რა საიდუმლო გაუმხილა ნუცა ბუზალაძეს ლელა წურწუმიამ იურმალაში

იურმალაში, კონკურს "ახალ ტალღაზე" წელს საქართველომ სხვა წლებთან შედარებით ასაკით ყველაზე პატარა მომღერალი, 17 წლის ნუცა ბუზალაძე გააგზავნა. მაყურებელმა ის პირველად სატელევიზიო შოუდან "ერთი ერთში" გაიცნო. ძლიერი ვოკალური მონაცემების მქონე მომღერლის გვერდით გამოცდილი პროდიუსერი კახა მამულაშვილი, იგივე მამულიჩა და მომღერალი ლელა წურწუმია დადგნენ. სხვათა შორის, სწორედ ლელას შექმნილია რატი დურგლიშვილის და მაკა ზამბახიძის დუეტი "ჯორჯია", რომელმაც 2008 წელს იურმალაში საქართველოს გამარჯვება მოუტანა. ლელა ახლაც ოპტიმისტურად არის განწყობილი. ის ნუცას რეპერტუარზე და ჩაცმულობაზეც აქტიურად ზრუნავს. ქართველი კონკურსანტის გამო ლელას ლატვიელ დიზაინერებთანაც მოუწია დაპირისპირება, რომლებსაც ნუცა სხვა სტილის სამოსში წარმოედგინათ.
ინტერვიუ კონკურსის დასრულებამდეა ჩაწერილი.

