სოფო ტოროშელიძე: "ვერასოდეს ჩავიცვამ გამჭვირვალე ზედატანს ბიუსტჰალტერის გარეშე!"

მომღერალი სოფო ტოროშელიძე ჩაცმულობაში თავისუფალ სტილს ანიჭებს უპირატესობას, მისი სამოსი იმ მუსიკასთან ახლოსაა, რომელსაც მღერის – როკთან. თუმცა "იქს ფაქტორის" ჟიურიში ყოფნისას გლამურული დეტალების დამატებაც უწევს ან მაშინ, როცა საღამოს წვეულებაზე მიდის, განსაკუთრებით ქმართან ერთად. მისი მეორე ნახევარი, დიტო კვინტრაძე, როგორც სოფომ გვითხრა, ჩაცმის საკითხებში კარგად ერკვევა, თავადაც გემოვნებით იცვამს და ცოლსაც სასარგებლო რჩევებს აძლევს.
– სოფო, მაყურებელმა სცენიდან გაგიცნოთ, ამიტომ საუბარი იქიდან დავიწყოთ, თუ რა როლს თამაშობს სცენაზე სამოსი, იმიჯი.
– ძალიან დიდს, იმიჯი ერთ–ერთი უმნიშვნელოვანესია. შენი სტილი უნდა გქონდეს, რითიც სხვებისგან გამოირჩევი. აუცილებელია, მრავალფეროვანი იყო.
– თქვენი სასცენო იმიჯი როგორ შეიქმნა?
– მინდა, თქვენი ჟურნალიდან ძალიან დიდი მადლობა გადავუხადო აკა ნანიტაშვილს. აქამდე რაც კი მეცვა, ყველაფერი მისი შემოქმედებიდან იყო. "იქს ფაქტორის" ლაივ კონცერტებზე კი (სოფო პროექტის ჟიურის წევრი და ერთ–ერთი მენტორია. ავტ.) "მატერია" გვაცმევს.
– მომღერლების სამოსს ხშირად განიხილავს საზოგადოება. ადევნებთ თვალ–ყურს, რას ამბობენ თქვენს ჩაცმულობაზე?
– ყველა კომენტარის წასაკითხად ნამდვილად არ მცალია, ყველაფერზე ყურადღების გამახვილებაც არ მიმაჩნია სწორად. რაც კი წამიკითხავს ჩემს იმიჯთან დაკავშირებით, უარყოფითი შეფასებები არასოდეს მინახავს. ერთ–ერთი გამორჩეული, ყველას რომ ძალიან მოეწონა და დაამახსოვრდა, ჩემი ზოლებიანი ზედატანი და თავზე ბენდენა იყო. ჩემთვის უფრო კომფორტული თავისუფალი სტილია და არა – გლამურული. ჩაცმულობით ჩემს შემოქმედებასთან ახლოს ვარ. როცა ჟიურის სკამზე ვზივარ, ვცდილობ, ჩემს იმიჯს გლამურიც შევმატო. მიყვარს, როცა კლასიკურს სპორტულსაც ვუხამებ და პირიქით, სპორტულ ფორმაში კლასიკურ დეტალს ვურევ. რა თქმა უნდა, ყველაფერი ერთმანეთთან არ მიდის, უნდა შეუხამო, რომ კარგად ჩანდეს.
– როცა საქმე სამოსს ეხება, ბევრს ფიქრობთ?
– კი, ადვილად ვერ ვწყვეტ. როცა დიზაინერი რაღაცას მთავაზობს, მაშინაც საკმაოდ ბევრს ვფიქრობ. ყოველი გადაღების წინ ვაანალიზებ, რა ჯობს ჩავიცვა.
– საყიდლებზე სიარული თქვენთვის განმუხტვის საშუალებაა თუ დამღლელი "სამუშაო"?
– ჩემთვის შოპინგი ძალიან სასიამოვნო პროცესია, მიუხედავად იმისა, რომ მაღაზიებში ბევრს ვფიქრობ. ვიდრე ზომას მოვირგებ, ავარჩევ, გადავწყვეტ... ერთ მაღაზიაში რომ რაღაც მომეწონება, მაშინვე არ ვყიდულობ, ჯერ სხვაგანაც წავალ, დავათვალიერებ და მერე ვიღებ საბოლოო გადაწყვეტილებას. ერთი რაღაცის ყიდვას შეიძლება მთელი დღე მოვანდომო, ამიტომ მეუღლე ვერ იტანს ჩემთან ერთად საყიდლებზე სიარულს. მან იცის, ეს პროცესი როგორ მიყვარს, ამიტომ, როცა საშუალებაა, მანებივრებს, საჩუქარს მიკეთებს და მეუბნება, ვიცი, რომ შოპინგზე წასვლა გინდა და წადიო.
– თავადაც შეუძლია თქვენთვის სამოსის შერჩევა?
– ამითაც ძალიან ხშირად მანებივრებს. მხოლოდ სამოსს კი არა, ბევრ სხვა ნივთსაც მჩუქნის.
– ქმარს მოსწონს თქვენი თავისუფალი სტილი თუ ურჩევნია, კლასიკურად გეცვათ?
