მსოფლიო ჩემპიონატის ოფიციალურ ბურთს ფიზიკოსები იკვლევენ

2014 წლის ფეხბურთის მსოფლიო ჩემპიონატის ოფიციალური ბურთი სახელწოდებით Brazuca ფიზიკოსების დაძაბული და აქტიური მეთვალყურეობის ქვეშაა. მეცნიერები დეტალურად სწავლობენ ბურთის დარტყმის და მოძრაობის ტრაექტორიებს. ამის მიზეზი ის სავალალო გამოცდილებაა, რაც სამხრეთ აფრიკაში წინა ჩემპიონატის ბურთმა მოუტანა საფეხბურთო ინდუსტრიას.
შეიძლება ბევრმა ქომაგმა არ იცის, რომ ყოველი ჩემპიონატისთვის ბურთები თავიდან იქმნება და ერთმანეთისგანაც სპეციფიურობით გამოირჩევა. განსაკუთრებით ფაქიზია კარკასის პანელების რიცხვი და აგებულება.

ვირჯინიის ლინჩბერგის ინტიტუტის ფიზიკოსის ჯონ ერიკ გოფის განცხადებით, არ არსებობს ზუსტი და ოფიციალური რეკომენდაცია, რამდენი და რა ფორმის პანელი უნდა ჰქონდეს მსოფლიო ჩემპიონატის ოფიციალურ ბურთს.

ტრადიციულად, ბურთს 32 პანელი აქვს, მაგრამ 2006 წელს ჩემპიონატის ბურთების მომწოდებელმა კომპანია Adidas-მა 8-პანელიანი ბურთი შექმნა. ის 2010 წლის მსოფლიო ჩემპიონატზე გამოიყენეს, რომელმაც სრული კრახი განიცადა. ექსპერტებიდან დაწყებული, მეკარეებით დამთავრებული, ყველა უკმაყოფილო იყო ბურთით, რომელსაც არაპროგნოზირებადი მიმართულება ჰქონდა. პანელებს შორის შეღწეული ჰაერის ნაკადი მას მიმართულებას უცვლიდა.

ამ მწარე გამოცდილების შემდეგ ბურთის შესწავლის საქმეში ნასას ავიაინჟინერი რაბი მეჰტაც ჩაერთო. მას შემდეგ, რაც მეცნიერებმა ბურთის უცნაური"ქცევის" მიზეზები დაადგინეს,

Adidas - მა ბურთის კარკასი კვლავ შეცვალა. მსოფლიო თასი-2014-ის ახალი ბურთი ტესტირებას ორწელიწადნახევრის განმავლობაში გადიოდა. ამის მიუხედავად მეცნიერები კვლავ აგრძელებენ მასზე დაკვირვებას.

Brazuca ბურთის სახელად მილიონამდე ფეხბურთის ფანის გამოკითხვის შედეგად შეირჩა და ადგილობრივთა ენაზე ბრაზილიელს ნიშნავს. მისი ფერები ე.წ."სურვილის სამაჯურების" გამოძახილია, რომელსაც ამ ქვეყნის მოსახლეობა ატარებს.

მომზადებულია americaru.com-ის მიხედვით.