რატომ გაურბის გიორგი გაბუნია ცოლის მოყვანას

ტელეწამყვანი გიორგი გაბუნია დარწმუნებული იყო, რომ დედის, ცნობილი დიქტორის, ჯულიეტა ვაშაყმაძის მსგავსად საინფორმაციო გადაცემას არასდროს წაიყვანდა, მაგრამ როცა "კურიერში" მოხვდა, თავისი პრინციპი გვერდზე გადადო. არასდროს ჰქონია კომპლექსი, რომ ჯულიეტა ვაშაყმაძის შვილია, არც მეტსახელი ჯულიეტოვიჩი აღიზიანებს და, როგორც თავად ირწმუნება, წლების წინ ტელეკომპანია "მაესტროში" მუშაობა ისე დაიწყო, რომ არავინ იცოდა, ვისი შვილი იყო.
"კურიერი" და პოლიტიკური ტოქ შოუ "არჩევანი" გიორგის მკაცრ ჩარჩოებში აქცევს, პროექტ "იქს ფაქტორის" ჟიურიში კი სრული გასაქანი მიეცა და მისი რეპლიკები ხან ირონიულია, ხან სარკაზმული, ხანაც ძალიან პირდაპირი. როგორც თავად აცხადებს, რეპლიკებს მიზანმიმართულად არ ისვრის და ყოველთვის იმას ამბობს, რასაც ფიქრობს. ამიტომ ხშირად დინების საწინააღმდეგოდ ცურვა გამოსდის. გიორგი გაბუნიაზე ყველაზე მეტს ლაპარაკობენ და უმეტესწილად ნეგატიურს, მაგრამ ეს მას სულაც არ ანაღვლებს.
– გიორგი, პროექტ "იქს ფაქტორის" ფინალურ ეტაპზე ხართ, რა მიიღეთ ამ შოუსგან?
– ჯერ ვერ ვიტყვი, რომ ის მივიღე, რაც მინდოდა, რადგან ჩემი მიზანი გამარჯვებაა.
– სანამ მაყურებელი გადაწყვეტს, ვინ გახდება იქს ფაქტორი, მანამდე უნდა აღვნიშნოთ, რომ მენტორის როლმა საზოგადოება თქვენ მიმართ არაერთგვაროვნად განაწყო. ხანდახან ღია აგრესიაც თვალშისაცემია.
– ჩემთვის დიდი მნიშვნელობა არ აქვს, საზოგადოება რას იტყვის. თუ მწარე რეპლიკებს ვისვრი, ეს ჩემი ბუნებრივი რეაქციაა იმ კონკურსანტების მიმართ, რომლებიც მოუმზადებლები არიან. სცენარით არ ვხელმძღვანელობ. არც ჩემი და სტეფანეს სასცენო ურთიერთობა ყოფილა დაგეგმილი. ჩემთვის მთავარია, მაყურებელიც და კონკურსანტიც მივახვედრო, რისი თქმა მინდა და თუ ამისთვის მკვეთრი რეპლიკა მჭირდება, არ ვერიდები იმის შიშით, რომ საზოგადოება ქვას მესვრის. თუ მეკითხები, ანუ ვაფასებ, სიმართლე უნდა ვთქვა.
– არ გაბრაზდით, როცა "ფეისბუქზე" თქვენთვის მოძღვნილი უხამსი გვერდი აღმოაჩინეთ?
– არა, ნებისმიერ უარყოფით რეაქციაზე მხოლოდ მეცინება. ვერ ვიტყვი, რომ ეკრანზე ვარ პერსონაჟი, რომელიც ცალსახად ბოროტი, ცინიკური ან კეთილია. ვფიქრობ, მაყურებლისათვის ის უფრო საინტერესოა, რომ არ იცის, როდის წამოვა ჩემგან შავი და თეთრი.
– არც იმაზე გაბრაზდით, როდესაც ეს გვერდი თქვენმა კოლეგა შალვა რამიშვილმა პირდაპირ თავის გადაცემაში მოიწონა და პროპაგანდა გაუწია?
– როგორც გითხარით, ყველაფერზე ღიმილიანი რეაქცია მაქვს. შალვა სწორად მოიქცა. როცა მინდა, ჩემი გადაცემა რეიტინგული იყოს, ყოველთვის რეიტინგულ ადამიანებზე ვსაუბრობ. შალვამაც ზუსტად ეს გააკეთა. პრეზიდენტის ყოფილმა პიარმა აბსოლუტურად უსასყიდლოდ იმუშავა ჩემთვის, რაც უდავოდ მისასალმებელია.