– რა სიტუაცია დაგხვდათ იურმალაში და როგორი განწყობა აქვთ ქართველი კონკურსანტის მიმართ?
კახა: კარგი სიტუაცია დაგვხვდა, ნუცა ძალიან დადებითი ადამიანია, ყველასთან გამოძებნა საერთო ენა. ის იურმალას ორგანიზატორებს და ყველა მონაწილეს ძალიან მოსწონთ და უყვართ.
ლელა: ნუცა ენერგიული გოგოა, ყველას შეუყვარდა, თავს კარგად გრძნობს და საკმაოდ თავდაჯერებულია. ბევრს მუშაობს, რეჟიმი დამღლელია, მაგრამ ვფიქრობ, ნუცა მზად არის იმისთვის, რომ ღირსეულად გამოვიდეს კონკურსზე.
კახა: დილის 10 საათიდან საღამოს 8 საათამადე რეპეტიციები აქვს. იურმალაში რომ ჩამოვედით, უნდოდათ, პირველი ტურის სიმღერა, ჯესი ჯეის რეპერტუარიდან შეეცვალათ, მაგრამ ბოლომდე გავიტანეთ ჩვენი, თუმცა სიმღერა მაინც შეგვიმოკლეს. დანარჩენი ყველაფერი კარგად არის, წინაღობა არ გვქონია. ძალიან მოსწონთ ქართული დუეტი სოფო ხალვაშთან ერთად. სოფო აქ ყველას უყვარს, თბილი დახვედრა მოუწყვეს. შეიძლება რეპეტიციაზე კარგად იმღერო, მაგრამ საკონკუსო დღეს ვინ როგორ აჩვენებს თავს, ესაა მთავარი.
ლელა: ველაპარაკე ხმის ოპერატორსაც, რომელიც თავისი საქმის პროფესიონალია და მითხრა, ნუცა თუ ისე იმღერებს, როგორც რეპეტიციის დროს, საუკეთესო იქნებაო. მას კარგი ენერგეტიკა აქვს. ერთ–ერთ რეპეტიციაზე ალექსანდრ რევზინმა თქვა, ალბათ წაგვლეკავს, იმხელა ენერგია აქვსო.
– რა პროგნოზებს აკეთებთ?
კახა: ძალიან ძლიერი კონკურსანტები არიან, ჩემი აზრით, საინტერესო ორთაბრძოლა იქნება. მგონია, რომ შანსები ყველას თანაბარი აქვს. რეჟისორი რევზინი აქტიურად მუშაობს ნუცასთან. ჟიურის 10 კაციან შემადგენლობას დაემატა ფილიპ კირკოროვი, რომელიც უკრაინელი კონკურსანტის პროდიუსერი გახლავთ.
ლელა: უკრაინას, ისრაელს, იტალიას ძალიან კარგი კონკურსანტები ჰყავთ. ამერიკის წარმომადგენელიც ძალიან ძლიერია, შავკანიანია და სპეციფიკური ხმის ტემბრი აქვს. საკმაოდ ძლიერი შემადგენლობაა.
– ფილიპ კირკოროვი თუ კონკურსანტის პროდიუსერია, ჟიურის მიმართ ობიექტურობის განცდა ხომ არ დაიკარგება?
კახა: არ ვიცი, როგორ იქნება, ვნახოთ. ასეთ რაღაცეებზე არ ვფიქრობთ, მთავარია, ნუცას ჰქონდეს კარგი გამოსვლები.
ლელა: იქიდან გამომდინარე, რომ ჟიურის წევრები მომღერლები არიან, ვფიქრობ, რომ ობიექტურები იქნებიან შეფასების დროს. ყოველ შემთხვევაში, ნუცა იმდენად მზად არის კონკურსისთვის, მჯერა, ნამდვილად ვიამაყებთ მისი თითოეული გამოსვლით.
– კონკურსის ორგანიზატორების მხრიდან არის რაიმე სახის შენიშვნები, მითითებები?
კახა: რევზინს ჰქონდა ნუცას მიმართ შენიშვნები. უთხრა, ცოტა დაბალ რეგისტრში იმღერეო. ნუცას უყვარს ბევრი ენერგიის გამოყოფა და სულ მაღლებში მღერის. ამაზე მითითებებს აძლევს და ნუცაც ემორჩილება, რა ქნას.
– ვის მიიჩნევთ ნუცას ძირითად კონკურენტად?
