ლევან ახვლედიანმა ცოლს, ლელა ბაზელს, სამშობიაროში ფლეშმობი მოუწყო

მოცეკვავე ლევან ახვლედიანს ძალიან გაუმართლა, სახლშიც და პარკეტზეც გვერდით საყვარელი ქალი უდგას. თაფლობისთვეც კი საერთაშორისო კონკურსზე გაატარეს. ისინი საქართველოს საუკეთესო მოცეკვავე წყვილად არიან აღიარებული. მერე კი პაუზის აღება დასჭირდათ, რადგან ორი შვილი ერთბაშად მიაყოლეს, ჯერ ლუკას მშობლები გახდნენ, მერე კი – ანასტასიასი. ლელა ბაზელი ცეკვებში საქართველოს ჩემპიონია, მაგრამ მისი ყველაზე დიდი გამარჯვება დედობაა – სამ წელიწადში ქმარს ორი შვილი აჩუქა. ახლა კი ფიქრობენ, რომ დრო დადგა, ერთად ცეკვა გააგრძელონ და საერთაშორისო კონკურსებზეც გავიდნენ.
– როგორ დაიწყო თქვენი ურთიერთობა, ჯერ ცოლ–ქმარი გახდით და მერე – პარტნიორები თუ ცეკვამ დაგაახლოვათ ერთმანეთს?
ლევანი: მე და ლელა ერთ სფეროში ვართ, ამიტომ ერთმანეთის შესახებ ვიცოდით, ერთიმეორეს შორიდან ვიცნობდით. ლელა მაშინ ჯგუფ "ელეგიაში" ცეკვავდა, მე სტუდია "თელაში" ვვარჯიშობდი. მერე ისე მოხდა, რომ მეწყვილე აღარ მყავდა და ლელა გაგვახსენდა. ერთმანეთს შევხვდით და მას მერე ერთად ვართ.
ლელა: როცა ლევანი პირველად ვნახე, ჩემზე ძალიან დადებითი შთაბეჭდილება მოახდინა. თავიდანვე მივხვდი, რომ კარგი პიროვნება იყო. მაშინვე დავთანხმდი და მისი მეწყვილე გავხდი. გაცნობიდან წელიწადნახევარში კი ოჯახი შევქმენით. მას მერე 3 წელი გავიდა.
– როგორია თქვენი ურთიერთობა პარკეტზე და სახლში?
ლელა: პარკეტზე, მუშაობის პროცესში ლევანი ზედმეტად მომთხოვნია. თავისი საქმის პროფესიონალია და უნდა, რომ მაქსიმალურად დაიხარჯოს. სავარჯიშო დარბაზში ბევრად უხეშია, სახლში კი თბილი და რბილია. კარგი მეწყვილეა, მასთან შედარებით მე ცოტა ზარმაცი ვარ.
ლევანი: მას მერე, რაც დავოჯახდით, ფაქტობრივად ლელა სულ ორსულადაა. შვილების გამო ერთობლივი ვარჯიში შევწყვიტეთ, მაგრამ ახლა ვაპირებთ, ხელახლა დავიწყოთ წყვილში ცეკვა.
ძალიან მიყვარს ჩემი საქმე, რომელსაც ძალიან დიდი ენერგია, დრო და შრომისმოყვარეობა სჭირდება. ამ ყველაფერს კი მას შემდეგ მივხვდი, რაც ასაკი მომემატა. 29 წლის ვარ. რასაც საკუთარ თავს ვთხოვ, ჩემი მეწყვილესგანაც იმავეს მოვითხოვ. ლელასთან მუშაობის დროს ისეთი უხეში ვყოფილვარ, რომ თავადაც გამკვირვებია. რეალურად კი უხეში არ ვარ. უბრალოდ წაგებას ვერ ვეგუები და ამიტომ საქმეში ბოლომდე დახარჯვას ვითხოვ.
– თქვენი ერთობლივი წარმატებების შესახებ გვიამბეთ.