– თქვენი სახით, მგონი, ახალი თაობის მარინა ბერიძე მივიღეთ.
– ჩემთვის ხშირად უთქვათ, ახალი მარინა ბერიძე ხარო. ალბათ ერთმანეთს იმიტომ გვამსგავსებენ, რომ პროექტში ისიც შესამჩნევი იყო. "რუსთავი 2"–ის მუსიკალურ–გასართობი პროექტების ჟიურიში ბევრი ადამიანი იყო, მაგრამ ახლა რომ შეგეკითხოთ, უმრავლესობას ვერ ჩამომითვლით, მარინა ბერიძე კი ყველას ახსოვს.
– თქვენგან "გულმოკლული" კონკურსანტები სოციალურ ქსელებში ღიად გემუქრებიან. დაპირისპირების სამიზნე რეალურად თუ გამხდარხართ?
– ჯერ არავის ვუცემივარ. ის ადამიანები, ვინც სოციალურ ქსელებში აგრესიით გამოირჩევიან, რეალურ ცხოვრებაში ამის გამკეთებლები არ არიან.
– შოუში ვოკალურ მონაცემებზე მეტად ჩაცმულობაზე ამახვილებთ ყურადღებას. ცხოვრებაშიც ჩაცმის სტილით აფასებთ ადამიანებს?
– არა, ცხოვრებაში ძალიან მიყვარს უბრალო ადამიანები. შეიძლება ვიღაცის უბრალო, არაბრენდული და ღარიბული ჩაცმულობა უფრო ძვირფასი იყოს ჩემთვის, ვიდრე ბრენდებში გამოწყობილის. უბრალოდ, ჩემი აზრით, როცა სცენაზე გამოდიხარ, უნდა იფიქრო, რა გაცვია. "იქს ფაქტორი" მხოლოდ ვოკალური კონკურსი არ არის, მთლიანად პიროვნება ფასდება. როცა კონკურსანტის ჩაცმულობაზე ვლაპარაკობდი, ეს იმას ნიშნავდა, რომ მისი ნამღერი ჩემთვის იმდენად უინტერესო იყო, მის ტანსაცმელზე ვიწყებდი ყურებას. ბევრმა ისე იმღერა, დღემდე ვერ ვიხსენებ, რა ეცვათ სცენაზე.
– თავად თუ ხართ ბრენდების "მონა"?
– ბრენდომანი საერთოდ არ ვარ. ვიმოსები ყველგან, სადაც კი ჩემთვის საინტერესოს გადავაწყდები. როგორც მხედავთ, ქეჟუალის სტილი უფრო მიყვარს. საერთოდ მარტივად ჩაცმა მომწონს – კედები, მაისური და ჯინსი. ჩაცმულობის გამოც ხშირად მაკრიტიკებენ, ჟიურიში ისე გაცვია, კონკურსანტისგან არაფრით გამოირჩევიო. სანამ წამყვანი გავხდებოდი, გარდერობში ერთი პიჯაკიც არ მქონდა. ახლა მიწევს კლასიკურად ჩაცმა, მაგრამ ეს ჩემი სტილი არ არის.
– მახსოვს ტელეკომპანია "მაესტროში" თქვენი მუშაობის წლები, როდესაც სხვადასხვაფრად შეღებილი თმით და საყურით ჩანდით ეკრანზე. ეს რა იყო, საკუთარი თავის ძიება?
– იმ ნაცრისფერ პერიოდში თავს ასე ვიმხიარულებდი. საკუთარი თავის გამოძერწვა მიყვარს, ექსპერიმენტების განხორციელებაში ჩემი ხასიათიც მეხმარებოდა, შემეძლო საზოგადოების აზრი "დამეკიდა". "მაესტროში" ამის გაკეთება უფრო ადვილი იყო. რაღაც მომენტში მომწონდა კიდეც, რომ ხალხს ჩემი ექსპერიმენტები არ მოსწონდა.

– ახლა ამის სურვილი აღარ გიჩნდებათ?

