ვანო ფიფიას ბათუმის ბულვარში ბინა გადაეცა

რუსთავი 2“-ის სატელევიზიო პროექტ „ნიჭიერის“ გამარჯვებულს, ვანო ფიფიას ბათუმის ბულვარში ერთოთახიანი ბინა გადაეცა. პროექტში მოგებული ბინის მიღებას ვანო ფიფია 2012 წლის ოქტომბრიდან ელოდა.

როგორც ვანო ფიფიამ კახეთის საინფორმაციო ცენტრს განუცხადა, ბინა მის სახელზე დაახლოებით 1 თვის წინ გაფორმდა.

„ერთოთახიანი ბინაა, გარემონტებული, ისეთი, რომ შეგიძლია შეხვიდე და იცხოვრო. გასაღები პირადად „ორბი ჯგუფის“ ხელმძღვანელმა გადმომცა. საბუთები მოამზადეს და დაახლოებით 1 თვის წინ გავიფორმეთ ბინა. როგორც ვაპირებდით, უნდა გავაქირავოთ“, - აღნიშნა ფიფიამ.

გურჯაანის რაიონის სოფელ კარდენახში მცხოვრები 14 წლის ვანო ფიფია პროექტ „ნიჭიერის“ გამარჯვებული 2011 წლის 7 ივნისს, 60,1%-ით გახდა. მას ფულად პრიზთან ერთად, საჩუქრად ბინა ბათუმის ბულვარში 2012 წლის ოქტომბერში უნდა გადასცემოდა. მოგვიანებით, ბინის გადაცემის ვადამ 2013 წლის ზაფხულამდე გადაიწია, თუმცა პროექტის გამარჯვებულს დაპირებული ბინა არც 2013 წელს გადასცეს. „რუსთავი 2“–ში კახეთის საინფორმაციო ცენტრს განუმარტეს, რომ პროექტ „ნიჭიერის“, ასევე „საქართველოს ვარკვლავის“ გამარჯვებულები სამშენებლო კომპანიასთან გადაამისამართეს, რის შემდეგაც ტელეკომპანია შიდა მოლაპარაკებებში, რომელიც ფართის დაზუსტებას ან სხვა დეტალის გარკვევას გულისხმობდა, აღარ ერეოდა.

„ორბი ჯგუფის“ გენერალურმა დირექტორმა ირაკლი კვერღელიძემ განმარტა, რომ კონტრაქტით, „ორბი ჯგუფს“ სამშენებლო ვადებზე პროექტის გამარჯვებულებთან ვალდებულება არ ეკისრებოდა და შესაბამისად, ვადები არ დარღვეულა.