"ერთხელ მანქანაში ძროხა შემომიხტა" - "მოულოდნელი კითხვები" კრისტი ყიფშიძეს

მოდელი კრისტი ყიფშიძე ზაფხულს ჯერჯერობით თბილისში ატარებს, ყოველდღიურად დადის აუზზე - ასეთი დასვენება დიდ სიამოვნებას ანიჭებს.

ბლიც-სერიისთვის ("მოულოდნელი კითხვები") რომ დავუკავშირდი, სწორედ, აუზზე მოვხვდი, რადგანაც მზეზე უზომოდ შეყვარებული ქალბატონი დიდ განცხრომაში იყო... მიუხედავად იმისა, რომ რელაქსაციის საათები ჰქონდა, ჩემს კითხვებს, მონდომებით მაინც უპასუხა...

- სად ხარ?
- აუზზე ვარ და მზეს ვეფიცხები. უზომოდ მიყვარს მზე, იმდენად, რომ მარჯვენა ფეხზე მისი გამოსახულებით პატარა ტატუც მაქვს გაკეთებული. ეს იმისთვის, რომ სულ თან დამყვებოდეს და მათბობდეს...

- რატომ, ქრონიკული სიცივის შეგრძნება გაქვს?
- ზამთარში მზის სხივები რომ გამოჩნდება, ხომ გახარებს? ასეა, ესეც, - მისი დანახვა სულ მიხარია...

- ბევრი მზის სხივის მიღება არ შეიძლება, - ამას ექიმები ამბობენ...
- კი, ვიცი და ყველაფერს აქვს თავისი ზღვარი, ზომა და ამ ყველაფერს მეც მივყვები და ვიცავ...

- ახლა როგორი განწყობა გაქვს?
- კარგი, მშვიდი, წყნარი, - ვისვენებ...

- ზოგადად, დროს როგორ კლავ?
- როცა მაქვს თავისუფალი დრო და არაფერს ვაკეთებ, ეს მაგიჟებს. თუ მაგ პერიოდში სახლში ვარ, რაღაცის დალაგებას ვიწყებ. შემიძლია მაგალითად, კარადა გადმოვალაგო და რაღაცები თავიდან შევალაგო, ყველაფერი დავახარისხო. მოკლედ, მაგ დროს მიყვარს საოჯახო ფუსფუსი. თუ გარეთ ვარ და "ფანჯარა" მაქვს, ის ერთი საათი შემიძლია ტაქსიში არ ჩავჯდე და გარკვეული მანძილი ფეხით გავისეირნო. ფეხით სიარული მამშვიდებს და თან, ძალიან სასარგებლოა. მოკლედ, ჯანმრთელი ცხოვრების სტილი მაქვს.

- რას გულისხმობ? მაგალითად, დილით უზმოზე ერთ ჭიქა ცივ წყალს სვამ?
- კი, და ყავას მერე ვაყოლებ... ალკოჰოლს არ ვიღებ, ხორცს არ მივირთმევ...

- ვეგეტარიანელი ხარ?
- მთლად არ მინდა, რომ ვეგეტარიანელი დავირქვა, რადგანაც იშვიათად, ქათმის ხორცს და თევზსაც ვჭამ.

- ძროხის ხორცს რატომ არ მიირთმევ?
- ერთხელ მე და დალი ჩიტალაძეს მანქანაში ძროხა შემოგვიხტა... კიდევ კარგი დალი კარგი მძღლია, იმარჯვა და გადავრჩით... ამ ამბის შემდეგ ხორცი არ მიჭამია...

- სიზმარში პოდიუმზე თუ გივლია?
- კი, ხშირად ყოფილა ასეთი რამ, განსაკუთრებით ჩვენების შემდეგ, თუ იმ დღეს ძლიერი შათაბეჭდილება მქონია. ერთხელ ფსიქოლოგიური ტესტის გაკეთება შემომთავაზეს, - გზა როგორ წარმოგიდგენიაო? ვუპასუხე, - მწვანე ბილიკი და გარშემო ყვავილებით მოფენილი-მეთქი. მოკლედ, გზა როგორც პოდიუმი, ისე დავინახე, პარალელებს სულ ჩემს საქმიანობასთან ვაკეთებ. ასე რომ, პოდიუმი სიზმარშიც მინახვას. საერთოდ, ისეთი სიზმრები მაქვს, რომ რაღაცები მიხდება ხოლმე.

- წინასწარმეტყველური?
- არ ვიცი, რამდენად წინასწარმეტყველობაა ეს, მაგრამ ასე გამოდის (სიცილით ამბობს)... ინტუიცია კარგად მაქვს განვითარებული და შემიძლია რაღაც წინასწარ ვიგრძნო და დავინახო...

- რის გამო გაათენებ ღამეს?
- თუ მეძინება, არაფერი მაინტერესებს, ბავშვობაში კი თავს ვიკლავდი, ღამეს ტელევიზორის ყურებასა და წიგნის კითხვაში ვათენებდი... რაც დრო გადის, უფრო ეგოისტი ვხდები, ვიცი, რომ ღამის გატეხვა ცუდია და როცა გეძინება, უნდა დაიძინო.

