფაშას თუ ის აბსოლუტურად განსხვავებულია?
– რა თქმა უნდა, ჩვენ შორის განსხვავება არის, თუმცა ვფიქრობ, რომ იბრაჰიმს სიძლიერით და სიმამაცით ნამდვილად ვგავარ.
– ცნობილი გახდა, რომ "დიდებულ საუკუნეში" ჰონორართან დაკავშირებით გარკვეული პრობლემები შეგექმნათ.
– დიახ, ასე იყო. თავდაპირველად ერთ სერიაში 8.000 ლირას მიხდიდნენ, როდესაც სერიალიდან ჩემი წასვლის საკითხი დადგა, ჰონორარი 15.000 ლირამდე გამიზარდეს.
– დროის უმეტეს ნაწილს გადაღებებზე ატარებთ, ეს თქვენს პირად ცხოვრებაზე უარყოფითად ხომ არ აისახება?

– სულაც არა. ჩემი რჩეული მსახიობია, ასე რომ, ისიც ჩემსავით დაკავებულია. როგორც კი თავისუფალ დროს გამოვნახავთ, ერთად ვართ.
– ჰატიჯეს როლის შემსრულებელ სელმა ერგეჩთან რა ურთიერთობა გაკავშირებთ? მაყურებელს რეალურ ცხოვრებაშიც ცოლ–ქმარი ჰგონიხართ.
– ეკრანზე პარტნიორები ვართ, ხოლო რეალურ ცხოვრებაში – გულითადი მეგობრები. ჩვენი ცოლქმრობა მაყურებლის წარმოსახვისა და ფანტაზიის ნაყოფია.
– ცნობილია, რომ მსახიობ ჰანდე სორალს დაშორდით. რა გახდა ამ ნაბიჯის მიზეზი?
– ეს მხოლოდ მე და ჰანდეს გვეხება. ჩვენ საკმაოდ დიდხანს ვხვდებოდით ერთმანეთს. როდესაც საქმე დაქორწინებამდე მივიდა, სწორედ მაშინ გადავწყვიტეთ დაშორება. მიზეზებზე ლაპარაკს არ ვაპირებ.
– ახლა ვინ არის თქვენი გულის მბრძანებელი?
– ჩემი რჩეული მსახიობი ჰანდე დოღანდემირია. ჩვენ ურთიერთობის საწყის ეტაპზე ვართ, ამიტომ ბევრს ვერაფერს გეტყვით, თანაც არ მინდა ამ თემაზე საუბარი.

– ეჭვიანი ხართ?

– დიახ, თანაც ძალიან, მაგრამ ეს მაშინ, როცა ჩემთვის მართლაც რაღაც ძალიან უსიამოვნო ხდება. საერთოდ, არაჩვეულებრივი ინტუიცია მაქვს.
– ღალატზე რა აზრის ხართ?
– თუ ვინმეს ცუდად ექცევი, ეს იმას არ ნიშნავს, რომ ამას განზრახ აკეთებ. იმას ვგულისხმობ, რომ, როცა ვიღაც გიყვარს, გინდა, სულ მასთან იყო. ამ დროს სხვაზე ვერ ფიქრობ და, თუ ფიქრობ, მაშინ არც გყვარებია.