"ქვეითთა არტ პროექტი" თბილისში: უჩვეულო აქცი-კონცერტი ვაკის პარკში

ბოლო რამდენიმე წლის განმავლობაში დედაქალაქი თავკომბალას დაემსგავსა. მოსახლეობის ზრდასთან ერთად მოიმატა ქალაქდაგეგმარებისა და სხვა ტიპის ურბანულმა პრობლემებმა. ორმაგად გაიზარდა ავტომანქანების რიცხვი, ფეხით მოსიარულები კი ქალაქში გადაადგილებისას სერიოზულ ბარიერებს ვაწყდებით. ქალაქის ცენტრალურ ქუჩებში ქვეითების განკუთვნილ ადგილს ხშირად ავტომობილები იკავებენ. სწორედ ამ და სხვა მნიშვნელოვან საკითხებს ეძღვნება ქვეითთა არტ პროექტი " იარე ფეხით", რომელიც 1 ივლისს დაიწყო და ერთი თვის განმავლობაში გაგრძელდება.

4 ივლისს ვაკის პარკში ადგილი დაეთმო ქიტო ჩხაიძის ინსტალაციას BLACK. საღამოს მუსიკალურად ჯგუფი Lady Heroine აფორმებდა.
ქიტო ამჟამად ბერლინში ერთ-ერთი უნივერსიტეტის სტუდენტია და სპეციალურად ამ პროექტის ფარგლებში ეწვია თბილისს. რატომ გადაწყვიტა ინსტალაციის ასეთი სახით წარმოდგენა და რატომ შეურჩია თავის პროექტს სახელწოდება BLACK? ამ კითხვებით მიმართა ambebi.ge-მ პროექტის ავტორს:

"რადგან ვაკის პარკის სივრცე და აქ არსებული შადრევანი იძლევა საშუალებას, რომ მასიური ინსტალაცია განთავსდეს, სწორედ ამიტომ შევაჩერე არჩევანი ამ ადგილზე. ჩემი პროექტი ეკოლოგიას ეხება. შავი ფერით დაბინძურებული ჰაერისა და წყლის იმიტაცია გავაკეთე, ალაგ-ალაგ განთავსებული მცენარეები კი დაბინძურებულ გარემოს ნიშნავს", - აღნიშნა ქიტო ჩხაიძემ.

პროექტის ორგანიზატორი და იდეის ერთ-ერთი ავტორი ელენე მარგველაშვილია. როგორც მან განმარტა, ერთ-ერთი მთავარი მიზეზი, რამაც უბიძგა პროექტის წამოწყება, არის დაბინძურებული ატმოსფერული ჰაერი, რისი მიზეზიც მეტწილად ავტომანქანების გამონაბოლქვია. გარდა ამისა, მისი აზრით, არანაკლებ მნიშვნელოვანი პრობლემა ქალაქდაგეგმარების სამსახურის არარსებობა:

"სწორედ ამიტომ გადავწყვიტეთ შეგვედგინა პეტიცია, ვაგროვებთ ხელმოწერებს და მივმართავთ თბილისის მერობის კანდიდატებს, გულისყურით მოეკიდონ ჩვენ მიერ პეტიციაში აღნიშნულ პრობლემებს", - განაცხადა ელენე მარგველაშვილმა.

მიწისზედა და მიწისქვეშა გადასასვლელების რეაბილიტაცია, საზოგადოებრივი სატრანსპორტო სისტემის განვითარება, მწვანე საფარის დაცვა და სარეკრეაციო ზონების შემცირების არდაშვება, ქვეითთა სიკვდილიანობის სტატისტიკის ანალიზი და მათ გამომწვევ მიზეზებზე რეაგირება - ეს პეტიციაში ჩამოთვლილი მოთხოვნათა არასრული

ნუსხაა, რომელსაც მალე პროექტის ორგანიზატორები ქალაქის მერიას წარუდგენენ.

პროექტის ფარგლებში მომდევნო ღონისძიება 5 ივლისს 16 საათზე თსუ-ს მაღლივი კორპუსის მიმდებარე სტუდენტური სივრცეში, უნივერისტეტის 2 ნომერში გაიმართება. წარმოდგენილი იქნება ინსტალაცია " ჩემი ფეხები", რომლის ავტორი ნიკა ქუთათელაძეა.

შეგახსენებთ, რომ პროექტის ფარგლებში მიცკევიჩისა და პეკინის კუთხეში უკვე განთავსდა ნატო ბაგრატიონის ინსტალაცია "მწვანე კედელი", რომლის ნახვაც მსურველებს დღესაც შეუძლიათ.

"იარე ფეხით" არის ორგანიზაცია, რომელიც ცდილობს დაიცვას ფეხით მოსიარულეთა უფლებები. არტ- პროექტი წელს შვეიცარიის საელჩოს მხარდაჭერით პირველად ტარდება თბილისში.

სალომე შიხაშვილი, Ambebi.ge