კახა: უკრაინელ გოგონას, რომელმაც "ახალი ტალღის" საბავშვო კონკურსში გაიმარჯვა. ებრაელი კონკურსანტიც ნუცას პირდაპირი კონკურენტია და ქართველი მონაწილე ნოდარ რევიაც, რომელიც რუსეთის სახელით გამოდის. ჩემი მთავარი მიზანია, საუკეთესო პოზიციაზე გავიდეს ნუცა. აქ უამრავი უცხოელი პროდიუსერია ჩამოსული, ისინი რეპეტიციებს ესწრებიან. რამდენიმესთან მაქვს ურთიერთობა და მათ ძალიან მოსწონთ ნუცა. ის პატარაა, ყველაფერი წინ აქვს და ვნახოთ, რა იქნება. ნუცათი უცხოელი პროდიუსერები დაინტერესდნენ, განსაკუთრებით რუსები და უკრაინელები.
– სასცენო კოსტიუმები კონკურსის დიზაინერებმა შექმნეს. მათი ნამუშევრები როგორ მოგეწონათ?
კახა: ძალიან სუსტი დიზაინერები ჰყავთ, ბევრ კონკურსანტს შეუცვალეს კაბა. ალბათ იცით, რომ საქართველოდან კოსტიუმები არ ჩამოგვატანინეს. ლელა აქაურ დიზაინერებთან ომობს, რომ ნუცას კარგი კაბები ეცვას.
ლელა: რამდენიმე კოსტიუმი დავიწუნეთ. რთულია შორიდან უცხო ადამიანს შეურჩიო სამოსი. საბოლოოდ მაინც შევჯერდით და ვფიქრობ, რომ ნუცას ყველა ტურში კარგი კოსტიუმი ეცმევა, რაც მთავარია, ასაკთან და რეპერტუართან შესაფერისი.
– როცა დუეტი "ჯორჯია" მონაწილეობდა "ახალ ტალღაში", დარწმუნებულები იყავით, რომ ისინი გაიმარჯვებდნენ. ახლა როგორია თქვენი წინათგრძნობა?
კახა: ლელა მაშინ მართლაც დარწმუნებით ამბობდა, რომ ისინი გაიმარჯვებდნენ. რეპეტიციაზე რასაც ვუყურებ მონაწილეებს, თუ ნუცა ძალიან კარგად იმღერებს, დიდი შანსები აქვს. არ მიყვარს წინასწარ ლაპარაკი, მაგრამ მგონია, რომ საპრიზო ადგილს დავიკავებთ.
– პოლიტიკური ფონი იგრძნობა?
ლელა: პოლიტიკური ელფერი ნამდვილად არ დაჰკრავს ამ კონკურსს. აქ პოლიტიკაზე არავინ ლაპარაკობს.
– იოსიფ კობზონი, ვალერია, ოლეგ გაზმანოვი არ შეუშვეს იურმალაში... რა ინფორმაციას ფლობთ, რას ამბობენ კულუარებში?
კახა: ამის შესახებ არ მაქვს სრული ინფორმაცია, ამიტომ კომენტარს ვერ გავაკეთებ.
– საქართველოდან ნუცას საგულშემატკივროდ ვინ ჩამოვიდა?
ლელა: ჩვენ გვერდით არის სოფო ხალვაში, ქალბატონი მაია ყიფიანი ყველაფერში გვეხმარება. აქ მცხოვრები ქართველებიც აქტიურად გვქომაგობენ, მაგალითად, ფეხბურთელი საშა რეხვიაშვილი თავისი ოჯახით, ჩოგბურთელი ირაკლი ლაბაძე... დარწმუნებული ვარ, მთელი საქართველო ჩვენ გვერდითაა და აქტიურად გვიქომაგებენ.
...
დატვირთული სამუშაო რეჟიმის მიუხედავად, ნუცამ არ დაიზარა და თავისი შთაბეჭდილებები "სარკის" მკითხველს გაუზიარა.
– ნუცა, რა წარმოდგენა გქონდათ მანამდე ამ კონკურსზე და ახლა რას ფიქრობთ?
– როცა ტელევიზიით ვუყურებდი, მაშინაც ძალიან მაგარი კონკურსი მეგონა და ახლაც ასეა. ისე მომწონს აქაურობა, არ მინდა, რომ მალე დამთავრდეს.
– როგორ დაგხვდათ ქართველ კონკურსანტს იურმალა?
– როგორც ყოველთვის, ქართველებზე აქ ძალიან სერიოზული და დადებითი წარმოდგენა აქვთ, ამიტომაც ცოტა სხვანაირად გვიყურებენ და ჩვენგან უფრო მეტს ელიან. მგონია, რომ არც მე გავუცრუებ აქაურებს იმედებს. ისეთივე წარმატებით წარვდგები მაყურებლის წინაშე, როგორც ჩემი წინამორბედები. როცა აქ იციან, რომ შენ ქართველი ხარ, უკვე იციან, რომ ძლიერი ხარ. ყველაფერს გავაკეთებ, რომ ჩემი ქვეყანა ვასახელო.

