ნურ ფეტაჰოღლუ: "მაჰიდევრან სულთანივით ცივი ქალი არ ვარ"

თურქი მსახიობი ნურ ფეტაჰოღლუ, რომელიც ცნობილია სერიალ "დიდებულ საუკუნეში" შესრულებული მაჰიდევრან სულთნის როლით, გერმანიაში გახლავთ დაბადებული, ქალაქ დუისბურგში. 10 წლის იყო, როდესაც მრავალშვილიანი ოჯახი საცხოვრებლად თურქეთში, სტამბულში გადავიდა. სკოლის დამთავრების შემდეგ სწავლა სტამბულის უნივერსიტეტში მოდისა და დიზაინის ფაკულტეტზე განაგრძო, მაგრამ თავისი სპეციალობით არასოდეს უმუშავია. ნურმა უნივერსიტეტის დამთავრების შემდეგ მუშაობა ბანკში დაიწყო. ახალგაზრდა ლამაზმანი მალე თურქულ ტელეარხებზე გადაცემის წამყვანად მიიწვიეს. ფეტაჰოღლუ მსახიობობაზე ყოველთვის ოცნებობდა, ოცნების განხორციელებაში კი ყოფილმა ქმარმა შეუწყო ხელი.
ნურის სამსახიობო დებიუტი შედგა თურქულ სერიალში "რომელია ჩვენგან მამა" და ცნობადი გახდა. სერიოზული წარმატება კი 2008 წელს გადაღებულმა "აკრძალულმა სიყვარულმა" მოუტანა, სადაც ფეიქერის როლი განასახიერა. შემდეგ იყო ფილმები "მოლარე" და ევროპაში საკმაოდ ცნობილი სურათი "მგლების ველი: პალესტინა", რომლის მთავარი თემა თურქეთის მერვე პრეზიდენტის მოწამვლის გამოძიებაა.
2011 წელს ნურ ფეტაჰოღლუ მიიწვიეს სერიალში "დიდებული საუკუნე". მაჰიდევრანის როლმა ერთიორად გაზარდა მსახიობის პოპულარობა.
რაც შეეხება მსახიობის პირად ცხოვრებას, კარიერისაგან განსხვავებით, წარმატებულად ნამდვილად არ დაწყებულა. 2008 წელს ნური ცოლად გაჰყვა მურატ აისანს და მას წლების განმავლობაში მაყურებელი სწორედ პირველი ქმრის გვარით, აისანით იცნობდა. 2011 წელს, განქორწინების შემდეგ, მსახიობმა თავისი გვარი დაიბრუნა.
2013 წლის ბოლოს 33 წლის ფეტაჰოღლუ მეორედ გათხოვდა მასზე 11 წლით უფროს ბიზნესმენ ლევენტ ვეზიროღლუზე. მათი საქორწინო ცერემონია პომპეზური არ ყოფილა – მხოლოდ 70 ახლობელი იყო დაპატიჟებული. ახლახან ლევენტმა განაცხადა, რომ ნური ორი თვის ორსულია. ამ სიახლემ ერთდროულად გაახარა და დაამწუხრა თურქული სერიალის თაყვანისმცემლები, რადგან ეს ნიშნავს, რომ მალე "დიდებული საუკუნე" კიდევ ერთ ვარსკვლავს დაემშვიდობება.
ბუნებრივია, ეს ფაქტი არც ჟურნალისტებს დაუტოვებიათ უყურადღებოდ და ჟურნალ "ელის" კორესპონდენტი თვალის დახამხამებაში ფეტაჰოღლუსთან გაჩნდა, რომელმაც ინტერვიუზე უარი არ უთხრა.
– ფილმს, რომელშიც მაჰიდევრან სულთნის როლი მოირგეთ, "დიდებული საუკუნე" ჰქვია, თავად სულთან სულეიმანის პერიოდს თუ მიიჩნევთ დიდებულად?
– ის ეპოქა ვერც კი წარმომიდგენია. ვერ წარმომიდგენია პერიოდი დემოკრატიის გარეშე. ყველა ერთ ადამიანს ემორჩილება – რა არის ამაში დიდებული?
– სერიალში ცივი ქალის იმიჯი გაქვთ, რეალურადაც ასეა?
– ვფიქრობ – არა, მაჰიდევრან სულთანივით ცივი ქალი არ ვარ, თუმცა გეტყვით, რომ ძალიან მინდოდა ამ როლის თამაში.
