გიორგი ნაზღაიძე: "ნასტია გლუხოვას გამო რეზო რობაქიძესთან დაპირისპირება მქონდა"

შოუბიზნესის პოპულარულმა სახემ, მოდელმა, რადიო და ტელეწამყვანმა გიორგი ნაზღაიძემ, ნიშნობის ბეჭედი მხოლოდ წელიწადნახევარი იგუა, უფრო სწორად, დღემდე ატარებს, მაგრამ გოგონას, ვისზეც ქორწინდებოდა, ერთი წლის წინ დაშორდა. აღმოაჩინა, რომ ერთმანეთისთვის არ იყვნენ შექმნილი. სასიყვარულო ურთიერთობებში პაუზა აიღო. კარიერაზე ფიქრობს, ოღონდ ჯერ გადაწყვეტილი არ აქვს, რას გააკეთებს. ცალი თვალით პოლიტიკისკენაც იყურება. "სარკესთან" არ დაუმალავს, რომ შეიძლება რომელიმე პარტიის სახეც გახდეს.
29 წლის ფლეიბოი ჩვეულებას არ ღალატობს და დროდადრო საზოგადოებას სკანდალური გამონათქვამებით იწვევს, შესაბამისად, ჭორების ობიექტიც მუდმივად არის. რამდენიმე მათგანზე "სარკემ" კომენტარის გაკეთება შესთავაზა.
– გიორგი, წელიწადზე ცოტა მეტი ხნის წინ "სარკესთან" ამბობდით, რომ თქვენს ცხოვრებაში არსებობდა ქალი, რომელზეც დაქორწინებას აპირებდით. გეგმები შეგეცვალათ?
– ჩემ გარშემო ყველაფერი სასწაულად ხდება ხოლმე. რადგან მარიამ ქინქლაძე დანიშნული მყავდა და ქორწილის დღეც დაგეგმილი გვქონდა, ამის გამო აუცილებლად ცოლად უნდა მომეყვანა?! მე და მარიამმა ჩავთვალეთ, რომ ოჯახის შესაქმნელად მზად არ ვიყავით. ჩვენ წელიწადნახევრიანი ურთიერთობა გვაკავშირებდა და მინდა გითხრათ, რომ თანაცხოვრება მაინც თავისას აკეთებს.
– ამ წელიწადნახევრის განმავლობაში უსიამოვნო სიურპრიზების წინაშე აღმოჩნდით?
– ერთმანეთს შევეჯახეთ ორი რადიკალურად განსხვავებული ძლიერი ადამიანი. ორივეს პირველობის ამბიცია გვქონდა, რაღაც დოზით ვთმობდით, მაგრამ ყოველთვის რთულია დათმობა. ორივეს განსხვავებული მოთხოვნები გვქონდა, ოღონდ იმას არ ვამბობ, რომ პირველობა ვერ დავთმე. ყველაფერი კონფლიქტამდე მიდიოდა, ჩვენს პოზიციებს საუბარშიც ვერ ვთმობით, ნებისმიერ საკითხს ვაქცევდით ხოლმე პრობლემად. მივხვდით, რომ ერთმანეთისთვის გაჩენილი წყვილი არ ვიყავით და კარგი მეგობრობა უფრო გამოგვივიდოდა. ასე თუ ისე, დღეს ერთმანეთის მტრები არ ვართ.
– რთული იყო ამ ურთიერთობის დასრულება?
– არანაირად, ორივემ ძალიან იოლად გადავიტანეთ, რადგან გადაწყვეტილება ჩვენ თვითონ მივიღეთ. 40 წლის ურთიერთობები იმსხვრევა და ქორწილი თუ ჩაიშალა, ამაში რა არის ტრაგედია? ერთმანეთს დავშორდით, მაგრამ ნიშნობის ბეჭდები არც ერთს დაგვიბრუნებია, მე ვატარებ, ჩვევად დამრჩა და მარიამს უკეთია თუ არა, არ ვიცი. ერთი წელია უკვე დაშორებულები ვართ.
– მარიამის შემდეგ სხვა ქალი უკვე გამოჩნდა თქვენს ცხოვრებაში?