- ალკოჰოლს რატომ არ სვამ?
- არასდროს დამილევია... ამ თემამ დამღალა, რადგანაც არავის სჯერა, რომ ალკოჰოლს არ ვიღებ. ასევე

არის რაღაც პროდუქტები, რაც არ გამისინჯავს, მაგალითად, სიმინდი...

- ზღვის გადაცურვის სურვილი არასდროს გქონია?
- არც ისე კარგად ვცურავ, რომ ეს შევძლო. შესაბამისად ასეთი სურვილი არ გამიჩნდება. რისკიანი არ ვარ.

- არასდროს რისკავ?
- თუ ჩემს ძალებში დარწმუნებული არ ვარ, არაფერს ვრისკავ...

- შენს კარგ თვისებად რას მიიჩნევ?
- თუ ვინმემ მაწყენინა, ის წყენა მალე მავიწყდება, ანუ ნეგატივს ვივიწყებ.

- როდის გღალატობს ნერვები?
- ვერ ვიტან ლოდინს, მერე "ვფეთქდები"... თუმცა გამართლება აქვს ყველაფერს. თუ რაღაც ისე არ არის, ე.ი. რაღაცის ბრალია.

- ბაღში ბარითა და თოხით თუ გიმუშავია?
- არასდროს.

- არც ხე დაგირგავს?
- არა, მარწყვი მომიკრეფია, ჟოლოც... სახლში კი გვაქვს ბევრი ყვავილი, მაგრამ მათ დედაჩემი უვლის.

- შენ მათი მოვლის სურვილი არ გიჩნდება?
- არა, ვგრძნობ, რომ ეს ჩემი საქმე არ არის... ჩვენს ეზოში არის ორი ხე - ბროწეული და კარალიოკი, როდესაც მოსავალია ხოლმე ასაღები, მას მე ვკრეფ. ძალიან მიყვარს ჩემი ხეები, განსაკუთრებით კი - ბროწეული.

- როგორი დასვენება გიყვარს?
- პასიური დასვენება მიყვარს და ხშირად ვსტუმრობ მთას. განსაკუთრებულად ყაზბეგი მიყვარს, თან, აქედან ორი საათის სავალია. იქ კომფორტული სასტუმროა. ხომ ვამბობ, მთა მიყვარს, მისტიკურია, რაღაცებზე მაფიქრებს და იქ სხვანაირად ვფიქრობ. როცა ყაზბეგიდან ვბრუნდები, საშინელი ნოსტალგია მემართება. მოკლედ, ნებისმიერ დროს შემიძლია იქ წასვლა, უარს არ ვამბობ. გერგეთზე ფეხით ავსულვარ, ახლა ჩემი ოცნებაა "მეტეოსადგურზე" ავიდე, 6 საათი უნდა ფეხით, არ ვიცი, როგორ გამომივა...

- ეს უკვე ლაშქრობაა...
- იქ ვერტმფრენითაც ავიდოდი, მაგრამ გზის ხიბლი მინდა, რომ განიცადო, ამას სხვა მუღამი აქვს.

- როგორ უნდა მოიქცეს ნამდვილი მამაკაცი, რომ ქალის გული დაიპყროს?
- რთული კითხვაა. ბევრი რაღაც სჭირდება, მაგრამ უპირველესად ქალს პატივს უნდა სცემდეს, მასზე ზრუნავდეს, ეამაყებოდეს მის გვერდით ყოფნა. ისევე როგორც იმ ქალს... მთავარი ურთიერთგაგებაა.

- საკუთარ თავში რა არ მოგწონს?
- ძალიან თვითკრიტიკული ვარ. ხან რა არ მომწონს, ხან - რა. მაგრამ საკუთარ გარეგნობაში არაფრის შეცვლას არ ვაპირებ. სხეულის რომელიმე ნაწილი პლასტიკურად რომ გავისწორო, მე აღარ ვიქნები, ხასიათი დაიკარგება.

- ვიცი, კარგი მეხსიერება გაქვს და ბევრი ტელეფონის ნომერიც გახსოვს ზეპირად. ისე რომ, მეტსახელად "კრისტი.com"-იც დაგარქვეს...
- კი, მაგალითად, შემიძლია გავიხსენო მეხუთე კლასში რომ ვმეგობრობდი ადამიანთან, იმის სახლის ტელეფონის ნომერი, ან შარშან ამ დროს რას ვაკეთებდი, პირველი ჩვენება ფოტოგრაფიულად აღვიდგინო.

- თანამდებობის პირი რომ იყო...
- თანამდებობაზე კი არა, საჯარო სამსახურში არც ერთ პოზიციაზე არ შემიძლია მუშაობა, თავისუფალი ადამიანი ვარ. მუშაობისთვის თავისუფალი რეჟიმი უნდა მქონდეს, იქაური მოთხოვნები, დრესკოდის დაცვა, ზუსტად ერთსა და იმავე დროს სამსახურში მისვლა არ შემიძლია. შემოქმედებითი ნატურა ვარ. შემიძლია ერთი კვირა დავისვენო, მერე ორი კვირა გადაბმით და დატვირთულმა ვიმუშავო...

ლალი ფაცია