წლის მთავარი სპორტული მოვლენა, კმაყოფილი პიტერი და მოხალისეებს შორის აღმოჩენილი ბრაზილიელი

ქვეყნისთვის წლის მნიშვნელოვანი სპორტული მოვლენა - ევროპის მძლეოსნობის გუნდური ჩემპიონატი დასრულდა, რომელიც თბილისში ორი დღის განმავლობაში (21-22 ივნისს) მიმდინარეობდა. ღონისძიების ორგანიზატორი საქართველოს მძლეოსნობის ეროვნული ფედერაცია გახლდათ. მონაწილეობდა 15 ქვეყანა და 508 სპორტსმენი.

პიტერ სტაფორდი, ევროპის მძლეოსნობის საბჭოს პროექტის კოორდინატორი:
- ყველაფერმა ძალიან მაღალ დონზე ჩაიარა. კმაყოფილი ვარ. გუნდებმაც სერიოზული მომზადების დონე აჩვენეს. ქართველები საოცრად დადებითი ხალხი ხართ, - სულ იმის სურვილი გაქვთ და ფიქრობთ, ადამიანებს რით ასიამოვნოთ. ასე იყო ახლაც, სტუმრების მიმართ საოცარ ყურადღებას იჩენდით. მეოთხედ ვარ თბილისში და ყოველ ჯერზე აქედან კმაყოფილი მივდივარ. მაგრამ ამ ჩემპიონატზე ჩემი სტუმრობა საქართველოში მაინც გამორჩეული იყო.

როგორც ორგანიზატორები ამბობენ, ამ სპორტულ ღონისძიებაზე მოხალისეების უპრეცედენტოდ დიდი რაოდენობა დაფიქსირდა. ყველა მიმართულებით იყვნენ ისინი ჩართულები. იყვნენ სპორტული მოხალისეები, ასევე ატაშეები, რომლებიც ვიპ სტუმრებს დაჰყვებოდნენ, მედიასთან ურთიერთობის სამსახურს ეხმარებოდნენ. ეს ადამიანები საორგანიზაციო კომიტეტს უანგაროდ ეხმარებოდნენ. რაც მთავარია, საქმეს უშეცდომოდ და ხარისხიანად უძღვებოდნენ.

ისინი ჩემპიონატზე მას მერე მოხვდნენ, რაც საორგანიზაციო კომიტეტის მიერ საიტზე გამოცხადებული რეგისტრაცია გაიარეს.

მოხალისეთა შორის იყო ერთი ბრაზილიის მოქალაქე, რომელსაც ქართველი ცოლი ჰყავს. ამ ადამიანს მოხალისეობის გამოცდილება აქვს, რადგანაც თავის ქვეყანაში ამ მიმართულებით უმუშავია. პროფესიით მეხანძრეა. ცოლ-ქმარმა ასეთ სიტუაციაში მონაწილეობა მეორედ მიიღო. ისინი სტუმრებს ხვდებოდნენ და სასტუმროებში ანაწილებდნენ. მათი ამბავი, როგორც ამბობენ, სამაგალითოა სხვებისთვის. ეს ყველაფერი კი იმის ფონზე, როცა ბრაზილიაში ფეხბურთის მსოფლიოს ჩემპიონატი მიმდინარეობს, როცა საქართველოშიც სერიოზულად განიცდიან ამ საფეხბურთო ციებ-ცხელებას, ბრაზილიის მოქალაქე, უანგაროდ ზრუნავს და მძლეოსანთა გუნდს ემსახურება.

მოკლედ, აღნიშნული ჩემპიონატის ჩატარების უფლება საქართველომ 2013 წელს ევროპის მძლეოსნობის ასოციაციის კონგრესზე მოიპოვა. ეს სპორტული ღონისძიება სხვადასხვა დისტანციაზე რბენას, ხტომას, ტყორცნასა და ბირთვის კვრას მოიცავდა და "დინამო არენასა" და მძლეოსნობის ახალ სტადიონზე მიმდინარეობდა.

"ივენთ ჰოლში" აღნიშნული

ღონისძიების დახურვის ცერემონია გაიმართა. დააჯილდოვეს გუნდური ჩემპიონატის პრიზიორები, ხოლო ევროპის მძლეოსნობის ფედერაციიამ საქართველოს მძლეოსნობის პრეზიდენტს - ალექსი ახვლედიანს ჩემპიონატის მაღალ დონეზე ორგანიზებისთვის სპეციალური პრიზი გადასცა.
გუნდურ შეჯიბრში პირველი ადგილი კვიპროსმა დაიკავა, მეორე ადგილი - ისლანდიამ, მესამე კი ისრაელმა. საქართველოს ნარკებს მეშვიდე ადგილი ერგო.

ლალი ფაცია
ambebi.ge