ლევანი: ჩვენგან მართლაც კარგი წყვილი ჩამოყალიბდა. გავხდით საქართველოს საუკეთესო წყვილი ცეკვაში, საერთაშორისო კონკურსებზეც გავედით. ქორწინებიდან ერთ კვირაში მონაწილეობა მივიღეთ დნეპროპეტროვსკში საერთაშორისო კონკურსზე და ერთგვარად ეს იყო ჩვენი თაფლობისთვეც. იქ 21–ე ადგილზე გავედით და იმ კონკურსანტების ფონზე და იმ რაოდენობაზე, რაც იქ იყო, ვთვლი, რომ კარგი შედეგია. კავკასიის თასის ჩემპიონი ვარ, ლელა წლების განმავლობაში გახლდათ საქართველოს ჩემპიონი.
– როგორ ფიქრობთ, შვილებიც თქვენს კვალს გაჰყვებიან?
ლევანი: ალბათ ნაადრევია ჩემი შვილების მომავალზე ფიქრი, რადგან ლუკაც და ანასტასიაც ძალიან პატარები არიან, მაგრამ გეგმებს მაინც ვაწყობ, დიდები რომ გახდებიან, რა შეიძლება, მათ შევთავაზო. მათ მომავალზე ფიქრით ვცხოვრობ. ოჯახისთვის, ჩემი პატარებისთვის თავი მაქვს გადადებული. ვგრძნობ პასუხისმგებლობას, რომელიც ცოლისა და შვილების წინაშე მაკისრია.
შვილები წამოიზრდებიან და ასე მგონია, ჩვენს საქმიანობას ისინი გააგრძელებენ.
ლელა: ჩვენ დამოუკიდებლად ვცხოვრობთ, ამიტომ მარტო მიწევს შვილების გაზრდა. მშობლები კი გვეხმარებიან, მაგრამ მეტი ჯაფა ჩემზეა. თავიდან, როცა მხოლოდ ლუკა მყავდა, მისი მოვლა არ მიძნელდებოდა, მაგრამ ორი შვილის დედობა ადვილი არ არის. ლუკა წლის და 10 თვისაა, ანასტასია – 2 თვის.
– ქმარს 3 წელიწადში ორი შვილი გაუჩინეთ. როგორ დაგიფასათ?
ლელა: როცა ანასტასია დაიბადა და სამშობიაროდან გამომწერეს, ლევანმა გრანდიოზული სიურპრიზი მომიწყო, სამშობიაროს ეზოში ფლეშმობი დადგა ფეიერვერკებით და ბუშტებით. ეს იმდენად შთამბეჭდავი და მოულოდნელი იყო, არასოდეს დამავიწყდება! ლევანი ძალიან რომანტიკულია, არ არსებობს დღესასწაული, რომ საჩუქრის გარეშე ჩაიაროს, ყურადღებიანი და მზრუნველი ადამიანია.
ლევანი: ლელას ორივე შვილზე არაჩვეულებრივი ორსულობა ჰქონდა. სულ მზად ვიყავი, რამე მოეთხოვა, რომ გავქცეულიყავი და მომეტანა, მაგრამ ამაოდ.
– ლელა, მშობიარობის შემდეგაც შესანიშნავ ფორმაში ხართ. როგორ მოახერხეთ ეს?

ლელა: წონაში თითქმის არ მომიმატია, თანაც 8 თვის ორსული ბოლომდე ვმუშაობდი, ბავშვებთან მქონდა რეპეტიციები და ცეკვის დროს მუცელი ხელს სულაც არ მიშლიდა. პირველი შვილიც და მეორეც 8 თვიანები დაიბადნენ, თუმცა მადლობა ღმერთს, ყველაფერი კარგად დამთავრდა.
– ლევანი სახლში გეხმარებათ?
ლელა: ლევანი დილიდან ღამემდე მუშაობს, ამიტომ ბავშვებთან მარტო ვარ. თუ ადრე მოვიდა, ორივეს მივაბარებ ხოლმე და ჩემს საქმეებს ვაკეთებ. ლევანს თუ დრო აქვს, თავიდან ბოლომდე ჩართულია ბავშვების აღზრდაში. მართლაც კარგი მამაა, ბავშვებს ასეირნებს, უვლის.
ლევანი: ჯერჯერობით ოჯახში ჩემი როლი მხოლოდ იმით შემოიფარგლება, რომ ვიმუშაო და შემომტანის ფუნქცია შევასრულო. არ მახსოვს, ბოლოს შინ ღამის 12 საათზე ადრე როდის დავბრუნდი. სულ მენატრებიან და მათთან მინდა, მაგრამ რას ვიზამთ.