– სიტუაციას გააჩნია. სახლში მაღალქუსლიანი ფეხსაცმლით რომ დავიწყო სიარული, ალბათ ძალიან დამცინებს. საღამოს წვეულებაზე როცა მივდივართ, უყვარს, თუ ქუსლიანი ფეხსაცმელი და კაბა მაცვია. ასევე უყვარს ჩემი სპორტული და ცოტა როკ იმიჯი. დიტოც ძალიან ახლოსაა როკთან, ამიტომ ხშირად უთქვამს, ეს არ ჩაიცვა, არაფერ შუაშია ამ კონცერტთან, ჯობს, უფრო თავისუფლად გეცვასო. თვითონაც თავისუფალ სტილში იცვამს, მაგრამ ისეთი სამსახური აქვს, რომ სოლიდურად ჩაცმაც ხშირად უწევს. ორივე სტილს კარგად იხდენს.
– რა ფერები გიყვართ?
– შავგვრემანი ვარ და, რაც უფრო ფერადი მაცვია, მით უფრო მიხდება. რა თქმა უნდა, შავი სამოსიც ხშირად მაცვია. ძალიან მიყვარს წითელი, ყვითელი... არ მიხდება ვარდისფერი, კრემისფერი, სალათისფერი, ეს ფერები ჩემი არ არის.
– თქვენს ფეხსაცმელებშიც აშკარად შეინიშნება სიჭრელე.
– კი, ასეა, ფეხსაცმელები ძალიან მიყვარს. გამოსასვლელი ფეხსაცმელიც ბევრი დამიგროვდა. მთავარია, კომფორტული იყოს და მოდური. ვცდილობ, მოდის ტენდენციები გავითვალისწინო, მაგრამ არის რაღაცეები, რასაც ვერ ჩავიცვამ. მაგალითად, ძალიან მოდაშია ნახევრად ტიტველი სიარული, გამჭვირვალე ზედატანების ჩაცმა ბიუსტჰალტერის გარეშე, მაგრამ ამას ვერასოდეს ჩავიცვამ. მყავს მეგობრები, რომლებიც არც ერთ ჩვენებას ტოვებენ, მე ასეთ დონეზე ნამდვილად არ მაინტერესებს. მხოლოდ ის მაინტერესებს, რაც მე მიყვარს და მიხდება.
– წლევანდელ თბილისის მოდის კვირეულზე კაბაში ჩაცმული ბიჭებიც გამოჩნდნენ. წარმოდგენაში მაინც თუ დაგიშვიათ, რომ ქმარი გამოგეცხადოთ ასეთ ფორმაში?
– ჩემმა ქმარმა კაბა რომ ჩაიცვას, ადეკვატურად ვერაფრით მივიღებ და რა გავაკეთო?! როცა ადამიანი მოდის სფეროშია ჩართულია ან დიზაინერია, მისგან მოსალოდნელია ასეთი საქციელი, მაგრამ... ჩემს ქმარს რომ შეხედავთ, ვერ იტყვით, გასული საუკუნის 90–იან წლებშია ჩარჩენილიო, 2014 წლის შესაბამისად იცვამს, ოღონდ ადეკვატურად. ვისაც უნდა, ჩაცვას კაბა, ხელს არავინ შეუშლის. მომწონს ბიჭები, რომლებსაც ძალიან მაგრად აცვიათ, მაგრამ ბიჭებს ჰგვანან. კარგია, როცა აცვიათ მოდური შარვლები, ზედატანები, მაგრამ ბიჭებს უნდა ჰგავდნენ და მათ სექსუალურ ორიენტაციაში ეჭვი არ უნდა გეპარებოდეს.
– როგორი ჩანთები მოგწონთ?
– დიდი, ტევადი ჩანთები მიყვარს. მაქვს კლატჩებიც, რომლებსაც გამოსასვლელად ვხმარობ. სადა ჩანთები მომწონს, რომლებიც რაღაც დეტალებით არ არის გაფორმებული.
– აქსესუარიც საკმაოდ ბევრი გაქვთ. როგორც ჩანს, სამოსს ამითაც ამრავალფეროვნებთ.
– აქსესუარებიდან ყველაზე ძალიან ყელსაბამები მიყვარს. კვირა არ გავა, რომ ჩემს ყელსაბამებს კიდევ ერთი ახალი არ შევმატო. ხშირად ვერ ვხმარობ დიდ საყურეებს, სამაჯურებს. ბეჭდებსაც მხოლოდ მაშინ ვიკეთებ, თუ ჩემი ჩაცმულობა როკის სტილშია.
– სამოსის მოვლა, გარდერობის დალაგება არ გეზარებათ?
– არა მგონია, გარდერობის დალაგება ვინმეს უყვარდეს, მაგრამ როცა შიგნით ვიხედები, უნდა ვიცოდე, სად რა მიდევს და ძებნა არ დამჭირდეს. გარდერობი ხშირად ირევა, მაგრამ ასევე ხშირად ვალაგებ, რომ ზეპირად ვიცოდე, სად რა დევს.
ქეთი დინოშვილი, ჟურნალი სარკე