– საქართველოში ბევრი ლამაზი ქალი არ არსებობს, რომ ყოველდღიურად ვინმე მომეწონოს. თუ არსებობენ, ან შეყვარებულები არიან, ან გათხოვილები. ერთეულები არიან და იქიდან ერთი გოგონა მომწონდა ფლირტის დონეზე, მაგრამ როცა გამახსენდა, რომ ყველაფერი თავიდან უნდა დამეწყო – აქტიურობა, პატივისცემა, ყურადღება, ფლირტი და ა.შ. დამეზარა. მით უმეტეს, როცა ურთიერთობა ახალი დასრულებული გაქვს... მოკლედ, სასიყვარულო თავგადასავლებისთვის ჯერ არ მცალია.
– რისთვის გცალიათ, რითი ხართ დაკავებული?
– სასიყვარულო ურთიერთობებმა უკან არ დამხია, მაგრამ ერთ ადგილას გავჩერდი. ვერ გეტყვით, რომ წინსვლისთვის ვიბრძვი. უბრალოდ გამუდმებით ვფიქრობ იმაზე, რომ სამსახური და შემოსავალი მქონდეს. კარიერა უნდა დავალაგო და ფეხზე წამოვდგე.
– რა მიმართულებით აპირებთ გააქტიურებას?
– ზაფხულის ცხელ დღეებში მხოლოდ დასვენებაზე ვარ ორიენტირებული, დუბაისა და ბათუმში უკვე დავისვენე და კიდევ ვაპირებ სადმე წასვლას. ამ ეტაპზე ისედაც ყველაფერი გაჩერებულია. ტელეკომპანია "მზე", სადაც გადაცემა "მზესუმზირის" წამყვანი ვიყავი, დაიხურა. ხაზს ვუსვამ, იქიდან არავის გამოვუშვივარ, როგორც ჭორაობენ. რადიოგადაცემებიც მიმყავდა, რომლებიც ფინანსური პრობლემების გამო დაიხურა და ასე დავრჩი სამსახურის გარეშე.
აქტიურობას შემოდგომიდან დავიწყებ, შემოთავაზებები უკვე მაქვს და უნდა დავფიქრდე, რა მიღირს და რა – არა.
– თქვენი ფინანსური მდგომარეობა ბევრს აკვირვებს. არ მუშაობთ, მაგრამ ძვირადღირებულ ავტომობილებს ხშირად იცვლით. ამას როგორ ახერხებთ?
– ახლა "რენჯ როვერ ვოგი" მყავს, რომელიც სპეციალური შეკვეთაა. კი, ჩემზე სულ მესმის, გიორგი ნაზღაიძეს საიდან აქვს ამდენი შემოსავალი, მანქანას მანქანაზე იცვლის და თან სხვადასხვა კურორტებზე ისვენებსო. ამ ეტაპზე არ ვმუშაობ, მაგრამ არსებობენ კარგი მეგობრები და საქმე, საიდანაც შემოსავალი მაქვს. ბიზნესში ჩართული ყოველთვის ვიყავი, რადგან სამსახურის და საქართველოს იმედზე ვერასდროს ვიქნები. არავის საქმე არ არის, საიდან აქვს გიორგი ნაზღაიძეს შემოსავალი!
– ბოლო დროს თქვენგან ხშირად ისმის პოლიტიკური განცხადებები. პოლიტიკაში წასვლას ხომ არ აპირებთ?
– კი, ვაპირებ. ვთვლი, რომ ჩემი აზროვნება შესაძლებელია საქართველოს რაღაც კუთხით გამოადგეს. უამრავი ახალი პარტია ყალიბდება. ძალიან მარტივია, ერთ–ერთის წევრი გახდე და შენი მოსაზრებები ხალხს გაუზიარო. ჩემი მიზნები მომავალი თაობის განვითარება და მათი აზროვნების სწორად წარმართვა იქნება. არ მომწონს, როცა ახალგაზრდა ფინანსურად მშობელზეა დამოკიდებული, ის აუცილებლად უნდა დასაქმდეს. მინდა, ახალგაზრდობას კომპლექსი მოვუხსნა, რომ მიმტანობა, ჭურჭლის რეცხვა და მუშად მუშაობა სირცხვილი არ არის. მილიარდებით ცხოვრება არავის დაუწყია. იყო პერიოდი, როცა მატერიალურად ძალიან მიჭირდა, მაგრამ არაფერი მითაკილია და ამ დროს არც პოპულარული სახეების მიმართ მქონია აგრესია.