ლელა ძალიან კარგად ხვდება, ჩვენი საქმე რამხელა შრომას მოითხოვს. მხოლოდ ხუთშაბათობით მაქვს შედარებით თავისუფალი დღე და ამიტომ ვცდილობ, ნახევარი დღე ცოლ–შვილთან გავატარო.
– ოჯახში პატარ–პატარა პრობლემებს, თუნდაც კამათს, როგორ აგვარებთ?
ლელა: სერიოზული კონფლიქტი არ მოგვსვლია, წვრილმანებზე თუ წავიკამათებთ ხოლმე. ლევანი უფრო ბუტიაა და მე მიწევს მისი შემორიგება.
ლევანი: ლელაზე 7 წლით უფროსი და მასზე მეტად დაღვინებული ვარ, ამიტომ ხშირად ვფიქრობ, რომ მე უფრო მართალი ვარ რაღაც საკითხებში, ვიდრე ის, თუმცა იმასაც ვიტყვი, რომ ხანდახან ზედმეტიც მომდის. ლელას ძალიან დადებითი თვისება აქვს, რომ აყოლა არ იცის და ჩემს უხეშ ნათქვამს არც გულში იდებს, არც იმახსოვრებს. ჩვენი წვრილმანი კამათი როგორც იწყება, რამდენიმე წუთში ისევე მთავრდება.
– ლევან, უკვე მეოთხე სეზონია, პროექტში "ცეკვავენ ვარსკვლავები" მონაწილეობთ. როგორ აფასებთ თქვენს თავს ამ შოუში და საერთოდ კმაყოფილი ხართ თუ არა მასში მონაწილეობით?
ლევანი: ჩვენ, პროფესიონალი მოცეკვავეები, იმ შედეგს ვერ ვდებთ ამ პროექტში, რაც უნდა დავდოთ, რადგან პროფესიონალი პარტნიორები არ გვყავს. ძირითადად ჩვენი მეწყვილეების წარმოჩენას ვუნდებით. ყველა სეზონში გამორჩეული მეწყვილე მყავდა თავისი სიძლიერით და მონდომებით. დღესაც იმავეს ვიტყვი იასენიაზე. ის არაჩვეულებრივი გოგონაა, მოგების დიდი შანსი აქვს.
– ლელა, როცა თქვენი ქმარი ლამაზ და პოპულარულ ქალებთან ცეკვავს, თქვენ არ ეჭვიანობთ?
ლელა: არა, რას ამბობთ, პირიქით, მეამაყება მისი წარმატება, პოპულარობა. მასთან ერთად ქუჩაში რომ დავდივარ, დიდ ყურადღებას აქცევენ და ეს ძალიან მსიამოვნებს.
ლევანი: ადამიანი ეჭვიანობს მასზე, ვინც უყვარს, თუმცა მიმაჩნია, რომ ეჭვიანობა გარკვეულ ფარგლებში უნდა იყოს. ლელა ეჭვიანი არ არის, ყველა ჩემს მეწყვილეს იცნობდა და მათთან კარგი ურთიერთობა ჰქონდა.

– ლევან, თქვენს ცოლს არ ეპატიჟებიან ამ პროექტში?
ლევანი: სხვათა შორის, როცა ეს პროექტი იწყებოდა და პირველ კასტინგზე მივედი, ლელამ გამიწია მეწყვილეობა, მაგრამ სამი თვის ორსული იყო და ამან ხელი შეუშალა. ქორეოგრაფებს ძალიან დასწყდათ გული, რომ ლელა ვერ მიიღებდა მონაწილეობას. მესამე სეზონზე ისევ შესთავაზეს ამ პროექტში ჩართვა, მაგრამ მეორე შვილზე იყო ორსულად და კვლავ შეეშალა ხელი. მეხუთე სეზონი რომ დაიწყება, იმედია, კიდევ ორსულად არ იქნება და მონაწილეობას მიიღებს. ლელა კარგი მოცეკვავეა და ეს პროექტი კარიერის აწყობაში დაეხმარება.
ლანა კიკნაძე, ჟურნალი სარკე