– არა, "კურიერის" მკაცრი ჩარჩოებიც კი დავარღვიე და ერთი ორი ისეთი ფრაზა წამოვისროლე, რომელიც აქამდე წამყვანს ეთერში არ უთქვამს. ზღვარგადასულ თავისუფლებას არ ვეძებ და ამის უფლებას საკუთარ თავს არც მივცემ. ახლა არ მაქვს სურვილი, რომ ზებრა ვარცხნილობა მქონდეს, მაგრამ შინაგანად მაინც ზებრა დავრჩი.
– ვფიქრობ, თქვენი მშობლები ძალიან კონსერვატულად შეეცდებოდნენ თქვენს აღზრდას, ყოველთვის გესმოდათ ერთმანეთის?
– ჩემსა და მშობლების შეხედულებებს შორის პრობლემა ყოველთვის იყო და ახლაც არის. ძალიან უპრობლემო ბავშვი ვიყავი, "იავნანასაც" კი თვითონ ვუმღეროდი საკუთარ თავს. სკოლაშიც არასდროს მჭირდებოდა, ვინმეს მითითებით მემეცადინა. გარდატეხის ასაკში სულ შევიცვალე. როგორც ჩანს, მომბეზრდა უპრობლემო ცხოვრება და მას შემდეგ პრობლემების შექმნაში ვარ. მშობლებთან დაძაბული ურთიერთობა დღემდე მაქვს, რადგან, რასაც დღეს ვაკეთებ, ბევრი რამ მათთვის მიუღებელია.
– და როგორ გვარდება თქვენსა და მშობლებს შორის უთანხმოება?
– არანაირად, მე ჩემი გზა მაქვს, მათ – თავიანთი. მშობლებთან ურთიერთობაში კომპრომისზე არ წავსულვარ, ამიტომ სულ მსაყვედურობენ, ანგარიშს არ გვიწევო.
– დედათქვენს, ქალბატონ ჯულიეტას ალბათ განსაკუთრებით არ მოსწონს თქვენი ლექსიკა "იქს ფაქტორის" ჟიურიში.
– მას ძალიან ცუდი რეაქციები აქვს ჩემს საეთერო მუშაობაზე, სულ სხვა შეხედულებები გააჩნია, როგორ უნდა ლაპარაკობდეს ადამიანი ეკრანიდან. ჯულიეტა ვაშაყმაძე 100 პროცენტით ანგარიშს უწევდა მაყურებელს და ყველაფერს ისე აკეთებდა, რომ მათი კეთილგანწყობა დაემსახურებინა. ამიტომაც მისთვის სრულიად გაუგებარია, როგორ უნდა ვთქვათ გადაცემაში ისეთი რამ, რამაც შეიძლება საზოგადოებაში ნეგატიური განწყობა გამოიწვიოს. მიუხედავად იმისა, რომ მშობლებთან აზროვნებით თანხვედრა არ მქონია, მაინც დიდი გავლენა იქონიეს ჩემზე, თუნდაც იმით, რომ მე დღეს ტელევიზიაში ვმუშაობ. პროფესიით არქიტექტორი ვარ, მაგრამ ყველაფერი ტელევიზიაში გავაკეთე.
– თქვენ მეტსახელად ჯულიეტოვიჩსაც გეძახიან, ეს ხომ არ გაღიზიანებთ?
– ერთ–ერთი ჩემი კარგი თვისება ის არის, რომ ძალიან კარგად განვითარებული თვითირონია მაქვს. საკუთარ თავზე იმდენს ვიცინი, რომ ვინც რა უნდა თქვას, იმაზე მეტს ვერ გაიცინებს. ჯულიეტას შვილობა ხელს არასოდეს მიშლიდა. სხვათა შორის, "მაესტროში" როცა მივედი, არ დამჭირვებია დედის სახელის ხსენება და ამიტომ კარგა ხანი არავინ იცოდა, ვისი შვილი ვიყავი.

– ქალბატონი ჯულიეტა გულდაწყვეტილი გაუშვეს "პირველი არხიდან", თქვენ უკეთ გეცოდინებათ, რა მდგომარეობაში იყო, როდესაც საყვარელ საქმეს ჩამოაშორეს.