– როგორი ადამიანები ტრიალებენ დღეს თქვენ ირგვლივ?
– ათასგვარი. ბევრი – არა, მაგრამ სასწაულად კარგი მეგობრები მყავს. პირდაპირ გეტყვით, რომ ცნობილ სახეებთან დიდად არ ვმეგობრობ, უბრალოდ ყველასთან კარგი დამოკიდებულება მაქვს. ნინო ჩხეიძე და კრისტი ყიფშიძე ის გამონაკლისები არიან, ვისთანაც დიდი მეგობრობა მაკავშირებს. წლების წინ, როცა ჯიხურში ვმუშაობდი, კრისტი ჩემგან სიგარეტს ყიდულობდა. შემდეგ კი, 20 წლის ასაკში, სამოდელო სფეროში მოვხვდი და კრისტისაც იქიდან დავუახლოვდი. სულ არ ახსოვდა, ჩემგან სიგარეტს რომ ყიდულობდა, მე გავახსენე და ბევრი იცინა.
ნინო ჩხეიძეც გადასარევი მეგობარია, რჩევებსაც ვეკითხები, ოღონდ პოლიტიკაზე არასდროს ვსაუბრობთ, სამეგობრო წრეში ეს საკითხი უინტერესოდ მეჩვენება.
– პერიოდულად სკანდალების ცენტრში აღმოჩნდებით ხოლმე, თითქოს საკუთარ თავზე ჭორებს თავად იწვევთ. ყვედაზე ცუდად რომელი ჭორი შემოგიბრუნდათ?
– ერთ–ერთ გადაცემაში ვთქვი, ხალხმა ზოოფილიც კი გამხადა–მეთქი და მივაყოლე, რომ ჩემს ძაღლთან მქონდა სექსი. ეს ხუმრობა კი აიტაცეს და ჭორად აქციეს. ერთ–ერთი ჩემი ხუმრობის გამო პროექტში "ცეკვავენ ვარსკვლავები" ჩემსა და თიკა ჯამბურიას კომენტარებზე ერთი ამბავი ატეხეს. იმ დროს სიტყვა "ნაგავი" იყო აქტუალური ჩემს ლექსიკონში და თიკასაც ამ სიტყვით მივმართე ფეისბუქზე კომენტარში. რატომღაც საზოგადოებამ გადაწყვიტა, რომ მეგობარს შეურაცხყოფა მივაყენე და დაპირისპირებაც მოგვივიდა. სინამდვილეში კი ჩვენ წლების მეგობრობა გვაკავშირებს. სად იყვნენ მაშინ ვარსკვლავები, როცა მე და თიკა ჯამბურია ვგუგუნებდით!
– "ცეკვებსაც" მოჰყვა ჭორები, როცა ფინალის დღეს თქვენს მეწყვილე ანასტასია გლუხოვასთან ერთად არ იცეკვეთ.
– ჩემსა და ნასტიას შორის პატარა გაუგებრობა მოხდა. ის რეზო რობაქიძის (პროფესიონალი მოცეკვავე, პროექტის "ცეკვავენ ვარსკვლავები" მონაწილე. ავტ.) შეყვარებულია. არ უარვყოფ, რომ ჩემსა და რეზოს შორისაც იყო დაპირისპირება იმ ღამეს, როცა პროექტი დავტოვე. ნასტიამ რეზოს არასწორი ინფორმაცია გადასცა, ვითომ ის მე მომწონდა და ამასთანავე შეურაცხყოფაც მივაყენე. ნასტია არ მომწონდა იმიტომ, რომ ვიცოდი, შეყვარებული ჰყავდა და თან არც ჩემს გემოვნებაში ჯდებოდა. ჩემი და რეზოს უთანხმოება დიდ დაპირისპირებაში არ გადაზრდილა, ყველაფერი გასაგებად ავუხსენი და დღეს კარგი მეგობრები ვართ.
სოფიო ბოჭორიძე, ჟურნალი სარკე