– რა დროს იგრძნობა კონკურენცია?
– კონკურენცია სულ იგრძნობა. საკმაოდ ძლიერი კონკურენტები მყავს, მაგრამ არავინ ვიცით, ვინ რას იზამს სცენაზე, ამიტომ დაველოდოთ კონცერტის დღეს. ზუსტად ვიცი, რომ შესაძლებლობების მაქსიმუმს ვაჩვენებ.
– 17 წლის ასაკში არ არის რთული კონკურენტულ გარემოში ყოფნა?
– მშვენივრად ვუძლებ კონკურენტულ გარემოს და არანაკლები კონკურენტი ვარ სხვებისთვის. ფსიქოლოგიურად ყველანაირად მზად ვარ.

– კონკურსანტის მთავარ მტერს, ნერვიულობას როგორ ებრძვით?

– მაქვს მოტივაცია, ყველას მოვაწონო და შევაყვარო თავი. სიმღერაში სიყვარული მეხმარება. რასაკვირველია, მეც ვნერვიულობ, მაგრამ ეს იმას არ ნიშნავს, რომ რამეში ხელი შემეშლება. პირიქით, ყველაფერი კარგად იქნება.

– როგორ უვლით ხმის იოგებს? ხშირად კონკურსის წინ მონაწილეები ავად ხდებიან ან ნერვიულობის გამო ხმა ერთმევათ.
– ყოველდღე ვსვამ ჩაის, ვჭამ თაფლს. აქ ნესტიანი ჰავაა და ყელს ყველანაირად ვუფრთხილდები.
– რას ფიქრობთ კონკურსანტ ნოდარ რევიაზე, რომელიც რუსეთის სახელით მონაწილეობს?
– ნოდარი ისეთი საყვარელია, მინდა, რომ შევჭამო. ერთადერთი კონკურსანტია, ვისაც ქართულად ველაპარაკები და მიხარია მასთან კომუნიკაცია. ის ჩემთვის ძლიერი კონკურენტია, მაგრამ ვამაყობ, რომ ქართველია და ასეთი მაგარი მომღერალია.
– ლელამ რა მთავარი საიდუმლოებები გაგანდოთ, როგორი ლელა წურწუმია გაიცანით საკონკურსო ცხოვრების დროს?
– თბილისში მზადების პერიოდში როგორიც იყო ლელა, ახლაც ასეთია – თბილი, მზრუნველი, ყველანაირად მხარში მიდგას და ცდილობს, არაფერი დამაკლოს. მთავარი საიდუმლო ლელამ ის გამანდო, რომ ჩემი ნამღერიდან არ წამოვიდეს აგრესია, ყოველთვის ვიმღერო სიყვარულით. როცა არ ვყვირი და სიყვარულით ვმღერი, მაშინ სულ სხვანაირი სიმღერა გამოდის.
– პირველ ტურში ჯესი ჯეის რეპერტუარიდან მღერით. გიყვართ ეს მომღერალი?

– მიყვარს და ვფიქრობ, რომ პირველ ტურში განსხვავებული სიმღერა მექნება. როგორც გითხარით, ამ სიმღერით ბოლომდე წარმოვაჩენ საკუთარ თავს.
– როგორ მოირგეთ სასცენო კოსტიუმები?
– კონკურსისთვის დავიცავი დიეტა და 5 კილო დავიკელი. შეიძლება ეს ბევრი არ არის, მაგრამ საგრძნობლად დამეტყო. შესაბამისად, ყველა კოსტიუმი ძალიან მომიხდა. მეცმევა მომდგარი კაბები, ამ კაბებში ვიქნები საყვარელიც და ამავე დროს სექსუალურიც, თუმცა ბავშვურ იერს არ დავკარგავ. კმაყოფილი ვარ ჩემი იმიჯითა და სტილით. როგორც ვოკალურად, ასევე გარეგნობით მზად ვარ, კონკურსანტებს კონკურენცია გავუწიო.
– ქართულ ტურში "ყვავილების ქვეყანას" მღერით. არჩევანის საშუალება რომ გქონოდათ, რომელ ქართულ სიმღერას აირჩევდით?
– ისევ და ისევ "ყვავილების ქვეყანას", რადგან ძალიან მომწონს. თქვენ არ იცით, აქ როგორი მოწონება დაიმსახურა ამ სიმღერამ ჩვენი შესრულებით. მიუხედავად იმისა, რომ არავის ესმის ტექსტი, აღფრთოვანებულები არიან, როგორ ვმღერით და როგორ ვეფერებით ჩვენს ბგერებს. ქართული სიმღერისადმი ჩვენი სიყვარული ორივემ ვაჩვენთ, მეც და სოფიკომაც.
ლანა კიკნაძე, ჟურნალი სარკე