– ამაზე დღემდე აქვს გულისტკივილი. ის ერთი უკიდურესობიდან მეორე უკიდურესობაში აღმოჩნდა, მთელი ცხოვრება მუშაობდა საზოგადოებისთვის და უცებ სახლში აღმოჩნდა. მთლიანად სახლში ჩაიკეტა, მისი თაობის სხვა ჟურნალისტები ასე თუ ისე რაღაც სახით მაინც აქტუალურები დარჩნენ, დედამ კი ყველაფერზე უარი თქვა. ოჯახის ყველა წევრი ვეცადეთ, გვერდში დავდგომოდით. მინდოდა, მასში ბრძოლისუნარიანობა გამეღვიძებინა და საზოგადოებაში კვლავ აქტიური ყოფილიყო. მას ჰქონდა შემოთავაზებები სხვა ტელეკომპანიებიდან, მაგრამ უარი თქვა. ჩემმა მონდომებამ შედეგი არ გამოიღო და სრულიად იზოლირებული აღმოჩნდა საზოგადოებისგან.
– მშობლები მთელ დროს რომ სამსახურში ატარებდნენ, ამით რა დაგაკლდათ?
– არაფერი დაუკლიათ ჩემთვის. სამი და–ძმა ვართ და ვთვლით, რომ ძალიან ბედნიერი ბავშვობა გვქონდა.
– თქვენი მშობლების სიყვარულმა წლებს გაუძლო, მათი ურთიერთობა თქვენთვისაც იდეალურია?
– მათი სიყვარული მართლაც ძალიან ლამაზია, მაგრამ ამ კუთხით მე საერთოდ სხვაგან ვარ. ზოგადად ჩემთვის ოჯახის ფენომენი მიუღებელია, ოჯახური ურთიერთობები, ტკბილად შეყვარებული წყვილი ჩემთვის სენტიმენტია, რაც ცხოვრებაში მაღიზიანებს.
– ანუ არ ხართ მეოჯახე ტიპი, არ შექმნით ოჯახს?
– არა, საერთოდ არ ვარ მეოჯახე, საზიზღარი მარტოსული ვარ. იცით, როგორი იქნება ჩემი მომავალი? დავძმარდები მარტო.
– რა არ მოგწონთ ოჯახურ ურთიერთობებში?
– ოჯახური ურთიერთობის არანაირი ფორმა არ მომწონს. ოჯახი არის ვალდებულება, ვალდებულებებს კი ვერ ვიტან. მიყვარს თავისუფალი ურთიერთობები.
– ზღვარგადასული თავისუფლებაც არ არის მოსაბეზრებელი?
– არა, ასე რომ იყოს, მერწმუნეთ, სხვა რამეს მოვიფიქრებდი.
– ერთი შეხედვით თავისუფალი ადამიანის შთაბეჭდილებას ტოვებთ, მაგრამ ამის უკან ალბათ ბევრი კომპლექსიც იმალება თქვენში.
– კი, კომპლექსები მაქვს და მათზე ლაპარაკს არ ვაპირებ. ამ ინტერვიუდან შეიძლება ბევრს დარჩეს შთაბეჭდილება, რომ ძალიან გახსნილი ვარ, მაგრამ ახლაც კი ჩაკეტილი ვარ. ერთადერთი კომპლექსი შეიძლება გაგიმხილოთ – არ მიყვარს უცნობ ადამიანებთან ურთიერთობა.
– ერთხელ თქვით, რომ ცხოვრებაში ყველაზე დიდი იმედგაცრუება ღმერთია, იქნებ განმარტოთ.
– კიდევ ერთხელ ვიტყვი, რომ ჩემი ყველაზე დიდი იმედგაცრუება ღმერთია, გააჩნია, ამაში ვინ რას დაინახავს და ვინ რას ამოიკითხავს. საზოგადოებას სრულ თავისუფლებას ვაძლევ, თავისი ინტერპრეტაციებით აღიქვას ჩემი სიტყვები. დღეს საზოგადოების 99% გიპასუხებთ, რომ სულით ხორცამდე მორწმუნეა, მაგრამ მათ რომ ჰკითხოთ, რა სწამთ, ვერ გეტყვიან, აზრზე არ არიან. ბევრს ეშინია იმის თქმა, რომ რაღაც კითხვები აქვთ საკუთარ თავთან, მე კი ამის არ მეშინია.
– ღმერთში იმედგაცრუება ნიშნავს, რომ მისგან დაშორებულიც ხართ?