– როგორი ურთიერთობა გაქვთ სერიალის სხვა მსახიობებთან?
– საოცრად მეგობრული. ჩვენ გადაღებების შემდეგაც ხშირად ვიკრიბებით.
– ცნობილია, რომ სამსახიობო განათლება არ გაქვთ, მიუხედავად ამისა, ყოველთვის მთავარ როლებზე გამტკიცებენ. თქვენი აზრით, რა არის ამის მიზეზი?
– ამის მიზეზი ჩემი ძლიერი სურვილი და მონდომებაა.
– მოდისა და დიზაინის ფაკულტეტზე სწავლობდით, მუშაობდით ბანკში, ტელევიზიაში, ხართ წარმატებული მსახიობი. არის რამე, რისი გაკეთებაც გინდათ?
– მინდა, კიდევ დიდხანს ვიყო მსახიობი. დიზაინერობაც ძალიან მომწონს და არ გამოვრიცხავ, რომ ოდესმე ჩემი ბუტიკიც გავხსნა.
– რას ნიშნავს თქვენთვის მსახიობობა?
– მსახიობობა ჩემთვის მხოლოდ სამსახური არ არის. ჩემს პროფესიაზე შეყვარებული ვარ. როცა რაღაც პრობლემას ვაწყდები, საკუთარ თავს მხოლოდ მაშინ ვეუბნები, რომ ეს სამსახურია და ასე უნდა იყოს. ვფიქრობ, მსახიობობას ჩემთვის უცნობი კიდევ ბევრი მხარე აქვს.
– პირველ ქმარს ხუთწლიანი თანაცხოვრების შემდეგ გაეყარეთ, ეს მტკივნეულად განიცადეთ?
– რა თქმა უნდა, განქორწინება ყველასთვის მტკივნეულია და არც მე ვიყავი გამონაკლისი, მაგრამ ძლიერი ქალი ვარ და ადვილად გადავიტანე, თუმცა მინდა აღვნიშნო, რომ ჩემი სამსახიობო კარიერა პირველი ქმრის, მურატ აისანის დამსახურებაა. მან მაზიარა სამსახიობო ხელოვნებას, რაზეც ყოველთვის ვოცნებობდი.
– განქორწინების შემდეგ თქვენი გვარი დაიბრუნეთ, მაყურებელი კი ნურ აისანით გიცნობდათ...
– მე ხალხი მიცნობდა ნურ აისანით და არ მინდოდა გვარის შეცვლა, მაგრამ იძულებული გავხდი, რადგან გავრცელდა ჭორები, რომ ყოფილი ქმრის გვარს კარიერული წინსვლისთვის ვიყენებდი. მინდა, აღვნიშნო, რომ ეს გადაწყვეტილება მურატთან არანაირ კავშირში არ არის.
– გასული წლის ბოლოს ბიზნესმენ ლევენტ ვეზიროღლუზე გათხოვდით, რომელიც თქვენზე 11 წლით უფროსია. ასაკობრივი სხვაობა თქვენს ურთიერთობაზე არ აისახება?
– არანაირად! მე ის უზომოდ მიყვარს და მასაც ვუყვარვარ. ვფიქრობ, ჩვენს სიყვარულზე ვერანაირი ასაკობრივი ბარიერი ვერ იქონიებდა გავლენას.
– თქვენმა ქმარმა განაცხადა, რომ შვილს ელოდებით, ეს მართალია?
– ორივეს ძალიან გვინდა, საერთო შვილი გვყავდეს. ამ ეტაპზე არაფერს დავამატებ, ყველაფერი ღმერთის ნებაა.
– თქვენს გარეგნობაზე განსაკუთრებულად ზრუნავთ?
– არა, თავს განსაკუთრებულად ნამდვილად არ ვუვლი. მინდა, ყოველთვის ბუნებრივად გამოვიყურებოდე, სულიერად და ფიზიკურად ისეთივე სუფთა მოვკვდე, როგორიც დავიბადე.
– წონის შესანარჩუნებლად დიეტის დაცვა გიწევთ?
– შეიძლება არ დამიჯეროთ, მაგრამ დიეტაზე არასოდეს ვყოფილვარ.
მოამზადა თათია ბოჭორიძემ, ჟურნალი სარკე