– ეს ამას არ ნიშნავს, შეიძლება ადამიანში იმედგაცრუებული დავრჩე, მაგრამ ის ყველაზე ახლობელი იყოს ჩემთვის.
– ძალიან დიდ ინტერესს იწვევს, თუ ვინ დგას გიორგი გაბუნიას გვერდით. ერთი პერიოდი თქვენი და თამთა გოდუაძის რომანზეც კი ალაპარაკდნენ.
– როცა გავრცელდა ჭორი, რომ მე და თამთა შეყვარებულები ვიყავით, ორივემ გულიანად ვიცინეთ.
– როგორი ქალები გიზიდავთ?
– ქალები, რომლებიც მომწონს, ერთმანეთისგან რადიკალურად განსხვავდებიან, ზოგადი ფორმულა არ მაქვს.
– საქმეს უფრო გაგიადვილებთ. გაიხსენეთ სერიალი "ჩემი ცოლის დაქალები", სადაც ქალების ძალიან ბევრი ტიპია წარმოდგენილი, თქვენთვის მისაღები რომელია?
– კატო.
– ანუ ცხოვრებაში შეიძლება ქარაფშუტა ქალი მოგეწონოთ?
– რა თქმა უნდა.
– რთულია ქალისთვის თქვენ გვერდით ცხოვრება?
– კი, ძალიან. ჩემი ატანა მართლაც რთულია, ხშირად ჩვენი ურთიერთობა იმით მთავრდება, ვინ დაასწრებს მიტოვებას. მეც მიმიტოვებია და მეც მივუტოვებივარ. ყოველთვის ვცდილობ, ურთიერთობა ისე დამთავრდეს, თითქოს ყველაფერი მე დავასრულე.
– პოლიტიკურ თემებზე მომუშავე ჟურნალისტისთვის დღეს რამდენად საინტერესო გარემოა შექმნილი?
– პოლიტიკური სპექტრი პოლარიზებულია, მუდმივად ორი მხარის ერთმანეთთან დაპირისპირებაში კი აზარტი არ არის.
– თქვენ მიმართ ხშირად ყოფილა ბრალდება, რომ ნაციონალებისკენ იხრებით.
– ზოგადად ადამიანები თავიდანვე მიკერძოებულად უყურებენ ჩემს პოლიტიკურ ტოქ შოუს, რადგან თვლიან, რომ "რუსთავი 2" შეიძლება მიკერძოებული იყოს. საზოგადოებას აქვს მოთხოვნილება, ნაციონალები დასვა ეთერში და თმით ითრიო. ჩემს გადაცემაში ეს არც ნაციონალების მიმართ მოხდება და არც "ოცნების". ბოლო პერიოდში ხუთი საარჩევნო სუბიექტის პრეზენტაციები გვქონდა. როდესაც ნაციონალების საარჩევნო პრეზენტაცია იყო, ყველა ალაპარაკდა, ეს ხომ ნაციონალების ტელეკომპანიააო. "ქართული ოცნების" საარჩევნო პრეზენტაციის დროს უფრო რბილი ვიყავი, მაგრამ ეს აღარავის დაუნახავს. ბოლოს ჩემზე თქვეს, ეტყობა, ახალი ტაქტიკა აქვთ და კრიტიკულ კითხვებს აღარ სვამენო.
– შეიძლება ოდესმე პოლიტიკაში წახვიდეთ?
– ახლა გადაწყვეტით ვიტყვი, რომ არა, მაგრამ ჩემს სიტყვებს არ უნდა ენდოთ. თავის დროზე ვამბობდი, რომ სულ უმუშევარი და მათხოვარი დავრჩებოდი, საინფორმაციო გამოშვებას კი არასოდეს წავიყვანდი, მაგრამ... ამიტომ არ ღირს ფიცი.
– საინფორმაციო სამსახურის უფროს ნინო შუბლაძის წასვლა როგორ მიიღეთ?
– ძალიან მძიმედ, რადგან ნინოსთან ერთად მოვედი "კურიერში". აბსოლუტურად მოულოდნელი იყო მისი გადაწყვეტილება არხიდან წასვლის შესახებ.
– ტელეკომპანიიდან მისი წასვლის რეალური მიზეზი იცით?
– რეალური მიზეზი არის ის, რაც მან თქვა. ტელევიზიისგან დასვენება უნდა.
ავთო ჩიტიძე, ჟურნალი სარკე